KISAH RASUL-RASUL 4

Petrus dait Yahya léq arepan Mahkamah Agame

1Léq waktu Petrus dait Yahya masih bebaos kance dengan-dengan nike, imam-imam kepale dait kepale pengawal Gedéng Allah kance dengan-dengan Saduki dateng ojok Petrus dait Yahya. 2Ie pade menggah gati séngaq Petrus dait Yahya bebase léq dengan-dengan bahwe Deside Isa sampun idup malik léman ninggal. Dait nike buktiang bahwe dengan ninggal gen idup malik. 3Make ie pade bau kedue rasul nike beterus tamaqne ojok dalem bui. Dait lantaran sampun peteng, make Petrus dait Yahya tetahen léq derike jangke jemaqne. 4Laguq dengan-dengan saq sampun dengah pengajahan rasul-rasul nike, luwéq saq percaye. Make sayan luwéq jumlah ie pade, jangke kire-kire lime iyu dengan.

5Jemaqne tokoh-tokoh Mahkamah Agame, pemimpin-pemimpin Yahudi dait ahli-ahli Taurat bekumpul léq Yerusalem. 6Ie pade bedait kance Imam Agung Hanas, Kayapas, Yahya, Aleksander, dait selapuq saq termasuk keluarge Imam Agung nike. 7Petrus dait Yahya tejauq ngadep ie pade, terus ie pade beketuan, “Berembé entane side pade nyelahang dengan képaq nike? Kadu kekuatan napi atao kadu kekuasean léman sai side pade laksaneang nike?”

8Petrus, saq tekuasein siq Roh Suci, bejawab, “Bapaq-bapaq, pemimpin-pemimpin bangse dait pemimpin-pemimpin Yahudi! 9Tiang pade teadilin jelo niki lantaran ngelaksaneang hal saq kenaq jari nulung sopoq dengan képaq, dait lantaran Bapaq-bapaq mélé nenaoq berembé dengan nike teselahang. 10Nah, Bapaq-bapaq senamian harus nenaoq, selapuq bangse Israel éndah harus nenaoq bahwe dengan niki nganjeng mangkin niki siq awak saq séhat lantaran teselahang dalem peséngan Deside Isa, dengan Nazaret nike. Bapaq-bapaq sampun pakuq Deside Isa léq kayuq salib, laguq Allah sampun ngidupang Ie malik. 11#Zbr. 118:22 Deside Isa niki saq temaksut siq ayat dalem Kitab Suci,

‘Batu saq tetetéh siq side tukang-tukang bangunan,

sampun jari batu saq paling utame.’

12Cume langan Deside Isa doang dengan teselametang. Séngaq léq seantéro dunie léq antare manusie ndéq araq sopoq dengan lain juaq saq mauq kekuasean léman Allah jari nyelametang ite.”

13Anggote-anggote Mahkamah nike bengaq serioq ketabahan Petrus dait Yahya, séngaq ie pade nenaoq bahwe kedue rasul nike dengan-dengan biase saq pendidikanne rendah. Beterus ie pade sadar bahwe kedue rasul nike dengan-dengan saq ngiring Deside Isa. 14Laguq ie pade ndéq bau ngucapang napi-napi, séngaq dengan saq sampun teselahang nike araq nganjeng léq derike léq julun ie pade bareng kance Petrus dait Yahya. 15Make ie pade suruq kedue rasul nike sugul léman ruang sidang, beterus ie pade berunding. 16Ie pade bebase, “Napi saq harus ite piaq tipaq dengan-dengan niki? Selapuq dengan saq ndot léq Yerusalem sampun nenaoq bahwe keajaipan saq luar biase niki, telaksaneang siq deduaqne. Ite ndéq bau tilas nike. 17Laguq adéq hal nike ndaq sayan nyebar léq antare dengan-dengan, silaq ite ancem ie pade adéq ndéq kanggo malik bebaos tipaq sopoq dengan juaq siq peséngan Deside Isa.”

18Make ie pade ngempoh kedue rasul nike tame malik, dait badaqang bahwe ie pade ndéq kanggo gati nyebut malik atao ngajahang siq peséngan Deside Isa.

