LUKAS 10

Junjungan Saq Mulie Deside Isa ngutus pituq pulu pengiring-Ne

1Sesampun nike, Junjungan Saq Mulie Deside Isa piléq pituq pulu pengiring saq lain, terus ie pade teutus due-due siq Deside Isa jari senjuluq Ie ojok sebilang kote dait taoq saq gen Ie rauhin. 2#Mat. 9:37-38 Manik-Ne tipaq ie pade, “Saq tepataq mule luwéq, laguq tukang pataqne cume sekediq. Keranaq nike tunas léq Épéne adéq Ie ngirim tukang pataq jari mataq. 3#Mat. 10:16 Silaq pade lumbar! Tiang ngutus side pade maraq anak dombe ojok tengaq-tengaq serigale. 4#Mat. 10:7-14; Mrk. 6:8-11; Luk. 9:3-5 Ndaq jauq dompét atao takaq sangu, atao sepatu. Ndaq mentelah jari ngucapang salam tipaq sai juaq léq tengaq kelampande. 5Lamun side pade tame ojok sopoq balé, ucapang juluq, ‘Moge-moge damé balé niki.’ 6Lamun léq derike araq saq patut nerimaq damé, make salamde nike gen tetep léq ie. Laguq lamun ndéq, salamde nike gen tulak tipaq side. 7#1Kor. 9:14; 1Tim. 5:18 Ndot léq sopoq balé doang. Terimaq napi saq tesajiang tipaq side, séngaq dengan saq begawéan berhak nerimaq upaqne. Ndaq ngalih-ngalih léman sopoq balé ojok balé saq lain. 8Lamun side pade dateng ojok sopoq kote dait léq derike side pade tesambut secare bagus, kelorang napi saq tesajiang tipaq side. 9Selahang dengan-dengan sakit léq kote nike, dait badaq dengan-dengan léq derike, ‘Kerajaan Allah sampun rapet léq side.’ 10#Kis. 13:51 Laguq lamun side pade dateng léq sopoq kote dait léq derike side pade ndéq teterimaq, sugul ojok rurung-rurung léq kote nike dait ucapang maraq niki, 11‘Kerepuk kotende saq nekét léq naén tiang pade, tiang pade kerapang sebagé peringetan tipaq side. Laguq adéq side pade nenaoq Kerajaan Allah sampun rapet!’ 12#Kej. 19:24-28; Mat. 10:15, 11:24 Tiang badaq side: Léq jelo Kiamat, dengan-dengan kote Sodom dait Gomora gen molahan teampunin siq Allah ketimbang dengan-dengan léq kote nike!”

Kote-kote saq ndéq percaye

(Mat. 11:20-24)

13 # Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 “Celake side, kote Korazim! Dait celake side, kote Betsaida! Seandéne muqjizat-muqjizat saq tepiaq léq taoqde nike sampun tepiaq léq kote Tirus dait Sidon, pasti dengan-dengan léq derike sampun ngonéq betobat léman dose-dose ie pade, dait ngengadu kelambi dukecite serte noloq awu-awu léq atas ulu ie pade. 14Léq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade! 15#Yes. 14:13-15 Dait side, Kapernaum! Napi side paran, side gen teatasang jangke dateng langit? Ndéq! Malahan side gen tetetéh ojok dunie dengan maté!”

16 # Mat. 10:40; Mrk. 9:37; Luk. 9:48; Yah. 13:20 Beterus Deside Isa bemanik léq pengiring-pengiring-Ne, “Dengan saq dengahang side pade, artine ie dengahang Tiang. Dengan saq nolaq side pade, ie nolaq Tiang. Dait dengan saq nolaq Tiang, artine ie éndah nolaq Allah saq ngutus Tiang.”

Tulakne pituq pulu pengiring Deside Isa

17Waktu kepituq pulu pengiring nike tulak, angen ie pade cemoh gati. Terus ie pade matur, “Junjungan Saq Mulie, sétan-sétan éndah taat léq tiang pade lamun tiang pade préntah ie pade siq peséngan Pelungguh!”

18Jawab Deside Isa, “Tiang serioq Belis geriq léman langit maraq kisap. 19#Zbr. 91:13 Setetune, side pade sampun Tiang béng kuase adéq side pade bau ngicaq ulah dait teledu serte kuase jari nahen selapuq kekuatan musuh, sehingge ndéq araq saq gen bahayeang side pade. 20Timaq maraq nike ndaq gembire lantaran sétan-sétan taat léq side. Laguq solahan side pade gembire séngaq arande tecatet léq sorge.”

Ucapan syukur dait bahagie

(Mat. 11:25-27, 13:16-17)

21Léq waktu nike éndah, Deside Isa gembire séngaq tekuasein Roh Suci. Terus Ie bemanik, “Bapa, Tuhan saq nguasein langit dait gumi! Tiang ngucap syukur léq Deside séngaq selapuqne nike Deside rahasieang léq dengan-dengan saq pinter dait bijaksane, laguq Deside nyatayang tipaq dengan saq biase-biase. Nike saq nyenengang Bapa.

