MATIUS 26

Rencane jari nyematéq Deside Isa

(Mrk. 14:1-2; Luk. 22:1-2; Yah. 11:45-53)

1Sewaktu Deside Isa selesé ngajahang selapuq hal nike, Ie bemanik léq pengiring-pengiring-Ne, 2#Kel. 12:1-27 “Side pade nenaoq, bahwe karing due jelo Hari Raye Paskah, dait Bije Manusie gen teserahang jari tepakuq léq kayuq salib.”

3Waktu nike imam-imam kepale dait pemimpin-pemimpin Yahudi bekumpul léq istane Imam Agung Kayapas. 4Ie pade berunding jari bau Deside Isa secare tedoq-tedoq dait nyematéq Ie. 5Laguq ie pade bebase, “Ndaq laksaneang hal nike waktu dengan-dengan kenyeke ngerayeang Paskah, adéq rakyat ndéq jari biur lantur.”

Deside Isa teminyakin siq minyak sengéh léq Betania

(Mrk. 14:3-9; Yah. 12:1-8)

6Sewaktu Deside Isa kenyeke léq Betania, léq gedéng Simon saq piranan sakit kuste, 7#Luk. 7:37-38 araq sopoq dengan nine parek tipaq Deside Isa, dait jauq sopoq botol pualam berisi minyak sengéh saq mahel. Léq waktu Deside Isa melinggih medaran, dengan nine nike noléngang minyak sengéh nike léq sirah Deside Isa. 8Pengiring-pengiring Deside Isa serioq hal nike, terus ie pade jari sili dait bebase, “Napi manpaatne minyak sengéh nike tesédaq-édaq?” 9“Minyak sengéh nike bau tejual siq aji saq mahel, terus képéngne bau tesedekahang tipaq dengan-dengan miskin!”

10Deside Isa wikan pikiran pengiring-pengiring-Ne, terus Ie bemanik, “Kembéq side pade piaq dengan nine niki susah? Ie ngelaksaneang hal saq solah tipaq Tiang. 11#Ul. 15:11 Dengan miskin tetep araq léq antare side pade, laguq Tiang niki ndéq seterusne araq bareng kance side pade. 12Ie minyakin Tiang siq minyak sengéh nike jari siepang pemakaman Tiang. 13Tiang badaq side: Setetune léq seantéro dunie, léq mbé juaq Kabar Solah léman Allah tesiarang, perbuatan dengan nine niki gen teceriteang éndah jari nginget ie.”

Yudas setuju behianat léq Deside Isa

(Mrk. 14:10-11; Luk. 22:3-6)

14Beterus salaq sopoq léman kedue olas pengiring-pengiring Deside Isa, saq aranne Yudas Iskariot, lumbar ojok imam-imam kepale. 15#Za. 11:12 Yudas bebase léq imam-imam kepale nike, “Napi saq side pade gen icanin tiang lamun tiang serahang Deside Isa tipaq side pade?” Terus imam-imam kepale nike ngerékéng telung dase képéng perak, dait serahangne képéng nike léq Yudas. 16Mulai léman waktu nike Yudas berusahe boyaq kesempatan jari behianat léq Deside Isa.

Deside Isa medaran keloran Paskah kance pengiring-pengiring-Ne

(Mrk. 14:12-21; Luk. 22:7-14, 21-23; Yah. 13:21-30)

17Léq jelo penembéq Perayaan Ruti Ndéq Beragi, pengiring-pengiring Deside Isa parek léq Ie, dait metakén, “Léq mbé Pelungguh kayun adéq tiang pade siepang Pelungguh keloran Paskah?”

18Jawab Deside Isa, “Pade lumbar ojok sopoq dengan léq kote, terus sampéang léq ie, ‘Manik Guru tiang, sampun waktune Tiang gen ngerayeang Paskah léq balénde bareng kance pengiring-pengiring Tiang.’ ”

19Pengiring-pengiring-Ne ngelaksaneang napi saq temanikang siq Deside Isa. Ie pade siepang keloran Paskah nike.

