Yesus 'ai so-soma'a 8

1'A Saulus 'o 'akoru ḏi'i di'a ananga 'aḏi sisengene Stefanus.

Saulus 'o sisikisa ngowa-ngowa'a ngaku Yesus

Toma wangere gena-ge ḏua, ananga 'aḏi kunu'i ngowa-ngowa'a ngaku Yesus toma limau Yerusalem, singadolo ananga 'aḏi wiḏi matai are toma daeraha Yudea re daeraha Samaria, mada'a Yesus 'ai so-soma'a 'aḏi wiḏi ua.

2Ngowa-ngowa'a loasa re banari 'aḏi palihara 'a Stefanus 'ai maiyeti toma kubu ma aḏu'u re ananga 'aḏi gaḏi unanga garura masala. 3Mada'a Saulus mau 'o sisikisa ngowa-ngowa'a ngaku Yesus. Sababu gena-ge, unanga 'o supu-osama toma wala-wala, 'o cako'o re 'o iḏala ngowa-ngowa'a gena-ge re ya'u singosama bui.#Som. 22:4-5, 26:9-11

Habari Roanga ra Ma Jou'ongu Madutu ino ya singadolo toma limau Samaria

4Ngowa-ngowa'a ngaku Yesus ga'a 'aḏi wiḏi matai are gena-ge 'aḏi singadolo Habari Roanga ra Ma Jou'ongu Madutu ino toma ngi'i le'a bolo le'a. 5'A Filipus, unanga ngowa'a ngaku Yesus, 'o wiḏi ḏi'i sisoi'i tala limau Yerusalem. Unanga 'o tagi toma limau Samaria#8:5 Limau si'aro'o Sebaste: limau gena-ge 'i lai la-lamo'o toma daeraha Samaria. 'o singadolo Habari Roanga mangale Yesus gena-ge 'O Kristus.#8:5 ma tero 'O Mesias 6-7'Age ngowa'a manga repe roh ma jira ya'u dungosama, 'a Filipus 'a dusu'u, enanga 'i supu re 'i maboa-boa'a. Unanga 'o si-la ngowa'a ḇolo re ngowa'a ceg̱u manga repe ḏi'i. Wakutu ngowa'a repe 'aḏi 'isene 'a Filipus 'ai do-doto'o re 'aḏi oḏi'i 'o 'a'a didina'o heranga gena-ge, ananga 'aḏi tailako 'a Filipus 'ai demo-demo. 8Dadi ngowa-ngowa'a toma limau Samaria 'aḏi maroanga masala.

9Toma limau gena-ge, 'age rema ngowa'a nau'u matengo, 'ai lomanga Simon. Ma di'ara ḏua 'o 'a'a sarati singadolo ananga mo-moini toma limau gena-ge 'aḏi heranga masala. Unanga 'o matoro re 'o kanau ra ananga, “Ngoi ḏua, 'a guna riwara.” 10Ananga mo-moini toma limau gena-ge, na-nau'u re we-were'a ce-ceka'a re la-lamo'o, 'aḏi tailako re 'aḏi 'isene unanga. Ananga gena-ge 'aḏi kanau, “Ngowa'a nena-ne 'ai de-de'e ra Ma Jou'ongu Madutu ino, ngene wo silomanga ‘ 'O Lamo'o Masala.’ ” 11Ma di'ara ḏua ananga gena-ge 'aḏi heranga sababu Simon 'a si'a'a sarati gena-ge singadolo ananga 'aḏi mete'e unanga. 12Filipus 'o singadolo Habari Roanga mangale Ma Jou'ongu Madutu 'ai Pareta re Yesus Kristus ḏi'i. Toma 'orasa gena-ge, ngowa'a repe 'aḏi ngaku 'oru ga'a Filipus 'o siajele. Dadi ananga sanga baptis ra Filipus, bae na-nau'u bae we-were'a. 13'A Simon masiretene 'o ngaku ḏi'i. Ḏua unanga 'o sanga baptis re 'o mete'e 'a Filipus le'a bolo le'a. Simon 'o heranga tau-taunu wakutu 'o oḏi'i 'a Filipus 'o 'a'a didina'o heranga re 'a'a ga'a hera-heranga ma lamo'o.

