RAROLOHANG 3

Tau peosẹ̌ niapakaul᷊e

1Piạ su sahěllo i Petrus dẹ̌duan Yohanes nakoạ sol᷊ong Bal᷊em Mawu pukul᷊ẹ̌ tatěllu wawěllo, su tempọen pẹ̌daroa. 2Ene sene su tukadẹ̌ gẹ̌gerẹ isěsẹ̌bạ, ”Tukadẹ̌ Mal᷊ěnggihẹ̌”, piạ tau esẹ sěngkatau sakị e peosẹ̌ deng bọu kararariadine. Ěllo-ěllo i sie tẹ̌tondaěng sene makịtatal᷊ěntụ si sai-sain sumuẹ̌ sol᷊ong Bal᷊em Mawu. 3Piạ e tau ene nakasilo si Petrus dẹ̌duan Yohanes kạpahunsuẹ̌ e sol᷊ong Bal᷊em Mawu, i sie mědẹ̌dorong apa-apa si rẹ̌dua. 4Tangu i rẹ̌dua měngkate měmẹ̌manda mataedẹ̌ si sie, kụ bọu e i Petrus nẹ̌bera, ”Kakěllako si kandua!” 5Mase tau ene měngkate kạpandane si rẹ̌dua kạpěngěngantibe měnsangbe sarung makaěbạ manga apa wọu i rẹ̌dua. 6Arawe i Petrus nẹ̌bera si sie, ”Iạ e tawẹ doitẹ̌ku sarang kadodọ. Kai apạeweng piạku e, ute takụ ionggọ si kau: Su ral᷊ungu kawasang Yesus Kristus tau Nazaret e, dal᷊engke!” 7Mase i Petrus e něngumbelẹ e lima koaneng u tau peosẹ̌ e ringangu napẹ̌bangung i sie. Tangu laedẹ̌ dingangu kal᷊entọ u tau ene natoghase. 8Kụ i sie měngkatewe liminsọ dimarisị, kụ nanětạ e rimal᷊eng tamai ramahi. Bọu ene i sie simuẹ̌ e sol᷊ong dal᷊ungu Wal᷊em Mawu, sěngkasuẹ̌ dingangi Petrus dẹ̌duan Yohanes, kạdal᷊enge apidu kạl᷊insọ e, kapẹ̌dẹ̌dalone Ruata. 9Patikụ taumata e nakasilo si sie kạdal᷊enge ringangu kapẹ̌dẹ̌dalone Ruata. 10Mase i sire nakaěnnạ e u i sie kai nạung mẹ̌darorong tiasa kụkaiang su, ”Tukadẹ̌ Maholẹ” su Wal᷊em Mawu. I sire měngkate apa něngkạherang dingangu rimal᷊inaụ nakasilo apa nariadi si sie.

Nasẹ̌ i Petrus su ral᷊ungu Wal᷊em Mawu

11Tau ene měngkate timol᷊e si Petrus dẹ̌duan Yohanes. Kụ piạ e i sire těllu nahumpạeng gandaria isěsẹ̌ba, ”Gandariang Salomo”, kěbị taumata e narěntạ e němpẹ̌komol᷊ẹ̌ su anun sire ual᷊ingu měngkai rụdal᷊inaụ. 12Sarạeng i Petrus nakasilo si sire, angkuěnge si sire: ”Ei tau Israel, unụe i kamene něngkaherang u hal᷊ẹ̌ ini? Unụe wue i kamene měngkate hanesẹ̌ měmẹ̌manda si kami? Apa su ěnnang kamene tau ini e nakaral᷊eng ual᷊ingu piạ kawasa si kami arau kawe ual᷊ingu i kami matuhụ su Mawu Ruata? 13#Sas. 3:15 Duatan Abraham, Ishak, Yakub, Duatang i upung i kitẹ, Duata ene seng napakawantugu ěllangʼE i Yesus. Kụ seng i Yesus ene e nisarakang i kamene su měngangawasane, bọu ene nirokateng i kamene su těngon Pilatus su piạ i Pilatus mapulu měměllọ i Sie. 14#Mat. 27:15-23; Mrk. 15:6-14; Luk. 23:13-23; Yoh. 19:12-15 I Sie e kai susi ringangu mapia, arawe i kamene kawe rumokạ si Sie, ringangu měnahowong tadeạu i Pilatus apěmẹ̌měllọu sěngkatau tahapate waugʼi kamene. 15I kamene němpamate si Sie, sumbal᷊iau mang i Sie nạung simbul᷊u pẹ̌bawiahẹ̌ baugu patikụ taumata. Kụ Ruata e seng napẹ̌biahʼi Sie kapia wọu papate. I kami e seng nẹ̌sahiding hal᷊ẹ̌ ene. 16Manga anạ u sěmbaụ seng nakasilo ringangu nakasahidi apa nariadi su tau peosẹ̌ ini. I sie seng natoghasẹ̌ dingangu nahuweka kapia ual᷊ingu i sie mạngimang Mawu Yesus dingangu kawasanʼE. Ual᷊ingu nangimang su Mawu Yesus e tangu tau ini e seng saụ naul᷊e kapia su těngon manga anạ u sěmbaụ patikụ.

