Markus 13

Yesus 'o kanau mangale Ma Jou'ongu Madutu 'ai Wala ya ruba

(Mat. 24:1-2; Luk. 21:5-6)

1Wakutu Yesus 'o sisoi'i tala Ma Jou'ongu Madutu 'ai Wala, 'age 'Ai me-mete'e matengo 'o kanau, “Guru, oḏi'i Ma Jou'ongu Madutu 'ai Wala re ma wala-wala lai rousu re ma maḏi-maḏi lamo'o!”

2Yesus 'a sangoro, “Ngana no oḏi'i wala-wala lai rousu gena-ge 'i lamo'o masala. Ḏuanga i'a, maḏi rimoi i'a moi ua, 'age 'i ma'u fato re maḏi ma lelegu, mo-moini 'i perego.”

Susa re Sangisara

(Mat. 24:3-14; Luk. 21:7-19)

3Gena ḏua, Yesus 'o tagi toma Polono Zaitun, 'o tegoro toma ngi'i ga'a 'i madalaḏi ra Ma Jou'ongu Madutu 'ai Wala. 'A Petrus, Yakobus, 'a Yohanes re 'a Andreas ananga 'aḏi sapolo masiretene ra Unanga 'aḏi mau sano. 4Ananga 'aḏi sano ra Yesus, “Jou, no siajele ra ngomi, ngau moju mo-moini gena-ge 'i dadi? Na'o ma 'orasa enanga 'i ngadolo rema nana'o 'oru?”

5Yesus 'o sangoro, “Ma'istiari ino, awa-awa ngowa'a 'aḏi sihaga ngini. 6'Age rema ngowa'a manga repe ḏuanga i'a 'aḏi sapolo re 'aḏi pake Ngoi 'ari lomanga, ‘Ngoi nena-ne Unanga ḏua!’ singadolo 'aḏi sihaga ngowa'a repe. 7Na'o ngini ni 'isene sanapanga ma iḏingi re ni 'isene habari-habari parangi, ngini ni mojongo awa. Mo-moini gena-ge balasu 'i dadi, mada'a kiamata ma 'orasa 'i ngadolo nyangu! 8Bangsa rimoi ma'u parangi bangsa lelegu, re nagara rimoi ma'u parangi nagara lelegu. Toma ngi'i le'a ḇato 'i dadi ngowa'a repe 'aḏi matai sawini re 'i dadi wusu. Mo-moini gena-ge aro ma mulaingi ma tero sa'olo were'a mi 'orasa ma ḏe-ḏegoro i'a sa'i ri ngadolo, dadi mo mabasono go-goḏi.

9Ngini balasu ni ma'istiari sababu ngowa'a ni cako'o re ngowa'a ni gasa toma mahkamah-mahkamah re ni sanga ca'olo toma wala puji ma dara ḏi'i. Ngowa'a ḏuanga i'a 'aḏi gasa ngini sitalaḏi toma ngowa'a la-lamo'o re 'olana-'olana sababu ngini Ngoi 'ari me-mete'e. Toma 'orasa gena-ge, ngini ni sanga donga rimoi di'a ni pula'a sakisi mangale Ngoi ra ananga gena-ge.#Mat. 10:17-20; Luk. 12:11-12 10Re Habari Roanga ra Ma Jou'ongu Madutu ino balasu singadolo siḏa toma bangsa mo-moini, kara kiamata 'i ngadolo. 11Na'o ngini sanga cako'o re 'aḏi gasa ngini toma juruhakimi, ninga 'akala re sinyingara 'i kangela awa mangale 'oru ngini balasu ni kanau. Siajele ḇato, sababu demo-demo gena-ge 'i sapolo taninga 'akala re sinyingara masiretene ua, mada'a 'i sapolo toma Ngagara 'Ofi-'Ofi ino. 12Gia nongoḏu masiretene 'aḏi ma'u pula'a sala, la ngowa'a lelegu ya'u sengene. Gena-ge 'i dadi ḏi'i toma ḇaḇa re ngowa'a. Ngowa 'olo 'aḏi 'isene riwara manga ngina re ḇaḇa. Ḏua ngowa 'olo 'aḏi sipula'a ngina re ḇaḇa toma mahkamah, la ya'u sengene ananga. 13Ngowa'a mo-moini ni emono ngini, sababu ngini gena-ge 'Ari me-mete'e. Mada'a 'a guna ḇato 'o matahana singadolo ma ḏo-ḏogumu; unanga gena-ge 'o sanga 'ahu kasingado-ngadolo i'a.”#Mat. 10:22

