Yesus 'ai so-soma'a 17

Toma Limau Tesalonika

1Toma limau Filipi, Paulus ra Silas ya dowanga manga ḏo-ḏagi 'aḏi tola'a i'a toma limau Ampifolis, re limau Apolonia, kara 'aḏi ngadolo toma limau Tesalonika. Toma limau gena-ge 'age rema wala puji. 2Na'o rema wala puji, biasa Paulus 'o osama re ma'u sangoro i'a re ino mangale bu-bula'a—bu-bula'a toma Boku 'Ofi-'Ofi. Sabata soi ro'ange ino, unanga 'o 'a'a so'o gena-ge. 3Paulus 'o sitarangi re 'o pula'a bukiti toma Boku 'Ofi-'Ofi mangale 'O Kristus balasu 'o basono sangisara re Unanga dadunu 'o 'ahu moju da'a toma ngowa'a senge-sengene manga sigolona. Re Paulus 'o kanau, “Ngoi to siajele ra ngini mangale Yesus, Unanga gena-ge 'O Kristus ga'a Ma Jou'ongu Madutu 'U sijaji pasala ḏua.” 4Ananga nga muḏuo i'a re 'aḏi dadi ngowa'a ngaku Yesus kara 'aḏi mete'e 'a Paulus ra Silas. So'o gena ḏi'i, ngowa'a Yunani ga'a 'aḏi silamo'o re mojongo Ma Jou'ongu Madutu re 'o ngowa'a la-lamo'o manga we-were'a manga repe ḏi'i, ananga 'aḏi ngaku Yesus.

5Mada'a ngowa'a Yahudi manga 'akala si-siḏi sababu manga repe raḏi ngaku Yesus. Dadi ananga 'aḏi lomu ngowa-ngowa'a kamanga munara ua toma pasara, kara 'aḏi 'a'a kaco toma limau gena-ge. Ḏua ananga 'aḏi jau-jau tagi ra Yason 'ai wala, 'aḏi disa 'a Paulus re 'a Silas, la ya'u gasa re sitalaḏi toma ngowa'a repe manga biono. 6Mada'a ananga 'aḏi sanga ua 'a Paulus re 'a Silas. Dadi ananga 'aḏi gasa 'a Yason re ngowa'a ngaku Yesus nga muḏuo i'a toma ngowa'a la-lamo'o toma limau gena-ge. Ananga 'aḏi mapataha 'aḏi kanau, “Paulus re 'a Silas 'aḏi 'a'a kaco toma ngi'i le'a bolo le'a. Nange-ne ananga raḏi sapolo ra ngene nanga limau, 7re Yason ya'u dawongo ananga ra unanga 'ai wala. Ananga 'aḏi mete'e ua Kaisar 'ai 'atoranga, sababu 'aḏi siajele 'age ḏi'i 'olana ma lelegu, 'ai lomanga Yesus.” 8Wakutu ananga 'aḏi kanau so'o gena, ngowa'a repe re ngowa'a la-lamo'o toma limau gena-ge ya 'isene 'aḏi manyiwere. 9Ḏua ananga 'aḏi soma'a Yason re ngowa-ngowa'a ngaku Yesus nga muḏuo i'a 'aḏi pula'a pipisi di'a manga du-duusu, kara ya'u eanga.

