Mrk 4

Xifaniso xa mubyali

(Mt 13:1-9; Lk 8:4-8)

1Yesu atlhela aya dondrisa kusuhi ni tiva dra Galileya. A xitrhungu xikulu ngopfu xihlengeletana ku yene, lakakuva anhingena byatrhwini, atrhamisa ku drone. A xitrhungu afa xili nkingeni wa tiva. 2Afa a vadondrisa swakutala hi swifaniso, akudondriseni kwake afa aku ku vone. 3Yingisetani! Kahumi mubyali ayabyala. 4Akubyaleni kwake tin'we tinhleke taweli ndleleni, a tinyanyana titatada hinkwatu. 5Tin'wana tinhleke tiwela a maribyeni, laha kungeke na misava yakutala. Tihatla timila, hileswi misava mingatalangakiki. 6A dambu driku dratlhava, tibuna hi leswi tingekena mitru. 7Tin'wana tiyawela amitweni, a mitwa mimila, mitikamalata, tingabeki mihandru. 8Kambe a timbewu tin'wana tayi wela a misaveni leminene, tikula, tirumbuka tibeka a mihandru ya kuyandra, kutlhasa makume mararu, ni le ku ntlhanu wa makume na kume drin'we, ni le ku dzana (100), ha yin'we ha yin'we 9Kutani aku ku vone: Lweyi anganitindleve ta kuyingela, ayingiseti!

Nkongometo wa xifaniso

(Mt 13:10-17; Lk 8:9-10)

10Loko xitrhungu xifambile lava vangasala na Yene kun'we ni lava khume na vabiri, vamuvutisisa hita xifaniso. 11Yene aku ku vone: N'wine, n'winyikiwi kutiva xihundla xa Mfumu wa Xikwembu Nkulukumba, kasi ku lava va le handle, hinkwaswu swiyentxiwa hi swifaniso, 12akuva nambi vavona, vangavonisisi, nambi vayingela vangayingelisisi, akuva vangatitlhelela ku Xikwembu Nkulukumba vadrivaleliwa swidoho swavu.

Yesu atlhamuxela xifaniso xa mubyali

(Mt 13:18-23; Lk 8:11-15)

13Yene aku ku vone: Loko n'wingayingelisisi xifaniso lexi, xana n'witayingelisisa kuyini swifaniso swin'wana? 14A mubyali hi lweyi ahangalasaka Ivangeli. 15Kambe a tinhleke leti tiweliki andleleni hi lava loko vayingela a ritu, Sathana ahatlaka ata, asusa a ritu ledri dribyaliwiki andreni kwavu. 16A vhanu van'wana vafana ni mbewu leyi yiweliki maribyeni, vatiki loko vayingela a ritu vadriyamukela hi kutrhava, 17kambe avana mitru andreni kwavu, i va nkamanyana ntsena. A ntrhaku-ke, loko a nhlomulo kumbe kuxaniseka hinkonta ya ritu dra Xikwembu Nkulukumba, swihumelela, vakhunguvanyeka vatrika xikan'we. 18A van'wana hi mbewu leyi yiweliki mitweni; lava vayingelaka ritu dra Xikwembu Nkulukumba, 19kambe akuhlatiyela hi swa misava leyi ni kukanganyisiwa hi vukosi, ni ku navela swin'wana, swinhingena swikamalata a ritu driva dripfumala ni mihandru. 20Kambe lava vabyaliwiki amisaveni leminene, hi lava vayingelaka a ritu dra Xikwembu Nkulukumba, vava vadriyamukela, vabeka mihandru, a nhleke yin'we makume mararu (30), yin'wana kambe ntlhanu wa makume na kume drin'we (60), yin'wana dzana (100).

A motre i wa kuvaninga

(Lk 8:16-18)

21Yene ayengeti aku ku vone: Xana a motre vawulumeka akuva wutabekiwa a hansi ka xihundru, kumbe ahansi ka vunanu? Xana ahi leswaku wuhayekiwa ahenhla ka tafula? 22Hikusa akuna xa ntxhumu lexi fihliwiki, lexakuka xinga tikombisiwa livaleni, na kone akuna xantxhumu lexinga xihundleni, lexi xakuka xinga tita alivaleni. 23Loko a mhunu ali ni tindleve ta kuyingela, ayingiseti! 24Kutani ayengeta aku ku vone: Tivonelani ku leswi n'wiswiyingelaka! A mpimu lowu n'witakapima van'wana ha wone, hi wolowo n'witakapimiwa ha wone na n'wine hi Xikwembu Nkulukumba, mfuri n'witayengeseliwa. 25Hikusa lweyi anganaswu, atanyikiwa, kambe lweyi angekenantxhumu, atatekeliwa ni leswi anganaswu.

A mbewu

26Atlhela avabyela aku: A Mfumu wa Xikwembu Nkulukumba wufana ni mhunu lweyi axuviki mbewu amisaveni; 27ayetlela, apfuka, vusiku ni nhlikanhi, a mbewu yitlhava, yimila, na angativi mamilela ya yone. 28A misava ha swa yone mibeka mihandru: kuhumelela kusunguleni a ximilwa, antrhaku a moko, antrhaku a nhleke. 29Kambe a mihandru, loko miwupfile, vasungula a kunhingenisa kone a sikela, hikusa a nkama wa kutrhovela wutlhasile.

Xifaniso xa nhleke ya nsinya wa Sinapi

(Mt 13:31-32; Lk 13:18-19)

30Kutani avabyela aku: Xana hitafanisa a Mfumu wa Xikwembu Nkulukumba ha yini, kumbe hitawubeka axifanisweni xini, xana? 31Wufana ni nhleke ya nsinya wa sinapi, leyi yibyaliwaka na yili leyitrongo ku timbewu hinkwatu tinga misaveni. 32Kambe loko yibyaliwile yikula, yitlula swimilwa hinkwaswu, yihamba tinkambu tikulu lani kakuva a tinyanyana ta tilo titata tihambela a vusaka atinkambyini ta wone. 33Afa a dondrisa ritu hi swifaniso swakutala, hi laha vakotiki kuyingelisisa ha kone. 34Afa angakhaneli navu loko kungali hi swifaniso, kambe afa atlhamuxela hinkwaswu ku vadondrisiwa vakwe loko vali vuswavu.

Yesu amiyeta xidzedze

(Mt 8:18,23-27; Lk 8:22-25)

35Asikwini droledro, loko dambu dripelile, ati ku vadondrisiwa vakwe: Ahiweleleni halahaya ka tiva. 36Kutani vatlhelisa xitrhungu, vamuteka hi byatrhu ledri afaka ali ku drone. A man'wana mabyatrhu afa mali na vone. 37Kutani kuhumelela a xidzedze xikulu, a mavimbi afa matlakuka, la kakuva a byatrhu drisungula ni kutala hi mati. 38Kambe Yene afa ali nyalwini, akhutriyelile na abeki a nhloko a xidan'wini. A vadondrisiwa vahangamupfuxa, vaku: Mudondrisi, xana awuswivoni leswaku hasuva? 39Yene apfuka, akhwavela mheho, yiyima ni mavimbi marula. 40Kutani aku ku vone: Xana n'wini vutoya hayini? An'wisivana kudumba xana? 41Vone, vatxhava ngopfu, vabyelana vaku: Xana lweyi i mani, a mhunu lweyi na yone mheho ni mavimbi, swimuyingisetaka?

Currently Selected:

Mrk 4: NTX2007

Highlight

Copy