YOHANES 1
1
Hengetang měgẹ̌gěllịu pẹ̌bawiahẹ̌
1Su tětạ-tětạ e kal᷊imonan dunia e niriadi, Hengetang e seng ene.
Hengetang e kai ringangu Ruata,
kụ Hengetang e mẹ̌sul᷊ung dingangu Ruata.
2Dokeng su tětạe i Sie ringangu Ruata.
3Kěbị e niriadi wọʼi Sie,
ringangu wọu kěbị apang seng ene,
tawẹu sarang sěmbaụ niriadi tạ i Sie.
4Hengetang e kai simbul᷊u pẹ̌bawiahẹ̌,#1:4: Hengetang e kai simbul᷊u pẹ̌bawiahẹ̌: arau Patikụ apang niriadi, mạnaghuang pẹ̌bawiahẹ̌ su ral᷊ungu masěmbaụ dingangu Hengetang.
dingangu pẹ̌bawiahẹ̌ e měgẹ̌gěllịu tualagẹ̌ su taumata.
5Tualagẹ̌ e sụsarang su kararěndung,
dingangu kararěndung e tawe makawatạ e.
6 #
Mat. 3:1; Mrk. 1:4; Luk. 3:1-2 Narěntạe sěngkatau rarolohangu Ruata,
arenge i Yohanes.
7I sie riměnta měhabarʼu tualagẹ̌ ene,
tadeạu kěbị taumata e mangimang.
8I sie sẹ̌sane wal᷊inewe tualagẹ̌ ene,
kai i sie kětạbeng mělahabare.
9Tualagẹ̌ tutune makạtualagẹ̌ kěbị taumata e,
riměnta su dunia.
10Hengetang ene su dunia,
dunia e niriadi wọʼi Sie,
kaiso dunia e tawe makakiral᷊a.
11I Sie riměnta su soanʼE sẹ̌sane,
kaiso taumatanʼE tawe něnarimạ i Sie.
12Kaiso piạbe lai taumata kụ němpěnarimạ i Sie
ringangu nangimang si Sie;
i sire nionggotangʼE hakẹ̌ makoạ anạ u Ruata,
13kụ niwantelẹ̌ bal᷊inewe wọu taumata,
u pẹ̌bawiahẹ̌ buhu e kai wọu anum Mawu e rarěntane.
14Hengetang e seng nariadi taumata,
kụ nẹ̌tanạ sutal᷊oarang kitẹ,
dingangu i kitẹ seng nakasahidi kawawantugʼE.
Kawawantugẹ̌ ene seng nitarimạʼE tabidạu Ahusʼi Amang mang sěmbaụ.
Wọʼi Sie i kitẹ makasilo Ruata ringangu kakěndagʼE si kitẹ.
15I Yohanes diměnta kere sahidinʼE,
kụ i sie mělẹ̌habaru:
”Seng i Sie ini e nạung takụ ipẹ̌paul᷊ị:
I Sie sarung duměnta samurin iạ e,
kai limembong kasěllahe wọu iạ,
u kal᷊amonan iạ ene, i Sie seng těbe ene.”
16I Sie napenẹu kakěndagẹ̌;
kụ tawẹ ědone,
i Sie měngal᷊amatẹ̌ si kitẹ.
17Toratʼu Mawu e kai nitarimạ i kitẹ bọu i Musa.
Arawe kakěndagẹ̌ dingangu kasasatian Duata e nilahẹ si Yesus Kristus.
18Tawẹu nakasilo Mawu Ruata,
sul᷊iun Ahusẹ̌ mang sěmbaụ,
kụ mẹ̌sul᷊ung i Amang kụ kạsasěmbaụ dingangʼE.
Kai i Sie nělahẹu Ruata i Amang si kitẹ e.
Sasahidin Yohanes
(Mat. 3:1-12; Mrk. 1:1-8; Luk. 3:1-18)
19Mangangawasang Yahudi su Yerusalem něndolohu manga imang dingangu taumatan Lewi apạkakoạ sol᷊ong anung Yohanes kụ iapakịbal᷊o si sie, ”Kai i sai i kau?”
20I Yohanes něngaku mal᷊ahẹ, ”U iạ e wal᷊inewe Ratu Měnanal᷊amatẹ̌.”