Toma limau Berea

10Ma lobi'i gena-ge ḏua, ngowa-ngowa'a ngaku Yesus toma limau Tesalonika silalo'o 'a Paulus re 'a Silas toma limau Berea. Wakutu Paulus re 'a Silas aro ngadolo toma limau gena-ge, ananga 'aḏi tagi toma wala puji. 11Ngowa'a Berea manga 'akala re sinyingara lai rousu, ma tero ua re ngowa-ngowa'a Tesalonika. Ananga manga 'akala re sinyingara 'i sanangi 'aḏi 'isene Habari Roanga mangale Yesus, re wange moi-wange moi ananga 'aḏi madoto'o toma Boku 'Ofi-'Ofi di'a ya disa waro ngadolo le'a 'a Paulus 'a siajele; banari bolo ua. 12Sababu gena-ge tamanga sigolona ngowa'a Yahudi manga repe 'aḏi ngaku Yesus. So'o gena ḏi'i ngowa'a la-lamo'o toma ngowa'a Yunani: na-nau'u manga repe re we-were'a nga muḏuo i'a 'aḏi ngaku Yesus. 13Wakutu ngowa'a Yahudi toma limau Tesalonika ya 'isene 'a Paulus 'o singadolo Ma Jou'ongu Madutu 'ai demo toma ngowa-ngowa'a Berea, ananga 'aḏi sapolo toma limau Berea gena-ge re 'aḏi singosama demo di'a siruwahe manga 'akala re sinyingara singadolo ananga 'aḏi ruta ra Paulus. 14Dadi ngowa'a ngaku Yesus toma limau Berea jau-jau 'aḏi soma'a ngowa-ngowa'a ngaku Yesus nga muḏuo i'a 'aḏi singata'a Paulus tagi toma ngoloto ma 'uḏu. Mada'a 'a Silas re 'a Timotius 'aḏi tegoro moju toma limau Berea. 15Ananga 'aḏi sidete singata'a 'a Paulus singadolo toma limau Atena. Pasala i'a, ananga 'aḏi maḏibo toma limau Berea. Paulus 'o bererongo ra ananga, siajele ra Silas re 'a Timotius 'aḏi macapati ino.

Toma limau Atena

16Wakutu 'a Paulus 'o totoma 'a Silas re 'a Timotius toma limau Atena, 'ai 'akala re sinyingara 'i kangela sababu 'o oḏi'i toma limau gena-ge 'i romanga reo jou'ongu ma somoara.#17:16: “jou'ongu ma somoara” ma tero berhala. 17Toma wala puji ma dara, 'a Paulus 'o ma'u sangoro i'a ra ino ngowa'a Yahudi re ngowa'a Yunani ga'a 'aḏi silamo'o re mojongo Ma Jou'ongu Madutu. Wange moi-wange moi, unanga ma'u sanga ngowa'a toma pasara, unanga 'o ma'u sangoro i'a ra ino ḏi'i. 18'Age guru-guru ngowa'a fara ḏiḏi: fara moi Epikuros ino, fara moi ḏi'i Stoa ino. Ananga 'aḏi ma'u rubutu ra Paulus. 'Age nga muḏuo i'a 'aḏi kanau, “Unanga nena-ne 'o waro 'oru? 'Ai wo-waro pa'i ceka'a ua mada'a unanga pa'i demo repe.” Mamuni'a 'aḏi kanau, “Unanga nena-ne 'o siajele ma tero sa'olo dewa-dewa bangsa lelegu.” Ananga 'aḏi kanau so'o gena sababu 'a Paulus 'o singadolo Habari Roanga mangale Yesus re ngowa'a senge-sengene dadunu 'aḏi 'ahu moju. 19Ḏua ananga 'u gasa Paulus ra ananga manga lo-lomu toma Areopagus ma polono. I'a da'a ananga 'aḏi sano ra Paulus, “Ngomi mi disa waro mangale do-doto'o su-sungi gena-ge ga'a no pula'a ra ngomi. 20Ngomi mi 'isene ngana no siajele mada'a 'i osama 'akala ua. Sababu gena-ge, ngomi mau disa waro enanga ma ngale 'oru.” 21(Ngowa'a Atena mo-moini re ngowa'a tagi-tagi ino, ananga 'aḏi sieanga manga munara, sababu 'aḏi nyanyaḏi 'aḏi 'isene re ma'u sangoro i'a ra ino mangale 'ori i'a ma su-sungi.)

22Toma 'orasa gena-ge, ananga 'aḏi malomu toma Areopagus, Paulus 'o te'oso tamanga biono re 'o kanau, “Hei ngowa'a Atena, ngoi to oḏi'i ngini cufala madutu reninga 'agama ma 'atoranga mo-moini. 23Sababu wakutu ngoi to tagi sikoloḏi ninga limau, ta tailako re to oḏi'i ninga jou-jou ma ngi'i, 'age jou-jou ma ngi'i rimoi 'i silefo so'o ne: ‘Toma jou'ongu ga'a mi nana'o ua.’ Unanga gena-ge ngini ni silamo'o re siḏubuso mada'a ni nana'o ua, nange-ne ngoi to siajele ra ngini mangale Unanga gena-ge.

