Lukas 7

Yesus 'o si-la Roma manga sordado ma sae'e 'ai budaka

(Mat. 8:5-13)

1Yesus 'o siajele hali-hali gena-ge toma ngowa'a repe togumu i'a, kara Unanga 'o tagi toma limau Kapernaum. 2I'a da'a, 'age Roma manga sordado ma sae'e, unanga 'ai budaka matengo ga'a 'o dadalara 'o siḏi sa'i 'o sengene. 3Wakutu sordado ma sae'e gena-ge 'a 'isene mangale Yesus ro sapolo toma limau Kapernaum, unanga 'o soma'a Yahudi manga sae'e 'aḏi tagi ra Unanga di'a 'aḏi golo'o Unanga 'o sapolo re si-la 'ai budaka gena-ge. 4Wakutu ananga 'aḏi ngadolo ra Yesus, ananga 'aḏi golo'o mode-mode'e, la Unanga 'o riono sordado ma sae'e gena-ge. Ananga 'aḏi kanau i'a ra Yesus, “Roma manga sordado ma sae'e nena-ne, ngowa'a la-la, dadi no riono unanga, 5sababu unanga 'o dadalara ngene nanga bangsa re unanga 'o simomi'i ḏua wala puji di'a ngomi.”

6Ḏua Yesus 'o tagi ma'u mete'e ra ananga. Wakutu Yesus reo co-cori i'a toma sordado ma sae'e 'ai wala, sordado ma sae'e gena-ge 'o soma'a 'ai ḏagilomu-ḏagilomu 'aḏi dola'a 'a Yesus re 'aḏi kanau, “Jou, awa no masikangela no sapolo tari wala sababu ngoi to patasa ua to dawongo Jou tari wala. 7Sababu gena-ge, ngoi masiretene to patasa ua talaḏi Jou. Dadi pa'i No siajele demo bale moi ḇato re 'ari budaka ro la. 8Sababu ngoi ḏi'i mai balasu to 'isene 'ari sae'e 'ai parenta, re 'ari aḏutala sordado-sordado ananga ḏi'i balasu 'aḏi mete'e 'ari parenta. Na'o ngoi to soma'a 'ari aḏutala matengo, ‘Tagi!’ unanga 'o tagi, re na'o ngoi to 'aro'o aḏutala ma lelegu, ‘Ino 'ane!’ unanga 'o sapolo ino. Na'o ngoi to soma'a 'ari budaka ‘No 'a'a ne!’ unanga ḏi'i 'o 'a'a.”

9Yesus 'o heranga wakutu 'o isene so'o gena togumu i'a. Unanga 'o magelelo re kanau i'a toma ngowa'a repe ga'a 'aḏi mete-mete'e Unanga, “Ngoi to siajele ra ngini nena-ne: Toma ngowa'a Israel manga sigolona, Ngoi to sanga matengo i'a mai nyangu, ga'a 'ai ngo-ngaku lai te'e sa'olo ngowa'a Yahudi ua nena-ne 'ai ngo-ngaku!”

10Ananga ga'a sordado ma sae'e 'o soma'a 'o dola'a Yesus gena-ge 'aḏi maḏibo toma sordado ma sae'e 'ai wala, sanga i'a budaka ga'a 'o siḏi gena-ge ro la.

Yesus dadunu 'o si'ahu moju balo matengo 'ami ngowa'a

11Pasala i'a ti'ara nyangu,#7:11 'Age toma kartasi lo-lolo lelegu 'i silefo so'o ne: “Ma ḇiḇini ino.” Yesus rai me-mete'e re ngowa'a repe 'aḏi tagi toma limau Nain. 12Wakutu Yesus 'o ngadolo toma limau ma ngalana lamo'o 'age rema ngowa'a manga repe 'aḏi singata'a mayeti toma limau ma ḏuḏunu. Mayeti gena-ge balo were'a matengo 'ami ngowa'a nau'u pa'i matengo ḇato. Limau ma manusia manga repe 'aḏi singata'a were'a balo gena-ge. 13Wakutu Ma Jou Yesus 'o oḏi'i were'a balo gena-ge, Tai 'akala re sinyingara 'i baolo dadalara ra munanga. Dadi Unanga 'o kanau, “Meme, no 'aḏi rawara!” 14Gena ḏua, Yesus 'o sebanga i'a mayeti ma 'usungana re 'a siteru 'Ai giama toma 'usungana gena-ge ma re'u. Dadi ananga ga'a 'aḏi do-doiti 'usungana gena-ge 'aḏi matogumu. Ḏua Yesus 'o kanau, “Hei tubaie! Ngoi to soma'a no momi'i.” 15Tubaie ga'a ro sengene nange-ge 'o momi'i madi-dirini re mulaingi 'o kanau. Ḏua Yesus 'o kanau i'a toma balo were'a gena-ge, “Meme, Ne 'ani ngowa'a tubaie.”

