AMOS 1

1 # 2Rat. 14:23-29, 15:1-7; 2Kar. 26:1-23 I Amosẹ̌ e kai sěngkatau měndal᷊ukadẹ̌ domba wọu Tekoa. I sie nakoạ nabi su tempoʼm banuang Yehuda su kawasang parentan Datu i Uzia, ringangu Israel su parentan Datu i Yerobeam, ahusi Yoahas. Dua taung kal᷊imonang linuhẹ̌ sěnsul᷊e nariadị e, Duata napal᷊ahẹ u manga apa mạanung Israel si Amos.

2 # Yl. 3:16 Kai ini e nipẹ̌berang Amos,

”Mawu e lụhuang bọu Wongkon Sion,

tingihʼE ghimal᷊ědụ bọu Yerusalem.

Kal᷊awọu ngaran děmpugẹ̌ e něngkahěgu,

děmpugẹ̌ su Wul᷊udu Karmel nahasa-hasa.”

Hukumangu Ruata waugu manga wansa ipělẹ̌lampungu Israel

Siria

3 # Yes. 17:1-3; Yer. 49:23-27; Za. 9:1 Mawu e něhengetang, ”Tumanạ u Damsyik seng masau su sul᷊ene nẹ̌baradosa, ual᷊ingu ene, Iạ e mamben sarung měhukung i sire. I sire tumanịu matingkaị miěbạ tau Gilead, 4ual᷊ingu ene Iạ sarung měndingọ u putung sol᷊ong istanan Datu i Hazael, dingangu měnutung kal᷊awọu benteng u Ratu Benhadad sarang pakasue. 5Manga tukadu pasěllangeng u Damsyik e sarung Takụ goghaheng, dingangu tumanạu Wal᷊ang Awen sarung Takụ kaehang pakawurěsi wọu tampạ u katatanakeng i sire. Měngangawasa su Bet-Eden sarung Takụ apal᷊intụ bọu kal᷊aianenge, ringangu pamamanuang Siria e sarung tawengang ore lai hengketang sol᷊ong banuang Kir.”

Pilistin

6 # Yes. 14:29-31; Yer. 47:1-7; Yeh. 25:15-17; Yl. 3:4-8; Zep. 2:4-7; Za. 9:5-7 Mawu e něhengetang, ”Tumanạu Gasa seng masaun sul᷊ene němpẹ̌dosa, ual᷊ingu tangú nal᷊ahẹu Iạ sarung měhukung i sire. I sire seng něhengkẹ bansa sěmbaụ ene kěbị taumatane, bọu e nẹ̌bal᷊ụ i sie kere ěllang su tau Edom. 7Ual᷊ingu ene Iạ sarung mapasěbang u putung su manga meselu Gasa, kụ měnutung kal᷊awọu bentenge pakasue. 8Tumanạ e ringangu mangangawasa soang Asdod dingangu Askelon sarung Takụ ipakaghea. Soang Ekron sarung Takụ ihukung, dingangu kěbị lěmben tau Pilistin sarung Takụ pakawinasa.”

Tirus

9 # Yes. 23:1-18; Yeh. 26:1–28:19; Yl. 3:4-8; Za. 9:1-4; Mat. 11:21-22; Luk. 10:13-14 Mawu e něhengetang, ”Tumanạu Tirus seng masau su sul᷊ene němpẹ̌dosa, ual᷊ingu ene seng nal᷊ahẹu Iạ sarung měhukung i sire. I sire seng něhengkẹ u wansa sěmbaụ kěbị e sol᷊ong piněmembangeng, dingangu něnarakangu ene su Edom; i sire seng limampa rianding pẹ̌dal᷊ahapị. 10Ual᷊ingu ene Iạ sarung měndingọ u putung su manga meselu Tirus kụ měnutung manga benteng e sarang pakasue.”

Edom

11 # Yes. 34:5-17, 63:1-6; Yer. 49:7-22; Yeh. 25:12-14, 35:1-15; Ob. 1-14; Mal. 1:2-5 Mawu e něhengetang, ”Tumanạu Edom seng masau su sul᷊ene měmpẹ̌dosa, ual᷊ingu ene nal᷊ahẹu Iạ sarung měhukung i sire. Tawẹ apa kakěndage, kụ i sire seng něngalo tau Israel, manga anạ u sěmbaụ i sire.#1:11: manga anạ u sěmbaụ i sire: Tau Israel kai pal᷊ahiten Yakub, tuaring Esau, i upungu tau Edom. I sire měngkate pědu, ringangu těbe měngẹ̌ngune. 12Ual᷊ingu ene, Iạ sarung mapasěbangu putung sol᷊ong soan Téman, kụ měnutung kal᷊awọu benteng su Bozra, sarang pakasue.”

Amon

13 # Yer. 49:1-6; Yeh. 21:28-32, 25:1-7; Zep. 2:8-11 Mawu e něhengetang, ”Tau Amon seng masau su sul᷊ene němpẹ̌dosa, ual᷊ingu ene nal᷊ahẹu Iạ sarung měhukung i sire. Ene nạung kạpẹ̌sẹ̌sekẹ e mědeạu měměnahẹ̌ kararatuange, i sire němpěngua tiang u manga wawine mẹ̌bẹ̌bawa kapapia e su Gilead. 14Ual᷊ingu ene, Iạ sarung maparentaʼm putung su manga meselu soang Raba, kụ měhengisẹ̌ manga benteng pakasue. Su tempo ene sarung i karingihẹ̌ gahẹ u pẹ̌sasekẹ, paraěng e mẹ̌dahenesang kere suwu-suwu. 15Datun sire ringangu apan sawohị u mẹ̌paparentane sarung hengketang sol᷊ong pěmamembangeng. Iạ e Mawu seng něhengetang.”

Currently Selected:

AMOS 1: SXN

Highlight

Copy