Lukas 9

Yesus 'o 'utusu 'Ai me-mete'e nga nyagi moi re nga muḏiḏi

(Mat. 10:5-15; Mrk. 6:7-13)

1Yesus 'o 'aro'o 'Ai me-mete'e nga nyagi moi re nga muḏiḏi 'aḏi malomu, re 'o pula'a kuasa di'a 'aḏi dusu'u roh ma jira mo-moini re si-la ngowa'a siḏi. 2Gena ḏua, Unanga 'o soma'a ananga 'aḏi tagi si-la ngowa'a siḏi re singadolo habari Roanga mangale Ma Jou'ongu Madutu 'Ai Pareta. 3Yesus 'o kanau i'a ra ananga, “Taninga ḏo-ḏagi ma dara ni gasa 'ori i'a rimoi i'a mai awa. Awa ni gasa ninga didiki bolo ninga tohe bolo ngo-ngoromo bolo pipisi pa'i ninga pakeanga masitero i'a ḇato. 4Le'a ḇato ngowa'a toma wala ḏu moi 'aḏi dawongo ngini, tegoro ḇato 'age singadolo ma 'orasa ngini ni tagi sisoi'i tala limau gena-ge. 5Mada'a na'o ngowa'a 'aḏi dawongo ngini ua, wakutu ni supu sisoi'i tala limau gena-ge, na sesara ninga rou ma korou'u, gena-ge si'a'a sa'olo nana'o rimoi mangale Ma Jou'ongu Madutu 'o dawongo ua re 'O sihukumu limau gena-ge ma manusia.”#Som. 13:51#Luk. 10:4-11

6Yesus 'ai me-mete'e ananga 'aḏi tagi toma gamu-gamu singadolo Habari Roanga re si-la ngowa'a siḏi le'a ḇato.

'Olana Herodes 'a waro 'ai gogare ua, mau ma'u sanga ra Yesus

(Mat. 14:1-12; Mrk. 6:14-29)

7Wakutu 'Olana Herodes 'o parenta toma daeraha Galilea, unanga 'a 'isene mangale mo-moini 'oru ga'a 'i dadi gena-ge. Unanga 'a waro 'ai gogare riwara sababu 'age rema ngowa'a 'aḏi siajele Yesus gena-ge 'a Yohanes tukanga baptis dadunu ro 'ahu moju. 8'Age ḏi'i rema ngowa'a 'aḏi siajele Yesus gena-ge nabi Elia ro dadunu sapolo. 'Age rema ngowa'a lelegu 'aḏi siajele Yesus gena-ge nabi 'au wali matengo i'a ro dadunu 'ahu moju.#Mat. 16:14; Mrk. 8:28; Luk. 9:19 9Mada'a 'Olana Herodes 'o kanau, “Ngoi to soma'a ḏua ngowa'a 'aḏi tola'a 'a Yohanes 'ai camala, dadi Unanga gena-ge mode-mode'e 'a guna? Habari ma repe ḏua ngoi to 'isene mangale Unanga gena-ge.” Dadi Herodes 'a disa ngo'omo di'a 'o ma'u sanga ra Yesus.

Yesus 'o pula'a oromo ngowa'a nga cala romotoa

(Mat. 14:13-21; Mrk. 6:30-44; Yoh. 6:1-14)

10Yesus 'ai so-soma'a 'aḏi ḏibo re 'aḏi sijarita 'oru ga'a ananga ya si'a'a pasala ḏua. Togumu i'a, Yesus ya'u sigaro'o ananga, la Unanga re ananga 'aḏi tagi masai'i i'a toma limau Betsaida. 11Mada'a wakutu ngowa'a repe ya waro mangale gena-ge, ananga 'aḏi siduu'u 'a Yesus. Unanga ya'u dawongo ananga re 'o siajele ra ananga mangale Ma Jou'ongu Madutu 'ai Pareta re Unanga ḏi'i 'o si-la ngowa'a siḏi.

12Wakutu wangere sa'i ri soḏu, Yesus 'ai me-mete'e 'aḏi sapolo ra Unanga, re 'aḏi kanau, “Jobilaha Jou no soma'a ngowa-ngowa'a nena-ne 'aḏi tagi, la ananga nga'unu 'aḏi disa manga ngo-ngoromo re 'aḏi masiḏingoto toma gamu-gamu re daeraha-daeraha co-cori sababu ngi'i nena-ne 'i tiwongo.”

