ZABUR 22
22
Do'e léq waktu susah dait nyanyian pujian
1Umaq pemimpin kor. Menurut lagu: Mayung léq waktu parek menah. Zabur Daud.
2 #
Mat. 27:46; Mrk. 15:34 Allah kaji, ya Allah kaji,
kembéq Deside bilin kaji?
Kaji bekuih, laguq Deside tetep jaoq
dait nénten nulung kaji.
3Ya Allah kaji, kaji bekuih léq waktu tengari,
laguq Deside tetep meneng.
Kaji bedo'e léq waktu kelem,
atén kaji éndah nénten tenang.
4Laguq Deside Raje Saq Mahesuci,
saq tepuji-puji siq Israel.
5Leluhur kaji pade beharep léq Deside,
ie pade beharep, dait Deside nyelametang ie pade.
6Ie pade bekuih tipaq Deside dait teluputang;
ie pade beharep dait nénten tekecéweang.
7Laguq kaji niki longe, nénten manusie,
tewade dait tehine siq dengan luwéq.
8 #
Mat. 27:39; Mrk. 15:29; Luk. 23:35 Selapuq saq serioq kaji ngoloq kaji,
ie pade bekemiq dait ngintek.
9 #
Mat. 27:43
Basen ie pade, “Alur ie ngandelang ALLAH,
adéq ALLAH nyelametang ie,
lamun ALLAH seneng kance ie!”
10Deside saq nyugulang kaji léman tian inaq kaji,
dait miaq kaji aman léq iwean inaq kaji.
11Mulai léman teanakang, nasib kaji araq léq gading Deside,
mulai léman tian inaq kaji, Deside Allah kaji.
12Sampunang jaoq, séngaq bahaye sampun rapet,
dait nénten araq saq nulung.
13Maraq banténg saq luwéq, musuh keriwung kaji,
maraq banténg gamang léman Basan ie pade ngepung kaji.
14Ie pade ngadepin kaji siq biwih saq ngangaq
maraq singe saq ngaum dait nyakrah.
15Balung kaji bis maraq aiq saq tumpah,
selapuq tolang kaji lepas léman sendine,
atén kaji léléh maraq lilin.
16Kekuatan kaji gero maraq belaqan kace,
élaq kaji nekét léq langit-langit biwih kaji.
Deside bilin kaji léq atas kerepuk, ya ALLAH,
maraq dengan saq sampun maté.
17Kaji tekepung siq dengan-dengan jahat;
maraq acong saq luwéq keriwung kaji,
nusuk ime dait naén kaji.
18Selapuq tolang kaji tao kaji rékéng,
musuh merhatiang kaji jari pantoan.
19 #
Mat. 27:35; Mrk. 15:24; Luk. 23:34; Yah. 19:24 Ie pade bagi-bagiang kelambi kaji,
dait miaq undian jari mauq jubah kaji.
20Laguq Deside, sampunang jaoq, ya ALLAH,
gelis rauh nulung kaji,
séngaq Deside kekuatan kaji.
21Luputang nyawen kaji léman kléwang,
selametang kaji léman cakrahan acong.
22Kaji lemah, lepasang kaji
léman tanggéq banténg dait léman biwih singe.
23 #
Ibr. 2:12
Peséngan Deside gen kaji nyatayang ojok semeton-semeton kaji;
dait memuji-muji Deside léq tengaq-tengaq jemaah.
24Pade puji Ie, hai dengan saq takut léq ALLAH!
Agungang Ie, selapuq keturunan Yakub!
Sujut léq Ie, selapuq keturunan Israel!
25Séngaq Ie nénten nganggep hine dengan saq tetindes,
dait nénten ngeréméhang kesengsareanne.
Ie nénten bebalik léman dengan nike,
laguq mirengang lamun ie nunas tulung léq Ie.
26LĂ©q tengaq-tengaq jemaah kaji memuji-muji Deside,
lantaran selapuq saq sampun Deside laksaneang.
Léq julun ie pade saq takut léq Deside
kaji ngaturang kurban saq kaji janjiqang.
27Dengan miskin gen bekelor jangke besuh;
dengan saq parek tipaq ALLAH gen memuji Ie.
Semoge side sejahtere selaéq-laéqne!
28Selapuq bangse gen inget tipaq ALLAH dait tulak ojok Ie,
selapuq suku bangse gen sujut nyembah Ie.
29SĂ©ngaq ALLAH saq bekuase,
Ie mréntah bangse-bangse.
30Selapuq dengan sombong gen sujut léq arepan-Ne,
selapuq manusie saq ndéq tao jagaq idupne gen sujut nyembah Ie.
31Anak baine gen bebakti léq Ie,
dait ie pade gen beriteang mengenai Junjungan Saq Mulie turun-temurun.
32Tipaq bangse saq mudian teanakang gen teberiteang
bahwe Ie sampun nyelametang umat-Ne.
Currently Selected:
ZABUR 22: LAISAS
Highlight
Share
Copy
Want to have your highlights saved across all your devices? Sign up or sign in
