HAGAI 2

Kawawantugʼu Wal᷊em Mawu e wuhu

1Su tanggalẹ̌ duam pul᷊o ěsa, wul᷊ang kapitune su ral᷊ungu taung ene lai, Mawu e něhengetangko l᷊ai limiun Nabi Hagai. 2Mawu e něngoro si Hagai pinẹ̌bisara su Guběrnurẹ̌ u Zerubabel, Imang Mawantugẹ̌ i Yosua, ore lai kawanua waugu měněpasu habarẹ̌ ini, 3#Esr. 3:12 ”Piạ ngae wọu i kamene wědang nakatahěndung u apạ e kawantuge Wal᷊e-Ku ini e nạung kal᷊imona? Kụ orasẹ̌ ini kereapa kakakoạ e tumuhụ ěbạ u? Kai wal᷊inewe mambeng tawe nakal᷊uasẹ̌ naung? 4Kaiso kumbahangbe měmpẹ̌kěndungu ene i kamene kěbị e! Těpasẹ̌ko hal᷊ẹ̌ ene, u Iạ e sarung tatapẹ̌be montol᷊ẹ̌ si kamene. 5#Sas. 29:45-46 Piạ i kamene nahunsěbang bọu Misirẹ̌ e, Iạ e sen nẹ̌kědo sarung sěntiniạ měnirung si kamene. Dingangu orasẹ̌ ini e Iạ bědang měněntanudẹ̌ si kamene. Kụ tawahal᷊uasu i kamene ghuměnggang.

6 # Ibr. 12:26 Su ral᷊ungu tempo tawẹ kararěngụe Iạ e sarung mapakakiọ u langị dingangu dunia, rul᷊unge ringangu l᷊audẹ̌. 7Patikụ bansa e sarung Takụ ipẹ̌gẹ̌gahẹ̌ dingangu kal᷊awọu arětạ tataghuaneng i sire e sarung bawaěng damahi, hakịeweng Bal᷊e-Ku e sarung masěgadu kakakalạ i sire e. 8Kal᷊awọu wul᷊aeng dingangu sal᷊aka su runia ini e kai tataghuaneng-Ku. 9Bal᷊e-Ku wuhu e sarung něngalembong kawantuge wọu nạung kal᷊imona, dingangu sini e Iạ sarung měngonggọu pẹ̌darame ringangu kasasukụ u pẹ̌bawiahẹ̌ su wansa-Ku.” Mawu Kụ Limembong Kawasa e seng nẹ̌bisara.

Nabi Hagai nẹ̌dal᷊ahintau ringangu manga imang

10Su tanggalẹ̌ duam pul᷊o ěpạ bul᷊ang kasione su ral᷊ungu taung karuane su parentan Datu i Darius, Mawu Kụ Limembong Kawasa e nẹ̌bisara lai su Nabi Hagai. 11AngkuěngʼE, ”Pẹ̌dorongko putusangu manga imang mạanung tal᷊imbukune ini: 12Andene piạ taumata měngal᷊ạ gẹ̌sing binatang sěmpotọ bọu sasěmba isěmba su Mawu, wọu ene niwawane napul᷊ẹ su ral᷊ungu lẹ̌kung kakingkaenge, kụ bọu ene dingangu kakingkaenge ene i sie měnenggehẹ̌ borotẹ̌ arau manga kaěng arau anggorẹ̌, arau lanang zaitun, arau walạewe měnsang kaěng apa, kụ apa měnsang kěbị ene e sarung mariadiwe lai susi arau?”

Piạ e i Hagai něngukahu kakiwal᷊o ene, manga imange simimbang u, ”Tala.”

13 # Pẹ̌t. 19:11-22 Bọu ene i Hagai mal᷊aing nakiwal᷊o, ”Andene piạu sěngkatau nal᷊amuhụ ual᷊ingu i sie nakasenggehẹ̌ maietẹ̌, mase wọu ene i sie nanenggehẹ̌ sěmbaụ bọu manga kaěng tamai ene, měnsang ute kaěng ene mal᷊aing makoạ mal᷊amuhụ ngae.”

Manga imang němpẹ̌simbang, ”Ore, mambeng těngadẹ̌!”

14Bọu ene i Hagai nẹ̌bera lai, ”Mawu e nẹ̌bera u tiahane ene e irẹ̌dal᷊eng lai waugu umatu Israel su wanua ini ringangu waugu kal᷊awọu sạbarang kụ kẹ̌koateng i sire piạ lětạ e. Kụ apan seng isẹ̌sěmban sire su pananěmbaěng ini e ute kai mal᷊amuhụ.”

Mawu e nẹ̌kědong al᷊amatʼE

15 Mawu e něhengetang, ”Kěnang, tatingane apang kụ nariadi kal᷊amona wọu ěllo ini, kụ kal᷊imonang Bal᷊e-Ku ini e lẹ̌ul᷊ikang! Kereapa kakakoạ u e su tempo ene? 16I kamene sen dimal᷊eng němanda niěndukang u gandung dingangu mạngiral᷊ing u sarung makahombang gandung 200 su kilone kutẹu nạung tumbạeng 100 su kilone. I kamene tamai měnaku 100 su litere wọu doroěngu anggorẹ̌, kutẹu nạung kate 40 su litere. 17Iạ e seng naparěllusʼu anging matětị dingangu tahiti watu waugu ipěnggolọ kal᷊awọu ghẹ̌sim baelu, kaiso i kamene tawe lai mẹ̌sul᷊e su anu-Ku. 18Su ěllo ini, tanggalẹ̌ duam pul᷊o ěpa bul᷊ang kasione, pondasim Bal᷊e-Ku nasueng pěllọ e! Tatinganeko apa sarung mariadi manětạ orasẹ̌ ini e. 19Manịeng sen tawẹ apa lai gandung mal᷊ěmbe ringangu kalung anggorẹ̌, kalung ara, kalun dělima ringangu kalung zaitun den tawe nẹ̌bẹ̌bua, kaiso manětạ bọu orasẹ̌ ini Iạ sarung měngal᷊amatẹ̌ si kamene.”

Dianding Mawu e su Zerubabel

20Su ěllo ene lai, su tanggalẹ̌ duam pul᷊o ěpạ bul᷊ang kasione, Mawu e timanata karua sul᷊ene si Hagai, 21mědeạu pakihabarẹ̌ su Guběrnurẹ̌ u Zerubabel. Angkuěngu Mawu, ”Sen tạ kararěnnane lai langị dingangu dunia e sarung Takụ kakiokang, 22kal᷊awọu kararatuange Takụ hakaěng dingangu kawasan sire e Takụ golokang. Manga karetan sekẹ e ringangu měngangul᷊inge sarung Takụ kal᷊intuingang; kal᷊awọu kawal᷊o e sarung mate ringangu kal᷊awọu sumasakene sarung lawọ mẹ̌papapate. 23Su ěllo ene i kau e Zerubabel, ěllang-Ku sarung Takụ iruị baugu mẹ̌parenta su ral᷊ungu areng-Ku. U kai ual᷊ingu i kau e sen Takụ nipile.” Mawu Kụ Limembong Kawasa e seng nẹ̌bisara.

Currently Selected:

HAGAI 2: SXN

Highlight

Copy