HOSEA 11

Mawu e kụkěndagu umatʼE kụ duruhaka

1 # Sas. 4:22; Mat. 2:15 Mawu e něhengetang,

”Iạ e kụkěndagu Israel den dokeng i sie wědang kạdodọ,

Takụ nikuiang anạ-Ku ene, apasěbang bọu Misirẹ̌.

2Kaiso mangkeng Takụ kuiang anạ-Ku ene

kai mangkeng i sie mẹ̌tẹ̌těngkarau wọu Iạ.

I sie nẹ̌bawa sasěmba ringangu nẹ̌nutung buwụ

baugu Baal dingangu manga mahang duata wal᷊ine.

3Sumbal᷊iau seng Iạ e mạněntiro Israel rumal᷊eng

dingangu měnanarul᷊une ringangu napenẹu kakěndagẹ̌.

Seng Iạ e mẹ̌tẹ̌tangkiang si sie

kaiso i sie tawe mapulu mangaku.

4Dingangu kal᷊awọu kakěndagẹ̌-Ku,

Takụ ipakarani i sie si Siạ e.

Kal᷊awọu sigěsạ e Takụ pakahaěng,

mase ringangu karal᷊ondon naung Takụ apakaěng i sie!#11:4: Kal᷊awọu ... apa kaěng i sie arau: Kere rariọ bědang kadodọ, i sie Takụ hengketang dingangu Takụ děnguang; Iạ e mẹ̌tumpěkuhẹ̌ su těngone waugu meněnggung kaěng si sie.

5Taumatang Israelẹ̌ e madiri pẹ̌sul᷊e su anu-Ku, ual᷊ingu ene i sire harusẹ̌ apẹ̌sul᷊e kapia sol᷊ong Misirẹ̌, dingangu tau Asyur sarung mẹ̌parenta si sire. 6Pẹ̌sasekẹ e sarung mạběse sarang dal᷊ungu manga soan sire, kal᷊awọu tukadu pasěllangeng sarung gagholangeng, dingangu umatẹ̌-Ku e ipakawinasa. Ene nariadi e ual᷊ingu i sire kawe tụtol᷊e kapulun sire hala, 7ringangu mẹ̌tẹ̌tungkětị u maněntang u Iạ. Tangu i sire sarung sědakeng, kụ mamben tawẹ u měliwirʼi sire manilaing i sire mẹ̌kẹ̌kiạ u makịtul᷊ung.”

8 # Pang. 29:23 Mawu e něhengetang, ”Ei Israel, tawe mariadi i kau Takụ iwala arau Takụ itěntang. Mariadi ngae i kau Takụ ipakaupu kere Adma? Arau Takụ koateng kere Zeboim?#11:8: Adma ringangu Zeboim: Manga soa ini i hakị dingangu Sodom dingangu Gomora. Kakělla Pěnd. 14:2 ringangu 14:8. Tawe waharia naung-Ku e měngkai mẹ̌koạ hal᷊ẹ̌ ene watụ u enẹ e kasariane kakěndagẹ̌-Ku e si kau! 9I kau e tawe Takụ ihukung su ral᷊ungu ral᷊angehẹ̌-Ku; i kau e tawe lai Takụ ipakawinasa. U kawe Iạ e Ruata, wal᷊inewe taumata. Iạ e i Masusi, mạněntanudẹ̌ si kau, ringangu semben tawe lai mapulu mẹ̌pědu si kau.”

10 Mawu e něhengetang, ”Umatẹ̌-Ku e sarung tumol᷊e si Siạ kereu Iạ e lụhuang kere singa ringangu makaghanuẹ̌ sědụ i sire. Umatẹ̌-Ku e sarung tạ karěngụ e su mongo wọu sěmběkaʼm bahẹ mědeạu měněmba si Siạ. 11Bọu Misirẹ̌ i sire sarung duměnta kere kasahawụ u manụ u winalangeng, dingangu wọu Asyur kere ghapaěngu paluma. Wọu e i sire sarung Takụ isul᷊e kapia sol᷊ong bal᷊en sire. Iạ e, Mawu kụ kapělẹ̌hengetange.”

Currently Selected:

HOSEA 11: SXN

Highlight

Copy