Ngowa'a ma Jira ga'a Ma Jou'ongu Madutu 'u emono

(Mat. 24:15-28; Luk. 21:20-24)

14“Mada'a wakutu ngini ni oḏi'i ‘Ngowa'a ma Jira ga'a Ma Jou'ongu Madutu 'u emono’ 'o made-de'oso toma enanga ma ngi'i ua#Dan. 9:27, 11:31, 12:11 ra Ma Jou'ongu 'ai Wala ma dara ('a guna ḇato 'o baca nubuata gena-ge, 'a tailako la-la!), ananga ga'a 'aḏi tegoro toma daeraha Yudea balasu 'aḏi wiḏi toma kie. 15Ngowa'a ga'a toma wala ma wanata, 'uci awa di'a 'o 'oro 'oru ḇato tai wala ma dara.#Luk. 17:31 16Ngowa'a ga'a tai guḏa, maḏibo awa di'a 'o 'oro 'ai juba. 17Toma 'orasa gena-ge, we-were'a—we-were'a remanga lese re ngina-ngina ga'a 'aḏi sisusu moju manga ngowa kiau, ananga gena-ge manga 'ahu kangela masala! 18Manyiata ra Ma Jou'ongu Madutu, la bahala gena-ge 'i dadi awa toma besa'a ma 'orasa. 19Toma 'orasa gena-ge, 'i dadi susa re sangisara lamo'o masala ga'a soi moi i'a mai ua 'i dadi nyangu, wakutu Ma Jou'ongu Madutu 'i sidadi dungia, singadolo toma 'orasa nange-ne, re 'i dadunu riwara.#Dan. 12:1; Ting. 7:14 20Na'o Ma Jou'ongu Madutu 'a siḇoko'o ua ma 'orasa gena-ge, marai matengo i'a mai ua nga'unu wo 'ahu moju. Mada'a Unanga 'a siḇoko'o ma 'orasa gena-ge sababu Unanga 'o dadalara 'Ai 'umata ga'a Unanga ro cumutu.

21Toma 'orasa gena-ge, na'o 'age rema ngowa'a matengo 'o kanau ra ngini, ‘Oḏi'i 'O Kristus unanga 'ane!’ bolo, 'age rema ngowa'a matengo ḏi'i 'o kanau ra ngini ‘Oḏi'i Unanga da'a!’ awa ni ngaku ngowa'a gena-ge. 22Sababu kristus-kristus sa-sakala re nabi-nabi sa-sakala ḏuanga i'a 'aḏi sapolo. Ananga gena-ge 'aḏi 'a'a 'ori i'a hera-heranga re didina'o-didina'o heranga di'a 'aḏi sihaga ngowa'a repe re na'o nyengara ananga 'aḏi sihaga Ma Jou'ongu Madutu 'ai 'umata, mada'a gena-ge 'i yoḏu'u! 23Dadi balasu ni ma'istiari mo-moini Ngoi to siajele ḏua ra ngini, mada'a gena-ge 'i dadi nyangu.”

