Mrk 5

Kuhanyisiwa ka mhunu wa mimoya leyi mimfani

(Mt 8:28-34; Lk 8:26-39)

1Kutani vatlhasi halahaya ka tiva, atikweni dra va-Gerasi. 2Aku na ahahuma byatrhwini, kuta mhunu lweyi angani moya lowu mfani, atatamutlhangaveta. 3Afa atrhama maxireni, mfuri afa kungena mhunu lweyi aswikotaka a kumutrimba hi timpentxana. 4Hikusa afa atrimbiwi kunyingi a mavoko ni minenge hi timpentxana, kambe yene afa atrhova hinkwaswu kutani afa kungena mhunu lweyi aswikotaka a kumunabyalisa. 5Vusiku ni nhlikanhi, amaxireni ni le tinhaveni, afa a ba huwa, na atipswetula hi maribye. 6Atiki avona Yesu, na ahali kule atrutruma, atatawa hi matrolo aminengeni yake, 7abandlukana aku ku yene: Udjula yini ku mine wene Yesu, N'wana wa Xikwembu Nkulukumba lweyi anga Henhla-henhla? Nikukombela hi kuhlambanya hi Xikwembu Nkulukumba, unganixanise! 8Hikusa afa aku ku yene: We moya lowu mfani, huma ku mhunu lweyi. 9Kutani amuvutisa, aku: Xana a vito draku u mani? Yene ayangula aku: A vito dranga, ni butrhu, hikusa hi vanyingi. 10Kutani amukhongota ngopfu aku: Ungahihlongoli ku tiko ledri.

11Afa kuni ntlhambi wukulu wa tinguluve, lowu afaka wubyisiwa anhaveni. 12Kutani a mimoya leyi mimfani mimukhongota miku: Hirumi tinguluveni hiya nhingena ku tone. 13Yene apfumela, kutani a mimoya leyi mimfani mihuma amhunwini, miyanhingena atinguluveni, leti afaka tili kusuhi ni makume mabiri ya madzana (2.000). Tahangatrutruma hinkwatu hi ligingiri dra tiva, tiyatika ativeni. 14A vabyisi va tone vatrutruma vaya mutini ni le matlhelweni, vayabika leswi swihumeleliki. Kutani a vhanu vanyingi vaya ku Yesu; 15vavona a mhunu lweyi afaka ani mademoni, atrhamisile na ayambalile, atlharihile, yene lweyi afaka avini butrhu. Loko va vona leswi vatxhava. 16Kolahu lava vaswivoniki va vatlhamuxela hi laha swihumeleliki ha kone ku lweyi wa mimoya leyi mimfani ni swa tinguluve. 17Vahangasungula kumukhongota leswaku asuka atikweni dravu.

18Kuti loko anhingena abyatrhwini, a mhunu lweyi afaka ani mademoni, amukhongota akuva afamba na Yene. 19Kambe Yene angamupfumeleli, ntrhaku aku ku yene; timukeli a kaya kwaku uyavabyela leswi a Hosi yikuyentxeliki swone, ni hi laha yiviki ni lilondro ku wene! 20A mhunu lweyo ahangasuka ayasungula a kudrungula atikwanini dra Dekapolisi hinkwaswu leswi swikulu Yesu amuyentxeliki swone. Kutani a vhanu va kone hinkwavu vahlamala.

Xikombelo xa Yayirusi

(Mt 9:18-19; Lk 8:40-42)

21Loko Yesu atlheli awelela halahaya ka tiva hi byatrhu, a xitrhungu xikulu xihlengeletana ku yene. 22Kutani kutlhasa mun'we wa mufambisi wa sinagoga, lweyi valiki i Yayirusi, atrhindrekela ku Yesu, atiwisa aminengeni yake, 23amukhongota ngopfu, aku: A n'wananga wa wanhwanyana a kusuhi ni kufa. Tana, umuntlhanteka a mavoko, akuva a hanyisiwa. 24Kutani Yene afamba na yene.

