Yesus 'ai so-soma'a 14

Toma limau Ikonium

1'Oru 'i dadi toma limau Antiokhia, ma tero 'i dadi ḏi'i toma limau Ikonium: Paulus re 'a Barnabas, ananga 'aḏi osama re 'aḏi doto'o ngowa-ngowa'a toma wala puji toma limau Ikonium gena-ge. Ananga 'aḏi doto'o mangale Ma Jou Yesus singadolo ngowa'a Yahudi re ngowa'a Yahudi ua manga repe raḏi ngaku Yesus. 2-3Sababu gena, Paulus re 'a Barnabas ananga 'aḏi tegoro 'age lai ti'ara. Ananga 'aḏi mojongo ua 'aḏi kanau mangale Ma Jou Yesus. Sababu Ma Jou'ongu Madutu 'age ra ananga re 'O pula'a kuasa ra ananga singadolo 'aḏi 'a'a didina'o heranga re 'ori i'a hera-heranga. Mada'a ngowa'a Yahudi ga'a 'aḏi ngaku Yesus ua, ananga 'aḏi dola'aku re 'aḏi baja ngowa'a Yahudi ua, la 'aḏi bo-bosono toma ngowa'a ngaku Yesus.

4Mada'a ngowa-ngowa'a toma limau gena-ge 'aḏi ma'u tolabe matengo re matengo: 'Age 'aḏi marimoi toma ngowa'a Yahudi re 'age 'aḏi marimoi ra Yesus 'ai so-soma'a. 5Ḏua ngowa'a Yahudi nga muḏuo i'a re ngowa'a Yahudi ua manga bi-biri'i—bi-biri'i, ananga mafakati mau 'aḏi sisikisa re 'aḏi poini Yesus 'ai so-soma'a reo maḏi. 6Mada'a Yesus 'ai so-soma'a gena-ge re 'a waro, ḏua 'aḏi wiḏi toma daeraha Likaonia re 'aḏi tegoro co-cori limau Listra re limau Derbe. 7I'a da'a, ananga 'aḏi singadolo ḏi'i Habari Roanga.

Toma limau Listra re limau Derbe

8Toma limau Listra 'age rema na-nau'u matengo 'ai rou 'i ḇolo singe-ngeta'a da'u tala moju re unanga kama tagi i'a ua. 9Ngowa'a gena-ge tegoro 'a sigi-gisene Paulus 'ai do-doto'o. Paulus 'u tailako re 'o nana'o ngowa'a gena-ge rai ngo-ngaku ra Yesus singadolo 'o la nyengara. Ḏua Paulus 'u lakodoto unanga 10re 'o kanau 'a siduga-duga, “No te'oso bo-boloto ie!” Unanga gena-ge 'o maḏupaka te'oso, kara ro tagi. 11Wakutu ngowa-ngowa'a gena-ge 'aḏi oḏi'i 'a Paulus 'o 'a'a so'o gena, ananga 'aḏi poa'a pake demo Likaonia, “Dewa-Dewa 'i 'uci matuhu sa'olo ngowa'a.” 12'A Barnabas, ananga 'u silomanga Zeus, Paulus, ananga 'u silomanga Hermes, sababu Paulus ga'a 'o ka-kanau. 13Dewa Zeus, enanga ma wala 'i maḏegoro toma limau ma ḏuḏunu. Re 'age 'imam matengo 'o side-de'oso Dewa Zeus 'o gasa sapi-sapi ma nau'u re 'o saya-saya di'a manga jou-jou toma limau ma ngalana lamo'o. Unanga ma'u mete'e ngowa'a repe 'aḏi sidoa'a manga jou-jou ra Yesus 'ai so-soma'a.

14Wakutu 'a Barnabas re 'a Paulus ya 'isene ngowa'a repe 'aḏi 'a'a so'o gena, ananga ya 'acingi manga pakeanga, sababu manga 'akala re sinyingara 'i kangela re 'aḏi lalara toma ngowa'a repe manga sigolona re 'aḏi poa'a, 15“Hei, i'a sa'olo ngini ni 'a'a so'o nena-ne? Ngomi ne mai manusia ḏi'i 'i ma tero sa'olo ngini! Ngomi mi sapolo 'ane mi singadolo Habari Roanga ra ngini, la na sieanga 'ori i'a ma fa'eda 'i cua nena-ne re ni silamo'o re siḏubuso Ma Jou'ongu Madutu ḇato. Unanga gena-ge 'ai 'ahu kasingado-ngadolo i'a re 'O sidadi ḏua diwanga re 'o dungia re ma dara mo-moini.#Sup. 20:11; Nya. 146:6 16Wakutu 'au wali, Ma Jou'ongu Madutu 'o sieanga bangsa-bangsa 'aḏi 'ahu mete'e manga mau masiretene. 17Mada'a Unanga gena-ge 'a sidaioranga ua 'o pula'a didina'o di'a sijumu mangale Ma Jou'ongu Madutu rema enanga. Unanga 'o 'a'a la-la toma ngowa'a repe: Unanga 'o pula'a besa'a da'u diwanga tala re 'o joro-joro toma tana'a 'i sowo'o re ya 'utu'u di'a manga ngo-ngoromo singadolo manga 'akala re sinyingara 'i maroanga.” 18Kalaha Paulus re 'a Barnabas 'aḏi kanau so'o gena, ngowa'a ya 'isene gena-ge 'aḏi mau gasa re 'aḏi pula'a manga jou-jou ra ananga moju singadolo ananga 'aḏi basono kangela masala ya sitogumu. Mada'a ma ḏo-ḏogumu, Paulus re 'a Barnabas ya sitogumu 'aḏi sidoa'a jou-jou ra ananga.