14Yesus 'ai so-soma'a toma limau Yerusalem ya 'isene ḏua mangale ngowa-ngowa'a toma limau Samaria 'aḏi ngaku ḏua Ma Jou'ongu Madutu 'ai demo mangale Yesus gena-ge 'O Kristus. Ḏua ananga 'aḏi cumutu 'a Petrus re 'a Yohanes, kara 'aḏi soma'a 'aḏi si'a da'a toma limau Samaria. 15Wakutu 'a Petrus re 'a Yohanes 'aḏi ngadolo, ananga 'aḏi manyiata, la Ma Jou'ongu Madutu 'o pula'a Ma Ngagara 'Ofi-'Ofi toma ngowa-ngowa'a Samaria gena-ge, 16sababu Ma Ngagara 'Ofi-'Ofi 'i 'uci re ya'u ḏegoro nyangu. Ananga gena-ge sanga baptis ra Ma Jou Yesus 'ai lomanga ḇato. 17Ḏua 'a Petrus re 'a Yohanes ya siteru manga giama ra ananga matengo re matengo, kara Ma Ngagara 'Ofi-'Ofi 'i 'uci ya'u ḏegoro.

18Wakutu Simon 'a oḏi'i ananga gena-ge Ma Ngagara 'Ofi-'Ofi ya'u ḏegoro sababu Yesus 'ai so-soma'a ya siteru manga giama ra ananga matengo re matengo, unanga 'o gasa 'o pipisi ra Petrus re 'a Yohanes, 19re 'o kanau, “Kuasa gena-ge pula'a ino ra ngoi ḏi'i, la Ma Ngagara 'Ofi-'Ofi 'i 'uci re 'i ḏegoro ḏi'i na'o ngoi ta siteru 'ari giama ra guna ḇato.”

20Mada'a Petrus 'a sangoro, “Ngana re 'ani pipisi ni osama naraka, sababu ngana na ta'ajiri Ma Jou'ongu Madutu 'ai cocatu nyengara na tibo reo pipisi! 21Ngana no ma'u mete'e munara ra ngomi yoḏu'u sababu 'ani 'akala re sinyingara ma dara 'i banari ua ra Ma Jou'ongu Madutu 'ai momina. 22Sababu gena-ge, na sieanga 'ani maksudu ma jira re no manyiata ra Ma Jou'ongu Madutu no golo'o Unanga 'o singi-ngiranga 'ani 'ulungu ma jira toma 'akala re sinyingara ma dara. 23Sababu Ngoi ta waro 'Iblisi ni ḏegoro ngana re 'ani 'akala re sinyingara ma dara 'i go-goḏi masala.”

24'A Simon 'o kanau i'a ra Petrus re 'a Yohanes, “Na'o so'o gena, ni riono ngoi re manyiata ra Ma Jou'ongu Madutu, la 'oru ngini ni siajele ge, awa 'i dadi ra ngoi.”

25Pasala i'a, ananga 'aḏi sijarita remanga wo-waro masiretene mangale Yesus Kristus tamanga 'ahu ma dara re 'aḏi singadolo Habari Roanga, kara Petrus re 'a Yohanes 'aḏi maḏibo toma limau Yerusalem. Tamanga ḏo-ḏagi gena-ge, wakutu ananga 'aḏi tuḏu toma gamu-gamu toma daeraha Samaria, ananga 'aḏi singadolo mangale Habari Roanga ḏi'i.

