ZABUR 30
30
Do'e syukur
1Zabur Daud. Nyanyian jari peresmian Gedéng ALLAH.
2Kaji memuji Deside, ya ALLAH,
séngaq Deside sampun nyelametang kaji
dait nénten menengang musuh kaji nyurakin kaji.
3 ALLAH Tuhan kaji, kaji bekuih tipaq Deside nunas tulung,
dait Deside nyelahang kaji.
4Deside luputang kaji léman alam maut,
dait ngidupang kaji léman tengaq-tengaq dengan-dengan maté.
5Pade nyanyiang puji-pujian bagi ALLAH,
hai umat-Ne saq setie,
dait pade besyukur tipaq Saq Mahesuci.
6Séngaq murke ALLAH seberaq doang,
kesolahan-Ne seumur idup.
Léq kekelem tiang nangis,
laguq parek menah jauq sukecite.
7Sewaktu merase aman, kaji ngeraos maraq niki,
“Kaji nénten gen tekalahang!”
8Séngaq Deside murah até léq kaji, ya ALLAH,
Deside jariang kaji maraq gunung saq kuat.
Laguq sesampun nike Deside nyeboq léman kaji,
dait kaji jari takut.
9Tipaq Deside, ya ALLAH, kaji bekuih,
léq ALLAH kaji nunas,
10“Napi manpaatne léq Deside lamun kaji maté
dait turun ojok loang kubur?
Napi iniq dengan maté memuji Deside
dait nyeriteang kesetiean Deside?
11Ya ALLAH, pirengang, dait periakang kaji.
Tulung kaji, ya ALLAH!”
12Tangisan kaji sampun Deside salin jari igelan saq gembire,
Deside bait kesedihan kaji dait Deside penoqang kaji siq sukecite.
13Make kaji nénten suke tedoq doang;
kaji nyanyiang pujian bagi Deside, ya ALLAH Tuhan kaji,
dait besyukur léq Deside selaéq-laéqne!
Currently Selected:
ZABUR 30: LAISAS
Highlight
Share
Copy
Want to have your highlights saved across all your devices? Sign up or sign in