21 #
Pang. 18:15, 18; Mal. 4:5 ”Mạeng kerene, i kau kai i sai?” angkuěng i sire, ”I Elia ngae?”
”Bal᷊ine,” angkuěng i Yohanes.
”Nabi i kau e?”#1:21: Nabi: I sie kụ lẹ̌harapeng suměpụ dingangu měhabaru rarentan Datu Měnanal᷊amatẹ̌. kakiwal᷊on sire kapia.
”Bal᷊ine,” angkuěnge.
22”Mạeng kerene, pẹ̌berạe si kami měnsang i sai i kau, tadeạu i kami makawawawe sasimbange baugʼi sire kụ dimolohʼi kami. Apạ e ipaul᷊ị u mạanun batangengu e?”
23 #
Yes. 40:3
I Yohanes nẹ̌berạe u, ”Seng iạ e ipẹ̌paul᷊ị u Nabi i Yesaya:
’Tau mạmohang su wanua l᷊inggi:
Teneko daral᷊engangu Mawu.’ ”
24Kal᷊awọu taumata apan nirolohʼu tau Farisi e#1:24: Taumata apan nirolohʼu tau Farisi e: arau ”I sire apan nirolohẹ e kai tau Farisi” arau ”i sire”. 25nakiwal᷊o, ”Kereu i kau wal᷊inewe Ratu Mananal᷊amatẹ̌, arau wal᷊inewe i Elia, arau wal᷊inewe lai nabi, kawe unụe i kau měnahani?”
26I Yohanes simimbang, ”Iạ e měnahani ringangu akẹ. Arawe su tal᷊oarang kamene ute kai piạ tau ta nikahěnganeng i kamene. 27I Sie ruměnta samurin iạ e, kal᷊ingung měluka tal᷊ing sapatunʼE e, iạ e tawe wotonge.”
28Kěbị ini e nariadi su Betania, su sěmbẹ̌kan daki wọu Sal᷊ụ u Yordan tampạ pěnẹ̌nahaniang i Yohanes.
Ahusʼu Domban Duata
29Su sěngkariọěllone, i Yohanes nakasilọe Mawu Yesus dụděnta su anune. Tangu i Yohanes nẹ̌bera, ”Kakělla ěndaị, Ahusʼu Domban Duata nangěmmụ dosan dunia e. 30Kai i Sie nạung takụ ipẹ̌paul᷊ịu sarung duměnta samurin iạ, kaiso kawe limembong kasěllahe wọu iạ, batụu těntal᷊ang iạ deng tawe nipěhanạe, i Sie seng těbe ene. 31Kal᷊imonan ene, iạ e wẹ̌gan Sie e. Sěmbal᷊iau iạ diměnta měnahani ringangu akẹ tadeạu tau Israel e masingkạben Sie.”
32I Yohanes mal᷊aing nẹ̌sahidi u, ”Iạ nakasilo Rohkẹ̌ u Ruata natěntung kere manụ paluma ěnaẹ bọu l᷊angị kụ dimorọ su pusigʼE. 33Tempo ene iạ bědawen bẹ̌ga i sai i Sie. Kaiso Ruata něndolohʼu iạ e apěnẹ̌nahaning akẹ e, kai seng nẹ̌bera si siạ, ’Mạeng i kau makasilo Rohkẹ̌ u Ruata e rumorọ, kụ mẹ̌tumanạ su sěngkatau, ute kai i Sie sarung měnahani ringangu Rohkẹ̌ u Ruata.’ 34Iạ e seng nakasilọʼE sẹ̌saku,” angkuěng i Yohanes, ”kụ iạ e nẹ̌sahidi u seng i Sie e Ahusʼu Ruata e.”
Manga muritʼu Mawu Yesus kal᷊ahumotongang e
35Sěngkariọěllone i Yohanes ene kạpia su tampạ ene e ringangu murite ruang katau. 36Piạ e i sie nakasilo Mawu Yesus simahe, i sie nẹ̌bera, ”Kakěllạ e! Pai Ahusʼu Domban Duata.”
37I rẹ̌dua nạung muritʼi Yohanes e nakaringihe manga wawera ene, tamai timol᷊ẹ e Mawu Yesus. 38Mawu Yesus nẹ̌bihu sarang l᷊ikude kụ nakasilo si sire kạpahuntol᷊ene si Sie. I Sie nakiwal᷊o, ”I kamene kai mědẹ̌deạ apa?”
