Lukas 5

Yesus 'o cumutu 'Ai me-mete'e ma mulaingi

(Mat. 4:18-22; Mrk. 1:16-20)

1Toma 'orasa rimoi, Yesus 'o te'oso doto'o ngowa-ngowa'a toma talaga Genesaret ma 'uḏu. Ngowa'a repe 'aḏi gowolo Unanga di'a 'aḏi 'isene Habari Roanga ra Ma Jou'ongu Madutu ino. 2Toma talaga ma 'uḏu, Yesus 'o oḏi'i oti romoḏiḏi, ngowa'a ngau-ngau raḏi 'uci toma oti gena-ge re 'aḏi woi'i manga j̱ala ma jeremoto. 3Ḏua Yesus 'o mabalene toma oti rimoi, Simon 'ai oti, re 'o soma'a 'a Simon 'a itomo gasa kiḏanga o'o. Gena ḏua, Yesus 'o tegoro toma oti ma dara re 'O doto'o ngowa'a repe.#Mat. 13:1-2; Mrk. 3:9-10, 4:1

4Yesus 'o doto'o togumu i'a 'O kanau ra Simon, “Siamono toma ngido re ni upa'a j̱ala di'a ni disa nyao'o.”

5Simon 'o kanau, “Jou, utu moi siwangere ngomi kama togumu ua mi upa'a j̱ala kuwiḏa re kuḇali, mada'a mi sanga 'oru rimoi i'a mai ua! Mada'a sababu Jou no soma'a, ngoi ta mete'e re ta si'a'a.”#Yoh. 21:3 6Ananga ya si'a'a ma tero sa'olo Yesus 'o soma'a. Ḏua ananga 'aḏi sanga nyao'o ma repe masala singadolo manga j̱ala sa'i 'i 'acingi.#Yoh. 21:6 7Sababu gena-ge, ananga 'aḏi 'aro'o manga ḏagilomu, la ma'u riono gola'a j̱ala sibalene toma oti romoḏiḏi ma dara. Oti romoḏiḏi gena-ge ma nyao'o 'i roma-romanga singadolo ma oti gena-ge sa'i jala. 8Wakutu Simon 'a oḏi'i so'o gena, unanga 'o mapagara 'ai biono tala ra Yesus re 'o kanau, “Ma Jou, sisoi'i tala ḇato ngoi; sababu ngoi ngowa'a baraḏosa!”

9Simon 'o kanau so'o gena-ge sababu unanga re manga ḏagilomu toma oti ma lelegu, ananga matai heranga sanga nyao'o lai repe. 10So'o gena ḏi'i 'a Yakobus, re 'a Yohanes, ananga gena-ge Zebedeus 'ai ngowa'a ga'a ma oti rimoi ra Simon. Yesus 'o kanau ra Simon, “Mojongo awa! Mulaingi nange-ne Ngoi to doto'o ngana di'a no disa ngowa'a, la 'aḏi mete'e Ngoi ma tero sa'olo nange-ge ngana no j̱ala nyao'o.”

11Simon re 'ai ḏagilomu mo-moini, ananga ya iḏala manga oti toma talaga ma 'uḏu. Gena ḏua, ananga 'aḏi tagi ya sisoi'i tala 'ori i'a mo-moini kara 'aḏi mete'e Yesus.

Yesus 'o si-la ngowa'a matengo si-siḏi 'eno'o

(Mat. 8:1-4; Mrk. 1:40-45)

12Toma wangere rimoi, Yesus 'o ngadolo toma limau rimoi. 'Age rema ngowa'a matengo si-siḏi 'eno'o#5:12 Si-siḏi 'eno'o: mete'e 'agama ma hukumu, ngowa-ngowa'a gena-ge 'i yoḏu'u 'aḏi manyiata bolo 'aḏi silamo'o re siḏubuso Ma Jou'ongu Madutu toma wala-wala puji. tai lese rimoi simoini. Wakutu unanga 'o oḏi'i Yesus unanga 'o maḏipolono re maruku ra Yesus re 'o golo'o mode-mode'e, “Jou, na'o No nyengara, No si-la ngoi!”

