RAROLOHANG 13

I Barnabas dẹ̌duan Saulus nipile ringangu nirolohẹ̌

1Su ral᷊ungu jamaatẹ̌ su Antiokia piạ manga nabi ringangu manga mananěntiro ute lěnnạu: i Barnabas, i Simeon isẹ̌sunggahị Si Maitung, i Lukius bọu Kirene, i Měnahem kụ niapakasaria ringangu Ratu i Herodes,#13:1: Ratu i Herodes: ute kai Herodes Antipas kụ mẹ̌pẹ̌parenta su Galilea (kakělla Luk. 3:1). dẹ̌duan Saulus. 2Piạ i sire kapẹ̌kẹ̌kal᷊iomanenge su Mawu ringangu měmpẹ̌pẹ̌puasa, Rohkẹ̌ u Ruata e něhengetang si sire, ”Iạ e ghělirengkong Barnabas dẹ̌duan Saulus, baugu Iạ sẹ̌sa-Ku, tadeạu i sire apẹ̌koạ munara kụ seng Takụ nitilakehẹ̌ si rẹ̌dua.”

3Bọuten nẹ̌puasa ringangu nẹ̌kal᷊iomaneng, i sire nanělliden lima si Barnabas dẹ̌duan Saulus, bọu e i rẹ̌dua e nirolohẹ̌.

Su Siprus

4Ual᷊ingu kawe nirolohʼu Rohkẹ̌ u Ruata e, tangu i Barnabas dẹ̌duan Saulus nẹ̌buạ e sol᷊ong Seleukia. Bọu ene i sire nẹ̌buạ sol᷊ong tahanusang Siprus. 5Sarạeng nahumpạ su Salamis, i sire němpěhabaren hengetangu Mawu Ruata e su apan kanisan tau Yahudi. I Yohanes Markus e mětẹ̌tul᷊ung i rẹ̌dua e su raral᷊engang.

6Kaguwạu tahanusa ene e napěpidẹ̌ si sire sarang Pafos. Pai sene i sire nẹ̌sombangken tau Yahudi sěngkatau arenge i Bar Yesus. I sie kai tau tahatariang makịtikạ u i sie kai nabi. 7I Sergius Paulus, guběrnurẹ̌ u tahanusa ene, kai hapị mapia ringangu tahatariang ene. Guběrnurẹ̌ ene kai tau pande ringangu pelẹesa. I sie kimui si Barnabas dẹ̌duan Saulus, batụu i sie mapulu rumaringihẹ̌ hengetang u Mawu Ruata. 8Kai i Barnabas dẹ̌duan Saulus rẹ̌dokateng i Elimas tau tahatariang ene, ual᷊ingu i Elimas (u kai ene e arenge su werang Yunani) kụ mětẹ̌tawakal᷊i tadeạu kumbahang sarang guběrnurẹ̌ ene mangimang su Mawu Yesus. 9Kutẹu i Saulus – isẹ̌sěbạ l᷊ai si Paulus – nẹ̌papinunụen Rohkẹ̌ u Ruata e kụ němandạ e mataedẹ̌ su tahatariang ene, 10mase nẹ̌bera, ”Ei taha pěngakal᷊ẹ̌, anạ kawontogang! I kau e rokạ u patikụ munara mapapia e. Unụe i kau tawe mangědo měnggoghahẹ̌ karakin Duata e mědeạu mapakasal᷊amatʼu taumata? 11Kụ ene kakěllạe, watụ u Mawu e mang měhukung i kau e! I kau sarung mawuta, sarang tawe makasilo tualagu matangěllo e arẹ̌gan sěngkatempo.”

Su orasẹ̌ ene lai i Elimas nakapěndang u kai piạ hiwụ maitung něnakạ matane, hakịu i sie rimal᷊eng e měsẹ̌sasaghipo mědẹ̌deạ taumata mědeạu pěnata si sie. 12Su tempon guběrnurẹ̌ ene nakasilọe apa nariadi e, i sie nangimang su Mawu Yesus, batụu i sie kai rimal᷊inaụ tạ sihinge su těntiro mạanun Mawu e.

