Matias 28

Yesus dadunu 'o 'ahu moju

(Mrk. 16:1-10; Luk. 24:1-12; Yoh. 20:1-10)

1Sabata ma wangere palisi i'a migu ma wangere da-daini i'a moju, ngo Maria Magdalena re ngo Maria ma lelegu 'aḏi tagi ya oḏi'i kubu gena-ge.

2Kage-kage 'i dadi wusu lai siḏi madutu re Ma Jou'ongu Madutu 'ai mala'ekata 'o 'uci da'u soroga tala. Ḏua unanga 'o tagi 'a lulu maḏi 'o kubu ma da-damunu, re 'o tegoro toma re'u. 3Mala'ekata gena-ge 'ai jamani sa'olo ḇeḇelanga, re 'ai pakeanga 'i buḏo madutu. 4Sordado ga'a dadanu kubu gena-ge, ananga 'aḏi dadi mojongo madutu singadolo 'aḏi terewete, re maeta'a toma tana'a re dadi sa'olo ngowa'a sengene.

5Mala'ekata gena-ge 'o kanau toma we-were'a—we-were'a, “Ni mojongo awa! Ngoi to waro ngini disa Yesus, ga'a ngowa'a 'U sisalib. 6Unanga 'o cua 'ane. Unanga dadunu ro 'ahu moju sa'olo 'au nga'ene Ro kanau ḏua ra ngini. Ino ni oḏi'i ga'a ngowa'a ya sigare 'Ai mayeti, 7kara ni tagi ca-cautu ni siajele ra Unanga 'ai me-mete'e: ‘Unanga dadunu ro 'ahu moju re nange-ne Unanga ro tagi siḏa i'a da'a toma Galilea. I'a da'a kara ngini ni oḏi'i Unanga!’ 'Elingi 'ari habari gena-ge 'oru ga'a ngoi to kanau ra ngini nange-ne.”

8Dadi macautu i'a, we-were'a gena-ge ya sisoi'i tala kubu. Ananga gena-ge 'aḏi mojongo mada'a 'aḏi roanga masala, re ananga 'aḏi lalara di'a 'aḏi singadolo habari gena-ge ra Yesus 'ai me-mete'e.

9Kage-kage, Yesus 'o sapolo ma'u sanga we-were'a gena-ge, re 'O kanau, “Tabea!” Ḏua ananga 'aḏi macori i'a ra Unanga re 'aḏi sibo'olo 'ai rou kara 'aḏi silamo'o re siḏubuso Unanga. 10Yesus 'o kanau ra ananga, “Ni mojongo awa! Ni tagi re siajele ra Ngoi 'ari ioronongoḏu, la 'aḏi tagi da'a Galilea. I'a da'a ananga 'aḏi ma'u sanga ra Ngoi.”

Sordado ga'a dadanu kubu 'aḏi singadolo mangale 'oru ga'a 'i dadi ḏua

11Wakutu we-were'a 'aḏi tagi moju di'a siajele ra Yesus 'ai me-mete'e, sordado nga muḏuo i'a ga'a dadanu kubu 'aḏi maḏibo i'a da'a limau, re 'aḏi siajele toma 'imam-'imam ma sae'e 'oru ga'a 'i dadi ḏua. 12'Imam-'imam ma sae'e re Yahudi manga bi-biri'i, ananga 'aḏi malomu re 'aḏi mafakati di'a pula'a pipisi ma lamo'o toma sordado ga'a 'aḏi dadanu kubu, 13'aḏi kanau, “Ngini balasu ni siajele, ‘ 'A Yesus 'ai me-mete'e ya tori'i 'Ai mayeti 'orasa utu i'a, wakutu ngomi matai otu.’ 14Re na'o ma gubernur 'a 'isene, ngomi ḏuanga i'a mi makanau ra unanga, la ngini sanga susa awa.”

15Ḏua sordado ga'a 'aḏi dadanu kubu, ya dawongo pipisi gena-ge, re ya si'a'a ma tero sa'olo 'aḏi sanga bererongo ra ananga. Re jarita gena-ge singadolo wangere nange-ne, ngowa'a Yahudi ya sija-jarita.

Yesus 'o masibaiti Tai me-mete'e

(Mrk. 16:14-18; Luk. 24:36-49; Yoh. 20:19-23; Som. 1:6-8)

16Yesus 'ai me-mete'e nga nyagi moi re matengo, ananga 'aḏi tagi toma Galilea ma polono rimoi, mete'e Yesus ro siajele ra ananga.#Mat. 26:32; Mrk. 14:28 17Wakutu ananga 'aḏi oḏi'i 'a Yesus, ananga 'aḏi silamo'o re siḏubuso Unanga. Mada'a mamuni'a 'aḏi wa-waḏunu. 18Yesus 'o macori i'a ra ananga re 'o kanau, “Kuasa mo-moini bae toma soroga, bae toma dungia gena-ge Ri sipula'a ra Ngoi. 19Sababu gena-ge, ni tagi toma bangsa mo-moini toma dungia sitabi donga, ni singadolo Habari mangale Ngoi, la ngowa'a 'aḏi dadi 'Ari me-mete'e. Ni baptis ananga gena-ge re siterongo Ḇaḇa 'ai lomanga, Ma Ngowa'a Nau'u 'ai lomanga, re Ma Ngagara 'Ofi-'Ofi ma lomanga.#Som. 1:8 20Re ni doto'o 'Ari me-mete'e gena-ge di'a 'aḏi 'ahu mete'e 'Ari parenta mo-moini ga'a Ngoi reta siajele pasala ḏua ra ngini. Re 'elingi nena-ne: Ngoi ḏuanga i'a tini sieanga i'a ua ngini, singadolo dungia nena-ne ma ḏo-ḏogumu.”

Currently Selected:

Matias 28: SNT

Highlight

Copy