Matias 13

'Ade-'ade mangale ngowa'a guḏa matengo 'o siare gisisi

(Mrk. 4:1-9; Luk. 8:4-8)

1Toma wangere gena-ge ḏi'i, Yesus 'o sisoi'i tala wala gena-ge, re 'O tagi da'a talaga Galilea ma 'uḏu, re 'o tegoro 'age. 2Unanga 'o malage toma oti, sababu ngowa'a repe 'u gowolo Unanga re ananga gena-ge 'aḏi made-de'oso toma talaga ma 'uḏu.#Luk. 5:1-3

3Ḏua Yesus 'o doto'o ma rupa ma repe ra ananga reo pake 'ade-'ade. Unanga 'o kanau, “ 'Age rema ngowa'a 'a'a guḏa matengo 'o tagi di'a 'a siare 'ai gisisi. 4Wakutu unanga 'a siare, 'age rema gisisi mamuni'a 'i eta'a toma ngo'omo ma 'uḏu. Ḏua namo diwanga 'i sapolo ya tubu'u simoini gisisi gena-ge. 5'Age mamuni'a ḏi'i 'i eta'a toma tana'a maḏi-maḏi. Gisisi gena-ge matai konyo lai caiti, sababu ma tana'a pa'i ceka'a ua. 6Mada'a wakutu wangere ma la'o pere ie ya 'erese go-gonyo gena-ge ḏua 'i wa'alo caiti singadolo 'i ngonono sababu ma 'utu'u 'i osama ngido ua. 7'Age mamuni'a ḏi'i 'i eta'a toma rurubu dodowo'o ma golona. Ḏua rurubu dodowo'o gena-ge 'i konyo re ya pilatu gisisi ma go-gonyo gena-ge singadolo 'i sengene. 8Mada'a 'age mamuni'a ḏi'i 'i eta'a toma tana'a ma la-la'eme, ḏua 'i konyo re 'i sowo'o. 'Age ma sowo'o sidu'o sou latu moi, 'age ma sowo'o sidu'o sou nyagi rarama, re 'age ma sowo'o sidu'o sou nyagi ro'ange. 9Na'o reninga ngau'u, ni 'isene la-la.”

I'a sa'olo Yesus 'o pake 'ade-'ade

(Mrk. 4:10-12; Luk. 8:9-10)

10Togumu i'a Yesus 'ai me-mete'e 'aḏi masebanga i'a ra Unanga re 'aḏi sano, “I'a sa'olo Jou no pake 'ade-'ade, na'o no kanau toma ngowa'a kawasa?”

11Yesus 'a sangoro, “Ngini reni sanga cocatu di'a ni sahe 'ori i'a go-gogono mangale Soroga ma Pareta,#13:11 “Soroga ma Pareta” ma tero Ma Jou'ongu Madutu 'ai Pareta. mada'a toma ngowa'a lelegu so'o gena ua. 12Sababu 'a guna ḇato ro sanga wo-waro mangale 'ori i'a go-gogono, Ma Jou'ongu Madutu 'a sidogo ḏi'i wo-waro gena-ge singadolo pai-pai'i. Mada'a 'a guna ḇato 'o sanga wo-waro ua mangale 'ori i'a go-gogono; 'oru ḇato, kalaha unanga ra sanga pa'i wo-waro ceka'a ua ḇato, gena-ge Ma Jou'ongu Madutu 'a 'oro ḏi'i.#Mat. 25:29; Mrk. 4:25; Luk. 8:18, 19:26 13Ma sababu gena-ge, Ngoi to pake 'ade-'ade na'o to kanau toma ngowa'a kawasa. Sababu kalaha ananga nga'unu 'aḏi oḏi'i, ananga ya sahe ua 'oru ga'a 'i dadi. Kalaha ananga nga'unu ya 'isene, ananga ma tero sa'olo ngowa'a ga'a ya 'isene ua, re ya sahe ua ma maksudu.

14Dadi nabi Yesaya 'ai nubuata 'i sitotomo ra ananga. Ma Jou'ongu Madutu 'o kanau,

‘Ananga 'aḏi 'isene tau-taunu

mada'a ya sahe ua.

Ananga 'aḏi totoho tau-taunu,

mada'a ananga ya sahe ua, 'oru ga'a 'i dadi.

15Sababu bangsa nena-ne manga 'akala re sinyingara lai te'e,

manga ngau'u ri popongolo,

re manga la'o ri ruutu.

Gena-ge 'i dadi, la remanga la'o ya oḏi'i ua,

remanga ngau'u ya 'isene ua,

re ananga manga 'akala re sinyingara ya sahe ua.

