KISAH RASUL-RASUL 8

1Dait Saulus éndah seneng Stepanus tematéq.

Saulus nganiaye jemaah

Jelo nike éndah jemaah léq Yerusalem mulai teaniaye, sehingge ie pade selapuq, bepencar-pencar ojok selapuq daérah Yudea dait Samaria kecuali rasul-rasul. 2Dengan-dengan saq takut tipaq Allah nguburang Stepanus dait nangis éroq aséq.

3 # Kis. 22:4-5, 26:9-11 Laguq Saulus terus doang berusahe nganiaye jemaah. Ie lumbar léman balé saq sopoq ojok balé saq lainne, dait orosne sugul dengan-dengan beriman, terus tamaqne ojok dalem bui.

Kabar Solah léman Allah tesebarang léq Samaria

4Dengan-dengan percaye saq sampun bepencar nike beriteang Kabar Solah léman Allah nike ojok embé-embé. 5Pilipus lumbar ojok sopoq kote léq Samaria dait beriteang tipaq dengan-dengan léq derike mengenai Almasih saq tejanjiqang siq Allah. 6Waktu dengan-dengan dengah Pilipus bebaos dait ie pade serioq keajaipan-keajaipan saq ie piaq, luwéq léq antare ie pade saq perhatiang napi saq tesampéang siq Pilipus. 7Séngaq roh-roh jahat sampun sugul sambil nyurak-nyurak léman dengan luwéq saq tekuasein siq roh jahat. Dengan-dengan képaq dait démpang éndah luwéq saq teselahang. 8Make dengan-dengan léq kote nike cemoh gati.

9Léq kote nike araq sopoq dengan aranne Simon, saq léman laéq miaq dengan-dengan Samaria takjub siq ilmu séhérne. Ie ngaku diriqne bahwe ie dengan saq luar biase. 10Make selapuq dengan léq kote nike léman macem-macem golongan masyarakat sanget merhatiang ie. Ie pade bebase, “Dengan niki kuase léman Allah saq kesohor saq tesebut ‘Kuase Beléq’ nike.” 11Sampun ngonéq gati ie miaq ie pade takjub siq kekuatan séhérne, sehingge ie pade turut ie. 12Laguq Pilipus beriteang tipaq ie pade Kabar Solah mengenai Kerajaan Allah dait mengenai peséngan Deside Isa Almasih. Make ie pade percaye léq berite saq tesampéang siq Pilipus, terus ie pade tebaptis dengan-dengan mame dait dengan nine. 13Simon mésaq éndah percaye. Dait sesampun tebaptis, ie tetep turut Pilipus. Keajaipan-keajaipan saq telaksane miaq Simon jari bengaq.

14Rasul-rasul léq Yerusalem mirengang bahwe dengan-dengan Samaria sampun nerimaq Manik Allah. Keranaq nike ie pade ngutus Petrus dait Yahya ojok derike. 15Waktu Petrus dait Yahya nike dateng, ie pade do'eang dengan-dengan Samaria nike adéq ie pade mauq Roh Suci, 16séngaq léq waktu nike léq antare ie pade ndéqman araq sopoq dengan juaq saq nerimaq Roh Suci; ie pade baruq tebaptis dalem peséngan Junjungan Saq Mulie Deside Isa doang. 17Terus Petrus dait Yahya noloq ime ie pade léq atas dengan-dengan Samaria nike; make ie pade nerimaq Roh Suci.

18Simon serioq bahwe lantaran ime rasul-rasul tetoloq léq atas dengan-dengan nike, Roh Allah teicanin tipaq ie pade. Keranaq nike Simon jauq képéng tipaq Petrus dait Yahya, 19terus bebase, “Icanin éndah tipaq tiang kuase nike adéq lamun ime tiang tetoloq léq sai juaq, dengan nike gen nerimaq Roh Suci.”

20Laguq jawab Petrus, “Celake side dait képéngde! Side paran paice Allah bau tebeli siq képéng? 21Side ndéq bedowé bagian dalem pegawéan tiang pade, séngaq atén side ndéq lomboq léq arepan Allah. 22Jari, pade tobat léman kejahatande niki dait bedo'e tipaq Tuhan semoge Ie ngampunin niat aténde niki. 23Séngaq tiang taoq side penoq siq talon até dait dose léq dalem aténde.”

