PĚNDARIADI 26

I Ishak mạtanạ su Gerar

1Su wanua ene tangu piạko kal᷊ahutung nariadi nạung kere su tempong Abraham. I Ishak nẹ̌tengong Abimelekh, datun tau Pilistin, su Gerar kụ nẹ̌dorong loahe mẹ̌deạu ipakawala matanạ sene. 2Ene kinoạ e ual᷊ingu Mawu seng nẹ̌tengkatodẹu watangengʼE si sie apidu něhengetang, ”I kau abe kakoạ sol᷊om Misirẹ̌; katanạ e su wanua ini, kerẹewe Takụ nipaul᷊i si kau. 3#Pěnd. 22:16-18 Iạ e sarung maněntanudẹ̌ dingangu měngal᷊amatẹ̌ si kau. Kasěllahu wanua ini e Takụ ionggọ su hitenu. Iạ e sarung maněhụ u kědoku e nạung Takụ nionggọ si Abraham i amangu. 4Iạ e sarung mangonggọu anạ pulung kakěpal᷊e kere wituing su l᷊angị e ringangu hitenu, ringangu kasěllahu wanua ini sarung Takụ ionggọ si sire. Kal᷊awọu umatẹ̌ su dunia e sarung mẹ̌gausẹ̌ si Siạ tadeạu Iạ měngal᷊amatẹ̌ si sire kerẹewe hitenu e seng Takụ nial᷊amateng. 5Iạ e sarung měngal᷊amatẹ̌ si kamene, watụ u i Abraham seng dimaringihẹ̌ si Siạ dingangu nẹ̌sěmpị kal᷊awọu tita-Ku ringangu tiaha-Ku.”

6Tangu natanạ e i Ishak su Gerar. 7#Pěnd. 12:13, 20:2 Ene sarangke taumata sene nakiwal᷊ọeng Ribka e, tangu i Ishak simimbang u i sie kai wawinene wal᷊inewe kawinge. I Ishakẹ̌ e kai mạtakụ i sire ene kiwuạ u měmate si sie ual᷊ingu i Ribka e kawe kereng kaholẹ e. 8Ene sarangke i Ishakẹ̌ e natanạ diọ marěngụ sene, tangú piạ sěnsul᷊e Datu i Abimelekh kai kukakělla wọu těbane kutẹu kai nakasilo si Ishak mědẹ̌darěngu ringangʼi Ribka. 9Tangú nikuiange i Ishak kụ i sie nẹ̌bera, ”Mahunẹu kai kawingu wawine ěndaị e ěng? Kawe unụ e i kau kawe naul᷊ị u i sie kawe wawinenu?”

Angkuěng i Ishak, ”Iạ mạngěnnau, iạ sarung pateěng kereu iạ kawe maul᷊ịu i sie kai kawingku.”

10”Kai apạ e seng nikakoạu si kami e?” angkuěng i Abimelekh. ”Sěngkatau wọu tal᷊oarang kawanuaku e botonge wue mětikị dingangu kawingu, kai kamagengu hal᷊ẹ̌ ene nariadi e, ute seng i kau masingkạ u pẹ̌sasal᷊agʼi kami ene.” 11Bọu ene i Abimelekh něgěllịu tatumbal᷊ung su kawanuane patikụ e kere ini, ”I saim manengehẹ̌ tau ini arau kawinge, mambeng sarung ihukung pateěng.”

12I Ishak nanawuhʼu wine waugu mahěnsinuang su wanua ene, kụ su taung ene nakapěnsạ mahasụ su sul᷊ene kal᷊awọe wọu nisawuhe, batụu Mawu e něngal᷊amatẹ̌ si sie. 13Kakakalạ e mangkeng kạpahuntinambane kụ i sie hakịu nakalạ tạ sihinge. 14Tau Pilistin e sụsingking i sie, ual᷊ingu i sie piạ ěllange mal᷊awọ, dombane ringangu sapine měngkate měgẹ̌gapaěng. 15Mase i sire němpěngambungkeng ěntana su kal᷊awọu pahighi nạung seng niwangkang manga ěllang i Abraham nạung deng i sie wědang biahẹ̌.

16Bọu ene i Abimelekh nẹ̌bera si Ishak, ”Dakọe pangal᷊ing bọu anung kami, u i kau e kai tumanịu makawasa limembong kami.” 17Tangu i Ishak dimal᷊eng bọu ene kụ nẹ̌daseng su Wal᷊ang Gerar. Sene i sie nẹ̌tanạ diọ mararěnna. 18I sie saụ němangka apam pahighi nạung niwangka su tempong Abraham kụ nạung seng niambungangu ěntana kahian tau Pilistin su l᷊ikudʼi Abraham. Pahighi tamai ene nighěllirangu arenge kere nạung nisěbạ i amange.