16Ananga mo-moini 'aḏi mojongo re mulaingi 'aḏi puji re silamo'o Ma Jou'ongu Madutu. Ananga 'aḏi kanau, “Nabi la-lamo'o matengo ro sapolo tananga sigolona. Ma Jou'ongu Madutu ro sapolo di'a riono 'Ai ngowa-ngowa'a.”

17Habari mangale Yesus 'i rera re walata toma daeraha Yudea sitabi donga re daeraha ma sebanga ḏi'i.

Yesus 'o sitoro Yohanes tukanga baptis

(Mat. 11:2-19)

18Yohanes tukanga baptis, unanga gena-ge 'ai me-mete'e 'aḏi siajele ra Yohanes mo-moini ga'a Yesus 'a si'a'a pasala ḏua. Ḏua Yohanes toma bui ma dara 'o 'aro'o 'ai me-mete'e nga muḏiḏi, 19kara unanga 'o soma'a ananga 'aḏi tagi ra Ma Jou Yesus re 'aḏi sano ra Unanga ma betongo so'o ne: “Jou nena-ne ḏua ga'a no sapolo mete'e Ma Jou'ongu Madutu 'ai jaji bolo ngomi balasu mi totoma ngowa'a lelegu?”

20Yohanes 'ai me-mete'e nga muḏiḏi gena-ge 'aḏi tagi ra Yesus re 'aḏi kanau, “Yohanes tukanga baptis 'o soma'a ngomi mi sano ra Jou: 'Oru Jou nena-ne ḏua matengo ga'a no sapolo mete'e Ma Jou'ongu Madutu 'ai jaji bolo ngomi balasu mi totoma ngowa'a lelegu?”

21Wakutu gena-ge, Yesus 'o si-la ngowa'a siḏi manga repe re 'O sisupu ngowa'a manga repe ga'a roh ma jira ya'u dungosama re 'O si-la ngowa'a hafu manga repe dadi raḏi oḏi'i. 22Dadi Yesus 'a sangoro, “Ni maḏibo ra Yohanes re ni siajele ra unanga 'oru ga'a ngini ni oḏi'i re ni 'isene: Ngowa'a hafu 'aḏi oḏi'i, ngowa'a ḇolo 'aḏi tagi; ngowa'a si-siḏi 'eno'o#7:22 “Si-siḏi pado” ma tero si-siḏi 'eno'o. 'aḏi la, ngowa'a popongolo 'aḏi 'isene, ngowa'a raḏi sengene, dadunu 'aḏi 'ahu moju, re Habari Roanga ra Ma Jou'ongu Madutu ino singadolo ḏi'i toma ngowa-ngowa'a ma dinga'unu ua.#Yes. 35:5-6, 61:1 23Bara'utungu ngowa'a ga'a manga ngo-ngaku kama elala ua ra Ngoi!”

24Yohanes 'ai me-mete'e 'aḏi tagi palisi'i i'a, Yesus 'o kanau toma ngowa'a repe mangale 'a Yohanes ma betongo so'o ne: “Ngini ni tagi toma daeraha baulaco di'a ni oḏi'i 'oru? Sanga ua, ngini ni tagi oḏi'i matengo ga'a 'o sitaka-taka mangale 'ai habari ma tero sa'olo rurubu ma so'a ngai moi ga'a karawiana ya wusu! 25Dadi ngini ni tagi di'a ni oḏi'i 'oru? Ngowa'a matengo ga'a mapake rousu? Sanga ua! Sababu ngowa'a ga'a mapake rousu re manga 'ahu pai-pai'i 'aḏi tegoro toma kadato. 26Dadi ngini ni tagi di'a ni oḏi'i 'oru? Nabi? Tero mode'e! Sidogo ḏi'i, unanga gena-ge lebe la-lamo'o i'a reo nabi ma siḏa-siḏa i'a! 27Sababu toma Boku 'Ofi-'Ofi 'age rema bu-bula'a nena-ne 'i silefo mangale 'a Yohanes ga'a Ma Jou'ongu Madutu 'o kanau so'o ne:

‘Nena-ne Ngoi 'ari so-soma'a. Ngoi ḏuanga i'a to 'utusu unanga siḏa kara Ngana,

la unanga ḏuanga i'a 'a sidodahe ngo'omo di'a Ngana.’ ”#Mal. 3:1

28Yesus 'o dadunu kanau, “Ngoi to siajele ra ngini nena-ne: Toma dungia nena-ne matengo i'a mai ua ga'a sibuoro lebe la-lamo'o i'a rea Yohanes tukanga baptis. Mada'a mulaingi nange-ne, ngowa'a ma pake ua ga'a 'o osama nyo-nyoimi ra Ma Jou'ongu Madutu 'ai Pareta, unanga gena-ge 'o dadi ngowa'a lebe la-lamo'o i'a rea Yohanes.”

29Rayata mo-moini (sidogo ngowa'a golo-golo'o balastengi) ga'a 'a Yohanes ya'u baptis, ananga gena-ge 'aḏi dawongo Yesus 'ai demo-demo mangale Yohanes 'i banari. 30Mada'a ngowa'a Farisi re guru-guru 'agama 'aḏi oḏu'u 'a Yohanes ya'u baptis sababu ananga gena-ge 'aḏi dawongo ua Ma Jou'ongu Madutu 'ai 'akala ma mau di'a ananga.#Mat. 21:32; Luk. 3:12

31Ḏua Yesus dadunu 'o kanau moju, “Reo 'oru ngoi ta site-tero ngowa-ngowa'a toma 'orasa nena-ne? Ananga nena-ne ma tero sa'olo 'oru? 32Ananga nena-ne sa'olo ngowa 'olo 'aḏi maḏegoro toma pasara toropo moi-toropo moi re 'aḏi ma'u sangoro i'a re ino ma'u ngali-ngali,

‘ Ngomi ḇisa serulingi ḏua mada'a ngini ni roje ua,

ngomi mi nyanyi-nyanyi duka re balisa mada'a ngini 'aḏi ua.’

33Ngoi 'ari maksudu: Wakutu Yohanes tukanga baptis 'o sapolo, unanga 'o puasa re oḏu'u ka'e 'anggur, re ngini nu dawongo ua re ni kanau, ‘Unanga 'o roh ma jira 'u dungosama.’ 34Ngoi, Manusia ma Ngowa'a Nau'u reto sapolo re To oromo re ka'e, mada'a ngini ḏi'i ni dawongo Ngoi ua re ni kanau, ‘ Oḏi'i unanga gena-ge 'O da-danata, 'O 'etolo, re Ma'u ḏagilomu reo ngowa-ngowa'a golo-golo'o balastengi re ngowa-ngowa'a baraḏosa.’ 35Kalaha so'o gena, Ma Jou'ongu Madutu 'ai 'akala ma soro'unu 'i waiti banari ra Ma Jou'ongu Madutu 'ai ngowa-ngowa'a ga'a raḏi dawongo Ngoi.”

We-were'a matengo mo silamo'o Yesus ra Simon 'ai wala

36Ngowa'a Farisi matengo 'ai lomanga Simon, unanga 'o saele Yesus di'a oromo ra unanga 'ai wala. Yesus 'o tagi ra Simon 'ai wala re 'o oromo ma'u mete'e ra unanga. 37Toma limau gena-ge, 'age rema we-were'a matengo, munanga remo 'ahu toma ḏosa ma dara. Wakutu munanga mo 'isene Yesus 'o oromo toma ngowa'a Farisi gena-ge 'ai wala, munanga mo sapolo rami botol#7:37 botol si'a'a reo maḏi pualam. rimoi ma dara rema bou-bounu. 38Wakutu Yesus 'o majoreke tala 'o oromo, munanga mo made-de'oso tai ḏuḏunu,#7:38 Yahudi manga 'atoranga: Na'o 'aḏi oromo 'aḏi majoreke tala. co-cori 'Ai rou kara mo 'aḏi re 'ami 'ongoro ma side-dege ra Yesus 'ai rou. Gena ḏua, munanga ma sipii'i rami utu kara mo dume 'Ai rou re masiba-ba'ala 'ami bou-bounu nange-ge Tai rou.#Mat. 26:7; Mrk. 14:3; Yoh. 12:3 39Wakutu ngowa'a Farisi ga'a saele Yesus nange-ge 'o oḏi'i so'o gena, unanga 'o kanau tai 'akala re sinyingara ma dara, “Na'o Unanga nena-ne nabi Unanga 'a waro ḏua we-were'a ga'a mo cigi Unanga, munanga gena-ge ngo guna. We-were'a nena-ne mo 'ahu toma ḏosa ma dara.”