24Beterus Simon bebase, “Tulung tunasang tipaq Tuhan adéq ndéq sopoq juaq léman saq side pade ucapang nike telaksane léq tiang.”

25Sesampun ie pade nyampéang kesaksian dait beriteang manik Tuhan, Petrus dait Yahya tulak ojok Yerusalem. Dait léq dalem kelampan uléq, ie pade beriteang Kabar Solah nike léq luwéq kampung léq Samaria.

Pilipus kance sopoq pembeléq léman Etiopia

26Sopoq malaékat Tuhan bemanik léq Pilipus, “Silaq berangkat! Lumbar ojok lauq ojok langan saq hubungang Yerusalem dait Gaza.” Rurung nike sepi. 27-28Make Pilipus berangkat. Léq waktu nike araq sopoq pegawé istane Etiopia saq kenyeke dalem kelampanne tulak ojok negerine. Dengan nike pegawé tinggi saq betanggung jawab léq selapuq kesugihan Kandake, Ratu negeri Etiopia. Dengan nike sampun lumbar ojok Yerusalem jari beribadah tipaq Allah dait mangkin kenyeke tulak kadu keréte. Sewaktune melinggih léq atas kerétene nike ie bace kitab Nabi Yesaya. 29Roh Allah bemanik léq Pilipus, “Lumbar rapetin keréte nike.” 30Beterus Pilipus lumbar ngerapetin keréte nike, terus dengahne dengan nike bace kitab Nabi Yesaya. Pilipus beketuan léq ie, “Napi pelungguh ngerti saq pelungguh bace nike?”

31Jawab dengan nike, “Berembé tiang iniq ngerti, lamun ndéq araq saq jelasang léq tiang?” Beterus ie ténaq Pilipus taék ojok keréte dait melinggih bareng kance ie. 32#Yes. 53:7-8 Niki ayat-ayat saq tebace nike.

“Ie maraq dombe saq tegeroh jari tesembeléh,

maraq anak dombe saq ndéq ngembéq,

lamun bulune tegunting, maraq nike Ie ndéq ngucapang napi-napi.

33Ie tehine dait teperlakuang ndéq adil.

Nyawe-Ne tembot léman gumi

sehingge ndéq sopoq dengan juaq

saq bau nyeriteang mengenai keturunan-Ne.”

34Pembeléq léman Etiopia nike bebase léq Pilipus, “Tunas badaq tiang sai saq temaksut siq nabi nike? Diriqne mésaq atao dengan lain?” 35Make Pilipus éndah mulai becerite; ie kadu ayat-ayat nike jari penembéqne nyampéang Kabar Solah mengenai Deside Isa tipaq pembeléq nike. 36Léq tengaq kelampan, ie pade dateng léq sopoq taoq saq araq aiq. Terus pembeléq nike bebase, “Serioq nike, araq aiq! Napi saq masih kurang malik jari baptis tiang?”

[37Pilipus bebase, “Lamun pelungguh percaye sepenoq angen, pelungguh kanggo tebaptis.”

Basen pembeléq Etiopia nike, “Tiang percaye Deside Isa Almasih Bije saq asalne léman Allah.”]

38Beterus ie suruq kerétene mentelah; dait deduaqne, Pilipus dait pembeléq nike, turun ojok dalem aiq terus Pilipus baptis pembeléq nike. 39Sewaktu ie pade sugul léman aiq, Roh Tuhan bait Pilipus léman derike. Pembeléq Etiopia nike ndéq serioq ie malik. Siq senengne pembeléq nike ngelanjutang kelampanne. 40Selung-selung Pilipus sampun araq léq Asdod. Dait sewaktu ie ngelanjutang kelampanne, ie beriteang Kabar Solah mengenai Deside Isa léq selapuq kote jangke ie dateng léq Kaisarea.

Currently Selected:

KISAH RASUL-RASUL 8: LAISAS

Highlight

Copy