PĚNDARIADI 42
42
Manga tuhang i Yusup nakoạ sol᷊ong Misirẹ̌ mědeạu měmpamělli gandung
1Piạ i Yakub nakaringihẹ̌ u kai piạ gandung su Misirẹ̌ e, tangu nẹ̌berạ e i sie su manga anạ e, ”Kawe unụe i kamene měngkate tawẹ konsange apa? 2#MMR. 7:12 Sen takụ kinaringihẹ̌ u piạ gandung su Misirẹ̌ e, kụ dakọko sasaẹ pěmpěmělli gandung mědeạu i kitẹ e tawe mateng lunusẹ̌.” 3Tangu němpẹ̌sasaẹ e manga tuhang i Yusup, i sire mapul᷊ong katau ene němpamělli gandung su Misirẹ̌ e. 4Kutẹu i Yakub kai tawe namalan Benyamin tuaring Yusup sěmpụ tinai e niapasasaẹ dingangi sire, batụu i sie kai ghụgěnggang u piạ u kereapa anạ e ene kụ masilakạ.
5Ual᷊ingu karal᷊unusẹ̌ su soang Kanaan, tangu manga anạ i Yakub dingangkewen sire lai wal᷊ine e wal᷊inewe mahal᷊i němpẹ̌sasaẹ němelli gandung su Misirẹ̌ e. 6Mẹ̌bawal᷊ụ u gandung su kal᷊awọu taumata wọu kasěllahu dunia e ute kai i Yusup, sěngkatau nahengkẹ nakoạ guběrnurẹ̌ su Misirẹ̌ e. Ual᷊ingu ene hakịu manga tuhang i Yusup němpẹ̌děnta kụ němpẹ̌suba su těngone. 7Ene i Yusup nakasilọ e manga tuhange, i sie nakakiral᷊a si sire, kai i sie měngkate měmělle tawe nakakiral᷊a. Kụ měngkate mahasa i sie nakiwal᷊o si sire u, ”I kamene kai taua?”
”I kami e tau Kanaan. I kami riměnta mamělli kaěng,” angkuěng i sire.
8Maningbe i Yusup sen nakakiral᷊a manga tuhange, kai i sire e wěgangben sie. 9#Pěnd. 37:5-10 Tangú i sie nakatahěndungke ipine kụ nipịen sire. Kụ nẹ̌berạ e i sie, ”I kamene ini e kai mẹ̌papahimang; kụ i kamene e kai němpẹ̌děnta waugu ipẹ̌kẹ̌koto měnsang suapa karal᷊omen banuang kami e.”
10”Tala wue Tuang,” angkuěng i sire. ”I kami e kai manga ěllang i Tuang kụ diměnta kětạ em baugu měmělli kaěng. 11I kami ini e tamahuari, Tuang. I kami taumatawe mapapia, bal᷊inewe mẹ̌papahimang.” 12I Yusup nẹ̌bera si sire, ”Konting kamene! I kamene riměnta ramahi e waugu měnananěsui měnsang suapa karal᷊omen banuang kami ini e.”
13Angkuěng i sire, ”I kami tamahuari ini e kai mapul᷊o dua su kataune Tuang! I kami e kai i amang sěmbaụ su wanuang Kanaan. Sěngkatau wọʼi kami e kai sen nate, arawe katuaring i kami e orasẹ̌ ini dala ringang i amang i kami.”
14”Mamben těngadẹ̌ kere takụ nipẹ̌bera,” angkuěng i Yusup, ”u i kamene ini e mẹ̌papahimang. 15Iạ e kai měmẹ̌manikạ si kamene: Iạ e mẹ̌salu ringangu arengu ratu u i kamene tawe takụ ipěněntangu wanua ini e kereu tuaring kamene kahembokange tawe apansaẹ. 16Sěngkatau wọu tal᷊oarang kamene e harusẹ̌ kapul᷊ẹ apěngal᷊ạ. Kụ bal᷊inẹewe lai tangu takụ paedang sarang bawerang kamene e mal᷊ahẹ. Kereu wal᷊ine kerene ute dingangu arengʼu ratu e, i kamene ini mamben těngadẹ̌ mẹ̌papahimang dokạ ipẹ̌sekẹ!” 17Bọu e i sire nisuẹ̌ su ral᷊ungu tahungkụ karěngụ e těllu ěllo.