19Manga ěllang i Ishakẹ̌ e němangka pahighi su Wědạu Gerar ene kụ nakahombang simbul᷊u akẹ mạhěmpal᷊iu. 20Kai arawe i sire mělal᷊ukadẹ̌ binatang su Gerar tangu měmpẹ̌dẹ̌darendehẹ̌ dingangu manga mělal᷊ukadẹ̌ binatang i Ishak. Angkuěng i sire, ”Ini e kai akẹ i kami!” Ual᷊ingu ene i Ishak nẹ̌sẹ̌bạ arengu pahighi ene, ”Pẹ̌dararendehẹ̌”.

21Manga ěllang i Ishakẹ̌ e němangka pahighi lai wal᷊ine, tangu nariadị e pẹ̌sasasighing pahighi ene lai. Ual᷊ingu ene i Ishakẹ̌ e nẹ̌sẹ̌bạeng pahighi ene, ”Pẹ̌sasitori”. 22Bọu ene i sie nangal᷊ing bọu tampạ ene kụ němangka pahighi katěllune. Sěnsul᷊e ini e tawẹ apawe pẹ̌dararendehẹ̌. Ual᷊ingu ene i Ishakẹ̌ e něsẹ̌bạu pahighi ene, ”Karal᷊iu”. Angkuěnge, ”Ini e Mawu seng nangonggọu l᷊oahe si kitẹ pẹ̌tẹ̌tanạ su wanua ini, kụ i kitẹ e sarungbe tumei pẹ̌bawiahʼi kitẹ e sini.”

23Bọu ene i Ishak nẹ̌buạ e kụ nahumpạ e su Bersyeba. 24Su hěbi ene Mawu e nẹ̌těngkasilom batangenge si sie kụ něhengetang, ”Iạ e kai Ruatang Amangu i Abraham. Abe katakụ; Iạ e maněntanudẹ̌ si kau. Iạ e sarung měngal᷊amatẹ̌ si kau ringangu mapakal᷊awọu hitenu ual᷊ingkem pẹ̌kakědo-Ku e su ěllang-Ku i Abraham.” 25Mase i Ishak napararisị u pananěmbaěng kụ naněmba Mawu e sene. I sie nẹ̌daseng sene ringangu manga ěllange němpamangka pahighi wal᷊ine.

Pẹ̌kakakědon Ishak dingangʼi Abimelekh

26 # Pěnd. 21:22 Piạ sahěllo i Abimelekh narěnta wọu Gerar dingangu měnanasane i Ahuzat, dingangu i Pikhol těmbonangu wuntuangu mẹ̌sasekẹ, baugu mẹ̌sombang i Ishak. 27Tangú i Ishak nẹ̌bera si sire ungkuěng, ”Kai unụe i kamene ruměnta su anuku? Karạkai kạngerẹ i kamene měbẹ̌binsị dingangu měmpẹ̌nokol᷊u iạ bọu wanuang kamene?”

28Mase i sire simimbang angkuěng, ”Ini e i kami masingkạ u Mawu e maněntanudẹ̌ si kau, hakịu i kami e mạngěnna u kai hinom piạ pẹ̌kakakědo sutal᷊oarang kitẹ. Pěmpẹ̌kedọ e, 29u i kau sarung tawe mẹ̌koạ dal᷊akisẹ̌ si kami, kerẹewe lai i kami e tawe nẹ̌kẹ̌koạ dal᷊akị si kamene. I kami e mang kětạu nẹ̌koạ mapia si kau ringangu naparal᷊eng i kau su pẹ̌darame. Mamben nal᷊ahẹ u si kami i kau e lẹ̌al᷊amatengu Mawu e.” 30Bọu ene i Ishak nẹ̌sake si sire, kụ i sire nahungkaěng dingangu němpanginung. 31Sěngkariọěllone mal᷊uka-l᷊ukadẹ̌ sěngkatau-sěngkatau e nasịhabareng kědone nisẹ̌garengkeng pẹ̌sasalu. Bọu e i Ishak nẹ̌katạen sire kụ nẹ̌tal᷊eị e i sire lawọ sěhapikang.

32Su ěllo ene lai manga ěllang i Ishak diměnta su anune kụ napakasingkạ u pahighi nạung niwangkang sire. Angkuěng i sire, ”I kami e seng nakaěbạ akẹ.” 33Mase i Ishak něsẹ̌bạu pahighi ene si ”Salu”. Kụ kai ene tětạ u soa ene nisěbạ Bersyeba.#26:33: Bersyeba: Areng ini su werang Ibrani mangal᷊ene ”Pahighin Pẹ̌sasalu” arau ”Pahighi Pitu” (Kakělla pasalẹ̌ 21:31).

Manga kawing i Esau wọu wansa wal᷊ine

34Ene piạ e i Esau umbure natimu ěpạ u pul᷊o su taunge, i sie nẹ̌kawing dingangu ruang katau wawine bọu tau Het, kụ i Yudit, anạ i Beeri, ringangi Basmat anạ i Elon. 35Bawine rarua ene e nakasusa naung i Ishak dẹ̌duang Ribka.

Currently Selected:

PĚNDARIADI 26: SXN

Highlight

Copy