20Sesampun kekelem, Deside Isa dait kedue olas pengiring-Ne melinggih medaran keloran Paskah. 21Sewaktu ie pade kenyeke medaran, Deside Isa bemanik, “Tiang badaq side: Setetune salaq sopoq léq antare side pade gen behianat léq Tiang.”

22Sewaktu pengiring-pengiring Deside Isa dengah hal nike, ie pade jari aséq gati, beterus sopoq-sopoq mulai metakén léq Deside Isa, “Junjungan Saq Mulie, pasti ndéqne tiang saq temaksut nike?”

23 # Zbr. 41:10 Jawab Deside Isa, “Dengan saq bareng-bareng kance Tiang celep ruti léq dalem jembung, ie saq gen behianat léq Tiang. 24Mule Bije Manusie gen ninggal maraq saq tetulis léq Kitab Suci. Laguq celake gati dengan saq behianat léq Bije Manusie nike! Solahan dengan nike ndéq tebijeang!”

25Beterus Yudas saq behianat nike bejawab, “Pasti ndéqne tiang saq Guru maksut nike?”

Jawab Deside Isa, “Maraq nike basende!”

Perjamuan Tuhan

(Mrk. 14:22-26; Luk. 22:14-20; 1Kor. 11:23-25)

26Sewaktu ie pade medaran, Deside Isa bait ruti, beterus ngucapang do'e syukur. Sesampun nike, peleng-peleng-Ne ruti nike siq gading-Ne terus teicanin tipaq pengiring-pengiring-Ne, dait bemanik, “Silaq bait, terus kelorang; niki ragen Tiang.”

27Sesampun nike, Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike léq pengiring-pengiring-Ne, sambil bemanik, “Silaq selapuqde pade nginem léman cawan niki. 28#Kel. 24:8; Yer. 31:31-34 Séngaq niki daraq Tiang saq ngesahang perjanjian Allah – daraq saq tetumpahang tipaq dengan luwéq adéq dose-dose ie pade teampunin siq Allah. 29Tiang éndah badaq side: Tiang ndéq gen nginem anggur niki malik jangke dateng waktune Tiang gen nginem anggur saq baru bareng kance side pade dalem Kerajaan Bapa Tiang.”

30Beterus ie pade nyanyiang lagu pujian. Sesampun nike ie pade lumbar ojok Bukit Zaitun.

Nubuat mengenai Petrus gen nilas Deside Isa

(Mrk. 14:27-31; Luk. 22:31-34; Yah. 13:36-38)

31 # Za. 13:7 Beterus Deside Isa bemanik léq pengiring-pengiring-Ne, “Kelem niki éndah side pade gen pelai bilin Tiang. Séngaq léq Kitab Suci tetulis: Allah bemanik, ‘Tiang gen nyematéq pengarat nike, dait selapuq dombe-dombene gen bekelin sopoq kance saq lain.’ 32#Mat. 28:16 Laguq sesampun Tiang idup malik, Tiang gen senjuluq side pade ojok Galilea.”

33Petrus matur léq Deside Isa, “Timaq selapuqne bilin Pelungguh, tiang nénten!”

34Jawab Deside Isa léq Petrus, “Tiang badaq side: Setetune kelem niki éndah, sendéqman manuk ngungkung, side sampun telu kali nilas Tiang.”

35Laguq jawab Petrus, “Timaq tiang harus maté bareng kance Pelungguh, tiang nénten gen nilas Pelungguh!”

Dait selapuq pengiring saq lain éndah matur maraq nike.

Deside Isa bedo'e léq Getsemani

(Mrk. 14:32-42; Luk. 22:39-46)

36Sesampun nike, Deside Isa lumbar kance pengiring-pengiring-Ne ojok sopoq taoq aranne Getsemani. Léq derike Deside Isa bemanik léq pengiring-pengiring-Ne, “Tokol léq deriki, waktu Tiang lalo bedo'e léq derike.” 37Beterus Deside Isa ténaq Petrus dait kedue bije Zebedeus lumbar bareng kance Ie. Deside Isa mulai beridap osah dait aséq. 38Deside Isa bemanik léq pengiring-pengiring-Ne nike, “Angen Tiang sedih gati, idapne maraq gen maté doang. Ndot léq deriki, dait bejage-jage bareng Tiang.”