Kuhanyisiwa ka mbabyi ya wansati

(Mt 9:20-22; Lk 8:43-48)

Ankameni wolowo, a xitrhungu lexi xikulu afa ximulandra, ximukamanyeta hi matlhelo hinkwawu. 25Afa kuni wansati lweyi avabyiki hi vukuvali #5:25 Mavabyi ya kuhalaka ngati. hi malembe ya khume na mabiri, 26axaniseki ngopfu hi tin'anga tinyingi, ahumexiki ni vukosi byake hinkwabyu, kambe aswipfunanga ntxhumu, ntsena swehundrisa! 27Atiki ayingela timhaka ta Yesu, ata hi le ntrhaku amakari ka xitrhungu, akhumba xiyambalu xakwe 28hikusa afa aku: Loko ningakota a kukhumba a xiyambalu xakwe ntsena, nitahanyisiwa. 29Hileswo-ke, ahundra hi le xikari ka xitrhungu ayima antrhaku ka Yesu kutani akhumba a xiyambalu xakwe. Hi nomu-lo atitwa na antrhunxekile kuxanisekeni kwake ava avona leswaku ahanyisiwile. 30Yesu na Yene aswitwa andreni kwake leswaku kuhumi ntamu wa kukari ku yene, andrulukela xitrhungwini aku: Xana hi mani lweyi akhumbiki swiyambalu swanga? 31A vadondrisiwa vakwe vaku ku yene: Waswivona leswaku a xitrhungu xa kukamanyeta, kambe wahavutisa leswaku hi mani lweyi akukhumbiki? 32Yene afa aralarala a matlhelo hinkwawu atavona lweyi ayentxiki leswo. 33Kambe, lweyi wansati, atxhava, arurumela, hi kutiva leswi swiyentxiwiki ku yene. Atrhindrekela ku Yesu amukhisamela amubyela hinkwaswu leswi swinga swone. 34Kambe Yesu aku ku yene: N'wananga, akupfumela kwaku kukuhuluxile; famba hi kurula. Utrhunxekile a kuxanisekeni kwaku.

Kupfuxiwa ka n'wana Yayirusi a kufeni

(Mt 9:23-26; Lk 8:49-56)

35Kuti loko Yene ahakhanela, kutlhasa a vhanu lava vapfaka hi le kaya ka Yayirusi vaku ku yene: A n'wanaku afile, xana wahakaratela yini a Mudondrisi? 36Kambe Yesu angalondrisanga ritu ledri vadrikhanelaka, aku ku Yayirusi: Ungatxhave, pfumela ntsena. 37Kutani angapfumelelanga mhunu a kumuheketa, loko vange va Petrosi na Yakobe na Yohana, amakwa Yakobe. 38Loko vatlhasile andlwini ya Yayirusi, ayingela pongwe ni kuvona lava vadrilaka, vabongosaka ngopfu, 39anhingena aku ku vone: Xana n'wibela yini a pongwe? N'widrilela yini? A nhwanyana angafanga kambe ekhutriyela. 40Kutani vamuhleka. Kambe Yene avahumexa hinkwavu. Ateka a tatana wa nhwanyana ni mamana wakwe ni lava afaka vali na Yene ayanhingena lani a nhwanyana afaka ali kone. 41Kutani amukhoma hi voko aku ku yene: Talita kumi#5:41 A maritu lawa yaku Talita kumi mapfa ku Xiaramu, anga lidrimi ledri afaka drikhaneliwa a Palestina, ankameni wa Yesu, na kone amayanakanyeleni ya Marka drikombisa a ntamu wa kupfuka-kufeni., hileswaku: Nhwanyana, pfuka! 42Hi nomu-lo, lweyi wanhwanyana apfuka, asungula ni kutifambela; na afa ali wa khume dra malembe na mabiri. Hinkwavu vava ni kuhlamala loku kulu. 43Kutani ahangavaleleta ngopfu leswaku vangatxhuke vabyela mhunu leswi swihumeleliki, ntrhaku avabyela leswaku vamunyika a swakuda.

Currently Selected:

Mrk 5: NTX2007

Highlight

Copy