Matias 15

'Adata toma ete re dotumu

(Mrk. 7:1-13)

1Ngowa'a Farisi toropo moi re guru-guru 'agama nga muḏuo i'a, ananga 'aḏi sapolo da'a limau Yerusalem ino ra Yesus, re 'aḏi sano ra unanga, 2“I'a sa'olo 'Ani me-mete'e 'aḏi mete'e ua nanga ete re dotumu manga 'adata? Wakutu ananga 'aḏi oromo, ya soso'o siḏa ua manga giama, gena-ge mete'e ua nanga 'atoranga!”

3Yesus 'a sangoro, “Re i'a sa'olo ngini ḏi'i ni mete'e ua Ma Jou'ongu Madutu 'ai parenta, la pa'i ni mete'e ninga ete re dotumu manga 'adata? 4Sababu Ma Jou'ongu Madutu ro kanau, ‘Silamo'o ninga ḇaḇa re ninga ngina.’ Re Unanga ro kanau ḏi'i, ‘ 'A guna ḇato 'o sosowini 'ai ḇaḇa bolo 'ai ngina, balasu 'o sanga hukumu sengene.’#Sup. 20:12, 21:17; Im. 20:9; Dad. 5:16 5Mada'a ngini ni sidoto'o, ‘ 'A guna ḇato nyengara 'o kanau tai ḇaḇa bolo tai ngina so'o ne: 'Oru ga'a ngoi balasu to pula'a ra ḇaḇa re ngina, gena-ge ngoi reta pula'a mo-moini sa'olo 'ari jou-jou ra Ma Jou'ongu Madutu.’ 6Dadi unanga gena-ge 'a silamo'o riwara 'ai ḇaḇa re ngina. Dadi sababu ninga ete re dotumu manga 'adata, ngini na si'u'ua Ma Jou'ongu Madutu 'ai parenta gena-ge. 7Ngini ngowa'a munafiki! Tero mode'e 'a Yesaya 'a sinubuata pasala ḏua mangale ngini: 8Ma Jou'ongu Madutu 'o kanau so'o ne:

‘Ngowa-ngowa'a gena-ge 'aḏi silamo'o Ngoi pa'i tamanga 'uḏu ma betu'u

mada'a tamanga 'akala re sinyingara 'i kiḏanga ra Ngoi.

9'I parasaja ananga gena-ge 'aḏi silamo'o re siḏubuso Ngoi;

sababu ananga manga do-doto'o pa'i manusia manga 'atoranga ḇato, ga'a 'i mete'e Ngoi 'ari do-doto'o ua!’ ”#Yes. 29:13

'Oru ga'a si'a'a ngowa'a 'aḏi dadi najis ra Ma Jou'ongu Madutu 'ai momina

(Mrk. 7:14-23)

10Gena ḏua, Yesus 'o 'aro'o ngowa'a manga repe 'aḏi sapolo ra Unanga re 'o kanau i'a ra ananga, “Ni 'isene la-la, la ni sahe. 11'Oru ḇato ga'a 'i osama toma madanga, enanga gena-ge 'i si'a'a ua ngowa'a matengo 'o dadi najis ra Ma Jou'ongu Madutu 'ai momina. Mada'a 'oru ga'a 'i supu toma madanga, enanga gena-ge 'i si'a'a ngowa'a matengo 'o dadi najis ra Unanga 'ai momina.”

12Ḏua 'Ai me-mete'e 'aḏi sapolo re 'aḏi kanau ra Unanga, “Jou na waro mangale ngowa-ngowa'a Farisi manga 'akala re sinyingara 'i gamamu wakutu ya 'isene Jou no kanau so'o gena-ge?”

13Yesus 'a sangoro, “ 'Oru ḇato ga'a 'Ari Ḇaḇa toma soroga 'A otomo ua, joro gena-ge ḏuanga i'a 'A wuru'u. 14Dadi awa ni kalesanga ngowa'a gena-ge, ananga gena-ge 'o bi-biri'i—bi-biri'i ga'a masihafu. Re na'o ngowa'a hafu matengo 'o tuda ngowa'a hafu, ma ḏo-ḏogumu tala ananga nga muḏiḏi 'aḏi masieta'a toma koti'i ma dara.”#Luk. 6:39

15Petrus 'o kanau, “Jou, tai'i na sitarangi 'ade-'ade nange-ge ma ngale ra ngomi.”

16Yesus 'o sangoro, “Ngini na waro nyangu ḏi'i enanga ma ngale?! 17Ngini ni sahe nyangu moju, 'oru ga'a 'i osama toma madanga ngadolo toma po'olo ma dara. Togumu i'a, enanga 'i supu tuwaḏi! 18Mada'a, 'oru ga'a 'i supu toma madanga, enanga gena-ge ma 'asala toma 'akala re sinyingara. Enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina.#Mat. 12:34 19Sababu toma 'akala re sinyingara 'i baolo 'ulungu ma jira, sisengene ngowa'a, su-sudala, tinikai, to-tori'i, sakisi sa-sakala ngowa'a, re sikanau ngowa'a. 20Enanga mo-moini gena-ge si'a'a ngowa'a matengo 'o dadi najis ra Ma Jou'ongu Madutu 'ai momina. Siḏibo ḏi'i, oromo kama soso'o giama ua, enanga gena-ge si'a'a ua ngowa'a matengo 'o dadi najis ra Ma Jou'ongu Madutu 'ai momina.”

