Mt 25

Xifaniso xa vanhwanyana lava va khume

1A Mfumu wa Matilo wungafanisiwa ni vanhwanyana lava va khume, vangateka a mimotre yavu vahuma, vayatlhangaveta a mulovoli. 2Lava va ntlhanu, ku vone afa ali masinge; kambe van'wana va ntlhanu afa ali tintlhari. 3Hikusa lava va masinge, vateki mimotre yavu, kambe avatekanga a mafura; 4kasi lava vakutlhariha vateki a mimotre kun'we ni mafura hi swihlambetwana. 5Leswi a mulovoli afaka ahlwela, a vanhwanyana hinkwavu vakhomiwa hi vurongo vakhutriyela. 6Amakari ka vusiku kutwala a ritu dribandlukana driku: Vonani a mulovoli awata! Fambani n'wiyamutlhangaveta. 7A vanhwanyana hinkwavu vahangapfuka, vasungula a kubekisa a mimotre yavu. 8Kutani lava va masinge vaku ku lava vakutlhariha: Hipumbelani a mafura yenu hikusa a mimotre yeru yatimeka. 9Kambe lava va kutlhariha vayangula vaku: Im'hi; hikusa mangatxhuka mangahiyaneli hine na n'wine. Swayapswa n'wiyatixavela lomu vaxavisaka kone. 10Vatiki vafambile vayatixavela a mafura, a mulovoli atlhasa, kutani lava afaka vatibekiselile vanhingena na yene andlwini ya nkhuvu, kutani a nyangwa yipfaliwa. 11Antrhaku kutlhasa van'wana vanhwanyana vaku: hosi, hosi, hipfuleli! 12Kambe a mulovoli avayangula aku: Nihlayelamfuri nili ku n'wine, anin'witivi.

13Hileswo-ke hitekani, hikusa an'witivi a siku ni nkama.

A xifaniso xa matalanta#25:14 Talanta: A ritu ledri dritlhamuxela mimpimu ni mali a mahlayeleni ya Xigirika.

(Lk 19:11-27)

14Hikusa leswi swifana ni mhunu lweyi atilulamiseliki kuyendra, avitana a vatiri vakwe avanyika a kubekisa vukosi byake. 15A mun'we ku vone amunyika ntlhanu wa matalanta, a mun'wana amunyika mabiri, a mun'wanyana amunyika drin'we; mun'wana-ni-mun'wana mayelano ni ntamu wakwe, ahanga suka ayendra. 16Lweyi ayamukeliki ntlhanu wa matalanta, afamba, ayatira ha wone abindrula man'wana ya ntlhanu. 17Na yene lweyi ayamukeliki mabiri ayayentxisa xiswoswo, abindrula man'wana mabiri. 18Kambe lweyi ayamukeliki drin'we, efamba ayakela misava, ayimbela a vukosi bya hosi yake.

19Loko kuhundri a nkama wunyingi, a hosi ya vatiri lavo yibuya, yikamba a mintiro yavu. 20Atrhindrekeliki lweyi afaka ayamukeli ntlhanu wa matalanta abuyisa ni man'wana ya ntlhanu aku: We hosi, waninyiki ntlhanu wa matalanta; langusa man'wana ya ntlhanu lawa nimabindruliki. 21A hosi yake yiku ku yene: I swa hombe, mutiri lweyi munene, wa kudumbeka. Leswi udumbekiki atimhakeni leti titrongo, nitakubeka ahenhla ka leti tinyingi. Nhingena akutrhaveni ka hosi yaku. 22Kutrhindrekela ni lweyi afaka ayamukeli matalanta mabiri, aku: We hosi, waninyiki matalanta mabiri, langusa man'wana mabiri, lawa nimabindruliki. 23A hosi yake yiku ku yene: I swa hombe mutiri lweyi munene wa kudumbeka. Leswi udumbekiki atimhakeni leti titrongo, nitakubeka ahenhla ka leti tinyingi. Nhingena akutrhaveni ka hosi yaku! 24Atrhindrekela na yene lweyi afaka yamukeli talanta drin'we aku ku hosi yake: We hosi, nakutivile leswaku u mhunu wa kunonon'hwa, utrhovelaka lomu ungabyalangakiki kone, uhlengeletaka lomu ungatrutruxikiki kone; 25hikutxhava, niyifihla a talanta draku amisaveni. Vona, hi ledri, drehe draku. 26Kambe a hosi yake yimuyangula yiku ku yene: Mutiri lweyi mfani wa kulolohwa. Afa uswitiva leswaku nitrhovela lomu ningabyalangakiki kone, niva nihlengeleta lomu ningahlwanyangakiki kone. 27Afa ufaneli kubeka a mali yanga amandleni ya vabindrulisi va timali, leswaku akubuyeni kwanga nitayamukela leswi swinga swanga kun'we ni bindru dra swone. 28Hileswo-ke, susani talanta amandleni yake, n'winyika lweyi angani khume dra matalanta.

