PĚNDARIADI 31

I Yakub timal᷊ang bọu anung Laban

1I Yakub nakaringihẹ̌ manga anạ i Laban němpẹ̌bera kere ini, ”I Yakub kai seng nangal᷊ạ kal᷊awọu arětạ i amang i kitẹ e, kụ nẹ̌těngkakalạ u kěbị tataghuaneng i amang i kitẹ.” 2I Yakub nakasilo lai watụ u i Laban kai seng bal᷊inewe kere nạung kạngerẹ kahimumune si sie. 3Mase Mawu e něhengetang si Yakub, ”Pẹ̌sul᷊e e sol᷊ong banuang amangu ringangu manga anạ u sěngkataunu e. Iạ e kai sarung maněntanudẹ̌ si kau.”

4Bọu ene i Yakub něngoro taumatang pělẹ̌habarẹ̌ si Rahel dẹ̌duan Lea tadeạu měsombang i sie su kěhu su tampạ u ghapaěngu kambing dingangu dombane. 5Kụ i Yakub nẹ̌bera si rẹ̌dua angkuěng, ”Kakěllaěngku e i amang i rua e kai seng bal᷊inewe kere nạung kạngerẹ kahimumune si siạ e; kaiso Ruatang amangku e mang dụděndingang si siạ. 6I rua mal᷊aing masingkạ u iạ seng němunara sěngapang ihạku e su anung amang i rua e. 7Manilaing kerene iạ e kai seng niakal᷊eng i sie ringangu seng mapul᷊on sul᷊e i sie měmẹ̌mal᷊ui tatendeng si siạ e. Kai Mawu Ruata e tawe iapakawala i sie pẹ̌koạ dal᷊akị si siạ. 8Su piạ i amangu e nẹ̌bera, ’Kambing apang nẹ̌punturang e sarung makoạ tatendengu,’ kụ kal᷊awọu ghapaěngu binatang e sarung měhanạ u punturang. Su tempong i sie nẹ̌bera u, ’Apang kambing kụ běhisange sarung makoạ tatendengu e,’ tangu kal᷊awọu ghapaěngu binatang e masuewe měhanạ u awạ e wěhisang. 9Kai kerene kakakoạ u Mawu e seng nangal᷊ạ gapaěngu binatang tataghuaneng i amangu e kụ bọu ene nighěllị e si siạ.

10Kụ musungu pẹ̌tatatimuhu manga binatang e, iạ kai nipi, nakasilo kěbị apang kambing esẹ e awạ e kai mang běhisang, punturang arau pantareng. 11Kụ Mawu Ruata e nẹ̌těngkatodẹ su Malạekatẹ̌ e něhengetang si siạ su ral᷊ungu ipi ene, angkuěnge, ’Yakub!’ Iạ e mal᷊aing simimbang u, ’Ěndaung iạ e.’ 12Malạekatẹ̌ e nẹ̌bera kapia, ’Kakěllạ e, kěbị kambing esẹ kapẹ̌tatimuhe ute awạe kawe wěhisang, dingangu punturang ringangu pantareng. Iạ e nẹ̌tatudẹ nẹ̌koạ ene si kau e kerene, ual᷊ingu Iạ seng nakasilo kěbị apang kinoạ i Laban si kau e. 13#Pěnd. 28:18-22 Seng, Iạ ini e Ruata kụ nětengkatodẹ si kau su Betel. Paị sene i kau e seng nangonggọu watu sěmbaụ tatahěndung, kụ pinaněbohangu lanang zaitun su wowone. Paị sene lai i kau e seng nẹ̌taingu pẹ̌kakakědo si Siạ. Kụ pẹ̌bangungko kụ sěbang bọu wanua ini, pẹ̌sul᷊e e sol᷊ong banua pinamitingang puidu.’ ”

14Mase i Lea rěduang Rahel simimbang, ”I kandua e semben tạ buạ arau pusakạ i kandua su wal᷊eng amang i kandua e. 15I kandua ini e kai seng ikẹ̌koạ kere tau raghị. I sie kai seng nẹ̌bal᷊ụ i kandua, ringangu apạeweng seng kinatarimạ baugu ene selaing niapakasuene. 16Kal᷊awọu kakakalạ nạung seng nial᷊ạ u Mawu Kasěllahenge wọu i amang i kami e tuhụ dal᷊enge ute kai tataghuaneng i kami ringangu tataghuanengu manga anạ i kami e. Pẹ̌koạ e apang lẹ̌orong Mawu Ruata e si kamene.”