18Su ěllo katěllune tangu i Yusup nẹ̌berạe si sire, ”Iạ e kai taumata mạtakụ dingangu mararingihẹ̌ su Mawu Ruata. I kamene takụbe ipakasal᷊amatẹ̌ kẹ̌tạeng piạ tiahane sěmbaụ. 19Baugu ipěnahutěngadẹ̌ u i kamene ini e taumatawe matul᷊idẹ̌, ute sěngkatau wọu i kamene tangu takụ iaresẹ̌ su ral᷊ungu tahungkụ, arawe i kamene wal᷊ine e wotonge měngkapul᷊e kụ pěmpẹ̌bawạewe gandung nạung seng niwělliang i kamene e baugu walagu anạ u sěmbaụ i kamene kụ seng něngkal᷊unusẹ̌ e. 20Bọu ene tangu i kamene harusẹ̌ pěmaringangu tuari kahembokange sol᷊ong anuku. Kai ene tialane sarung makal᷊ahẹ u wawerang kamene e kahěngang bue. Kụ i kamene tawe takụ i hukumangu papate.”
I sire tangu němpẹ̌kirẹ e su putusangu guběrnurẹ̌ ene. 21Tangú nẹ̌berạ e i sire sěngkatau su wal᷊ine, ”Ené, i kitẹ ini e seng nipahangeng ual᷊ingu pẹ̌sasal᷊ang kitẹ su tuaring kitẹ kal᷊imona e; i sie kai mědẹ̌dorong tul᷊ung kai i kitẹ e tawe nẹ̌pandung, manilaing i kitẹ e sen nakasilo u i sie kai enẹ ewe masigěsạ. Kai ual᷊ingu ene hakịu i kitẹ nakahombang sigěsạ ini e.”
22 #
Pěnd. 37:21-22
Angkuěng i Ruben, ”Bal᷊inewe nạung kal᷊imona sen takụ pinẹ̌bera si kamene tadeạu rariọ ini e abe kapurai. Kai i kamene tawe mapulu rumaringihẹ̌. Kụ orasẹ̌ ini e papatene ipamal᷊isẹ̌ si kitẹ e.” 23I Yusup e tangu nakaěnna wue pẹ̌bawisaran sire, kaiso i sire e wěgaweng hal᷊ẹ̌ ene, batụu i sire e mạhumbisarang Yusup e kai piạ sěngkatau nakoạ měnanungkang bisara. 24I Yusup naněntang i sire, kụ bọu ene simangị. Kụ sarangke sen saụ e nakawera, i sie nẹ̌sul᷊e su anun sire, kụ něngal᷊a si Simeon, kụ bọu ene nipakihapusẹ̌ i sie su těngong kal᷊awọu anạ u sěmbaụ e.
Manga tuhang i Yusup nẹ̌sul᷊e kapia sol᷊ong Kanaan
25I Yusup nangoro tadeạu apang karong u manga tuhange pakịlohoing gandung, mase roitʼi sire sěngkatau-sěngkatau e pakitaho su ral᷊ungu karong ene. I sire pakịgěllireng lai kaěng sinasạ i sire su raral᷊engang. Parentane ene nituhukang. 26Bọu ene manga tuhang i Yusup e nělurangkeng gandung běllin sire e su wowong kaliden sire e, mase nẹ̌buạ e i sire wọu ene. 27Su tampạewen sire nikahěbiange tangu, sěngkatau wọu i sire e namukako karongu gandung pěngonggotang kaěngu kalide. Kutẹu kawe nakaěbạ doitẹ̌ su wowong gandung ene. 28”Doitẹ̌ku e kai nisul᷊e,” angkuěnge su manga tuhange. ”Kakěllạ e ěndaung, su ral᷊ungu karongku!” Naung i sire měngkawe riọ nẹ̌gilabẹ̌ dingangu něngkatakụ, mase němpẹ̌kakiwal᷊o sěmbaụ su wal᷊ine, ”Kai apạe nikoạ u Mawu si kitẹ e ngae?”
