RAROLOHANG 24

I Paulus nikalakẹ̌ u tau Yahudi

1Lima ěllo tuhụ e, Imang Mawantugẹ̌ i Ananias ringangu manga těmbonang u tau Yahudi e nakoạ sol᷊ong Kaisarea nẹ̌dingangu sěngkatau pěngacara arenge i Tertulus. I sire nẹ̌těngon Guběrnurẹ̌ i Feliks dingangu něhabaru pangaduhang i sire mạanun Paulus. 2Piạ e i Tertulus nikuiang sol᷊ong těngone, i sie něngěnsilʼi Paulus kere ini,

”I Tuang Guběrnurẹ̌ Lẹ̌adateng! Su l᷊iman tuang, banuang kami e rembeng měbẹ̌biahẹ̌ su pědarame. Dingangu ual᷊ingken katatahuěnnang tuang, ute selaing mal᷊awọ hal᷊ẹ̌ mapapia e kẹ̌koateng i pạnaghupia kawanuang kami. 3Kěbị e mang tẹ̌tarimakeng i kami ringangu tatarimakasẹ dingangu pěngangarěga sěngapang karangẹ e su patikụewe tampạ. 4Kai tadeạu kumbahangbe mẹ̌gagholọ u tempo l᷊awọ si tuang, ute iạ mělẹ̌harapẹ̌ mal᷊owọko i tuang dembeng mẹ̌daringihẹ̌ pangaduhang i kami e kadodọ ini. 5I kami e nakaěbạ tau ini e nạung kai měnggaghohaeng makạsilakạ. Su apan tampạ i sie kai makakạděntang ganohạ sutal᷊oaran tau Yahudi ringangu i sie nakoạ pangahạ e suapang kakanoạu tau Nazaret. 6I sie seng hakịu wọu l᷊ai něnal᷊ukạ napakal᷊amuhụ u Wal᷊em Mawu e, hakịu nisamẹ i kami e i sie. (I kami e kai mapulu měhukung i sie tuhụewe toratu agamang kami e. 7Kaiso koměndang i Lisias e nangahon sie wọu l᷊imang kami, 8ringangu nangoro tadeạu apang měmpangạduhang e pětẹ̌těngon tuang.) Kereu i tuang měnanẹ̌sui tau ini e, i tuang sěsane sarung makaringihẹ̌ bọʼi sie katul᷊idẹ̌ e wọu patikụ laěnsilẹ̌ ipạngěnsilʼi kami e si sie.” 9Taumatan Yahudi apan sene mal᷊aing měmpangěnsilẹ̌ dingang si Paulusẹ̌ e, ringangu mạnahuntěngadẹ̌ patikụ apang niweran Tertulus.

I Paulus mětẹ̌tahutěndạ u hinone su těngon Feliks

10Mase guběrnurẹ̌ e něnida si Paulus mědeạu apěbẹ̌bera. Tangu i Paulus simimbang ungkuěng, ”Iạ mạsingkạ u i tuang kai seng nakoạ mělahukung su wanua ini e ringangu taunge karěngụ e. Hakịu ene iạ nakapěndang mal᷊uasẹ̌ maul᷊ịu sasimbangku e su pahesʼi tuang. 11I tuang seng nakasẹ̌sui hala u tawe něngalembo wọu mapul᷊o dua su ěllone nal᷊iu iạ e nakoạ sol᷊ong Yerusalem kụ nẹ̌kal᷊iomaneng. 12Dingangu tawe nikẹ̌kaěbakeng u tau Yahudi e iạ mědẹ̌darendehi sai-sai arau napẹ̌komol᷊u taumata waugu pẹ̌gěnggohaeng su Wal᷊em Mawu, arau su manga kanisa arau su tampạewe sude su ral᷊ungu soa. 13I sire mal᷊aing tawẹ u makal᷊ahẹ u manga laěnsili sire ilẹ̌habarẹ̌ si tuang mạanun iạ e. 14Mambeng těngadẹ̌ iạ harusẹ̌be měngaku su těngon tuang u iạ kawe měnẹ̌němba Ruatang i upung i kami e tụtuhụewe těntirong Mawu Yesus kụ angkuěng i sire kawe nẹ̌sal᷊a. Arawe iạ e wědang mạngimang u patikụ apang mạbawohẹ su ral᷊ungu Bukẹ̌ i Musa e ringangu Bukẹ̌ u manga nabi e. 15Mẹ̌sul᷊ungu i sire, iạ mal᷊aing piạ pělaharapẹ̌ku ilẹ̌unsandehẹ̌ su Mawu Ruata u kěbị taumata e sarung mẹ̌biahẹ̌ kapia wọu papatene – taumata mapapia arau taumata ewe lai raral᷊aị! 16Hakịu ene iạ měkẹ̌kul᷊ěte sěngapang botonge tadeạu ral᷊ungu naungku e wurẹ̌si su těngon Mawu e ringangu wurěsi su těngọewe lain taumata e.