17-18Bọu ene i Yakub nẹ̌dariahi mapul᷊e sol᷊ong anung amange su ěntanang Kanaan. Niapasakene kawinge ringangu manga anạ e su wowong onta, bọu e niahạ e kal᷊awọu ghapaěngu kambing dingangu dombane ringangkeweng kal᷊awọu apang seng kinaěbakenge su Mesopotamia. 19Su tempo ene i Laban ene su wimbaenge kạpěngẹ̌ngul᷊ụ e rukụ u manga dombane, kụ seng tempo ene i Rahel nẹ̌tako tul᷊ada ral᷊indung anạ u sěngkatau,#31:19: Tul᷊ada ral᷊indung anạ u sěngkatau: Su werang Ibrani e Terafim, kụ kai tul᷊adang mahang duata kere kakoạu taumata kụ sẹ̌sěmbaěng kere ral᷊indung anạ u sěngkatau. tataghuaneng i amange. 20I Yakub nangakal᷊ẹ̌ si Laban kụ tawe napakasingkạ u i sie kawe tumal᷊ang. 21I sie něngal᷊ạ kal᷊awọu arětạ e kụ nẹ̌bawal᷊ikěkasẹ̌ dimal᷊eng. I sie rimakị pai sol᷊ong sěmběkan Sal᷊ụ u Efrat kụ bọu ene nẹ̌timona sol᷊ong bawul᷊urangu Gilead.

I Laban měnẹ̌nahusu si Yakub

22Hědon su katěllu ěllone i Laban nipaul᷊ikang u Yakub kai timal᷊ang. 23Mase i Laban měngkatewe nanampungu taumatane kụ i sire něnahusu si Yakub karěngụ u pitu ěllo sarang kinarahuaneng i sire su wawul᷊urang u Gilead. 24Kutẹu hěbi ene Mawu Ruata e kai nẹ̌těngkasilo si Laban su ipi kụ něhengetang, ”Ěne ěng! kumbahang-bahang i kau měhinakang u wawera sarung kadiongeng sěngkamohong si Yakub.” 25Su tempo ene i Yakub seng nangeting u tendane su wul᷊ude sěmbua. Mase wul᷊ude wal᷊ine su wanua ene lai i Laban dingangu taumatane nangětingu tendane.

26Bọu ene i Laban nẹ̌bera si Yakub, ”Kawe unụe i kau e něngakal᷊ẹ̌ si siạ kụ nẹ̌tangehu manga anạku wawine e, kụ al᷊ingkai manga tawengu pẹ̌sasekẹ e? 27Kai unụe i kau e něngakal᷊ẹ̌ si siạ e kụ nělikosẹ̌ napul᷊ẹ tawẹ pal᷊aul᷊ị e? Mangawe i kau nẹ̌katạu iạ, angkeěng iạ e něnonda wue si kau ringangu piạ kantarị e ringangu musikẹ̌ u arabanạ, dingangu hitarẹ̌ e! 28I kau kawe tawe něngonggọ u loahe mědeạu měngimbu anạ pulungku e ual᷊ingu seng mẹ̌tal᷊ei. Kakanoạben taumata wodo si kau e! 29Iạ kai piạ kawasa měkoạ dal᷊akị si kau e, kaiso mẹ̌kalaeng ini e, Ruatang amangu e seng naul᷊ị si siạ u kumbahang-bahang iạ kai měhinakang si kau. 30Iạ e masingkạ i kau e napul᷊ẹ ene e, kai ual᷊ingu mapulu-pulu mapul᷊ẹ. Kai kawe unụ e i kau e nẹ̌tako tul᷊ada ral᷊indung anạ u sěmbaụku e tangu?”