Su Antiokia, Pisidia

13Bọu Pafos, i Paulus dingangkewelain manga hapị e němpěmundal᷊ẹ̌ sol᷊ong Perga su Pampilia. Sene i Yohanes Markus naněntang i sire, bọu ene nẹ̌sul᷊e sol᷊ong Yerusalem. 14Bọu Perga, i sire naněpasu raral᷊eng i sire sol᷊ong Antiokia su Pisidia, bọu ene su ěllon Sabatẹ̌ i sire simuẹ̌ nahungkaiang su ral᷊ungu kanisa. 15Sarạeng Bukẹ̌ i Musa ringangu Bukẹ̌ u Manga Nabi e nibawasa, manga těmbonangu kanisa e něndolohu taumata pakịbal᷊o si Paulus dingangu manga hapị e, ”Manga anạ u sěmbaụ, kereu i kamene piạ manga sasasa pẹ̌sěmbaụ baugʼi sire ini e, ute sal᷊amatẹ̌be měmpěhengetangu ene.” 16I Paulus měngkatewe rimarisị, kụ bọu ene něnida ringangu limane, mase nẹ̌bera,

”Manga anạ u sěmbaụ tau Israel ringangu i kamene wal᷊ine, kěbị apang sini kụ dudaringihẹ̌be su Mawu Ruata! Pěmpẹ̌daringihẹ̌ko si siạ: 17#Sas. 1:7, 12:51 Duatan Israelẹ̌ e seng němile manga i upung i kitẹ e, kụ napakasěllahu umatẹ̌ ini piạ i sire nakoạ tau raghị su wanuan Misirẹ̌. Bọu ene kinahiang kawasan Duata masěllahẹ̌ e naněbang i sire wọu Misirẹ̌. 18#Pẹ̌t. 14:34; Pang. 1:31 I Sie nẹ̌tingkědang u pẹ̌kakakoạ i sire#13:18: I Sie nẹ̌tingkědang u pẹ̌kakakoạ i sire: binohẹ u nạung pira-pira: I Sie měpẹ̌padul᷊i si sire. su kěhu l᷊inggi e ghěnnangu ěpạ u pul᷊o su taunge karěngụe. 19#Pang. 7:1; Yos. 14:1 Umatẹ̌ pitung kawanuaěng su Kanaan nịpapukinʼE mědeạu pẹ̌papahiakengu wanua ene su tau Israel makoạ tataghuaneng i sire. 20#Měl. 2:16; 1Sam. 3:20 Kěbị ene mariadi ěpạ u hasụ limam pul᷊o su taunge karěngụ e.

Samurin nẹ̌papahiạ u wanuan Kanaan ene,#13:20: Kěbị ene mariadi ěpạ u hasụ limam pul᷊o su taunge karěngụ e. Samurin ... ene: arau ěpạ u hasụ limam pul᷊o su taunge tuhụ e. tangu Mawu Ruata něngonggọu manga mělahukung si sire. Kasamuriange kěbị mělahukung ene ute kai Nabi i Samuel. 21#1Sam. 8:5, 10:21 Bọu ene i sire nẹ̌dorong sěngkatau ratu. Kụ Mawu Ruata e něngonggọ i Saul anạ i Kish bọu hěnton Benyamin, mědeạu makoạ datun sire karěngụ u ěpạ u pul᷊o su taunge.

22 # 1Sam. 13:14, 16:12; Mzm. 89:21 Bọuten Mawu Ruata nělohosʼi sie, Duata e něhengkẹ i Daud niapakakoạ datun sire. Kụ seng ini e nipěhengetang u Mawu Ruata e mạanun Daud, ’Iạ e seng nakahombang si Daud anạ i Isai e kai sěngkatau taumata mětẹ̌tatahino su naung-Ku. Seng i sie taumata sarung makawatụ kapulu-Ku.’ 23Bọu hěnton Daud ene tangu Mawu Ruata e napasěpụ u sěngkatau Ratu Měnanal᷊amatẹ̌ kerẹewe sembeng nikědonʼE. Kụ seng i Yesus ene e Ratu Měnanal᷊amatẹ̌ e. 24#Mrk. 1:4; Luk. 3:3 Kal᷊amonan i Yesus nanětạ u munaranʼE, i Yohanes seng bọu němohang su taumatan Israel tadeạu i sire měmpẹ̌tobatẹ̌ bọu kal᷊awọu rosan sire ringangu isahani. 25#Mat. 3:11; Mrk. 1:7; Luk. 3:16; Yoh. 1:20, 27 Kụ maraning mạnguadipẹ̌ munarane, i Yohanes něbera su taumata, angkuěng: ’Kai i sai tangu iạ ini e tumuhụ kasingkạ i kamene? Iạ e wal᷊inewe Taumata lẹ̌ampal᷊eng i kamene e. Pẹ̌tahěndung Tau ene sarung duměnta samuring iạ; kal᷊ingung měluka sapatunʼE e, iạ e mal᷊aing tawe wotonge.’