17Manga anạ u sěmbaụ! Kai ini e iạ masingkạ u apang nikoạ i kamene ringangu manga těmbonang i kamene su Mawu Yesus, ene nikoạ i kamene e ual᷊ingu i kamene wěga wue měnsang apa kẹ̌koateng i kamene. 18Kụ ual᷊ingu ene ute nariadị e lai apan seng nihabaru Ruata su tempo nal᷊iu limiun patikụ nabinʼE, u Ratu Mananal᷊amatẹ̌ kụ seng nikědọ e harusẹ̌ mẹ̌tatahang u sunsara. 19Ual᷊ingu ene, manga anạ u sěmbaụ, pěmpẹ̌tobate wọu patikụ dosang kamene kụ pěmpẹ̌bal᷊ị e sol᷊ong anun Mawu Ruata, tadeạu i Sie měndẹ̌dasẹ̌ kal᷊awọu rosanu. 20Mawu e sarung duměnta su anunu kụ i kamene sarung makahombang katatal᷊ěmbuhung pẹ̌bawiahu marohkẹ̌ e. Kụ Mawu e sarung dumolohʼi Yesus duměnta su anung kamene batụu i Sie kai seng nitilakehʼu Ruata makoạ Datu Mananal᷊amatẹ̌ si kamene. 21I Sie harusẹ̌ matanạ su sorga sarang Duata e mapakariadin patikụ e wuhu kerẹewe seng nipěhengetang u Mawu Ruata su manga nabi su tempo nal᷊iu. 22#Pang. 18:15, 18 I Musa e nạung bọu nẹ̌bera, ’Mawu Ruatang kamene e sarung měndolohu sěngkatau nabi wọu tal᷊oarang kawanuanu hala e, kerẹewe i Sie rimolohʼu iạ.#3:22: Kerẹewe i Sie rimolohʼu iạ: arau kerẹewe iạ. I kamene harusẹ̌ dumaringihẹ̌ patikụ apan niwerang nabi e si kamene. 23#Pang. 18:19 I sain tawe měndaresọ bawerang nabi e, i sie sarung ipakaghaẹ̌ bọu kawanuan Duata e kụ ipakawinasa.’ 24Manga nabi nạung bọu něhabaru hengetang u Mawu e nanětạ bọu Nabi i Samuel dingangu manga nabi wal᷊ine kụ diměnta samuri e, kěbị e mělẹ̌habaru tempo orasẹ̌ ini. 25#Pěnd. 22:18 Manga rianding Duata kụ manga nabi e kai waugu manga anạ u sěmbaụ. Su ral᷊ungu pẹ̌dariandi kụ nikoạ u Ruata ringangu manga i upung i kamene e, Duata něhengetang si Abraham kere ini, ’Bọu hitenu e Iạ sarung měngal᷊amatẹ̌ kěbị bansa su dunia.’ Pẹ̌dariandi ene mal᷊aing baugʼi kamene. 26Hakịu ene Mawu Ruata e němile ĚllangʼE, bọu ene rimolohʼi Sie apạděnta sol᷊ong anun kamene kal᷊imona, tadeạu i Sie měngal᷊amatẹ̌ si kamene. Kakakoạ u i Sie měngal᷊amatẹ̌ e ute tadeạu i kamene kai mẹ̌tobatẹ̌ bọu kararal᷊akị u pẹ̌bawiahʼi kamene.”

Currently Selected:

RAROLOHANG 3: SXN

Highlight

Copy