Dadi awa ananga 'aḏi ḏibo ra Ngoi,

la 'aḏi dawongo 'Ari salamata.’ ”#Yes. 6:9-10

16Yesus 'o kanau Tai me-mete'e, “Mada'a ngini bara'utungu madutu, sababu ngini mode-mode'e ni oḏi'i re ni 'isene. 17Ni ngaku mode-mode'e 'Ari demo-demo nena-ne: Nabi re ngowa'a loasa re banari manga repe 'aḏi nyafusu ya oḏi'i 'oru ga'a ngini ni oḏi'i nange-ne, mada'a ananga ya oḏi'i ua. Ananga nyafusu 'aḏi 'isene 'oru ga'a ngini ni 'isene nange-ne, mada'a ya 'isene ua.”#Luk. 10:23-24

Yesus 'a sitarangi 'ade-'ade mangale ngowa'a guḏa matengo 'o siare gisisi

(Mrk. 4:13-20; Luk. 8:11-15)

18“ 'Isene, Ngoi to sitarangi 'ade-'ade mangale ngowa'a guḏa matengo 'o siare gisisi: 19Gisisi ga'a 'i eta'a toma ngo'omo ma 'uḏu, ma tero sa'olo ngowa'a ga'a 'isene habari mangale Soroga ma Pareta,#13:19 “Soroga ma Pareta” ma tero Ma Jou'ongu Madutu 'ai Pareta. Gena-ge ma tero toma bu-bula'a 24, 31, 33, 44, 45, 47, 52. mada'a ya sahe ua. Dadi 'Iblisi sapolo re ya ra-rabasa 'oru ga'a 'i siare ḏua tamanga 'akala re sinyingara ma dara. 20Gisisi ga'a 'i eta'a toma tana'a maḏi-maḏi, ma tero sa'olo ngowa'a 'aḏi 'isene habari gena-ge, re jau-jau ya dawongo remanga roanga tamanga 'akala re sinyingara, 21mada'a habari gena-ge 'i utu'u ua tamanga 'akala re sinyingara singadolo 'i tahana ti'ara ua. Dadi wakutu 'aḏi sanga susa re sangisara bolo sanga sikisa, sababu 'aḏi ngaku habari, ananga jau-jau 'aḏi celolo ḏuḏunu i'a. 22Gisisi ga'a 'i eta'a toma rurubu dodowo'o ma sigolona, ma tero sa'olo ngowa'a ga'a 'aḏi 'isene habari gena-ge, mada'a 'aḏi dodato mangale manga 'ahu, re 'aḏi mau manga 'ahu pai-pai'i. Sababu gena-ge habari gena-ge 'i 'ahu peletoro tamanga 'akala re sinyingara singadolo 'i sowo'o ua. 23Mada'a gisisi ga'a 'i eta'a toma tana'a ma la-la'eme, ma tero sa'olo ngowa'a ga'a 'aḏi 'isene habari gena-ge, ananga ya sahe re ma sowo'o lai repe: 'age ma sowo'o sidu'o soi latu moi, 'age ma sowo'o sidu'o soi nyagi rarama, re 'age ḏi'i ma sowo'o sidu'o soi nyagi ro'ange.”

'Ade-'ade mangale 'usumu 'i konyo toma gandum ma sigolona

24Yesus 'o carita 'ade-'ade ma lelegu rimoi toma ngowa'a repe. Unanga 'o kanau, “Wakutu Soroga ma Pareta 'i ngadolo, gena-ge ma tero sa'olo 'ade-'ade so'o ne: Ngowa'a guḏa matengo 'o siare 'ai gisisi ma la-la tai guḏa. 25Mada'a wakutu lobi'i rimoi re ngowa'a raḏi matara otu mo-moini, ngowa'a guḏa 'ai lawana 'o sapolo siare gisisi 'usumu toma gandum ma sigolona. Gena ḏua, unanga ro tagi. 26Toma 'orasa gisisi-gisisi gandum gena-ge 'i konyo re ma gutingana mai ri supu, gisisi 'usumu mai 'i konyo ma'u mete'e reo gandum ḏi'i. 27Ḏua guḏa ma dutu 'ai budaka-budaka, 'aḏi sapolo, re 'aḏi kanau, ‘Tuanga, mode'e bolo ua, tuanga no siare tani guḏa gisisi ma la-la?! 'Oru ma sababu singadolo 'usumu ḏi'i mai ri konyo ma'u mete'e gandum.’ 28Guḏa ma dutu gena-ge 'o sangoro, ‘Gena-ge 'o lawana ma munara.’

Mada'a 'ai budaka-budaka 'aḏi sano moju, ‘Tuanga no nyengara ngomi tagi ma wuru'u 'usumu gena-ge?’