Filipus re ngowa'a Etiopia, unanga gena-ge 'ai ḏe-ḏegoro lai kau'u

26Toma 'orasa gena-ge, Ma Jou'ongu Madutu 'ai mala'ekata matengo 'o kanau ra Filipus, “No tagi mete'e ngo'omo kore mie toma limau Yerusalem re limau Gasa ma sigolona.” Ngo'omo gena-ge 'i garura. 27Ḏua Filipus 'o tagi. Toma 'orasa gena-ge, ngowa'a Etiopia 'ai ḏe-ḏegoro lai kau'u tai ḏo-ḏagi maḏibo toma nagara Etiopia. 'Au nga'ene, unanga gena-ge ro tagi toma limau Yerusalem di'a 'o silamo'o re siḏubuso Ma Jou'ongu Madutu. Unanga ngo Kandake 'ami Kadato ma ja-jaga re 'ami pipisi ma gu-gu'u ma sae'e; Kandake, munanga gena-ge ngowa'a Etiopia manga 'olana. 28Tai ḏo-ḏagi maḏibo, ngowa'a Etiopia gena-ge tai goroba ma dara#8:28 jarana 'i iḏala 'o goroba 'o baca nabi Yesaya 'ai boku. 29Ma Ngagara 'Ofi-'Ofi 'i kanau ra Filipus, “No tagi re no sebanga i'a toma goroba ge.” 30Filipus 'o lalara 'o masebanga i'a re 'o 'isene ngowa'a Etiopia gena-ge 'o baca nabi Yesaya 'ai boku. Filipus 'o sano, “Tuanga, 'oru no baca, no sahe bolo ua?”

31Ngowa'a Etiopia gena-ge 'o sangoro, “Ngoi ta waro ua, na'o matengo i'a mai ua 'a sipula'a ma ngale ra ngoi!” Ḏua unanga 'o golo'o 'a Filipus 'o palene tai goroba re tegoro ma'u sebanga ra unanga.

32Ngowa'a Etiopia gena-ge 'a baca ra nabi Yesaya 'ai boku. Nabi gena-ge 'o silefo ma betongo so'o ne:

“Unanga ma tero sa'olo doba ya gasa mau ya tola'a,

re 'o ma tero sa'olo doba ma ngowa ya guti ma gogo, mada'a 'i poa'a ua.

So'o gena ḏi'i, Unanga kama kanau bale moi i'a mai ua.

33Ananga 'U pula'a mara'a re 'U si'u'ua Unanga.

Ḏua ananga 'U sengene singadolo matengo i'a ua ya sijarita mangale 'Ai ngowa re danongo.”#Yes. 53:7-8

34Ngowa'a Etiopia gena-ge 'o kanau ra Filipus, “Na'o no nyengara na siajele ra ngoi, nabi 'ai maksudu gena-ge 'a guna? Unanga masiretene bolo ngowa'a lelegu?” 35Ḏua 'a Filipus 'o mulaingi kanau, pake bu-bula'a—bu-bula'a gena-ge ra Yesaya 'ai boku, la 'o singadolo Habari Roanga mangale Yesus toma ngowa'a Etiopia gena-ge. 36Tamanga ḏo-ḏagi gena-ge ma dara, ananga 'aḏi ngadolo toma ngi'i rimoi rema ḇanyo. Ngowa'a Etiopia gena-ge 'o kanau, “Oḏi'i 'age rema ḇanyo! Nyengara bolo ua to sanga baptis?”

[ 37Filipus 'o sangoro, “Tuanga na'o no ngaku rani 'akala re sinyingara mode-mode'e, nyengara Tuanga no sanga baptis.”

Ngowa'a Etiopia gena-ge 'o kanau, “Ngoi to ngaku Yesus Kristus, Unanga gena-ge Ma Jou'ongu Madutu 'ai Ngowa'a Nau'u.”]

38Ḏua unanga 'o soma'a goroba ma ga-gasa sitogumu goroba gena-ge, kara ananga nga muḏiḏi 'aḏi 'uci toma ḇanyo ma dara re 'a Filipus 'o baptis unanga. 39Wakutu ananga 'aḏi pere ie toma du-dudungu, kage-kage Ma Ngagara 'Ofi-'Ofi 'u gasa 'a Filipus toma ngi'i ma lelegu. Ḏua ngowa'a Etiopia gena-ge 'o oḏi'i Filipus riwara. Unanga 'a dowanga 'ai ḏo-ḏagi ra roanga masala. 40Siwaro i'a ua, 'a Filipus 'o ngadolo ḏua toma limau Asdod. Wakutu unanga 'a dowanga 'ai ḏo-ḏagi toma limau Kaisarea, 'o tuḏu toma limau mo-moini 'o singadolo Habari Roanga.

Currently Selected:

Yesus 'ai so-soma'a 8: SNT

Highlight

Copy