17 # MMR. 21:17-28 Sarạeng nạung tawẹ dise su Yerusalem mangạe pira taung, iạ nẹ̌bal᷊ị sene nangěntudu roitẹ̌ kakěndagẹ̌ su kawanuaku ringangu waugu měnarakangu sasěmba su Mawu Ruata. 18Su tempong iạ kapěkẹ̌koạ e ene, i sire nakaěbạ e si siạ su Wal᷊em Mawu, bọuten nanusi watangeng. Tawẹ apa taumata l᷊awọ e ringangku, ringangu tawẹ apa l᷊ai ganohạ sene su tempo ene. 19Kětạembeng piạ tau Yahudi pirang katau sene wọu propinsing Asia. Kawe i sire hinong ene sini e waugu mẹ̌bawa pangaduhang i sire si tuang, kereu i sire piạ pangaduhang ual᷊ingu laěnsilʼi sire si siạ e. 20Arau měngkate walạ i sire ini hala maul᷊ịu karal᷊akịku apạeweng kinasilon sire, su tempon iạ e mapẹ̌těngon Měnggaghuta Agama e. 21#MMR. 23:6 Kinaěbakeng i sire kětạbeng bawera sěmpědi ini, kụ pinẹ̌bera su těngon sire u: Iạ e nịdaratẹ̌ sahěllo ini e, kai ual᷊ingu iạ mạngimang u taumata nate e saụbe iapẹ̌biahẹ̌ kapia.”

22Mase i Feliks kụ seng nakakasingkạ l᷊awọ hal᷊ẹ̌ u těntirong Mawu Yesus, něngondọeng pěrkara ene, ”Iạ e sarung mamutusu pěrkara ini,” ungkuěnge, ”kereu koměndang i Lisias seng marěnta.” 23Mase i sie něndolohen pěrwira kụ masasingkạ i Paulus tadeạu pakịpaere apidewe lai pěgẹ̌gěllị u l᷊oahe pẹ̌kadodọ si sie ringangu kumbahangbe mẹ̌sědingu manga hapị e měmpěgěllị u apang gẹ̌gausange.

I Paulus su těngon Feliks dẹ̌duan Drusila

24Ene nal᷊iụen pira ěllo i Feliks diměnta, niringanengkeng kawinge isẹ̌sěbạ si Drusila; i sie sěngkatau tau Yahudi. Tangu i Feliks něngoro taumata piněngal᷊ạ si Paulus, bọu ene i Feliks dimaringihẹ̌ si Paulus měbẹ̌bisara mạanun pangangimang si Kristus Yesus. 25Kutẹu piạ i Paulus nanẹ̌pasu wisarane mạanung katul᷊idu naung dingangu pẹ̌tatingkědang dingangu mạanun hukumang su Ěllong Kiamatẹ̌, i Feliks natakụ e kụ bọu ene nẹ̌bera, ”I kau e wotonge mapul᷊ẹ ini e. Iạ hědo saụ mẹ̌kui si kau mạeng piạ loahe.” 26Ene i Feliks nạung kai mạngantibẹ̌ sarung makaěbạ doitẹ̌ e bọʼi Paulus. Ual᷊ingu ene hakịu i sie měngkate seng masau měndolohu taumata apěngẹ̌ngal᷊ạ si Paulus mědeạu mẹ̌bisara ringange.

27Nal᷊iụen dua taung i Perkius Festus něngaweng si Feliks nakoạ guběrnurẹ̌. Kụ ual᷊ingu i Feliks mapulu měngal᷊ạ naung u tau Yahudi e, i sie měngkatewe napakawalan Paulus mạl᷊aaresẹ̌ su ral᷊ungu tahungkụ.

Currently Selected:

RAROLOHANG 24: SXN

Highlight

Copy