Angkuěng i sire, ”Guru, i Tuang kai mạtanạ suapa?” (Guru arau ’Rabi’ mangal᷊ene mananěntiro.)
39”Mahịe pěmandạe hala,” angkuěngu Mawu Yesus. I rẹ̌dua nahuntol᷊e si Sie, kụ nakasilọe katatanakengʼE. Orasẹ̌ ene seng pukulẹ̌ ěpạ bawěllo. Ěllo ene i rẹ̌dua e něngkatanạ dingangʼE.
40Sěngkatau wọʼi rẹ̌dua kụ seng nakaringihẹ̌ bawerang Yohanes kụ mase timol᷊e Mawu Yesus, ute kai i Andreas, anạ u sěmbaụ i Simon Petrus. 41I Andreas e měngkatewe lighạ nẹ̌deạ si Simon, anạ u sěmbaụ e, mase nẹ̌bera si sie, ”I kami e seng bọu nẹ̌sombangu Mesias!” (Mesias ute mẹ̌sul᷊ungu i Kristus kụ kai: Ratu Mananal᷊amatẹ̌.)#1:41: (Mesias ... Mananal᷊amatẹ̌.): Pěmanda kamusẹ̌ su al᷊ungu wawera Kristus. 42I Andreas e nangěntudʼi Simon sol᷊ong anun Mawu Yesus.
Mawu Yesus e timaedẹ̌ si Simon, mase něhengetang, ”I kau e i Simon anạ i Yona. I kau sarungbe isěbạ si Kefas.” (Kefas mẹ̌sul᷊ung dingangu Petrus, mangal᷊ene: i wukidẹ̌ batu.)
Mawu Yesus nẹ̌kui si Filipus dẹ̌duan Natanael
43Sẹ̌ngkariọěllone Mawu Yesus kai napulu makoạ sol᷊ong Galilea. I Sie kai nẹ̌sombang i Filipus kụ něhengetang si sie, ”Mahịe tol᷊e Siạ!” 44I Filipusẹ̌ e kai tau Betsaida, pẹ̌tatanakeng i Andreas dẹ̌duang Petrus. 45Filipusẹ̌ e nẹ̌sombang i Natanael kụ nẹ̌bera si sie, ”I kami e seng bọu nẹ̌sombangu tau ipẹ̌paul᷊ị i Musa su ral᷊ungu bukẹ̌ u Toratʼu Mawu, dingangu lai seng nihabaru manga nabi. I Sie kai i Yesus tau Nazaret, anạ i Yusup.”
46Arawe i Natanael simimbang, ”Mariadi wue ngae hal᷊ẹ̌ mapapia suměpụ bọu Nazaret?”
”Pěmandạe sẹ̌sanu,” nisimbang i Filipus.
47Mawu Yesus mạmanda si Natanael kạděntane, kụ měbẹ̌bisaran kakakoạ i sie, ”Tingangke, ene sěbạ e tau Israel patutune. Tawẹ apa hal᷊ẹ̌ mělle si sie.”
48”Kereapa wue i Tuang nakakiral᷊a si siạ?” kerene kakiwal᷊on Natanael su Mawu Yesus.
Mawu Yesus simimbang, ”I Filipus deng ta někẹ̌kui si kau e, Iạ seng těbe mạmanda si kau su al᷊ungu kalun ara e.”
49”Tuang Guru,” angkuěng i Natanael, ”I Tuang e kai Ahusʼu Ruata! I Tuang e kai Ratun tau Israel!”
50Mawu Yesus něhengetang, ”I kau mangimangu kětaben ual᷊ingu Iạ nẹ̌bera u Iạ seng nakasilo si kau su al᷊ungu kalun ara e? Patikụ hal᷊ẹ̌ kụ nangělembong kasěllahe wọu ene e sarungbe ikasilonu!” 51#Pěnd. 28:12 Mawu Yesus něhengetang kapia, ”Mambeng kahěngang, pangimangke, i kau sarung makasilo l᷊angị e matope, ringangu manga malaekatʼu Mawu mal᷊intụ marangeng su l᷊antehu Ahusʼu Taumata e.”
Currently Selected:
YOHANES 1: SXN
Highlight
Share
Copy
Want to have your highlights saved across all your devices? Sign up or sign in