13Yesus 'a siteru 'Ai giama re 'A siteru ra unanga gena-ge re 'O kanau, “Ngoi to nyengara, no la!” Toma 'orasa gena-ge ḏua, 'ai si-siḏi 'eno'o ri iranga. 14Ḏua, Yesus 'o sipo-poma 'o kanau ra unanga, “Awa ngana na sijarita mangale gena-ge ra guna ḇato. Mada'a no tagi re no masijumu 'ani lese toma 'imam, la siwaro tala mangale ngana reno la. Pasala i'a no pula'a 'ani jou-jou di'a sigofi 'ani lese ga'a mete'e 'a Musa 'ai hukumu sa'olo bukiti rimoi toma ngowa-ngowa'a ḏi'i mangale ngana reno la.”#Im. 14:1-32

15Mada'a habari mangale Yesus ganapu 'i rera re walata, ngadolo le'a bolo le'a, singadolo ngowa'a manga repe matai sapolo di'a 'aḏi 'isene Yesus 'ai do-doto'o re ya'u si-la ngowa'a siḏi. 16Mada'a soi rai o'o i'a Yesus 'o tagi manyiata toma ngi'i ga-garura.

Yesus 'o si-la ngowa'a ḇolo matengo

(Mat. 9:1-8; Mrk. 2:1-12)

17Toma wangere rimoi wakutu Yesus 'o doto'o, 'age rema ngowa'a Farisi nga muḏuo i'a, re guru-guru 'agama 'aḏi tegoro 'isene. Ananga 'aḏi sapolo da'a limau Yerusalem ino, re limau-limau toma daeraha Galilea re Yudea ino. Kuasa ra Ma Jou'ongu Madutu 'i marimoi ra Yesus di'a 'O si-la ngowa'a siḏi. 18Toma 'orasa gena-ge, ngowa'a nga muḏuo i'a 'aḏi gasa ino ngowa'a ḇolo matengo sigae toma 'usungana. Ananga 'aḏi makutale 'u singosama ngowa'a siḏi gena-ge toma wala ma dara, la 'u sigare ra Yesus 'ai biono. 19Mada'a sababu ngowa'a 'aḏi masituḏu-tuḏu i'a, ananga 'aḏi sanga ngo'omo ua di'a 'u singosama ngowa'a ḇolo gena-ge. Sababu gena-ge, ananga 'u sibere unanga da'u toma wala ma re'u. Gena ḏua, ananga ya tiwa'a wala ma 'atu, kara 'u siala sirimoi rai 'usungana pasi-pasi tala ra Yesus 'ai biono toma ngowa'a repe manga sigolona. 20Wakutu Yesus 'a oḏi'i ananga manga ngo-ngaku lai te'e, Unanga 'O kanau i'a toma ngowa'a ḇolo gena-ge, “Wolo, 'ani ḏosa 'i singi-ngiranga ḏua.”

21Guru-guru 'agama re ngowa-ngowa'a Farisi mulaingi 'aḏi masano tamanga 'akala re sinyingara, “Unanga ne 'a guna, singadolo 'o nau'u masala 'o je-jengere Ma Jou'ongu Madutu! Pa'i Ma Jou'ongu Madutu masiretene nga'unu 'o singi-ngiranga ngowa'a manga ḏosa!”

22Yesus 'a waro ananga manga so-sano tamanga 'akala re sinyingara, dadi Unanga 'o kanau, “I'a sa'olo taninga 'akala re sinyingara ma dara 'i masano so'o gena? 23Le'a lebe gapanga si'a'a: Ngoi nyengara to kanau, ‘ 'Ani ḏosa ta singi-ngiranga ḏua’ bolo nyengara to kanau, ‘Momi'i re no tagi’?! 24Mada'a nange-ne Ngoi ta sibukiti ra ngini mangale Ngoi, Manusia ma Ngowa'a Nau'u, masiretene rari kuasa nga'unu ta singi-ngiranga ngowa-ngowa'a manga ḏosa toma dungia nena-ne.” Gena ḏua, Yesus 'o kanau toma ngowa'a ḇolo gena-ge, “Momi'i ie, na tede 'ani 'usungana, re no maḏibo!”

25Ngowa'a ḇolo gena-ge 'o te'oso ra ananga mo-moini manga biono. Ḏua 'a tede 'ai 'usungana, re 'o maḏibo 'o puji re silamo'o Ma Jou'ongu Madutu.

