PĚNDARIADI 33
33
I Yakub nẹ̌sombang i Esau
1I Yakub nakasilo si Esau riměnta i sire ěpạ u hasụ su kataune. Tangú manga rariọ e nipẹ̌gaghelare si Lea siren Rahel dingangu ěllange rarua. 2I sie naměllọu ěllange rarua ringangu anạ i rẹ̌dua su těngone, tuhụ e i Lea sire tahanạ, bọu ene i Rahel dẹ̌duan Yusup su l᷊ikude kahěngang. 3I Yakub rụdal᷊eng su těngon sire kěbị, kụ apidu kạdal᷊enge tangu i sie nẹ̌suba pitun sul᷊e sarangkewe naraning Esau. 4Arawe i Esau tangu timal᷊angkewe naněnsomahẹ̌ si Yakub apidu limahěkụ dingangu riměngu. Kụ i rẹ̌dua e měngkatewe nahunsangị. 5Ene i Esau nakasilọ e si sire manga wawine ringangkeweng manga rariọ ene, i sie nakiwal᷊o, ”Kai i sai ěndaị i sire ringangu ini e?”
”I sire kai anạku,” angkuěng i Yakub, ”Mawu Ruata e seng timal᷊ěntụ kụ nangonggọ u i sire manga anạ si siạ.” 6Bọu ene ěllang darua e himaung dingangkeweng anạ i rẹ̌dua e, kụ němpẹ̌suba. 7Bọu ene narěntạ e i Lea ringangkeweng kal᷊awọu anạ e, mase kasamuriange i Yusup dẹ̌duan Rahel kụ němpẹ̌haung kụ i sire kěbị e němpẹ̌suba.
8I Esau nakiwal᷊o, ”Kai apa timonane si kau e kal᷊awọu wuntuang apan takụ pinẹ̌sombang kanini tangu?”
I Yakub simimbang, ”Ene kai mědeạu mapakal᷊uasu naung i kau tuhang.”
9Arawe i Esau kai nẹ̌bera u, ”Seng botonge kal᷊awọu arětạku e, kụ seng tawahal᷊uase relaing mamoroseěng si siạ e.”
10Angkuěngkewen Yakub, ”Kumbahang! Mạeng u iạ nẹ̌tatal᷊ahino wue su naung i kau Tuhang, ute raeke wue kakěndagẹ̌ku ini e wọu l᷊imaku. Si siạ kereu iạ makasilo ghahị i kau Tuhang, ute mẹ̌sul᷊ungu makạsilo ghahịu Ruata batụu i kau Tuhang e kai enẹ e kapiane si siạ. 11Iạ měkẹ̌karimang u, daeke wue kakěndagẹ̌ku e ěndaung seng takụ niwawa ini e. Mawu Ruata e mangkewen kụkěndagʼu iạ kụ měgẹ̌gěllịeweng patikụ sabarang apạewen takụ gẹ̌gausang.” I Yakub měngkate hanesẹ̌ měnẹ̌nihasa sarạeweng pangěnsueěnge i Esau e rimaẹ e kakěndage ene.
12Mase i Esau nẹ̌bera u, ”Bọete i kitẹ mẹ̌dariahiko rumal᷊eng, kụ iạ e reng dumal᷊eng kụ měngal᷊imona si kau.”
13I Yakub kai simimbahẹ̌ u, ”Tuhang masingkạ u anạku tamai ini e lome, kụ iạ e kai hinom pakatitị su apạewen binatang su susu. U mạeng u měngkai hanesẹ̌ lẹ̌hiudang pědẹ̌dal᷊ahěngkasẹ̌ e, ute nal᷊ahẹ u manilaing kětạeng sěhěllo e, kai kal᷊awọu ghapaěngu binatang e sarung mate. 14Dal᷊engke kal᷊imona, kụ iạ hědon tumol᷊e riọ mal᷊awa. Iạ hědowen mẹ̌těngkasahawụ sěngapam botonge rumal᷊eng dingangu manga binatangku e ringangu apạeweng manga anạku ini e sarangkewe makasahusu si Akang su Edom.”
15Angkuěng i Esau, ”Mageng kerene, mapiawe takụ itěntang si kau pirang katau wọu taumataku e.”
Arawe i Yakub kai simimbahẹ̌ u, ”Tawahal᷊uasʼu mẹ̌tasibung, iạ kětạeng mapulu mapakal᷊uasʼu naung i Akang.”#33:15: Iạ kětạeng mapulu mapakal᷊uasʼu naung i Akang arau mạengu i Akang e mal᷊uarẹ.
16Kerene su ěllo ene i Esau nẹ̌buạ dimal᷊eng nẹ̌sul᷊e sol᷊ong Edom. 17Arawe i Yakub tangu nakoạ sol᷊ong Sukot, bọu ene napararisị u wal᷊ene ringangu nẹ̌koạ tenta pẹ̌sasirungangu binatang e. Ual᷊ingu ene hakịu tampạ ene nisěbạ e Sukot.#33:17: Sukot: Areng ini su werang Ibrani mangal᷊ene ”tampạ u pẹ̌sasirungang”.
18Su raral᷊engang bọu Mesopotamia, nahumpạ e i Yakub ringangu tawẹ kurange su soan Sikem, su wanuang Kanaan, mase nangětingke tentane su wimbaeng e sěmbaụ maranin soa. 19#Yos. 24:32; Yoh. 4:5 Wimbaeng e tampạ u pẹ̌sasirungange ene niwělliange wọu pal᷊ahiten Hemor i amang i Sikem arěgan doitẹ̌ sal᷊aka mahasụ su kal᷊ěpane. 20Bọu ene i sie napararisị u pananěmbaěng sene, kụ nisěbạ e, ”El, Ruatang Israel.”
Currently Selected:
PĚNDARIADI 33: SXN
Highlight
Share
Copy
Want to have your highlights saved across all your devices? Sign up or sign in