19'Age ngowa'a Yahudi nga muḏuo i'a toma limau Antiokhia — toma daeraha Pisidia re limau Ikonium ḏi'i, 'aḏi tagi toma limau Listra — ananga 'aḏi baja ngowa-ngowa'a toma limau gena-ge singadolo manga repe 'aḏi lawana 'a Paulus re 'a Barnabas. Ananga 'aḏi poini 'a Paulus reo maḏi, kara 'u taba'a unanga re 'u sisupu toma limau ma ḏuḏunu sababu 'aḏi ta'ajiri unanga ro sengene. 20Ḏua ngowa'a ngaku Yesus 'aḏi made-de'oso 'u sigoloḏi unanga re Paulus 'o momi'i re dadunu 'o osama toma limau gena-ge ma dara. Ma ḇiḇini ino, unanga 'o tagi toma limau Derbe 'aḏi ma'u mete'e ra Barnabas.

Paulus re 'a Barnabas 'aḏi maḏibo toma limau Antiokhia

21Toma limau Derbe, Paulus re 'a Barnabas 'aḏi singadolo Habari Roanga, ḏua ngowa'a manga repe 'aḏi dadi ngowa'a ngaku Yesus. Gena ḏua, ananga dadunu 'aḏi tuḏu toma limau Listra, limau Ikonium re limau Antiokhia toma daeraha Pisidia. 22Toma limau-limau gena-ge, ananga 'aḏi site'e ngowa'a ngaku Yesus manga ngo-ngaku re 'aḏi babata ananga gena-ge di'a 'aḏi ngaku Yesus tau-taunu re 'aḏi mete'e Unanga 'ai do-doto'o ḇato re 'aḏi siajele “Ngene balasu wo basono kangela siḏa, kara ḏuanga i'a wa sanga ma sanangi toma soroga ra Ma Jou'ongu Madutu.” Paulus re 'a Barnabas 'aḏi doto'o ngowa'a ngaku Yesus so'o gena toma limau-limau gena-ge. 23Toma jama'ata mo-moini, Paulus re 'a Barnabas 'aḏi sitede manga jama'ata ma bi-biri'i.#14:23: “Jama'ata ma bi-biri'i” ma tero penatua-penatua jemaat Ananga 'aḏi manyiata re 'aḏi puasa 'aḏi golo'o ra Ma Jou'ongu Madutu la Unanga ya'u kalesanga ananga, sababu ananga 'U ngaku Unanga ḏua.

24Gena ḏua, Paulus re 'a Barnabas ya dowanga manga ḏo-ḏagi 'aḏi tola'a daeraha Pisidia re 'aḏi ngadolo toma daeraha Pamfilia. 25Toma limau Perga toma daeraha Pamfilia, ananga 'aḏi singadolo Ma Jou'ongu Madutu 'ai demo. Togumu i'a, ananga 'aḏi tagi toma limau Atalia. 26Toma limau Atalia, ananga 'aḏi sidete maḏibo toma limau Antiokhia. 'Au wali, jama'ata toma limau gena-ge, ananga 'aḏi sidoa'a Paulus re 'a Barnabas ra Ma Jou'ongu Madutu 'ai mura re dadalara, la Unanga ya'u kalesanga ananga singadolo ananga nga'unu ya siḏuanga manga munara ga'a aro 'i ḏuanga ḏua.

27Wakutu ananga 'aḏi ngadolo toma limau Antiokhia, Paulus re 'a Barnabas 'aḏi lomu ngowa'a ngaku Yesus re ya siajele mangale ma duhu sa'olo Ma Jou'ongu Madutu 'o pake ananga di'a sidagi 'Ai munara. Ananga ya siajele ḏi'i mangale Ma Jou'ongu Madutu 'o mete'e ananga singadolo ngowa-ngowa'a Yahudi ua mai 'aḏi dadi ngowa'a ngaku Yesus. 28Toma limau gena-ge, Paulus re 'a Barnabas 'aḏi tegoro ma di'ara i'a toma ngowa-ngowa'a ngaku Yesus.

Currently Selected:

Yesus 'ai so-soma'a 14: SNT

Highlight

Copy