13Yesus 'a sangoro, “Ngini balasu pula'a oromo ananga.”

'Ai me-mete'e 'aḏi kanau, “Ngomi minga roti pa'i ngai romotoa re minga nyao'o pa'i ngai ḏiḏi. Dadi ngomi balasu mi tagi tibo ngo-ngoromo di'a ngowa'a manga repe nena-ne!” 14('Age na-nau'u ḇato ḏa nga cala romotoa).

Yesus 'o kanau i'a Tai me-mete'e, “Soma'a ngowa'a repe nena-ne 'aḏi tegoro toropo moi-toropo moi, toropo moi ḏa nga nyagi romotoa.”

15Yesus 'ai me-mete'e ya si'a'a ma tero sa'olo 'a Yesus 'o soma'a ra ananga. 16Gena ḏua, Yesus 'a 'oro roti ngai romotoa nange-ge re nyao'o ngai ḏiḏi, kara 'O talaḏi ie da'u diwanga re 'O sibere ie murasa ma la ra Ma Jou'ongu Madutu. Ḏua Unanga 'a poti-poti ma roti re 'A sibalangu nyao'o gena-ge, re 'A pula'a i'a Tai me-mete'e, la ananga ya sibalangu toma ngowa'a repe. 17Ananga mo-moini 'aḏi oromo singadolo 'aḏi wunusu. Togumu i'a, Yesus 'ai me-mete'e ya lomu ngo-ngoromo ma jingianga ya sanga pipigu nyagi moi re romoḏiḏi.

Petrus 'o kanau mangale Yesus Unanga gena-ge 'O Kristus

(Mat. 16:13-19; Mrk. 8:27-29)

18Soi moi, wakutu Yesus 'o manyiata 'o matengo, 'Ai me-mete'e 'aḏi sapolo ra Unanga. Ḏua Yesus 'o sano ra ananga, “Mete'e ngowa'a manga waro, Ngoi ne 'a guna?”

19Ananga ya sangoro, “ 'Age mamuni'a 'aḏi kanau Jou 'a Yohanes tukanga baptis. 'Age mamuni'a 'aḏi kanau Jou nabi Elia, ma lelegu ḏi'i 'aḏi kanau Jou nabi ma lelegu 'ua re 'au wali matengo i'a 'o dadunu 'ahu moju.”#Mat. 14:1-2; Mrk. 6:14-15; Luk. 9:7-8

20Yesus dadunu 'o sano, “Mada'a mete'e ngini ninga wo-waro masiretene, Ngoi ne 'a guna?”

Petrus 'a sangoro, “Jou 'O Kristus ga'a Ma Jou'ongu Madutu ro sijaji 'ua re 'au wali.”#Yoh. 6:68-69

Yesus 'o masiajele ma mulaingi 'Ai se-sengene

(Mat. 16:21-28; Mrk. 8:31—9:1)

21Yesus 'o sipo-poma Tai me-mete'e toma 'orasa nena-ne, “Awa ngini na sihabari ra guna ḇato, Ngoi nena-ne 'O Kristus.” 22Yesus dadunu 'o kanau, “Ngoi, Manusia ma Ngowa'a Nau'u, balasu basono sangisara ma repe, re Yahudi manga bi-biri'i, 'imam-'imam ma sae'e re guru-guru 'agama, ananga ḏuanga i'a 'aḏi dawongo Ngoi ua. Ḏuanga i'a Ngoi ngowa'a ri sisengene, mada'a toma wangere ma soi ro'ange Ngoi dadunu to 'ahu moju.”

