PĚNDARIADI 43
43
Manga tuhang i Yusup nakoạ sol᷊ong Misirẹ̌ dingangʼi Benyamin
1-2Karal᷊unusẹ̌ su Kanaan mangken nanědụ, kụ sarạeng gandung nial᷊ạ i sire wọu Misirẹ̌ e sen nasuẹ e, tangu i Yakub nẹ̌berạe su manga anạ u, ”Dakọko saụ tamai sol᷊ong pai ene kụ pamělliko gandung baugʼi kitẹ.”
3Mase i Yehuda e nẹ̌bera si sie, ”Guběrnurẹ̌ u Misirẹ̌ seng něngonggọu tatal᷊umbaghẹ masěgadẹ̌ u i kami e tawe wotonge mẹ̌těngon sie, kereu i kami e tawe mẹ̌bawa tuaring kami ene. 4Kereu i Amang i kami e mapakawalan tuaring kami ene apatol᷊e, u i kami e kai mapulu tamai mamělli kaěng. 5Kai kereu tawe mapakawalan Benyamin tumol᷊e, tangu i kami e tawe tamai, batụu guběrnurẹ̌ e kai seng nẹ̌bera u i kami e tawe wotonge mẹ̌těngo kereu tuaring kami e tawe tumol᷊e.”
6Angkuěng i Yakub, ”Kawe unụe i kamene napakasusang iạ e kụ měhabarẹ̌ su tau ene u i kamene kai wědang piạ tuaring kamene?”
7Angkuěng i sire, ”Tau ene měngkate hanesẹ̌ makịbal᷊ong kami ringangu mạanụeweng anạ u sěmbaụ i kami e, angkuěng e, ’Bědang biahẹ̌ tangu i amang i kamene? Delaim piạ tuaring kamene esẹ bal᷊ine?’ I kami e katewe nasihasa simimbahẹ̌ kal᷊awọu apạeweng kakiwal᷊one. Kụ kereapa wue i kami e makatikạ u i sie sarung dumolohʼi kami e apẹ̌bawa tuaring kami ene?”
8Bọu e angkuěng i Yehuda si amange, ”Dariọ e walạ e apatanaẹ dingangku, hědọeng iạ mangaku makoạ papal᷊ese waugʼi sie. I kami e hědọ e lighạ mẹ̌bawal᷊ikěkasẹ̌ mẹ̌buạ, tadeạu kumbahangbe piạ u sarang sěngkatau wọu i kami e mateng karal᷊unusẹ̌. 9Seng iạ e makoạ papal᷊ese, ringangu i Amangku e hědọe pẹ̌deạ si siạ. Kereu i sie tawe takụ ipakisul᷊e ringangu maambang, ute hědọeng iạ měnal᷊udẹ̌ hukumange kanandụewen biahẹ̌ku e. 10Kai manga i kitẹ tawe měngampal᷊ẹ̌ kerene karěngụ e, nal᷊ahẹu kere ini i kami e sen duan sul᷊e nẹ̌kakuwal᷊ị.”
11Bọu e i amang i sire nẹ̌bera, ”Kereu mambeng hinong kerene, ute wawako kapapiaěngu ghěsim banua ini e su ral᷊ungu karong i kamene kere gaghěllị baugu guběrnurẹ̌ ene: Kere manga kismisẹ̌, gul᷊a madu, dampa, buang kamiri, buang lěhi. 12Pẹ̌bawako lai roitẹ̌ manga ruan sul᷊e kakěpal᷊e, batụu roitẹ̌ kụ kaěbakeng i kamene su ral᷊ungu karong i kamene e harusẹ̌be sul᷊eng kamene. U aramanung kai nẹ̌sal᷊a taho. 13Kụ bawạ e tuarinu ene, kụ lighạbe ěndaị pẹ̌sul᷊e. 14Mal᷊owọko Mawu Kasěllaheng e mẹ̌karadiahang su naung u guběrnurẹ̌ ene kụ kumoho u tatal᷊ěntụ e si kamene, sarang i sie mapulu manul᷊em Benyamin dẹ̌duang Simeon si kamene. Arawe mạanung iạ ini ute, kereu iạ mambeng hinong ikatạdiseng manga anạku e, ute koatengbe kereapa.”
15Bọu ene manga anạ u sěmbaụ i Yusup němpẹ̌bawạ e manga ghagěllị ene, dingangu roitẹ̌ duan sul᷊e kal᷊awọe, mase wọu ene nakoạ sol᷊ong Misirẹ̌ dingangu tuarin sire i Benyamin. Nahumpạ e paị sene, i sire nẹ̌těngọen Yusup. 16Ene i Yusup nakasilọ e si Benyamin dingangu manga tuhange, nẹ̌berạe i sie su mẹ̌tatangkiange kụ masasingkạ u ral᷊ohon bal᷊ene, ”Paringangko i sire ini sol᷊om bal᷊eku. I sire kai kumaěng sěngkakaěng dingangku ěllo rangẹ, kụ pěmotọko sěmbaụ bọu binatang ene kụ sadiako ene.” 17Ěllang ene e timuhụ e parenta ene kụ němaringangke manga tuhang i Yusup sol᷊ong dal᷊ungu wal᷊eng guběrnurẹ̌.