24Ma Jou'ongu Madutu 'o sidadi ḏua dungia re ma dara mo-moini, Unanga gena-ge 'Ai kuasa ma pari cua toma dungia ma dara. Unanga 'o tegoro ua toma jou'ongu ma somoara ma wala ga'a manusia ya 'a'a.#1'Oln. 8:27; Yes. 42:5; Som. 7:48 25Unanga 'o paralu ua manusia wo riono Unanga sababu manusia nanga 'ahu re nanga ngagara re 'ori i'a mo-moini, Unanga 'a pula'a. 26Ma Jou'ongu Madutu sidadi manusia ma mulaingi pa'i matengo ḇato, mada'a ra unanga nena-ne Ma Jou'ongu Madutu 'o sidadi bangsa-bangsa siromanga dungia. Unanga gena-ge 'a sitantukanga manga ngi'i re manga 'ahu re se-sengene. 27Ma Jou'ongu Madutu 'o 'a'a so'o gena-ge, la ananga 'aḏi disa Unanga. Re na'o ananga 'aḏi disa Unanga ḏa ananga 'aḏi ma'u sanga ra Unanga. Ma nyonyata Unanga gena-ge 'o kiḏanga ua ra ngene matengo re matengo. 28Nena-ne 'i ma tero sa'olo ngowa'a 'aḏi siajele pasala ḏua, ‘Ngene wo 'ahu toma dungia nena-ne wo te'oso re wo tegoro wo coku-cokutu duga-duga ra Unanga 'ai kuasa ḇato.’ Ma tero sa'olo ninga dolabololo ma betongo so'o ne: ‘Ngene mo-moini Unanga 'ai ngowa'a.’

29Dadi sababu ngene nena-ne Unanga 'ai ngowa'a, Ma Jou'ongu Madutu awa ngene wa site-tero sa'olo dulada guraci bolo dulada salaka bolo 'o 'a'a maḏi wa tuhu sa'olo dulada mete'e manusia manga wo-waro. 30Ma siḏa i'a, Ma Jou'ongu Madutu 'o 'elingi riwara nanga haga re nanga waro ua. Mada'a toma 'orasa nange-ne Unanga 'o soma'a ngowa-ngowa'a toma dungia ma dara mo-moini balasu wo maḏibo toma ngo'omo boloto. 31Sababu Unanga 'a sitantukanga pasala ḏua toma 'orasa rimoi ngowa'a mo-moini toma dungia ma dara Unanga 'a sijuruhakimi Rai 'adili. Ma Jou'ongu Madutu 'a sitatapu ḏua Matengo ga'a 'A siḏagi munara gena-ge. Unanga gena-ge Ma Jou'ongu Madutu 'U si'ahu moju toma ngowa'a senge-sengene manga sigolona 'i dadi bukiti rimoi, la ngowa'a mo-moini 'aḏi ngaku Unanga gena-ge 'o dadi juruhakimi.”

32Wakutu ananga ya 'isene ngowa'a 'aḏi sengene ḏua 'aḏi 'ahu moju, 'age mamuni'a 'aḏi nye-nyelo'o 'a Paulus. 'Age mamuni'a ḏi'i 'aḏi kanau, “Maha soi moi i'a, ngomi mau ma 'isene moju ngana no kanau mangale gena-ge.” 33Ḏua Paulus 'a sisoi'i tala lo-lomu gena-ge. 34Mada'a 'age mamuni'a 'aḏi mete'e unanga re 'aḏi dadi ngowa'a ngaku Yesus. Ananga gena-ge: 'a Dionisius, unanga osama nyo-nyoimi toma lo-lomu Areopagus ino, re we-were'a matengo 'ami lomanga ngo Damaris, re ngowa-ngowa'a nga muḏuo i'a ḏi'i.

Currently Selected:

Yesus 'ai so-soma'a 17: SNT

Highlight

Copy