23Ḏua Yesus 'o kanau i'a toma ngowa-ngowa'a mo-moini gena-ge, “ 'A guna ḇato mau 'o mete'e Ngoi, balasu 'a mete'e 'ai mau masiretene riwara#9:23 Enanga ma ngale: mete'e Ma Jou'ongu Madutu 'ai 'akala ma mau ḇato. re wange moi-wange moi balasu 'o doiti 'ai salib,#9:23 Enanga ma ngale: matengo i'a 'o ḏu-ḏuanga ḏua sengene sababu mete'e Yesus. kara 'o mete'e Ngoi tau-taunu.#Mat. 10:38; Luk. 14:27 24Sababu 'a guna ḇato ga'a 'o kadiarata pa'i 'ai 'ahu toma dungia nena-ne, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o mete'e 'ai mau masiretene riwara sababu 'o mau mete'e Ngoi, unanga gena-ge ḏuanga i'a 'o sanga 'ahu kasingado-ngadolo i'a.#Mat. 10:39; Luk. 17:33; Yoh. 12:25 25Sababu ma 'utungu 'i cua, na'o ngowa'a matengo 'o sanga 'ori i'a rana mo-moini toma dungia nena-ne ma dara, mada'a unanga 'a sijira 'ai 'ahu masiretene re 'o sanga ua 'ahu kasingado-ngadolo i'a! 26Na'o ngowa'a 'aḏi mara'a mangaku Ngoi re 'ari do-doto'o wakutu Ngoi, Manusia ma Ngowa'a Nau'u 'o ḏuanga i'a dadunu to sapolo rari kuasa, re Ḇaḇa 'ai kuasa re mala'ekata-mala'ekata 'ofi-'ofi ma kuasa; Ngoi ḏi'i mai to mara'a mangaku ngowa'a gena-ge. 27Ni ngaku mode-mode'e 'Ari demo-demo nena-ne: Taninga sigolona 'age rema ngowa'a 'aḏi 'ahu-'ahu moju re 'aḏi oḏi'i Ma Jou'ongu Madutu mulaingi 'o parenta sa'olo 'Olana.”

'U simulia Yesus

(Mat. 17:1-8; Mrk. 9:2-8)

28Yesus 'o doto'o gena-ge palisi'i i'a ḏa migu rimoi, Unanga 'o gasa 'a Petrus, 'a Yohanes re 'a Yakobus sie toma kie rimoi ma tubu di'a manyiata. 29Yesus 'o manyiata si'olona i'a, 'Ai biono ri ngali, re 'Ai pakeanga 'i dadi buḏo jama-jamanga. 30-31Kage-kage ngowa'a nga muḏiḏi, matengo 'a Musa re matengo ḏi'i 'a Elia, ananga gena-ge 'aḏi masijumu remanga cahaya da'u soroga tala. Ananga 'aḏi ma'u kanau ra Yesus mangale 'Ai se-sengene ga'a ma 'orasa ti'ara riwara 'i ngadolo toma limau Yerusalem. 32Toma 'orasa gena-ge Petrus re 'ai ḏagilomu ananga 'aḏi otu, mada'a kage-kage raḏi wangolo, re 'aḏi oḏi'i i'a Yesus rai cahaya 'o made-de'oso sebanga ra Elia re 'a Musa. 33Wakutu 'a Elia re 'a Musa 'aḏi tagi sa'i sisoi'i tala 'a Yesus, Petrus 'o kanau i'a ra Yesus, “Tuanga, mode-mode'e sanangi masala ngi'i nena-ne. Na'o nyengara gari'a ngomi side'oso suyu'u ḏu ro'ange: ḏu moi di'a Jou, ḏu moi di'a Musa re ḏu moi ḏi'i di'a Elia.” (Petrus 'o kanau so'o gena, mada'a unanga masiretene 'a sahe ua 'oru ga'a unanga 'o kanau.)

34Wakutu Petrus 'o ka-kanau moju, kakamo 'i sapolo ya'u sao ananga, singadolo Petrus re 'ai ḏagilomu 'aḏi matai mojongo 35Gena ḏua, ananga 'aḏi 'isene toma kakamo gena-ge ma dara iḏingi ma betongo, “Nena-ne 'Ari Ngowa'a ga'a Ngoi to cumutu ḏua. Ni 'isene Unanga!”#Yes. 42:1; Mat. 3:17, 12:18; Mrk. 1:11; Luk. 3:22#2Ptr. 1:17-18

36Ananga 'aḏi isene iḏingi gena-ge togumu i'a, ananga 'aḏi oḏi'i Yesus pa'i matengo ḇato. Yesus 'ai me-mete'e kama kanau i'a mai ua, re 'aḏi siajele ra guna ua mangale 'oru ga'a ananga ya oḏi'i gena-ge.