39Sesampun nike Deside Isa margi jaoqan sekediq, terus Ie sujut léq tanaq dait bedo'e, “Bapa, lamun bau, bait cawan penderitean niki léman Tiang laguq sampunang menurut keméléq Tiang, laguq menurut pekayunan Bapa.”

40Sesampun nike, Deside Isa tulak ojok taoq ketelu pengiring-Ne terus ie pade tedait kenyeke tindoq. Deside Isa bemanik léq Petrus, “Cume sejam doang side pade ndéq sanggup bejage kance Tiang? 41Bejage-jage dait bedo'e, adéq side pade ndéq ngalamin cobe. Mule roh side mélé ngelaksaneang saq kenaq, laguq side pade ndéq sanggup séngaq awakde nike lemah.”

42Karing sekali Deside Isa lumbar bedo'e, manik-Ne, “Bapa, lamun cawan penderitean niki harus Tiang terimaq, menengang pekayunan Bapa saq telaksane.” 43Sesampun nike Deside Isa tulak, terus dait-Ne malik pengiring-pengiring-Ne masih tindoq, séngaq ie pade ngantok gati.

44Deside Isa lumbar bilin ie pade terus bedo'e saq ketelu kaline dait ngucapang do'e saq pade. 45Sesampun nike Deside Isa tulak malik tipaq pengiring-pengiring-Ne, dait bemanik, “Napi side pade masih tindoq dait mentelah? Silaq pade serioq, sampun wayene Bije Manusie teserahang ojok ime dengan-dengan bedose. 46Pade ures! Silaq ite lumbar! Pade serioq! Dengan saq behianat léq Tiang sampun dateng!”

Deside Isa tebau

(Mrk. 14:43-50; Luk. 22:47-53; Yah. 18:3-12)

47Sewaktu Deside Isa masih bebaos, Yudas, salaq sopoq léman kedue olas pengiring-Ne nike dateng. Bareng kance Yudas araq éndah dengan luwéq jauq kléwang dait gegitik. Ie pade tesuruq siq imam-imam kepale dait pemimpin-pemimpin Yahudi. 48Penghianat nike sampun badaq tande niki tipaq ie pade, “Dengan saq tiang siduk, Ie uwah denganne. Bau Ie!”

49Sesampun dateng léq taoq nike, Yudas, langsung ojok Deside Isa dait matur, “Salam Bapaq Guru!” Terus ie siduk Deside Isa.

50Jawab Deside Isa, “Semeton, napi maksutde dateng ojok deriki?”

Beterus dengan luwéq nike maju dait bau Deside Isa. 51Salaq sopoq dengan léman dengan-dengan saq bareng Deside Isa serét kléwangne, terus ngerantek pelayan Imam Agung jangke pegat kentokne. 52Deside Isa bemanik léq pengiring-Ne nike, “Tamaqang kléwangde léq dalem sarungne. Séngaq sai juaq saq kadu kléwang gen ninggal siq kléwang. 53Side paran Tiang ndéq bau tunas tulung léq Bapa Tiang, adéq Ie gelis ngirim lebih léman due olas pasukan malaékat? 54Laguq lamun hal nike Tiang laksaneang, ndéq gen telaksane napi saq sampun tetulis léq dalem Kitab Suci bahwe mule harus telaksane hal maraq niki?”

55 # Luk. 19:47, 21:37 Beterus Deside Isa bemanik léq dengan luwéq nike, “Napi Tiang niki perampok, jangke side pade dateng jauq kléwang dait gegitik jari bau Tiang? Sebilang jelo Tiang ngajahang léq Gedéng Allah, dait side pade ndéq bau Tiang. 56Laguq mule seharusne maraq niki, adéqne telaksane napi saq tetulis siq nabi-nabi léq dalem Kitab Suci.”

Sesampun nike, selapuq pengiring-pengiring-Ne pelai bilin Deside Isa.