40Ḏua Yesus 'o kanau i'a ra Simon, “ 'Age 'ori i'a rimoi i'a ngoi mau to kanau ra ngana.”

Simon 'a sangoro, “Ya Guru no kanau ḇato.”

41Yesus 'o kanau, “ 'Age rema ngowa'a matengo 'a sibau 'ai pipisi toma ngowa'a nga muḏiḏi. Matengo 'o sanga pipisi salaka latu romotoa, re matengo ḏi'i 'o sanga pipisi salaka guḏi romotoa. 42Ananga nga muḏiḏi ya siḏibo ya nga'unu ua pipisi salaka gena-ge mada'a manga banyatoro toma ngowa'a ga'a sipula'a bau 'a singi-ngiranga. Na 'a guna ra ananga nga muḏiḏi gena-ge ḏuanga i'a 'aḏi lebe manga dadalara ngowa'a ga'a sibau pipisi?”

43Simon 'o sangoro, “Mete'e ngoi 'ari 'akala ma sanga, ngowa'a ga'a banyatoro lebe lamo'o i'a 'i singi-ngiranga ḏua.”

Yesus 'o kanau, “Tero mode'e ngana.”

44Ḏua Yesus 'o magelelo toma we-were'a gena-ge re 'O kanau ra Simon, “Ngana no oḏi'i we-were'a nena-ne? Wakutu Ngoi to sapolo tani wala, ngana no mete'e ua ngene ngowa'a Yahudi nanga 'atoranga: ngana no sidodahe ua ḇanyo di'a sisoso'o 'Ari rou. Mada'a we-were'a nena-ne munanga mo soso'o ḏua 'Ari rou rami la'o ma 'ongoro re masidudungu rami utu. 45Ngana no mete'e ua ngene ngowa'a Yahudi nanga 'atoranga moju wakutu no 'aro'o Ngoi tani wala: ngana no dume ua 'Ari bobongolo. Mada'a we-were'a nena-ne, kama togumu ua ma dume 'Ari rou wakutu Ngoi to sapolo 'ane. 46Ngana na siba-ba'ala ua 'ani zaitun ma goroho Tari sae'e, mada'a we-were'a nena-ne masiba-ba'ala 'ami bou-bounu Tari rou. 47Sababu gena-ge, Ngoi to siajele ra ngini nena-ne: Mode-mode'e munanga masijumu 'ami dadalara lebe lamo'o i'a sababu Ngoi ta singi-ngiranga ḏua 'ami ḏosa-ḏosa. Na'o ngowa'a manga ḏosa pa'i ceka'a ua ya singi-ngiranga, unanga ḏuanga i'a 'ai dadalara pa'i ceka'a ua ḏi'i.”

48Ḏua Yesus 'o kanau i'a toma we-were'a gena-ge, “ 'Ani ḏosa ta singi-ngiranga ḏua.”

49Ngowa-ngowa'a lelegu ga'a 'aḏi oromo mamete'e rea Yesus, mulaingi 'aḏi ma'u kanau matengo re matengo, “Ngowa'a nena-ne 'a guna ga'a 'o nau'u masala 'o kanau mangale unanga nga'unu 'a singi-ngiranga ngowa'a manga ḏosa!”

50Mada'a Yesus 'o kanau toma we-were'a gena-ge, “Sababu ngana reno ngaku Ngoi, ngana sanga salamata, no maḏibo rani dame.”

Currently Selected:

Lukas 7: SNT

Highlight

Copy