Yesus 'o dusu'u ngowa 'olo matengo roh ma jira 'u dungosama

(Mat. 17:14-18; Mrk. 9:14-27)

37Ma ḇiḇini ino, Yesus rai me-mete'e nga ḏu'ange, ananga 'aḏi 'uci da'u kie tala, re ngowa'a repe matai sapolo ra Yesus. 38Toma ngowa'a repe manga sigolona, 'age rema na-nau'u matengo 'o mapataha, “Guru, riono 'ari ngowa'a, 'ari ngowa'a duga-duga pa'i unanga matengo! 39Soi rai o'o i'a roh ma jira 'i ḏegoro unanga singadolo 'o poa'a, re 'ai lese 'i rofu-rofu, singadolo 'ai sopu'u 'i pa'ala. Roh ma jira gena-ge 'i masupu ua re 'i mau sijira unanga. 40Ngoi to maḏigaro'o ḏua Tani me-mete'e ya dusu'u roh ma jira, mada'a ananga nga'unu ua ya dusu'u.”

41Yesus 'o sangoro, “Ngini mode-mode'e ngowa-ngowa'a ga'a ni ngaku Ngoi ua, re ni iranga ninga ngo'omo! Singadolo ma di'ara ngau moju, Ngoi balasu to tegoro marimoi ra ngini?! Singadolo ma di'ara ngau moju, Ngoi to sidodai 'Ari 'akala ḇanyo ra ngini?! Gasa ino 'ani ngowa 'olo gena-ge!”

42Wakutu ngowa 'olo gena-ge 'o tagi jau ino ra Yesus, roh ma jira 'i sibau'u unanga singadolo 'ai lese rimoi 'i rofu-rofu. Mada'a Yesus 'a soma'a roh ma jira gena-ge 'i supu ra unanga re unanga 'o la. Togumu i'a, Yesus 'o siḏibo ngowa 'olo gena-ge tai ḇaḇa. 43Ngowa'a repe matai heranga ya oḏi'i kuasa ra Ma Jou'ongu Madutu tala.

Yesus 'o masiajele mangale 'Ai se-sengene ma soi ḏiḏi

(Mat. 17:22-23; Mrk. 9:30-32)

Wakutu ngowa'a repe 'aḏi hera-heranga moju ya oḏi'i 'oru ga'a 'i dadi ḏua, Yesus 'o kanau Tai me-mete'e, 44“Isene re totoho la-la ino 'Ari demo nena-ne: Ngoi, Manusia ma Ngowa'a Nau'u, ḏuanga i'a sipula'a toma manusia ma kuasa.” 45Mada'a Yesus 'ai me-mete'e ya sahe ua ma ngale Yesus 'ai demo-demo gena-ge. Demo-demo gena-ge 'i sigogono ra ananga, la ananga ya sahe awa. Mada'a ananga 'aḏi mojongo dadi ya sano ua ra Unanga.

So-sano mangale 'a guna lebe la-lamo'o i'a?

(Mat. 18:1-5; Mrk. 9:33-37)

46Yesus 'ai me-mete'e matengo re matengo 'aḏi ma'u rubutu mangale 'a guna lebe la-lamo'o i'a tamanga sigolona.#Luk. 22:24 47Yesus 'a waro ananga manga fikirana matengo re matengo. Sababu gena-ge, Unanga 'o 'oro ngowa 'olo matengo re 'o side-de'oso ra Unanga 'ai gagoro 48Ḏua 'o kanau i'a Tai me-mete'e, “ 'A guna 'o dawongo ngowa 'olo matengo ma tero sa'olo ngowa 'olo nena-ne sababu unanga 'o mete'e Ngoi, unanga gena-ge ro dawongo Ngoi ḏi'i. Re 'a guna 'o dawongo Ngoi, 'o dawongo Ma Jou'ongu Madutu ga'a 'o 'utusu Ngoi. Sababu 'a guna ga'a 'o maholo taninga sigolona, unanga gena-ge 'o dadi ngowa'a lebe la-lamo'o.”#Mat. 10:40; Luk. 10:16; Yoh. 13:20

'A guna ga'a 'o lawana ngini ua, ananga gena-ge 'aḏi ngini ra ngomi

(Mrk. 9:38-40)

49'A Yohanes 'o kanau, “Tuanga, ngomi oḏi'i ngowa'a matengo 'o dusu'u roh ma jira 'a pake Tuanga 'ani lomanga, dadi ngomi mi simaha ua unanga, sababu unanga ra ngene ua.”

50Yesus 'o kanau i'a ra ananga mo-moini, “Awa ni simaha ua unanga, sababu 'a guna ga'a lawana ngini ua, ananga 'aḏi marimoi ra ngini.”