26Ananga mo-moini 'aḏi heranga masala re 'aḏi puji re silamo'o Ma Jou'ongu Madutu. Tamanga 'akala re sinyingara ma dara 'i mojongo ḏi'i, ananga 'aḏi kanau, “Heranga masala 'oru ga'a 'i dadi wangere nange-ne!”

Yesus 'o 'aro'o 'a Lewi

(Mat. 9:9-13; Mrk. 2:13-17)

27Togumu gena, Yesus 'o supu i'a re 'o oḏi'i ngowa'a golo-golo'o balastengi matengo, 'ai lomanga 'a Lewi, 'o madi-dirini tai kantoro. Yesus 'o kanau i'a ra unanga, “Ino, mete'e Ngoi” 28Lewi 'o te'oso re 'a sisoi'i tala 'ai ngi'i gena-ge, kara 'o mete'e ra Yesus.

29Togumu i'a, Lewi 'o 'a'a laya tai wala di'a Yesus. Ngowa'a golo-golo'o balastengi manga repe re ngowa'a lelegu ḏi'i 'aḏi oromo mamete'e ra ananga. 30Ngowa'a Farisi nga muḏuo i'a re ananga manga guru-guru 'agama ananga 'aḏi sanangi ua. Dadi ananga 'aḏi kanau i'a ra Yesus 'ai me-mete'e, “I'a sa'olo ngini mo-moini ni oromo mamete'e reo ngowa'a golo-golo'o balastengi re ngowa'a baraḏosa?”#Luk. 15:1-2

31Yesus 'a sangoro, “Ngowa'a kamanga si-siḏi ua 'aḏi paralu dokter ua. Pa'i ngowa'a remanga si-siḏi ḇato 'aḏi paralu dotere. 32So'o gena ḏi'i, Ngoi to sapolo ua di'a 'aro'o ngowa'a loasa re banari mada'a di'a 'aro'o ngowa'a baraḏosa, la ananga gena-ge 'aḏi maḏibo toma ngo'omo boloto.”

Do-doto'o mangale puasa

(Mat. 9:14-17; Mrk. 2:18-22)

33Ngowa-ngowa'a 'aḏi kanau ra Yesus, “Yohanes 'ai me-mete'e re Farisi manga me-mete'e soi rai o'o i'a ananga 'aḏi puasa re 'aḏi manyiata. Mada'a 'Ani me-mete'e 'aḏi puasa ua!”

34Yesus 'a sangoro reo 'ade-'ade nena-ne: “Sanga ua ngini ni soma'a ninga ioro nongoḏu 'aḏi puasa toma ngowa'a molo'ara manga laya na'o ma geri molo'ara na-nau'u 'age tamanga sigolona moju! 35Mada'a ḏuanga i'a ma 'orasa 'i ngadolo na'o geri molo'ara gena-ge ananga 'u 'oro tamanga sigolona. Toma 'orasa gena-ge, ananga ḏuanga i'a 'aḏi puasa.”

36Ḏua Yesus 'a sijarita mangale 'ade-'ade rimoi ḏi'i: “Matengo ua, 'o pata 'ai baju ma siḏa reo ba-bata su-sungi ga'a 'a 'acingi toma baju ma su-sungi. Sababu na'o so'o gena, unanga ra 'acingi baju ma su-sungi dadi baju gena-ge 'i pake riwara. Sidogo ḏi'i, ḇa'a ma ba-bata su-sungi gena-ge 'i ma'u gasa ua reo baju ma siḏa. 37So'o gena ḏi'i, matengo ua 'o sidai'i 'anggur ma su-sungi toma 'anggur ma ngi'i ma siḏa.#5:37 'anggur ma ngi'i si'a'a reo haiwani ma 'eno'o. Sababu na'o so'o gena 'anggur ma ngi'i gena-ge 'i 'acingi, kara 'anggur 'i pa'ala re 'anggur ma ngi'i ri cira. 38'Anggur ma su-sungi balasu sidai'i toma 'anggur ma ngi'i ma su-sungi ḏi'i. 39So'o gena ḏi'i, sanga ua ngowa'a 'aḏi ka'e mulaingi 'anggur ma siḏa, kara sidu-duu'u 'anggur ma su-sungi sababu 'aḏi kanau, ‘ 'Anggur ma siḏa lebe sa'i.’ ”

Currently Selected:

Lukas 5: SNT

Highlight

Copy