26Manga anạ u sěmbaụ pal᷊ahěnton Abraham, dingangu kěbị taumata wal᷊ine apang sini kụ matuhụ su Mawu Ruata! Duata e seng něndohong habaru kasasal᷊amatẹ̌ ene si kitẹ; 27batụu taumata apang mětẹ̌tanạ su Yerusalem dingangu manga těmbonang i sire e tawe nakaěnna u kai seng i Sie ene e mananal᷊amatẹ̌ e. I sire tawe nakahěngang těntiron manga nabi e kụ seng bẹ̌basaěng apang ěllong Sabatẹ̌, hakịu i sire něhukung i Yesus. Kaiso ual᷊ingkewen pẹ̌kakoạ kerene tangu nakawodaịewe kaghaghanapu apan seng nitěbal᷊u manga nabi e. 28#Mat. 27:22-23; Mrk. 15:13-14; Luk. 23:21-23; Yoh. 19:15 Maningbeng i sire tawe makahombang pẹ̌sasal᷊a apạ e si Sie kụ makakahukungu hukumang papate e, kaiso i sire kawe mědẹ̌dorong si Pilatus tadeạu i Sie pakịpate. 29#Mat. 27:57-61; Mrk. 15:42-47; Luk. 23:50-56; Yoh. 19:38-42 Kụ sarạeng i sire nasue němpẹ̌koạ kěbị apang kạbawohẹ su ral᷊ungu Winohẹ Susi, i sire napal᷊intụem bal᷊unangu wadangʼE wọu kalu kuruisẹ̌, bọu ene nipěllọ su ral᷊ungu lěbing. 30Kai Mawu Ruata e napẹ̌biahʼi Sie kapia wọu papate. 31#MMR. 1:3 Bọu ene ghěnnangu pẹ̌taha pira ěllo e i Sie měngkate rụděnta měnodẹ u watangengʼE su taumata apan seng bọu riměnta ringangʼE wọu Galilea sol᷊ong Yerusalem. Seng i sire ene kụ orasẹ̌ ini e nakoạ mẹ̌sasahidin Sie su manga umatʼu Israel. 32Kụ orasẹ̌ ini e i kami mělẹ̌habaru Injilẹ̌ ene si kamene: Apang kụ seng nikědo su manga i upung i kitẹ e, 33#Mzm. 2:7 ene tangu seng nikoạ e si kitẹ dingangu napẹ̌biahʼi Yesus kapia wọu papate. Batụ u su ral᷊ungu bukẹ̌ u Mazmur karuane piạ kạbawohẹ,

’Seng i Kau e Ahusẹ̌-Ku,

kụ su ěllo ini tangu Iạ seng makoạ i AmangʼU.’

34 # Yes. 55:3 Mawu Ruata e seng napẹ̌biahʼi Sie kapia wọu papate. Kụ orasẹ̌ ini e i Sie seng tawe lai sarung makahombang papate su ral᷊ungu kubul᷊ẹ̌. Kụ baugu hal᷊ẹ̌ ene, Mawu Ruata e něhengetang,

’Iạ sarung měngonggọu pẹ̌kakědo susi kụ sarung ipakasěhụ,

kerẹewe seng Takụ pinẹ̌kědo si Daud.’

35 # Mzm. 16:10 Kerene lai su ral᷊ungu ayetẹ̌ wal᷊ine niwera u,

’I Kau e sarung tawe mapakawalan ĚllangʼU satia ene mawuhụ su ral᷊ungu lěbing.’

36I Daud seng nate, kụ nilěbing sěngkal᷊ěbing dingang i upunge, samurin sie nẹ̌koạ apang pakịkoạ u Mawu Ruata e si sie. Maietʼi Daud mal᷊aing seng nasue nahenẹ kěbị. 37Arawe i Yesus, kụ seng niapẹ̌biahʼu Ruata kạpia wọu papate e, kai i Yesus e tawe nasue nahenẹ. 38-39Ual᷊ingu ene, manga anạ u sěmbaụ, i kamene hinong masingkạ u kai wọu anun Yesus ini e habaru kal᷊aampungu rosa e ipakịhabarẹ̌ si kamene; i kamene hinong masingkạ u apan taumata kụ mạngimang si Sie e, ipakal᷊iwirẹ̌ bọu kal᷊awọu rosa kụ tawe ikarědasẹ̌ ual᷊ingu wọu manga titan Duata kụ ilẹ̌habarʼi Musa. 40Ual᷊ingu ene i kamene hinong pakapapia tadeạu, kumbahang sarang mariadi si kamene#13:40: Su ral᷊ungu winohẹ u nạung pira-pira tawẹ apa: si kamene. apang niwerang manga nabi ini e,

41 # Hab. 1:5 ’Tatingangko pakapia-pia, ei kamene taumata apam puluang měhinakang!