Ngowa-ngowa'a toma gamu rimoi toma daeraha Samaria 'aḏi dawongo Yesus ua

51Wakutu ma 'orasa sa'i ri co-cori di'a Yesus 'o pere sie da'u soroga, Unanga 'a putusu tala 'o tagi toma limau Yerusalem. 52Ḏua Yesus 'o cumutu ngowa'a nga muḏuo i'a di'a 'aḏi tagi siḏa i'a, la 'aḏi sidodahe 'oru ga'a Unanga 'o paralu. Dadi ananga gena-ge 'aḏi tagi re 'aḏi ngadolo toma gamu rimoi toma daeraha Samaria. 53Mada'a sababu Unanga 'o tagi toma limau Yerusalem, ngowa-ngowa'a toma gamu gena-ge 'aḏi dawongo Unanga ua. 54Wakutu Yesus 'ai me-mete'e nga muḏiḏi, Yakobus re 'a Yohanes, ya oḏi'i so'o gena, ananga 'aḏi kanau ra Yesus, “Ma Jou, no nyengara bolo ua mi golo'o u'u 'uci da'u diwanga tala, la singi-ngiranga ngowa-ngowa'a toma gamu gena-ge?”#9:54 'Age toma kartasi lo-lolo lelegu 'i silefo so'o ne: “ma tero sa'olo Nabi Elia 'a si'a'a ḏua.”#2'Oln. 1:9-16

55Yesus 'o magelelo re ya'u ḇangata ananga.#9:55 'Age toma kartasi lo-lolo lelegu 'i silefo so'o ne: “Ngini na waro ua roh 'oru nu'u ḏegoro sababu Manusia ma Ngowa'a Nau'u 'o sapolo di'a singi-ngiranga ngowa'a manga nyawa ua mada'a sisalamata ngowa-ngowa'a.” 56Gena ḏua, ananga 'aḏi tagi toma gamu ma lelegu.

Ngowa-ngowa'a ga'a mau 'aḏi mete'e Yesus

(Mat. 8:19-22)

57Wakutu Yesus re 'Ai me-mete'e ya dowanga manga ḏo-ḏagi moju, 'age rema ngowa'a 'aḏi kanau ra Yesus, “Jou, ngoi ḏi'i mau to mete'e Jou tagi le'a ḇato!”

58Yesus 'a sangoro ra unanga, “Serigala rema aḏu'u, re namo diwanga rema ngi'i. Mada'a Ngoi, Manusia ma Ngowa'a Nau'u kari ngi'i ua di'a to masibatongo.”

59Gena ḏua, Yesus 'o kanau i'a toma ngowa'a lelegu matengo, “Mete'e Ngoi.”

Mada'a ngowa'a matengo gena-ge 'o kanau, “Jou, pula'a loasa ngoi to maḏibo siḏa. Wakutu 'ari ḇaḇa 'o sengene re ngoi to palihara unanga togumu ḏua, kara ngoi ḏuanga i'a tini mete'e.”

60Mada'a Yesus 'o sangoro ra unanga, “Sieanga i'a ḇato ngowa'a sengene 'aḏi palihara ngowa'a sengene.#9:60 Ngowa-ngowa'a ga'a ngaku Ngoi ua, ananga gena-ge ma tero sa'olo ngowa'a sengene. Dadi sieanga ḇato ananga gena-ge 'aḏi palihara ngowa'a sengene. Mada'a ngana, no tagi no singadolo Ma Jou'ongu Madutu 'ai Pareta le'a ḇato.”

61'Age ḏi'i rema ngowa'a matengo ga'a 'o pula'a 'alasana so'o ne: “Jou, ngoi ḏi'i mau to mete'e Jou, mada'a pula'a ra loasa ngoi to maḏibo la to masilo-loasa tari ḇaḇa re ngina.”#1'Oln. 19:20 62Yesus 'o sangoro i'a toma ngowa'a gena-ge, “Na'o ngowa'a matengo 'o 'elingi tau-taunu mangale 'ai ḇaḇa re ngina, ngowa'a gena-ge 'o patasa ua 'o dadi Ma Jou'ongu Madutu 'ai ngowa-ngowa'a. Ngowa'a gena-ge ma tero sa'olo ngowa'a aro mulaingi 'o pajeko, 'o magelelo ḏuḏunu tau-taunu.”

Currently Selected:

Lukas 9: SNT

Highlight

Copy