29Ene nahumpạ e su Kanaan, i sire nẹ̌běkẹ e si amang i sire kal᷊awọu apang kinahombangeng i sire. Angkuěng i sire u, 30”Guběrnurẹ̌ u Misirẹ̌ e nẹ̌bisara mahasa si kami dingangu měnẹ̌noke si kami mẹ̌pẹ̌pahimang banuane. 31I kami e simimbang u, ’I kami e taumatawe mapia, wal᷊inewe mẹ̌papahimang u, i kami e taumatawe matul᷊idẹ̌. 32I kami kěbị e mapul᷊o dua su kataune tamahuari, kụ sěngkatau wọʼi kami e sen nate, kụ i amang i kami e man sěmbaụ, kụ katuariang i kami e ringangi amang i kami su Kanaan.’ 33Guběrnurẹ̌ e nẹ̌bera, ’Iạ e kai měmẹ̌manikạ si kamene mědeạu makakasingkạ u měnsang i kamene taumata matul᷊idẹ̌: Sěngkatau wọʼi kamene e harusẹ̌ katanạ sini; arawe wal᷊ine ute wotonge mapul᷊ẹ kụ pěmpẹ̌bawa gandung baugu anạ u sěmbaụ i kamene apang kinahombangengu karal᷊unusẹ̌ e. 34Mạeng i kamene sem mawal᷊ị kụ makawawa katuariang i kamene ute, iạ buhụ e masingkạ u i kamene wal᷊inewe mẹ̌papahimang, kaiso kawe taumatawe matul᷊idẹ̌. Tangu anạ u sěmbaụ u kụ takụ niaresẹ̌ ene e sarungbe takụ isul᷊e suanung kamene ringangu i kamene e wotongewe makakatanạ sini, kụ botongewe mẹ̌dagang tuhụ kapulung kamene.’ ”
35Bọu ene su tempọeng i sire něngaungke ral᷊ohong manga karong i sire e, nakasiloko kawihu roitʼi sire sěngkatau-sěngkatau e kụ mang piạ dal᷊ohone; kụ i sire apạe něngkatakụ, kụ kerene lai i amang i sire e. 36Tangú nẹ̌berạe i amang i sire u, ”I kamene mambeng makakailang anạku e kěbị. I Yusup sen tawẹ dịe; i Simon sen tawẹ dịe; mase ini e i kamene měngal᷊ạko l᷊ai si Benyamin. Bal᷊inewe sạbarang kasasigěsạku e!”
37Bọu e i Ruben nẹ̌berạe si amange, ”Gěllị e i Benyamin si siạ, Amang; hědo iạ manul᷊eng sie kapia, mạeng tala ute, i Amang botonge mamate anạku rarua esẹ.”
38I Yakub nẹ̌bera, ”Tala! I Benyamin tawe wotonge wawaěng i kamene; tuhange sen nate, kụ ini e kate i sie wědang ene. Kiwuạu piạ u kereapa i sie masilakạ su raral᷊engang. Iạ ini sem maghurang dingangu kasasusa kụ niapahombang si siạ kahiang kamene e kai makapate si siạ.”
Currently Selected:
PĚNDARIADI 42: SXN
Highlight
Share
Copy
Want to have your highlights saved across all your devices? Sign up or sign in