29Hikusa lweyi anganaswu, atanyikiwa swinyingi, kambe lweyi angekena ntxhumu, ni leswi switrongo anganaswu atatekeliwa. 30Loko ali mutiri lweyo wa kuka angapfuni ntxhumu, mutxukumetani ahandle amunyameni, lomu kutakavani kudrila ni kuketrela ka menyo.

A yavanyiso dra vugamu

31Kambe kutaku loko a N'wana wa Mhunu ata vumenyemenyeni byake, kun'we ni tintrumi hinkwatu, atatrhamisa a xitrhan'wini xa vumenyemenye byake. 32Kutani a matiko hinkwawu matahlengeletiwa amahlweni kwake; atatravuxa van'we ku van'wana, swanga hi loko mubyisi atravuxa tihamba atimbutini. 33Atabeka a tihamba axineneni ni timbuti aximantrhini. 34A HOSI yitabyela lava vanga xineneni xa yone: Tanani n'wine n'wikhensiwaka hi Tatana wanga; danani pfindla dra vuhosi lebyi n'wingabekiseliwa byone a misava mingasina tumbuluka. 35Hikusa navini ndlala, n'wininyika nida; navini tora, n'wininyika ninwa; afa nili muyeni, n'winirurelile. 36Afa ningayambalanga ntxhumu, n'waniyambexile; afa nivabya n'wati n'watanikamba; afa nili kubohiweni, n'wita ku mine. 37Kolahu a valulami vatamuyangula vaku: We HOSI, xana hakuvoni drini na unindlala, hi kuphamela, kumbe na uni tora hi kunyika unwa? 38Hakuvoni drini na uli muyeni hikururela, kumbe ungayambalanga ntxhumu hikuyambexa? 39Hakuvoni drini na uvabya kumbe uli kubohiweni, hita ku wene? 40Kambe a HOSI yitavayangula yiku ku vone: Nihlayelamfuri nili ku n'wine: Loko n'wiswiyentxi ku mun'we amakari ka vamakweru lava vatrongo, lava, n'wiswiyentxi ku mine.

41Kutani a HOSI yitabyela lava vanga ximantrhini yiku: Sukani ku mine, n'wine lava varuketeliwiki; fambani n'wiya ndrilweni lowu wungatimekikiki, lowu wubekiseliwiki Diyavulosi ni tintrumi takwe. 42Hikusa navini ndlala, n'winganinyiki nida, navini tora n'winganinyiki ninwa; 43afa nili muyeni, an'wanirurelanga, afa ningayambalanga ntxhumu an'waniyambexanga; afa nivabya, afa nili kubohiweni, an'wanikambanga. 44Kutani na vone vatayangula vaku ku yene: We HOSI, xana hakuvoni drini na unindlala, kumbe unitora, kumbe uli muyeni, kumbe ungayambalanga ntxhumu, kumbe uvabya, kumbe uli kubohiweni hiyala kukutirela? 45Kutani yitavayangula yiku: Nihlayelamfuri nili ku n'wine: loko n'wingaswiyentxanga ku mun'we wa lava vatrongo, lava, an'wiswiyentxanga ku mine. 46Volavo vataya akuxanisiweni loku kungahelikiki, kasi a valulami vataya avutomini lebyi byingahelikikiki.

Currently Selected:

Mt 25: NTX2007

Highlight

Copy