Deside Isa léq arepan Mahkamah Agame

(Mrk. 14:53-65; Luk. 22:54-55, 63-71; Yah. 18:13-14, 19-24)

57Dengan-dengan saq bau Deside Isa jauq Deside Isa ojok gedéng Imam Agung Kayapas. Léq derike ahli-ahli Taurat dait pemimpin-pemimpin Yahudi sampun bekumpul. 58Petrus ngiring Deside Isa léman jaoq jangke leléah gedéng Imam Agung. Dait sesampun tame ojok dalem, ie tokol bareng kance pengawal-pengawal. Petrus melét nenaoq berembé laun kejarianne selapuqne nike. 59Imam-imam kepale dait selapuq anggote Mahkamah Agame berusahe mauq kesaksian palsu adéq Deside Isa bau tehukum maté. 60Laguq ie pade ndéq mauq, timaq luwéq dengan saq maju jari saksi duste. Ahirne araq due dengan maju ojok julu. 61#Yah. 2:19 Ie pade bebase, “Dengan niki sampun bebaos bahwe, ‘Ie bau robohang Gedéng Allah, terus dalem telu jelo Ie sanggup penganjeng malik.’ ”

62Terus Imam Agung nike nganjeng dait bebase léq Deside Isa, “Pelungguh kayun jawab napi saq tetuduhang nike atao nénten?” 63Laguq Deside Isa tetep meneng. Imam Agung nike bebase malik léq Deside Isa, “Demi Allah saq idup, sampéang léq tiang pade napi tetu Pelungguh niki Almasih, Bije saq asalne léman Allah?”

64 # Dan. 7:13 Jawab Deside Isa, “Maraq nike basen pelungguh. Laguq Tiang badaq side waktu niki side pade gen serioq Bije Manusie melinggih léq sedi kanan Allah saq Mahekuase, dait rauh léq atas awan léq langit!”

65 # Im. 24:16 Make Imam Agung nike ngeroék-roék kuacene, dait bebase, “Ie menghine Allah! Ndéq perlu saksi malik. Side pade dengah mésaq ucapan nike menghine Allah.

66Mangkin berembé pendapet side pade?”

Jawab dengan-dengan nike, “Ie salaq, dait harus tehukum maté.”

67 # Yes. 50:6 Terus ie pade nijuh penjarupan Deside Isa, dait jagur Ie. Araq éndah saq nempélék Ie, 68dait bebase, “Cobaq badaq tiang pade, hai Almasih! Sai saq ngempuk Side?”

Petrus nilas Deside Isa

(Mrk. 14:66-72; Luk. 22:56-62; Yah. 18:15-18, 25-27)

69Petrus kenyeke tokol léq luah, léq leléah. Salaq sopoq pelayan nine dateng ngerapetin Petrus dait beketuan, “Tekan side éndah saq bareng kance Deside Isa dengan Galilea nike?”

70Laguq Petrus nilas léq julu selapuq dengan nike. “Tiang ndéq ngerti napi maksut side,” basen Petrus, 71terus Petrus lumbar ojok jebak. Pelayan nine saq lain éndah serioq Petrus, terus bebase léq dengan-dengan léq derike, “Onéq dengan niki araq bareng kance Deside Isa dengan Nazaret nike.”

72Laguq Petrus nilas malik dait besumpah, “Tiang tetu-tetu ndéq kenal dengan nike!”

73Ndéq ngonéq sesampun nike, dengan-dengan saq nganjeng léq derike dateng ngerapetin Petrus, dait bebase, “Pasti side salaq sopoq léman ie pade. Kentare gati agolde.”

74Beterus Petrus mulai besumpah-sumpah, dait bebase, “Tiang ndéq kenal Deside Isa nike!”

Léq waktu nike éndah manuk ngungkung. 75Terus Petrus jari inget bahwe Deside Isa sampun manikang hal nike léq ie, “Sendéqman manuk ngungkung, side sampun telu kali nilas Tiang.” Beterus Petrus sugul dait nangis siq aséqne.

Currently Selected:

MATIUS 26: LAISAS

Highlight

Copy