18Ene piạ e i sire niwawa sol᷊ong dal᷊ungu wal᷊eng Yusup, i sire něngkatakụ e kụ mẹ̌tẹ̌tiněnna, ”I kitẹ e niwawa sol᷊ong ini, ual᷊ingu roitẹ̌ kụ seng nikaẹ̌bakeng i kitẹ e su ral᷊ungu karong i kitẹ su raramahing kitẹ e. I sire sarung sěngkianu měnamẹ si kitẹ mase měngaho kalideng kitẹ e kai i kitẹ e koateng ěllang i sire.” 19Ual᷊ingu ene, su rěduhu tukadu wal᷊eng Yusup, i sire němpẹ̌bera su sadaham bal᷊en Yusup, 20”Ampunge wue Tuang, i kami e kai sem bọu naramahi sol᷊ong ini e namělli laidopẹ̌. 21-22Piạ i kami e kạdal᷊enge mapul᷊ẹ, kụ měnaungke kahěbiang, ute i kami e namukạ e karong i kami e. Kutẹu sěngkakakěllane kal᷊awọewen doitʼi kami wawělli gandung e ene su wowone. I kami e wěga wue měnsang i sai nẹ̌tahon doitẹ̌ ene. Kụ ini e sen niwawang kami e kapia su anun Tuang sul᷊iung ene tangu, i kami e wědang lai nẹ̌bawa roitẹ̌ kụ mal᷊aing ipẹ̌mělli laidopẹ̌.”
23Ěllang ene e nẹ̌bera, ”Abe katakụ. Duatanu, kụ Duata e sẹ̌subaěng i amangu e, kụ seng i Sie e nẹ̌tahon doitẹ̌ ene e su ral᷊ungu karong i kamene. Iạ e sen dimaẹ bawaehẹ̌ gandung i kamene ene.”
Bọu ene i Simon niparingange sol᷊ong anun sire. 24Mase niahạ e i sire sol᷊ong dal᷊ungu wal᷊e. I sie něngonggọeng akẹ baugu ipěnguhasẹ̌ laedẹ̌, dingangu kaěng u kaliden sire. 25Bọu ene i sire něndiahiko l᷊ai ghaghěllị baugʼi Yusup kereu i sie marěnta ěllo rangẹ, batụu i sire kai sen nihabareng u i sire lai sarung kumaěng sěngkakaěng dingange. 26Piạ i Yusup nidatingkem bal᷊e, i sire němpẹ̌gěllịeng manga laonggọ ene si Yusup apidu nẹ̌suba si sie. 27I Yusup nakiwal᷊ong kakakoạ i sire, kụ nẹ̌bera, ”I kamene sem bọu nẹ̌běkeng amang i kamene si siạ, u i amang i kamene kai sem maghurang. Kụ kereapạ e? Mapia wue ngae?”
28Kụ angkuěng i sire, ”Ěllang i Tuang, kụ i amang i kami e, mapia wue.” Bọu ene i sire tangu nẹ̌suba si sie.
29Ene i Yusup nakasilọ e si Benyamin tuarine, nẹ̌berạ e i sie, ”Kụ seng ini e katuariang i kamene e, nạung měngkate ipẹ̌paul᷊ị i kamene e si siạ e? Mal᷊umbạko Mawu Ruata e měngal᷊amatẹ̌ si kau anạku.” 30Naung i Yusup měngkate nẹ̌papinunụ u kakěndagẹ̌ su tuarine. I sie sem maranin tawe makakědang u watangenge, kụ ual᷊ingu ene e i sie měngkatewe sěngkianu nangensọ bọu ěndaị ene kụ simuẹ̌ su ral᷊ungu kamarẹ̌ kụ bọu ene simangị. 31Masene wuhụewe něnděmusẹ̌ gatine, bọu ene saụ siměbang, kụ měngkatewe mětẹ̌tingkědang sěngapam botonge, kụ bọu ene něngorong paměllọ u kaěng. 32I Yusup tangu kimaěng su medane sẹ̌sane, arawe manga tuhange ute su medawe wal᷊ine. Tau Misirẹ̌ apang ěndaị sene tangu nahungkaěng su meda lai wal᷊ine, watụ u i sire kai nakapěndang u tawe sěmbewe kereu kumaěng sěngkakaěng dingangu taumatang Ibrani e. 33Manga tuhang i Yusup nipakaiang su meda mẹ̌tẹ̌těngon Yusup, tuhụewe umburʼu sěngkatau-sěngkatau e wọu kaiakanenge sarang katuariange. Ene i sire nakasilọ e kakakoạ u pal᷊ahungkaiang ene tangu, i sire mangkewen naral᷊ingu, kụ němpẹ̌papanda sěmbaụ dingangu wal᷊ine e. 34I sire tangu makạẹ̌bạ kaěng kai wọu medang i Yusup, dẹ̌duam Benyamin kụ sẹ̌siliwirẹ̌kang liman sul᷊e limembong kal᷊awọe wọu kaẹngu manga tuhange. Tangú němpẹ̌kaěngke ringangu němpanginungke i sire ringangʼi Yusup sarangkewe něngkasahe.
Currently Selected:
PĚNDARIADI 43: SXN
Highlight
Share
Copy
Want to have your highlights saved across all your devices? Sign up or sign in