22 # Yah. 3:35, 10:15 Selapuq hal sampun teserahang siq Bapa tipaq Tiang. Ndéq araq sopoq dengan juaq saq kenal kance Bije, selain Bapa. Ndéq araq éndah saq kenal Bapa selain Bije; dait tipaq dengan-dengan saq Bije nike kayun nyatayang Bapa.”

23Beterus Deside Isa ngéngat andang pengiring-pengiring-Ne, dait bemanik tipaq ie pade secare husus, “Bahagie side pade séngaq sampun serioq saq side pade serioq mangkin niki. 24Tiang badaq side: Luwéq nabi dait raje melét serioq saq side pade serioq mangkin laguq ie pade ndéq serioq ie. Ie pade melét dengah saq side pade dengah mangkin niki, laguq ie pade ndéq dengah ie.”

Perumpamean dengan Samaria saq murah até

25 # Mat. 22:35-40; Mrk. 12:28-34 Léq sopoq waktu araq ahli Taurat nganjeng jari boyaq kesalaqan Deside Isa. Ie metakén, “Bapaq Guru, napi saq harus tiang laksaneang adéq bau nerimaq idup sejati dait kekel?”

26Jawab Deside Isa, “Napi saq tetulis léq Kitab Suci? Berembé pendapet side mengenai hal nike?”

27 # Im. 19:18; Ul. 6:5 Jawab dengan nike, “ ‘Kasihin Allah, Tuhan side siq segenep aténde, dait siq segenep jiwende, dait siq selapuq kekuatande, dait siq segenep akal budinde,’ dait ‘Kasihin sepadende manusie maraq side ngasihin diriqde mésaq.’ ”

28 # Im. 18:5 “Jawabande nike kenaq,” manik Deside Isa. “Laksaneang nike, make side gen idup.”

29Laguq ahli Taurat nike mélé pekenaq diriqne mésaq. Make ie metakén léq Deside Isa, “Sai saq teparan pade-pade manusie maraq tiag?”

30Jawab Deside Isa, “Araq sopoq dengan mame turun léman Yerusalem ojok Yeriko. Léq tengaq kelampan ie teserang perampok, terampas selapuq dowé bandene, tempuk jangke lelah, terus tebilin nyelangkar léq rurung dalem keadaan bakat saq parah. 31Léq waktu nike araq éndah sopoq imam liwat léq rurung nike. Sewaktu ie serioq dengan nike, ie mirik lampaq langan itoqan rurung. 32Maraq nike éndah sopoq dengan Lewi saq lampaq léq derike; sewaktu ie serioq dengan nike, ie mirik lampaq langan itoqan rurung. 33#2Hik. 28:15 Laguq sesampun nike sopoq dengan Samaria saq kenyeke bekelampan, liwat éndah léq derike. Sewaktu ie serioq dengan saq terampok nike, ie periak léq dengan nike. 34Ie rapetin dengan nike terus persiq bakat-bakatne siq anggur dait ngowatin kadu minyak, beterus bebetne bakat-bakat nike. Sesampun nike, taékangne dengan nike ojok bagalne mésaq, dait jauqne ojok taoq penginepan dait ngerawat ie. 35Léq jemaqne, ie ngebéng due képéng perak tipaq épén penginepan nike dait bebase, ‘Rawat ie, dait lamun araq biaye-biaye lain, gen tiang bayah laun lamun tiang tulak ojok deriki.’ ”

36Beterus Deside Isa nutuqang cerite nike dait beketuan niki, “Léman ketelu dengan nike, saq mbé side paran sepade manusie kance dengan saq terampok nike?”

37Ahli Taurat saq teketuan nike bejawab, “Dengan saq sampun nulung dengan nike.”

Deside Isa bemanik, “Silaq lumbar dait laksaneang maraq nike éndah!”

Deside Isa jangoq Mariam dait Marta

38 # Yah. 11:1 Beterus Deside Isa dait pengiring-pengiring-Ne ngelanjutang pemargian, beterus rauh léq sopoq dése. Léq derike araq dengan nine aranne Marta, pesilaq Deside Isa ojok baléne. 39Marta bedowé semeton nine aranne Mariam. Mariam niki tokol léq dékét Deside Isa dengahang pengajahan-pengajahan-Ne. 40Laguq Marta répot gati siq pegawéanne léq balé. Ie lumbar tipaq Deside Isa dait matur, “Junjungan Saq Mulie, kembéq Pelungguh nénten peduli tiang tealurang begawéan mésaq-mésaq siq Mariam? Manikang ie nulung tiang!”

41“Marta, Marta!” jawab Deside Isa. “Side kuatir dait répot mikirang luwéq hal; 42padahal saq penting cume sopoq. Mariam sampun piléq saq paling solah, saq ndéq gen tebait léman diriqne.”

Currently Selected:

LUKAS 10: LAISAS

Highlight

Copy