Lukas 6:27-49
Lukas 6:27-49 SNT
“Mada'a Ngoi to siajele ra ngini mo-moini nange-ne ga'a ni 'isene nena-ne: Dadalara ninga lawana-lawana, re ni sijumu ninga de'oso re ḏegoro la-la toma ngowa'a ga'a 'aḏi emono ngini. Sibarakati ngowa'a ga'a sosowini ngini, re ni manyiata di'a ngowa'a ga'a 'aḏi 'a'a cira ra ngini. Na'o ngowa'a 'aḏi sata ninga bobongolo ma kuwiḏa, ni pula'a ḏi'i ninga bobongolo ma kuḇali. Na'o ngowa'a ya ra-rabasa ninga juba, ni pula'a ḏi'i ninga baju. Na'o ngowa'a 'aḏi golo'o ra ngini 'ori i'a rimoi i'a, balasu ni pula'a. Na'o ninga 'ori i'a rana ngowa'a ya ra-rabasa, awa ni golo'o ananga ya siḏibo. 'Oru ḇato ngini ni mau ngowa'a 'aḏi 'a'a ra ngini, ni 'a'a siḏa ra ananga. Na'o ngini ni dadalara pa'i ngowa'a ga'a dadalara ngini ḇato, Ma Jou'ongu Madutu 'o sibarakati ngini ua! Ngowa'a baraḏosa mai waro 'aḏi dadalara ḏi'i ngowa'a ga'a ya'u dadalara ananga! Re na'o ngini ni 'a'a la-la pa'i toma ngowa'a ga'a 'aḏi 'a'a la-la ra ngini ḇato, Ma Jou'ongu Madutu 'o sibarakati ngini ua! Ngowa'a baraḏosa mai waro 'aḏi 'a'a so'o gena ḏi'i. Re na'o ngini pula'a bau pipisi toma ngowa-ngowa'a ga'a nga'unu ya siḏibo, Ma Jou'ongu Madutu 'o sibarakati ngini ua! Ngowa'a baraḏosa mai waro 'aḏi pula'a bau pipisi toma ngowa'a baraḏosa ḏi'i, kara ya golo'o siḏibo. Ngini so'o gena awa! Siḏibo ḏi'i ngini balasu ni dadalara ninga lawana, re ni 'a'a la-la ra ananga gena-ge: Ngini balasu ni pula'a bau 'ori i'a rimoi i'a taninga lawana re awa ni nganono enanga ma ḏibo. Na'o ngini ni 'a'a so'o gena ḏuanga i'a ni sanga ngogele lai lamo'o, re ngini ni sijumu mode-mode'e ngini sa'olo Ma Jou'ongu Madutu toma Gau'u 'ai ngowa-ngowa'a. Sababu Ma Jou'ongu Madutu 'a sijumu 'Ai 'akala ma la-la toma ngowa'a ma jira re ngowa-ngowa'a ga'a 'elingi ngowa'a manga la-la ua ḏi'i. Ngini balasu ni sijumu ninga 'akala re sinyingara ma la-la toma ngowa'a ma tero sa'olo ninga Ḇaḇa, Ma Jou'ongu Madutu 'o sijumu 'Ai 'akala re sinyingara ma la-la toma ngowa'a ḏi'i. Dadi awa ni sijuruhakimi ngowa'a lelegu, la Ma Jou'ongu Madutu ḏi'i 'o sijuruhakimi ngini ua. Awa jau-jau singe-ngeta'a hukumu toma ngowa'a lelegu, la Ma Jou'ongu Madutu ḏi'i 'o singe-ngeta'a hukumu ngini ua. Si'apongo ngowa'a lelegu, la Ma Jou'ongu Madutu 'a singi-ngiranga ninga ḏosa-ḏosa. Pula'a toma ngowa'a lelegu reninga 'akala re sinyingara sa-sanangi, la Ma Jou'ongu Madutu 'a balasa ra ngini pai-pai'i ga'a Unanga 'a tuga pa'a-pa'ala di'a ngini. Sababu ninga du-duga ga'a ngini ni pake di'a situga toma ngowa'a lelegu, du-duga gena-ge ḏi'i Ma Jou'ongu Madutu 'a pake 'a situga ra ngini!” Togumu i'a, Yesus 'o carita ra ananga 'ade-'ade rimoi so'o ne: “Na'o ngowa'a hafu re ngowa'a 'aḏi ma'u tuda, tantu ḏua ananga nga muḏiḏi 'aḏi masieta'a toma koti'i ma dara. Murid matengo ua lebe pahe i'a reo 'ai guru! Mada'a na'o unanga 'a siḏo-ḏogumu guru manga do-doto'o. Ḏua 'o dadi pahe ma tero sa'olo 'ai guru ḏi'i. I'a sa'olo ngini ni oḏi'i 'o ate ma bingana taninga ioronongoḏu manga la'o, mada'a jaro jule moi taninga la'o masiretene, ni siwaro i'a ua. I'a sa'olo ngini ni kanau taninga ioronongoḏu, ‘Dowara, ino ngoi ta woi'i 'o ate ma bingana tani la'o,’ mada'a taninga la'o ma dara rema jaro jule moi, ni siwaro i'a ua? Hai ngini ngowa'a munafiki! Ni sisupu siḏa 'o jaro jule moi tani la'o, la ni oḏi'i tarangi, kara nga'unu ni sisupu 'o ate ma bingana taninga ioronongoḏu 'ai la'o ma dara.” “Sanga ua, ate ma nga-ngamasa lai rousu ma sowo'o 'i cira. So'o gena ḏi'i, sanga ua ate ma nga-ngamasa rousu ua ma sowo'o 'i la-la. Ate ma nga-ngamasa lai rousu bolo rousu ua wa nana'o toma sowo'o ino. Sanga ua, goroa dodowo'o ma sowo'o ara. Sanga ua rurubu dodowo'o ma sowo'o 'anggur. So'o gena ḏi'i ma tero sa'olo manusia: Ngowa'a la-la 'i waiti 'ori i'a ma la-la, sababu manga 'akala re sinyingara 'i romanga reo ga'a ma la-la. Ngowa'a ma jira 'i waiti 'ori i'a ma jira, sababu manga 'akala re sinyingara 'i romanga reo ga'a ma jira. Sababu 'oru ga'a ngini kanau, gena-ge 'i supu taninga 'akala re sinyingara ma dara ino. I'a sa'olo ngini ni 'aro'o Ngoi, ‘Ma Jou! Ma Jou!’ Mada'a na si'a'a ua 'oru ga'a Ngoi to kanau ra ngini! Ngowa'a mo-moini ga'a 'aḏi sapolo ra Ngoi, re 'aḏi 'isene re 'aḏi si'a'a Ngoi 'ari demo, Ngoi ta site-tero reo 'aḏe-'aḏe 'oru! Unanga gena-ge ma tero sa'olo ngowa'a matengo mau 'o simomi'i 'ai wala. Unanga 'a paiti ma tana'a lai ngido singadolo sanga maḏi, kara 'o 'a'a ma bangini. Wakutu ngu'uisi ya ngadolo toma wala gena-ge, enanga gena-ge kama elala ua, sababu side'oso toma bangini lai te'e. 'A guna ḇato 'a 'isene Ngoi 'ari demo, mada'a 'a si'a'a ua, ma tero sa'olo ngowa'a matengo 'o simomi'i 'ai wala kama bangini ua. Wala gena-ge 'i ruba ca-caiti ḇato singadolo 'i pinya'olo lai siḏi wakutu ngu'uisi ya sirarini!”