31Mase i Yakub simimbang, ”Iạ e rimal᷊eng marěmasẹ̌ e ual᷊ingu mạtakụ u i kau ghaghurang kibasị u tawe mamalang manga anạ i kau gaghurang. 32Su hal᷊ẹ̌ u tul᷊ada ene tangu, kereu i kau ghaghurang kawe nakasẹ̌sui piạ u sěngkatau sini kawe seng nẹ̌tako ute, i sie sarungbe ihukungu papate. Měngkate pẹ̌kiral᷊a měnsang piạ manga rarotong i kau gaghurang sini e. Mạengbeng piạ ute měngkate al᷊ạ. Dingangu taumatang kitẹ e wotongewe makapẹ̌sahidi.” I Yakub běgawue kawe nạung i Rahel nẹ̌tako tul᷊ada ene.

33Mase i Laban simuẹ̌ e su tentang Yakub kụ něnahěsidẹ̌; bọu ene simuẹ̌ su tentan Lea ringangu su tentang ěllang bawine rarua ene, kaiso tul᷊ada ene e tawe kinasahěsidange. Pangěnsueěnge simuẹ̌ e su tentan Rahel. 34Kutẹu nạung kawe i Rahel něngal᷊a tul᷊ada ene kụ nitahone su ral᷊ungu kawihu salẹ̌ u onta, arawe i sie tangu kụkaiang su wowong salẹ̌ ene. I Laban něnahěsidẹ̌ su kaguwạu tentan Rahel, kaiso mang tawe nakaěbạ tul᷊ada ene. 35Mase i Rahel něberạe si amange, ”I Amang abe langehẹ̌, u iạ tawe makararisị maněnsomahẹ̌ si Amang, u iạ e kai niral᷊engangu raha tundun manga wawine.” I Laban sembeng enẹ e pananahěside, kaiso mang tawe nakareạ tul᷊ada ene.

36Tangu nẹ̌pědụ e i Yakub, ”Kai apạ e ral᷊ampaku takụ nikoạ tangu?” Kakiwal᷊one mahasa. ”Kai apa sal᷊aku hakịu i kau gaghurang měnẹ̌nahusu si siạ tangu? 37Ho! Sarạeng seng nasuen sahěside si kau kal᷊awọu apal᷊iwụku, kụ i kau ghaghurang nakaěbạ bue apal᷊iwụ u rědeakengu e? Sěbangke apal᷊iwụ ěndaị ene kụ pěllọ e sini, tadeạu taumataku ringangu taumatang kau ghaghurange makasilo wue, ringangu makahěngang bue měnsang i sai nihino sutal᷊oarang kadua e. 38Seng duam pul᷊o su taunge iạ mạtanạ dingangʼi kau ghaghurang. Ghapaěngu domba ringangu kambing i kau ghaghurang e seng něhite, kụ iạ e tawe nakạkinạ sarang sěmbaụ kambing měndangeng bọu manga binatang lěhikinangu e. 39Apang nate tẹ̌těmboěngu binatang dul᷊u e tawe takụ bẹ̌bawaěng sol᷊ong anunu, kaiso kawe mang iạ sẹ̌saku měngangawenge. Apạeweng tẹ̌takoěng baewe ěllo arau hěbi e sěntiniạ kahiạeweng kau ghaghurang e mang iạ iapẹ̌ngẹ̌ngaweng. 40Pẹ̌sěngkakuhuang iạ kai kẹ̌kapědisang su tempong ěllo ringangu rẹ̌dahěndongang su tempong hěbi. Kụ pẹ̌sěngkakuhuange tawe makatemang tikị. 41Kerene kakakoạku e piạ iạ mětẹ̌tahamawu si kau ghaghurang karěngụeweng duam pul᷊o su taunge tiwatu. Mapul᷊o ěpạ su taunge karěngụ e iạ němunara sarang nakareạ si rẹ̌dua anạ i kau ghaghurang ene – kụ ěnnungu taung lai sarang nakareạ ghapaěngu kambing dingangu domba e. Mase karěngụewelaing ene e i kau ghaghurang namal᷊ui tatendeng si siạ sarang mapul᷊o su sul᷊ene. 42Mangawe iạ tawe tẹ̌tanurang u Ruatang upungku nạung sẹ̌sěmbaěng i Abraham děduang Ishak, tangu i kau ghaghurang nal᷊ahẹ u seng dimolohu iạ pinakapul᷊eẹ lima mapul᷊o. Kaiso Mawu Ruata e seng kimakělla susaku, ringangu pẹ̌kakarạdiahangku e, kụ mẹ̌kalaeng ini e i Sie seng něgěllị u sasimbangʼE.”