29Unanga 'a sangoro, ‘Awa, sababu na'o ni wuru'u 'usumu gena-ge, marai ma gandum mai mete'e wuru'u ḏi'i. 30Sieanga ḇato 'usumu gena-ge 'i konyo singadolo 'orasa 'utu'u gandum. Maha ngoi to kanau toma ngowa'a gu-gutu'u: ni lomu siḏa ma 'usumu, piri'u re na tau'u. Gena ḏua, ngini ni 'utu'u re lomu gandum re ni singati'i toma titila.’ ”

'Ade-'ade mangale gisisi ma moi'i ngai moi lai 'alusu madutu

(Mrk. 4:30-32; Luk. 13:18-19)

31Yesus 'o carita 'ade-'ade ma lelegu rimoi ḏi'i toma ngowa'a repe. Unanga 'o kanau, “Wakutu Soroga ma Pareta 'i ngadolo, gena-ge ma tero sa'olo 'ade-'ade so'o ne: Ngowa'a matengo 'o 'oro gisisi ma moi'i ngai moi lai 'alusu madutu re ya so'ana tai guḏa. 32Kalaha gisisi ma moi'i gena-ge 'i 'alusu madutu, mada'a na'o ri konyo enanga ḏuanga i'a 'i dadi joro lai lamo'o masala. Enanga 'i dadi ate ḏu moi singadolo namo diwanga matai 'a'a ma ngi'i toma uma-umanga.”

'Ade-'ade mangale ragi

(Luk. 13:20-21)

33Yesus 'o carita moju 'ade-'ade lelegu rimoi ḏi'i toma ngowa'a repe. Unanga 'o kanau, “Wakutu Soroga ma Pareta 'i ngadolo, gena-ge ma tero sa'olo 'ade-'ade so'o ne: We-were'a matengo mo 'oro ragi kara masicapuru reo tarigu litere nyagi rata singadolo enanga mo-moini 'i ramasa.”

Ma sababu Yesus 'o pake 'ade-'ade

(Mrk. 4:33-34)

34Wakutu Yesus 'o doto'o ngowa'a kawasa nange-ge, Unanga pa'i 'o pake 'ade-'ade ḇato. Soi moi mai i'a ua, Unanga 'o pake ua 'ade-'ade na'o 'O doto'o ngowa'a kawasa. 35Enanga 'i dadi so'o gena ma tero sa'olo nabi 'a siajele pasala ḏua:

“Ngoi to sipake 'ade-'ade na'o to doto'o ananga;

Ngoi to doto'o ananga 'oru ga'a 'i gogono mulaingi dungia 'i dadi re sino.”#Nya. 78:2

Yesus 'a sitarangi 'ade-'ade mangale 'usumu 'i konyo toma gandum ma sigolona

36Gena togumu i'a, Yesus 'o sisoi'i tala ngowa'a repe re 'o osama toma wala ma dara. Re 'Ai me-mete'e 'aḏi sapolo re 'aḏi kanau ra Unanga, “Tai'i Jou na sitarangi mangale 'ade-'ade 'usumu toma gandum ma sigolona.”

37Yesus 'a sangoro, “Ngowa'a matengo ga'a siare gisisi ma la-la gena-ge Ngoi, Manusia ma Ngowa'a Nau'u. 38Guḏa gena-ge dungia nena-ne. Gisisi ma la-la gena-ge Ma Jou'ongu Madutu 'ai ngowa-ngowa'a. 'Usumu gena-ge 'Iblisi ma ngowa-ngowa'a. 39Re lawana ga'a siare gisisi 'usumu gena-ge 'Iblisi. 'Orasa 'utu'u gena-ge Kiamata ma Wangere, re ngowa'a gu-gutu'u gena-ge mala'ekata-mala'ekata. 40Dadi 'usumu ya lomu kara ya tau'u toma u'u. So'o gena ḏi'i toma Kiamata ma Wangere enanga ḏua 'i dadi so'o gena. 41Ngoi, Manusia ma Ngowa'a Nau'u ḏuanga i'a To soma'a 'Ari mala'ekata-mala'ekata 'aḏi tagi re 'aḏi lomu Tari 'umata ma sigolona ngowa'a mo-moini ga'a sigasa ngowa'a 'aḏi eta'a toma ḏosa re ma lelegu ga'a 'aḏi 'a'a kajahatana. 42Ananga mo-moini ḏuanga i'a sanga upa'a toma ḏiḏiana u'u ga'a leja-lejanga. Toma ngi'i gena-ge ananga ḏuanga i'a ya rerese ma gaḏi re ya doiti ma sangisara. 43Mada'a ngowa-ngowa'a loasa re banari, ananga remanga cahaya ma tero sa'olo wangere ma la'o ra Ma Jou'ongu Madutu 'ai dungia su-sungi. Na'o reninga ngau'u ni 'isene la-la!”