Manusia ma Ngowa'a Nau'u 'o sapolo

(Mat. 24:29-31; Luk. 21:25-28)

24“Mada'a toma 'orasa gena-ge wakutu susa re sangisara togumu i'a, wangere ma la'o 'i dadi hafu-hafu re ngara 'i taḏusu;#Yes. 13:10; Yeh. 32:7; Yl. 2:10, 31, 3:15; Ting. 6:12

25re mumuḏungu toma diwanga ḏuanga i'a 'i matai turono, re kuasa-kuasa toma ngawa-ngawa ḏuanga i'a 'i matai kaco.#Yes. 34:4; Yl. 2:10; Ting. 6:13 26Toma 'orasa gena-ge, ngowa-ngowa'a 'aḏi oḏi'i Ngoi, Manusia Ma Ngowa'a Nau'u, dadunu to sapolo moju da'u diwanga tala to osama toma kakamo ma dara Rari kuasa lamo'o re Rari kabasarana.#Dan. 7:13; Ting. 1:7 27Re Ngoi to soma'a 'Ari mala'ekata-mala'ekata 'aḏi supu re 'aḏi lomu Ma Jou'ongu Madutu 'ai 'umata ga'a Unanga ro cumutu toma dungia ḇuḇuku rata, toma dungia ma didiki singadolo toma diwanga ma didiki.”

Do-doto'o mangale ate 'ara

(Mat. 24:32-35; Luk. 21:29-33)

28“Totoho la-la do-doto'o mangale ate 'ara: Na'o ma umanga ma 'alusu 'i 'ijo 'i supu ju'uda, ngini ni waro gena-ge 'i dadi nana'o 'orasa ngogoro ri co-cori. 29So'o gena ḏi'i, na'o ngini ni oḏi'i 'oru ga'a Ngoi ta siajele ḏua enanga 'i dadi, ngini na waro Ngoi 'ari ta-sapolo ma 'orasa ri co-cori madutu. 30Ni ngaku mode-mode'e 'Ari demo-demo nena-ne: Wakutu enanga gena-ge 'i dadi, ngowa'a ga'a 'aḏi 'ahu toma 'orasa nena-ne, 'aḏi sengene mo-moini nyangu. 31Diwanga re dungia ḏuanga i'a 'i iranga, mada'a Ngoi 'ari demo-demo 'i iranga ua kasingado-ngadolo i'a.”

Matengo i'a mai ua 'o waro ngau ma wangere bolo ca'olo muḏuo 'i ngadolo

(Mat. 24:36-44)

32“Mada'a matengo i'a mai ua 'o waro ma wangere ngau bolo ca'olo muḏuo: Mala'ekata-mala'ekata toma soroga mai ya waro ua, re Ma Jou'ongu Madutu 'ai Ngowa'a Nau'u masiretene mai 'a waro ua, pa'i 'Ari Ḇaḇa masiretene ḇato 'a waro.#Mat. 24:36 33Dadi ngini balasu ni majaga-jaga re ni ma'istiari, sababu ngini ni waro ua ngau kiamata ma 'orasa gena-ge 'i ngadolo. 34'Orasa gena-ge site-tero sa'olo matengo 'a sisoi'i tala 'ai wala re 'o tagi toma giḏanga. Unanga 'o soma'a 'ai falalomu sioḏi'i 'ai wala re sibalangu manga munara matengo re matengo. Re 'a sibererongo ḏi'i tai ngalana ma ja-jaga, ‘Jaga la-la ino.’#Luk. 12:36-38 35Sababu gena-ge, ngini balasu ni majaga-jaga sababu ngini ni waro ua ngau wala ma dutu 'o maḏibo: bae wangere so'o ne'o, bae utu golona i'a, bae cori wangere i'a, bolo ma wangere pilata. 36Na'o kage-kage wala ma dutu ro sapolo, awa singadolo ni otu moju. 37Ngoi to kanau pa'i ra ngini ḇato ua, mada'a toma ngowa'a mo-moini: balasu majaga-jaga!”

Currently Selected:

Markus 13: SNT

Highlight

Copy