ZABUR 50
50
Ibadah saq sejati
1Zabur Asap.
TUHAN, ALLAH Saq Mahekuase, bemanik;
Ie bekuih tipaq seantéro gumi
léman Timuq jangke dateng Bat.
2Léman Sion, kote saq paling bagus,
Allah rauh becahaye.
3Tuhante rauh dait nénten meneng doang,
Ie tesenjuluq siq api saq begelaur-laur,
dait tekeliningin siq ujan angin saq beléq.
4Ie ngemanikang langit dait gumi
jari nyaksiang Ie ngadilin umat-Ne.
5Manik-Ne, “Pade kumpulang selapuq umat Tiang
saq sampun miaq perjanjian kance Tiang,
dait saq sampun Tiang sahang kadu kurban saq tesembeléh.”
6Langit nyeriteang bahwe Allah ngadilin umat-Ne,
dait Ie mésaq jari hakimne.
7“Pade dengahang, umat Tiang, Tiang gen bemanik,
Israel, Tiang gen besaksi tipaq side;
Tiang niki Allah, Allah side.
8Ndéq lantaran kurbande Tiang nuduh side;
kurban tunuqan side tetep araq léq julun Tiang.
9Tiang ndéq merluang sampi léman barénde,
atao bémbéq léman ternak saq side épéang;
10séngaq selapuq binatang léq gawah nike dowén Tiang,
dait beiyu-iyu binatang léq pegunungan.
11Selapuq kedit léq pegunungan dowén Tiang éndah,
dait selapuq mahluk saq idup léq tanaq lendang saq galuh.
12Lamun Tiang lapah, ndéq perlu Tiang badaq side,
séngaq gumi dait selapuq isine dowén Tiang.
13Tiang ndéq ngelorang empaq sampi mame,
ndéq éndah nginem daraq bémbéq mame.
14Pade aturang kurban syukur tipaq Allah,
bayah sesangi side tipaq Saq Maheagung.
15Pade bekuih tipaq Tiang léq waktu kebucuq,
Tiang gen bébasang side,
dait side gen mulieang Tiang.”
16Laguq tipaq dengan jahat Allah bemanik,
“Side ndéq bedowé hak ngucapang hukum Tiang,
dait ngeraos mengenai perjanjian Tiang.
17Séngaq side ndéq mélé nerimaq peringetan Tiang,
dait nolaq manik Tiang.
18Lamun side serioq sopoq maling, side milu kance ie,
dait side bebatur kance dengan-dengan saq demen bezinah.
19Side tetep ngeraosang saq jahat,
dait tetep siep siq tipu muslihat.
20Side terus pitnah semetonde,
dait sumpaq senaq semeton kuninde.
21Nike saq side laksaneang, laguq Tiang tedoq doang,
jari side pikir Tiang maraq side.
Laguq mangkin Tiang wade side,
dait selapuq nike Tiang jariang nyate léq side.
22Pade perhatiang, side saq lupaq léq Allah;
jagaq ndaq jangke side Tiang binaseang,
dait ndéq araq saq nyelametang.
23Dengan saq ngaturang persembahan syukur sebagé kurbanne,
ie saq hormatin Tiang;
dait tipaq dengan saq lomboq pengelampanne
gen Tiang petitoqang keselametan léman Tiang.”
Currently Selected:
ZABUR 50: LAISAS
Highlight
Share
Copy
Want to have your highlights saved across all your devices? Sign up or sign in
