Mrk 8

Yesu aphamela a kutlula mune wa makume ya madzana (4000) ya vhanu

(Mt 15:32-39)

1Amasikwini lawo katlheli kuva ni xitrhungu xikulu, loko kungahali na swakuda, Yesu avitana a vadondrisiwa aku ku vone: 2Nitwela vurombe a xitrhungu lexi, hikusa i masiku mararu na vatrhamisi ku mine na vangana ntxhumu xa kuda. 3Ni loko nivatlhelisela ma kaya kwavu na vangadanga, vatahela ntamu andleleni. Mfuri van'we ku vone vapfa kule. 4A vadondrisiwa vakwe vamuyangula vaku: Xana hingaswikuma kwini a swakuda swa vhanu vanyingi kola huleni? 5Yene avavutisa aku: Xana n'wina makati mangani? Vone vaku: Ntlhanu na mabiri.

6Ahangaleleta a xitrhungu leswaku xitrhamisa hansi, Kutani ateka a ntlhanu wa makati na mabiri, atlangela Xikwembu Nkulukumba, akhemelela, anyika a vadondrisiwa akuva vayavela vhanu, kutani vone vavayavela. 7Nakone afa vani tinhlampfinyana tinge-tingani, atikatekisa anyika vadondrisiwa akuva vatiyavela na tone ku vhanu. 8A vhanu vada vaxura vava vatata ntlhanu wa swihundru na swibiri hi swibuvu leswi swisaliki. 9Kambe afa vatlula mune wa makume ya madzana (4000), ya vhanu. Kutani Yesu avatlhelisa.

10Ahatla anhingena byatrhwini kun'we ni vadondrisiwa vakwe, vaya tikweni dra le Dalmanuta#8:10 A tikwana dra Dalmanuta adritiviwi.

A vafarisi vakombela a xifaniso xa ntamu wa Yesu

(Mt 16:1-4)

11Ka kutlhasa van'we va vafarisi, vasungula kukanetana na Yene. Afa vadjula akuva anyika xikombiso, ayentxa a xikombiso xa le Tilweni. 12Yene ahefemula ahikeni drakwe aku: Xana hayini a lixaka ledri, drikombela a xikombiso? Nihlayelamfuri nan'wibyela: Kungatinyikiwa xikombiso ku lixaka ledri. 13Kutani asuka, atlhela anhingena byatrhwini awelela halahaya ka tiva.

Handrelo ya vafarisi ni ya Heroda

(Mt 16:5-12)

14A vadondrisiwa afa vadrivali kuteka a makati, mfuri afa vangena ntxhumu abyatrhwini loko dringe kati drin'we ntsena. 15Kutani Yene avaleleta aku: Lavisani! Tivonelani ku handrelo ya vafarisi ni handrelo ya Heroda. 16Kutani a vadondrisiwa afa vakanetana vaku: Ahlaya leswo hi leswi hingekena makati.

17Yesu aswiyingela, aku ku vone: Xana n'wikanetelana yini hi leswi n'wingekena makati? Xana an'wisina yanakanya ni kuyingelisisa ntxhumu xana? Mahanonon'hwa atimbilwini tenu kuyingelisisa? 18Leswi n'wingani mahlu ni tindleve ha yini n'wingavoni ni kuyingela, xana? An'widrimuki, 19#Lavisa 6:35-44. loko nikhemeleli ntlhanu wa makati ku lava va ntlhanu wa makume ya madzana (5000) ya vhanu? Xana n'witati swihundru swingani hi mantlhantlha, xana? Vaku ku Yene: Khume na swibiri. 20Ni loko nikhemeleli makati lawa ya ntlhanu na mabiri ku vhanu va kutlula mune wa makume ya madzana (4000) n'waroleli mantlhantlha kutala swihundru swingani xana? Vaku ku Yene: Ntlhanu na swibiri. #Lavisa 8:1-9. 21Ahangavabyela aku: Xana an'wisina yingelisisa ntxhumu?

Kuhanyisiwa ka wa kufa-mahlu wa le Betsaida

22Kutani Yesu ni vadondrisiwa vatlhasa a Betsaida. A vhanu vatisa mun'we wa kufa-mahlu vamukombela leswaku amukhumba. 23Yene akhoma lweyi wa kufa-mahlu hi voko, amuyisa a handle ka muti. Loko athukeli mari ku mahlu yake, amuntlhanteka mavoko, amuvutisa aku: Xana uvona xa txhumu? 24A wanuna lweyo apfula a mahlu ayangula aku: Nivona a vhanu, nivavonaka vafamba swanga i minsinya! 25Atlhela antlhanteka a mavoko amahlweni ya mhunu lweyo, yene asungula ku vona hi kuhetiseka, lakakuva avona hinkwaswu swinene. 26Yesu amutlhelisela a kaya kwake, na aku ungahanhingeni mutini.

Petrosi ahlaya leswaku Yesu i Kriste

(Mt 16:13-20; Lk 9:18-21)

27Kutani Yesu asuka kun'we ni vadondrisiwa vakwe, aya mitanini ya le Khezareya wa Filipi! Vaku na vahali ndleleni a vutisa vadondrisiwa vakwe aku: Xana a vhanu vali ni mani? 28Vaku ku yene: Van'we vali u Yohana Mubabatisi, a van'wana vali u Eliya, a van'wana kambe vali u mun'we wa vaprofeta. 29Yesu ayengeta avavutisa aku: N'wine-ke, n'wili ni mani xana? Petrosi ayangula aku ku yene: Wene u Kriste. 30Kambe avalaya leswaku vangabyeli mhunu a takwe.

Yesu a khanela hi lifu drakwe ni kupfuka kufeni

(Mt 16:21-28; Lk 9:22-27)

31Kolanu, asunguli kudondrisa a vadondrisiwa vakwe leswaku swifanekeli a N'wana wa Mhunu atwisiwa kuvaviseka loku kulu, ni kutxukumetiwa hi vakulu va tiko ni vaprista lava vakulu ni vadondrisi va Nawu, ava adlawa, atlhela apfuka kufeni loko kuhundri masiku mararu.

32Afa avabyela a ritu ledro alivaleni. Petrosi amutekela tlhelweni asungula kumulaya hikuva ahlayi leswo. 33Kambe Yene andruluka avona vadondrisiwa vakwe alaya Petrosi aku: Suka lani ku mine Sathana! Hikusa awuyanakanyi swa Xikwembu Nkulukumba kambe uyanakanya a swa vhanu.

34Kutani avitana a xitrhungu kun'we ni vadondrisiwa vakwe, aku ku vone: Loko a mhunu arandra a kunilandra, atiyale, atirwexe xihambano xakwe anilandra. 35Hikusa lweyi arandraka kuhuluxa a vutomi byake atabyilahla, kambe lweyi atakalahla a vutomi byake ha mine ni hi dondriso dranga, yene atabyihuluxa. 36Hikusa switamupfuna yini a mhunu, nambi afuya a misava hinkwayu, hi vugamu atilahla? 37A mhunu anganyika yini a kuxava a hika drakwe?

38A mhunu lweyi atakavani tingana ha mine ni maritu yanga amakari ka lixaka dra kusandra, ni dra kudoha, a N'wana wa Mhunu na yene atava ni tingana ha yene, a siku atakabuya hi kuphatima ka Tatana wakwe, kun'we ni swirun'wa leswi swakuxwenga.

Currently Selected:

Mrk 8: NTX2007

Highlight

Copy