I kamene e sarung měngkaherang, mase mate!

U su tempo ini Iạ e kapẹ̌kẹ̌koạ e munara

kụ i kamene hala e sarung tawe měmpangimang u ene,

maningbe piạ u měnualagẹ̌ si kamene.’ ”

42Ene piạ i Paulus dẹ̌duan Barnabas naněntangu kanisa ene, i sire su kanisa e mědẹ̌dorong tadeạu i sire saụ mẹ̌sul᷊e kapia su ěllon Sabatẹ̌ tuhụ e, saụ měnualagu manga hal᷊ẹ̌ ene e pakaunsui. 43Samurin sasẹ̌bangu taumata wọu kanisa e, i Paulus dẹ̌duan Barnabas e nitol᷊eěngu tau Yahudi mal᷊awọ dingangu taumata wọu umatẹ̌ bal᷊ine kụ seng nasowa agamang Yahudi. Tangu manga rarolohang ene něnasa si sire e tadeạu i sire e hanesẹ̌ měngumbala su kakěndagʼu Mawu Ruata.

44Su ěllon Sabatẹ̌ tuhụ e, marani kěbị dal᷊ohon soa e riměnta mẹ̌daringihẹ̌ hengetangu Mawu. 45Kai sarạeng tau Yahudi e nakasilo taumata l᷊awọ e, i sire kai něngkapenẹ u sasasingking. I sire mạnungkeang si Paulus dingangu rụdendehẹ̌ patikụ apang iwẹ̌berane. 46Kai něngalembo laing kawahanine i Paulus dẹ̌duan Barnabas měngkatewe mẹ̌bẹ̌bera mahatedẹ̌. Ungkuěng i sire, ”Hengetang u Mawu e mambeng hinong ihabarẹ̌ si kamene kal᷊imona. Kaiso ual᷊ingu i kamene kawe tawe mapulu měnarimạ u ene, i kamene seng něnantu hala u i kamene ta hinone měnarimạ u pẹ̌bawiahẹ̌ tutune ringangu kakalẹ̌. Kụ ini e i kandua něněntang i kamene kụ mẹ̌bihu bansa wal᷊ine. 47#Yes. 42:6, 49:6 U kai ini e laorong Mawu e si kami; Mawu e něhengetang,

’Iạ e seng něnilakehʼi kamene e makoạ sěmbaụ tualagẹ̌ baugʼu kal᷊awọu taumata wansa wal᷊ine kụ bal᷊ine Yahudi,

tadeạu i kamene makakarěntambeng kasasal᷊amatẹ̌ baugu patikụ dunia.’ ”

48Piạ e umatẹ̌ bal᷊ine tau Yahudi nakaringihẹ̌ ene, i sire měngkate mal᷊ua-l᷊uasẹ̌, bọu e mědẹ̌dalo e hengetangu Mawu e. Mase taumata apan seng nịtataning Duata mědeạu makahombang pẹ̌bawiahẹ̌ tutune ringangu kakalẹ̌, i sire ene e nangimang.

49Hengetang u Mawu e mal᷊aing nasawuhẹ̌ su patikụ tampạ su kạguwạu wanua ene. 50Arawe manga adimal᷊ạ u soa ene ringangu manga wawine matatuhasẹ̌ měngkatakụ u Mawu e tangu, sẹ̌sahowongang u taumatan Yahudi e. I sire mapạl᷊ěton pẹ̌sasitori waugʼi Paulus dẹ̌duan Barnabas, kụ měnokol᷊ʼi rẹ̌dua wọu wanua ene. 51#Mat. 10:14; Mrk. 6:11; Luk. 9:5, 10:11 Tangu manga rarolohang e němpanontong u awul᷊ẹ̌ su laedʼi rẹ̌dua e su těngon sire e nakoạ kere tatahěndung, bọu e nakoạ sol᷊ong Ikonium. 52Manga muritẹ̌ su Antiokia e měngkate mal᷊ua-l᷊uasẹ̌ dingangu něngkapenẹ u Rohkẹ̌ u Ruata e.

Currently Selected:

RAROLOHANG 13: SXN

Highlight

Copy