19Laguq jawab Petrus dait Yahya, “Silaq pikir mésaq napi saq kenaq léq arepan Allah: turut préntah Bapaq-bapaq atao turut préntah Allah. 20Séngaq tiang pade ndéq tao engkah ngeraos mengenai napi saq sampun tiang pade serioq dait dengah mésaq.” 21Anggote-anggote Mahkamah nike ndéq mauq sopoq alasan jari ngukum Petrus dait Yahya. Jari ie pade ngancem kedue rasul nike, beterus deduaqne telepas, séngaq selapuq dengan mulieang Allah lantaran keajaipan nike. 22Dengan saq teselahang siq muqjizat nike sampun petang dase taun lebih umurne.

Do'e Jemaah

23Sesampun Petrus dait Yahya tebébasang, ie pade tulak ojok batur-batur ie pade dait nyeriteang selapuq saq tesampéang siq imam-imam kepale dait pemimpin-pemimpin Yahudi nike léq ie pade. 24#Kel. 20:11; Neh. 9:6; Zbr. 146:6 Sesampun batur-batur ie pade dengahang hal nike, siq sopog angen ie pade bedo'e tipaq Allah. Ie pade matur, “Tuhan, Deside saq cipteang langit dait gumi, segare dait selapuq isine. 25#Zbr. 2:1-2 Siq Roh Suci, Deside sampun bemanik langan leluhur tiang pade, Daud, nike hambe Deside; Deside bemanik,

‘Kembéq bangse-bangse sili;

kembéq suku-suku bangse miaq rencane saq ndéq araq manpaatne?

26Raje-raje dunie besiep-siep gen perang, dait

pare pemimpin besopoq ngelawan Tuhan dait ngelawan Almasih-Ne.’

27 # Mat. 27:1-2; Mrk. 15:1; Luk. 23:1, 7:11; Yah. 18:28-29 Séngaq mule Herodes dait Pontius Pilatus sampun ngaraqang sangkep kance dengan bangse-bangse lain dait kance dengan-dengan Israel léq kote niki. Ie pade bedait jari ngelawan Deside Isa, Hambe Deside saq suci nike, saq sampun Deside sahang jari Almasih. 28Ie pade besopoq jari ngelaksaneang selapuq hal, saq Deside sampun tentuang bejulu bahwe nike gen telaksane. Dait Deside tentuang nike siq kekuasean dait pekayunan Deside mésaq. 29Mangkin, Tuhan, cingakin berembé ie pade ngancem tiang pade. Dait ijinang tiang pade, hambe-hambe Deside niki, nénten takut beriteang Manik Deside nike. 30Tunas adéq tiang pade bau nyelahang dengan sakit dait miaq keajaipan-keajaipan dait tande-tande siq peséngan Deside Isa, Hambe Deside saq suci nike.”

31Sesampun ie pade inggas bedo'e, taoq ie pade bekumpul nike inggur. Ie pade selapuq tekuasein siq Roh Suci, dait mulai bani ngeraos mengenai Manik Allah.

Selapuqne bareng-bareng

32 # Kis. 2:44-45 Selapuq dengan saq percaye nike idup sopoq angen dait sopoq jiwe. Ndéq araq sopoq dengan juaq léman ie pade anggep bahwe napi saq ie épéang jari dowéne mésaq. Napi juaq saq araq léq ie pade, ie pade kadu bareng-bareng. 33Siq kuase saq beléq, rasul-rasul nike ngebéng kesaksian bahwe Junjungan Saq Mulie Deside Isa sampun idup malik. Make ie pade idup dalem rahmat saq belimpah-limpah. 34Dait ndéq araq sopoq dengan juaq léq antare ie pade saq kekurangan napi-napi. Séngaq ie pade saq bedowé tanaq atao balé, jual tanaq atao balé ie pade; beterus képéng léman hasil jual tanaq atao balé nike ie pade jauq 35dait ie pade serahang ojok rasul-rasul. Beterus képéng nike tebagi-bagiang tipaq sebilang dengan saq merluang.

36-37Maraq nike éndah Yusup. Ie jual tanaqne, beterus képéngne ie jauq dait serahangne ojok rasul-rasul. Yusup nike sopoq dengan keturunan Lewi léman Siprus; ie éndah tesebut siq rasul-rasul nike Barnabas (artine Penghibur).

Currently Selected:

KISAH RASUL-RASUL 4: LAISAS

Highlight

Copy