We-were'a Yahudi ua matengo 'ami ngo-ngaku

(Mrk. 7:24-30)

21Gena ḏua, Yesus 'a sisoi'i tala ngi'i gena-ge, re 'O tagi toma daeraha co-cori limau Tirus re limau Sidon. 22We-were'a Kana'an matengo toma daeraha gena-ge mo sapolo ra Yesus re mo poa-poa'a, “Ma Jou, 'Olana Daud 'ai ju'uda,#15:22 'Olana Daud 'ai ju'uda ma tero sa'olo: Daud 'ai Ngowa'a Nau'u. No sijumu 'Ani 'akala re sinyingara ma la-la ra ngoi! 'Ari ngowa'a were'a roh ma jira mi dungosama, dadi munanga mo sangisara masala.”

23Yesus kama kanau bale moi i'a mai ua toma we-were'a gena-ge. Dadi 'Ai me-mete'e 'aḏi sapolo ra Unanga re 'aḏi kanau, “Jou, soma'a we-were'a gena-ge mo tagi, munanga mo 'a'a nyiwere ra ngene nanga ḏuḏunu.”

24Yesus 'a sangoro toma we-were'a gena-ge, “Ngoi pa'i sanga 'utusu toma ngowa-ngowa'a Israel ḇato ga'a ma tero sa'olo doba ga'a 'i iranga ngo'omo.”

25We-were'a gena-ge sapolo mo maḏipolono ra Yesus 'ai biono re mo kanau, “Ma Jou no riono ngoi!”

26Yesus 'a sangoro, “Enanga 'i rousu ua wo 'oro ngowa 'olo manga ngo-ngoromo, kara wa pula'a di'a nunu'u.”

27We-were'a gena-ge mo kanau, “Tero mode'e Ma Jou, mada'a nunu'u mai 'i sanga oromo ngo-ngoromo ma so-sorono ga'a 'i eta'a tala ra madutu 'ai meja ma 'aḏu.”

28Ḏua Yesus 'o kanau i'a ra munanga, “Meme 'ani ngo-ngaku lai lamo'o. Sababu gena-ge, 'oru ga'a ngana ni mau, enanga 'i dadi.” Toma 'orasa gena-ge ḏua, 'ami ngowa'a were'a remo la.

Yesus 'o si-la ngowa'a siḏi manga repe

29Ḏua Yesus 'a sisoi'i tala ngi'i gena-ge, re 'o tagi mete'e talaga Galilea ma 'uḏu. Gena ḏua, Unanga 'o materu ie toma polono rimoi kara 'o tegoro. 30Ngowa'a kawasa 'aḏi sapolo gasa ngowa'a cug̱a, ngowa'a hafu, ngowa'a ḇolo, ngowa'a mou, re ngowa'a siḏi ma lelegu manga repe ḏi'i. Ngowa-ngowa'a siḏi gena-ge ananga ya'u sigare ra Yesus 'ai rou, re Unanga ya'u si-la mo-moini. 31Ngowa'a kawasa toma ngi'i gena-ge 'aḏi heranga madutu wakutu ananga 'aḏi oḏi'i masiretene ngowa'a mou raḏi kanau, ngowa'a ḇolo raḏi la, ngowa'a cug̱a raḏi tagi, re ngowa'a hafu raḏi oḏi'i. Ḏua ananga mo-moini 'aḏi puji re silamo'o Ma Jou'ongu Madutu ga'a ngowa'a Israel 'aḏi silamo'o re siḏubuso.

Yesus pula'a oromo ngowa'a nga cala rata

(Mrk. 8:1-10)

32Gena ḏua, Yesus 'o 'aro'o 'Ai me-mete'e kara 'O kanau ra ananga, “Tari 'akala re sinyingara 'i baolo dadalara toma ngowa'a kawasa nena-ne. Sababu ma di'ara wangere ro'ange ḏua ananga raḏi mamete'e ra Ngoi dadi nange-ne ananga manga ngo-ngoromo 'i moini ḏua. Ngoi to oḏu'u ananga 'aḏi maḏibo remanga sawini, sababu na'o so'o gena-ge awa-awa 'aḏi beberete toma ngo'omo ma golona.”

33Ḏua, 'Ai me-mete'e 'aḏi sangoro ra Unanga, “Ngi'i nena-ne 'i tiwongo i'a. Wo sanga le'a ngo-ngoromo di'a ngowa'a manga repe nena-ne?”

34Yesus 'o sano, “ 'Age roti ngai muḏuo i'a ra ngini?”

Ananga ya sangoro, “Ngai tumudingi re pa'i nyao'o 'alusu ngai muḏuo i'a ḇato.” 35Ḏua, Unanga gena-ge 'o soma'a ananga ngowa'a kawasa 'aḏi tegoro toma tana'a. 36Gena ḏua, Yesus 'a 'oro roti ngai tumudingi re ma nyao'o gena-ge re 'O sibere ie murasa ma la ra Ma Jou'ongu Madutu. Ḏua Unanga 'a poti-poti roti re nyao'o gena-ge re 'O sipula'a Tai me-mete'e di'a ya sibalangu toma ngowa'a kawasa. 37Ananga mo-moini 'aḏi oromo singadolo 'aḏi wunusu. Togumu i'a, Yesus 'ai me-mete'e ya lomu ma jingianga ya sanga pipigu tumudingi roma-romanga. 38Ngowa'a repe ga'a 'aḏi oromo toma 'orasa gena-ge, ananga gena-ge na-nau'u ḇato nga cala rata. We-were'a re ngowa 'olo siroimi ua. 39Gena ḏua, Yesus 'o soma'a ananga 'aḏi maḏibo, kara Yesus re 'Ai me-mete'e 'aḏi mabalene toma oti re 'aḏi sidete toma daeraha Magadan.

Currently Selected:

Matias 15: SNT

Highlight

Copy