ZABUR 48
48
Sion, kote ALLAH
1Zabur kaum Korah.
2Tetu-tetu ALLAH nike agung dait sanget tepuji
léq kote Tuhante, léq gunung saq suci.
3 #
Mat. 5:35
Sion, gunung Allah saq atas gati dait solah
kote Raje Agung nyenengang seantéro gumi.
4Allah meneng léq puri-puri-Ne,
ternyate Ie mésaq jari pelindung-Ne.
5Serioq raje-raje bekumpul;
ie pade dateng mélé nyerang.
6Waktu serioq gunung nike, ie pade bengaq;
ie pade tinjot dait pelai kebingungan.
7Léq derike ie pade ngijik ketakutan dait kesakitan,
maraq dengan nine saq gen nganak,
8maraq kapal saq remuk léq tengaq angin pusut.
9Maraq saq ite dengah, mangkin ite serioq,
léq Kote ALLAH Saq Mahekuase.
Kote nike kote Tuhante,
Ie jari pembélene selaéq-laéqne.
10Léq dalem Gedéng Deside
kaji pade inget kasih Deside, ya Allah.
11Peséngan Deside kesohor dait tepuji léq seantéro gumi,
Deside mréntah secare adil.
12Menengang rakyat Sion dait Yehuda besurak siq cemohne,
lantaran Deside ngukum musuh ie pade.
13Pade keliningin Sion, kiterin ie,
dait rékéng pire luwéq menarene.
14Perhatiang tembokne, periksaq bénténgne,
adéq side bau nyeriteang ojok keturunande:
15“Ie nike Allah, Allahte selaéq-laéqne,
Ie gen mimpin ite jangke selaéq-laéqne.”
Currently Selected:
ZABUR 48: LAISAS
Highlight
Share
Copy
Want to have your highlights saved across all your devices? Sign up or sign in
