PĚNDARIADI 35

I Yakub dingangu wuntuange nakoạ sol᷊ong Betel

1 # Pěnd. 28:11-17 Piạ su sahěllo Mawu Ruata e něhengetang si Yakub, ”Kai Iạ e Ruata kụ nẹ̌těngkatodẹ si kau piạ i kau nạung tụtal᷊ang bọu anun tuhangu i Esau. Dakọko lighạ kakoạ sol᷊ong Betel. Katanạ e sene kụ pělanging pananěmbaěng baugu Iạ e.”

2-3Mase i Yakub nẹ̌bera su manga anạ u sěngkataune ringangu su kěbị taumata apạeweng dingange u, ”I kitẹ e kai sarung mědariahi měbuạ bọu ini kụ makoạ sol᷊ong Betel. Sene iạ sarung měndarisị pananěmbaěng baugu Mawu Ruata kụ seng nẹ̌tul᷊ungu iạ su tempong kasasěsẹ̌ku ringangu seng naněntanudẹ̌ si siạ balạewe iạ měnsang sol᷊ong apa. Kụ děmmẹko tul᷊adang manga ruata raghị si kamene kụ pěmpamurěsiko watangeng i kamene, kụ pěmpẹ̌luhen pakeang burěsi.” 4Mase i sire němpanarakangkeng kal᷊awọu tul᷊adan duata raghị apạeweng piạ si sire ringangu lai manga anti-antin sire si Yakub. Kal᷊awọu kěbị apal᷊iwụ tamai ene nasueng lěbing e si Yakub su al᷊ungu kalu ghẹ̌guwạ maranin soang Sikem.

5Su tempo ene i Yakub dingangu wuntuangu walage němpẹ̌buạ, kụ Mawu Ruata e napahombangu takụ su kal᷊awọu taumata tumanạ u kěbị soa mạngělikụ e, hakịu i sire tawe němpěnahusu si Yakub dingangu manga wuntuange. 6Tangu narěntạ e i sire su ěntanang Kanaan su soam Betel kụ nạung kal᷊imona e isẹ̌sẹ̌bạ Lus. 7Sene i Yakub něndarisị u pananěmbaěng, kụ nisěbạ e tampạ ene, ”El-Betel”, ual᷊ingu Mawu Ruata e seng nẹ̌tẹ̌ngkatodẹ u watangengʼE si sie sene piạ i sie kạtal᷊ange wọu anun tuhange. 8Sene lai kinapateěng i Debora, nạung napasusun Ribka e, kụ nilěbing su al᷊ungu kalu ghẹ̌guwạ su sěmběkan timuhẹ̌ bọu soa ene. Ual᷊ingu ene hakịu kalu ene nisěbạ e, ”Kalun Sasangitang”.

Duata e něngal᷊amatẹ̌ si Yakub su Betel

9Sarạeng i Yakub nawal᷊ị kapia wọu Mesopotamia, Mawu Ruata e nẹ̌těmpasilom batangengʼE kapia si sie ringangu něngal᷊amatẹ̌. 10#Pěnd. 32:28 Angkuěngu Mawu Ruata e si sie, ”I kau e seng tawe saụ isěbạ si Yakub, kaiso kai Israel.” Kerene Mawu Ruata e něsẹ̌bạ i sie Israel. 11#Pěnd. 17:4-8 Mase angkuěng u Mawu Ruata kapia, ”Iạ e kai Ruata Kasěllahenge, kawasam patikụ. I kau e mangkewen pěhite pakal᷊awọ! I kau e sarung měhiteng kal᷊awọu wansa e, ringangu makoạ i upungu mararatu. 12Banua kụ Takụ nionggọ si Abraham děduan Ishak, sarung Takụ ionggọ si kau ringangu su hitenu.” 13Bọu ene Mawu Ruata e naněntang i Yakub. 14#Pěnd. 28:18-19 Su tampạ kụ suapang Mawu Ruata e mělẹ̌hengetang si Yakub, i sie napararisị u watu sěmbaụ kinoạ e tatiala. Mase watu ene nikoạ e sasěmba su Mawu Ruata kụ naněbohu anggorẹ̌ dingangu lanang zaitun su wowone. 15Tampạ ene siněbạ e, ”Betel”.

I Rahel nairị

16Bọu ene i Yakub dingangu wuntuange naněntangu Betel. Piạ i sire nạung deng diọ marau wọu Efrata, ene nịdatingken tempone i Rahel seng mamantelẹ̌. Kaiso rariọ kawe masusa iědihẹ̌. 17Ene kal᷊ikine kạpěnẹ̌nědụ e, nẹ̌berạe biang ene si sie u, ”Pakatarimạ bue naungu e Rahel, anạ u e kai saụ esẹ.” 18Arawe i Rahel kai seng kakạdanineng maminsul᷊ẹ̌ singongone, kụ piạ e i sie maminsul᷊ẹ̌ singongone, tangu nisěbạ e rariọ ene si Ben-Oni,#35:18: Ben-Oni: Areng ini su werang Ibrani mangal᷊ene ahusu sigěsạku. kutẹu i amange kawe nẹ̌sẹ̌bạu arenge si Benyamin.#35:18: Benyamin: Areng ini su werang Ibrani mangal᷊ene ahuse kụ sarung makauntung.

19Sarạeng i Rahel nairị, i sie nilěbing su wiwihu ral᷊eng makoạ sol᷊ong Efrata e kụ nạung orasẹ̌ ini e kawe nisěbạ Betlehem. 20I Yakub napararisị u watu tatiala sene, kụ sarang ěllo ini kubul᷊i Rahelẹ̌ e wědang tẹ̌tialangu watu ene. 21Nal᷊iu wọu ene i Yakub naněpasu raral᷊enge, mase nangětingu tentane su tampạ sěmpalang sumaheng měnarang Eder. 22#Pěnd. 49:4 Tangú piạ e i sire ene su tampạ ene i Ruben nẹ̌tikị sěngkapẹ̌tikị i rěduan Bilha, kapapuěng i amang e. Kụ ene tangu kinaringihʼi Yakub, kụ i sie mangkewen limangehẹ̌ marasai.#35:22: Sěmbaụ tungkangu nạung: Limangehẹ̌ marasai. Su werang Ibrani manga wawera tamai ini e tawẹ apa.

Manga anạ i Yakub

(1Kar. 2:1-2)

I Yakub piạ anạ e esẹ i sire mapul᷊o dua su kataune. 23Anạ si Lea ute kai i Ruben (anạ i Yakub kaiakanenge), i Simeon, i Lewi, i Yehuda, i Isakar ringangʼi Zebulon. 24Anạ si Rahel ute kai i Yusup dẹ̌duan Benyamin. 25Anạ si Bilha ěllangʼi Rahel i Dan dingangkewen Naftali. 26Anạ si Zilpa ěllangʼi Lea ute kai i Gad děduang Asyer. Manga rariọ ene ute piněhending su Mesopotamia.

I Ishak nairị

27 # Pěnd. 13:18 Mase nahumpạ e i Yakub su anung Ishak i amange, su tampạ katatanakenge su Mamre maraning Hebron. (Nạung su tempo tamai i Abraham i upunge, mal᷊aing mạtanạ sene.) 28-29I Ishakẹ̌ e naminsul᷊u singongone seng maghurang-gurang, nịdatingu mahasụ ual᷊um pul᷊o su taunge, kụ bọu ene nilěbing i Esau rěduan Yakub anạe.

Currently Selected:

PĚNDARIADI 35: SXN

Highlight

Copy