'Ade-'ade mangale harata toma tana'a ma dara

44“Wakutu Soroga ma Pareta 'i ngadolo, gena-ge ma tero sa'olo 'ade-'ade nena-ne: Wakutu ngowa'a matengo 'o sanga harata toma tana'a ma dara, unanga dadunu 'a otomo toma tana'a gena-ge ma dara. Sababu unanga 'o maroanga siḏi woḏi, unanga 'o tagi 'a wu'unu 'ai 'ori i'a rana mo-moini, kara 'o ḏibo ino 'a tibo tana'a gena-ge ga'a rema harata.”

'Ade-'ade mangale mutiara ma ijana lai hali

45“Wakutu Soroga ma Pareta 'i ngadolo gena-ge ma tero sa'olo 'ade-'ade nena-ne: Ngowa'a rema-enanga matengo 'o disa mutiara-mutiara ga'a lai rousu i'a. 46Wakutu unanga ra sanga mutiara ma ijana lai hali, unanga 'o tagi re 'a wu'unu 'ori i'a rana mo-moini kara rema pipisi 'a sitibo mutiara gena-ge.”

'Ade-'ade mangale j̱ala

47“Soi moi moju, wakutu Soroga ma Pareta 'i ngadolo gena-ge ma tero sa'olo 'ade-'ade nena-ne: Ngowa'a ngau-ngau 'aḏi upa'a j̱ala toma talaga re 'aḏi sanga nyao'o fara muḏuo i'a. 48Ngowa'a ngau-ngau ya totoma singadolo ma j̱ala 'i romanga reo nyao'o, kara ananga ya iḏala sibere j̱ala gena-ge toma tana'a du-dudungu. Gena ḏua, ananga ya siwo-wola nyao'o ma la-la sigae toma karajanga, re nyao'o ma la-la ua, ananga ya upa'a. 49Toma Kiamata ma Wangere enanga 'i dadi so'o gena-ge ḏi'i: Ma Jou'ongu Madutu 'ai mala'ekata-mala'ekata 'aḏi siwo-wola ngowa'a loasa re banari reo ngowa'a ma jira. 50Ngowa'a ma jira gena-ge, ananga ḏuanga i'a sanga upa'a toma ḏiḏiana u'u ga'a leja-lejanga. Toma ngi'i gena-ge, ananga ḏuanga i'a ya rerese ma gaḏi re ya doiti ma sangisara.”

Harata ma su-sungi re harata ma siḏa

51Yesus 'o sano Tai me-mete'e, “Ngini na sahe ḏua mo-moini gena-ge?”

Ananga sangoro, “Jou, ngomi ma sahe!”

52Dadi Yesus 'o kanau, “Sababu gena-ge, guru 'agama mo-moini ga'a raḏi sahe do-doto'o mangale Soroga ma Pareta ma tero sa'olo wala ma dutu ga'a sisupu harata su-sungi re ma siḏa tai harata ma ngi'i.”

Ngowa'a 'aḏi dawongo ua Yesus toma Nazaret

(Mrk. 6:1-6; Luk. 4:16-30)

53Wakutu Yesus 'a sijarita toma ngowa'a kawasa mangale 'ade-'ade gena-ge, togumu i'a Unanga 'o tagi 'a sisoi'i tala ngi'i gena-ge. 54Yesus 'o maḏibo toma limau Nazaret, Tai ji'o re gamu. I'a da'a, Unanga 'o doto'o toma wala puji, singadolo ngowa'a matai heranga! Ananga 'aḏi kanau, “Unanga 'o sanga le'a ino 'ai 'akala soro'unu gena-ge? Re 'O sanga 'Ai kuasa le'a ino singadolo Unanga nga'unu 'o 'a'a ga'a hera-heranga? 55Unanga gena-ge 'Ai ḇaḇa pa'i 'o tukanga wala ḇato re 'Ai ngina ngo Maria, re 'Ai nongoḏu 'a Yakobus, 'a Yusuf, 'a Simon re 'a Yudas! 56Re Unanga 'ai nongoḏu biḏa-biḏanga ananga mo-moini 'aḏi tegoro 'ane-ne ḏi'i! Sababu gena-ge, Unanga 'o sanga le'a ino 'Ai 'akala soro'unu re 'Ai kuasa gena-ge?”

57Dadi Yesus masiretene Tai gamu re Tai rera, ananga 'U dawongo ua. Ḏua Yesus 'o kanau i'a ra ananga, “Nabi matengo ga'a 'o tegoro tai ji'o re gamu, unanga ngowa'a 'u silamo'o ua. Mada'a na'o nabi matengo 'o tegoro toma ngi'i lelegu, unanga ngowa'a 'u silamo'o.”#Yoh. 4:44 58Sababu gena-ge, Yesus 'o 'a'a ga'a hera-heranga repe ua Tai gamu, sababu ananga 'aḏi ngaku Unanga ua.

Currently Selected:

Matias 13: SNT

Highlight

Copy