Pẹ̌kakakědong Yakub dingang i Laban

43Mase i Laban simimbahẹ̌ si Yakub, ”Anạ bawine rarua ene kai anạku; anạ i rẹ̌dua e ute kai anạku, ringangu ghapaěngu manga domba ene e mal᷊aing iạ piạ. Kụ tuhụewe ral᷊enge tangú patikụ apạeweng kinasilonu sini e ute kai iạ piạ. Kai iạ e tawe makakoạbe apa waugu mẹ̌tahutěndạ u manga anạ pulungku e. 44Ual᷊ingu ene tangu ěndaị e i kadua mẹ̌koạko pẹ̌kakakědo kụ deng mẹ̌dal᷊ěnsungu manga watu kere sěmbaụ tatialam pẹ̌kakědo ene.”

45Bọu ene i Yakub nangal᷊ạ e watu sěmbaụ kụ nipararisị e nakoạ batu pẹ̌tatahěndungang. 46Bọu ene i sie nangoro taumatane napěnampung u manga watu kụ nẹ̌koạ niěndukang. Bọu ene i sire kimaěng sěngkakaěng su rěduhu niěndukangu watu ene. 47I Laban něsẹ̌bạu wilowoim batu ene e Yegar-Sahaduta,#31:47: Yegar-Sahaduta: Areng ini su werang Aram mangal᷊ene ”niěndukangu watu kere tatahěndung”. arawe i Yakub něsěbạ e arenge Galed.#31:47: Galed: Areng ini su werang Ibrani mangal᷊ene ”niěndukangu watu kere tatahěndung”. 48Angkuěng i Laban si Yakub, ”Batu niěndụ ěndaị ini e sarung makoạ pẹ̌tatahěndungang i kadua.” Kai ene hakịu tampạ sěmpalang ini e nisěbạ Galed. 49I Laban nẹ̌bera lai, ”Mal᷊owọko Mawu e měnitị si kadua e karěngụeweng i kadua e měbẹ̌biahẹ̌ maghaghea.” Ual᷊ingu ene hakịu sěmpalang ene nisěbạ l᷊ai Mizpa.#31:49: Mizpa: Areng ini raringihang kere werang Ibrani kụ mangal᷊ene ”tampạ i kitẹ tẹ̌titikang”. 50I Laban nẹ̌bera lai, ”Kereu i kau mẹ̌koạ dal᷊akị su manga anạku, arau mẹ̌kawingu manga wawine wal᷊ine ipěnamba si rẹ̌dua e, manilaing tawẹ u sarang sěngkatau masingkạ, pẹ̌tahěndungbue u Mawu e kai manitị si kitẹ. 51Kụ ini watu takụ nipědal᷊ensung, batụeng pẹ̌tatahěndungang. 52Baẹbe watu niěndụ ini e, arau watu pẹ̌tatahěndungang ene e kai apětẹ̌tahěndung i kitẹ u iạ e tawe lumiu niěndukange ini e waugu měngalo si kau dingangu i kau mal᷊ain tawe wotong e lumiu niěndukangu watu pẹ̌tatahěndungang ini e kụ měngalo si siạ. 53Ruata sẹ̌sěmbaěng i Abraham dingangu sẹ̌sěmbaěng i amangku i Nahorẹ̌#31:53: Abraham … Nahorẹ̌: Abraham ute kai i upung i Yakub, dingangu Nahor ute kai i amang i Laban. sarung makoạ mělahukung sutal᷊oarang kadua.” Bọu ene i Yakub nẹ̌salu su arengu Mawu Ruata kụ isẹ̌sěmbang Ishak, i amange mědeạu mapakasěhụ u kědone. 54I sie namotọ binatang sěmbaụ kụ nikoạ sasěmbane su wowom bul᷊ude ene. Mase i sie něhaěngke taumatane kimaěng sěngkakaěng. Nasuẹeng kaěnge, i sire němpẹ̌tikị e hěbi ene sene. 55Sěngkariọěllone mal᷊uka-l᷊ukadẹ̌, i Laban diměngụ e rarěngung pẹ̌tatal᷊ei su manga anạ e ringangu pulunge, něngal᷊amatẹ̌ si sire, wọu ene nẹ̌sul᷊e sol᷊ong katatanakenge.

Currently Selected:

PĚNDARIADI 31: SXN

Highlight

Copy