Mt 17

Kundrulutiwa ka Yesu

(Mrk 9:2-13; Lk 9:28-36)

1Antrhaku ka ntlhanu wa masiku na drin'we, Yesu ateki Petrosi na Yakobe na Yohana makwa Yakobe, kutani vantlhantukela anhaveni ya kuleha ha vuswavu. 2Kutani andrulutiwa mahlweni kwavu. A liso drakwe driphatima swanga hi dambu, ni swiyambalu swake swindruluka swiva swa ntlhohe swanga hi livaningo. 3Kolahu vavona Moxe na Eliya vakhanela na Yene. 4Petrosi aku: HOSI, i swa hombe loko hiva kola! Loko uswirandra, nitayaka mintronga miraru: mun'we wutava waku, mun'wana wutava wa Moxe ni mun'wana wutava wa Eliya. 5Kaku loko Petrosi ahakhanela, a tlavi dra kuphatima drihumelela drivafukumeta, atlavini kutwala ritu, ledri driliki: Lweyi hi N'wananga lweyi a randrekaka, lweyi nitrhavaka ha yene, muyingisetani. 6Loko vayingeli leswi, a vadondrisiwa vawa hansi hi liso, vatali hi kutxhava. 7Kambe Yesu atrhindrekela ku vone avakhumba aku: Sekelekani! N'wingatxhaveni! 8Loko valavisa avahavonanga mhunu mumbeni, loko ange Yesu ntsena. 9Loko vafulameli hi le nhaveni, Yesu avaleleta aku ku vone: N'wingadrunguleli mhunu ni mun'we leswi n'wiswivoniki, loko N'wana wa Mhunu angasinapfuka akufeni.

10Kutani a vadondrisiwa vakwe vamuvutisa vaku: Hayini a vatrali vahlaya leswaku Eliya afanela kuranga ata? 11Yene avayangula aku: Kunene, Eliya awata, atatapfuxetela hinkwaswu. 12Kambe nan'wibyela leswaku: Eliya ati khale, kambe avamutivanga, kutani vamuyentxi hinkwaswu leswi vangaswirandra. Hi swoswo na yene N'wana wa Mhunu ataxanisiwa ha vone.

13A vadondrisiwa vahangayingelisisa leswaku afa avabyela hita Yohana Mubabatisi.

Yesu ahanyisa wandrisanyana wa kuvabya hi xitruli xa hweti

(Mrk 9:14-29; Lk 9:37-43a)

14Loko vatlhasi lomu afaka kuni xitrhungu, mun'we wanuna atrhindrekela ku Yene, amukhisamela aku: 15HOSI, yentxela vurombe a n'wananga; hikusa ani xitruli xa hweti axaniseka ngopfu, minkama minyingi awela andrilweni, ni le matini. 16Nimuyisi ku vadondrisiwa vaku, kambe vahluleki kumuhanyisa. 17Yesu ayangula aku: Yowee lixaka ledri dringapfumelikiki ni dra kusomboloka. Xana nitava na n'wine kukondra kuva drini? Nitan'wilehisela mbilu kuyagama kwini? Mubuyisani kola ku mine. 18Yesu atshinya a demoni, drihuma, kutani andrisanyana ahanyisiwa hi nkama wolowo.

19Ntrhaku a vadondrisiwa vatrhindrekela ku Yesu vakhanela hi le tlhelweni vamuvutisa vaku: Xana hayini hine hihluleki kudrihumexa? 20Yene aku ku vone: Hi leswaku n'wine n'wini kupfumela kutrongo. Nihlayelamfuri nili ku n'wine loko afa n'wini kupfumela loku kudringanaka ni nhleke ya sinapi#17:20 A nhleke leyi yihlayiwaka, afa yivoniwa swanga nhleke leyi yitrongo ku tinhleke hinkwatu., afa n'wingabyela nhava leyi n'wiku: Suka la uya kutlhelo drin'wana, afa yitasuka. Akuna ntxhumu lowu afaka wutan'wihlula. [ 21#17:21 A ndrimana leyi yisusiwi ku matralwa manyingi yakhale. Kambe a lixaka ledri dra mademoni, drihuma ntsena hi kukhongota ni kutitrona.]

Yesu ativisa ka vubiri a kufa ni kupfuka kwake

(Mrk 9:30-32; Lk 9:43b-45)

22Loko vahlengeletani kun'we a Galileya, Yesu ati ku vone: A N'wana wa Mhunu atanyiketiwa amavokweni ya vhanu. 23Vatamudlaya, kambe hi siku dra vuraru atapfuxiwa akufeni. A vadondrisiwa vatala hi kuvaviseka.

Yesu ahakela tinemba

24Loko vatlhasi Kapernawume, a vahlengisi va madrakma mabiri#17:24 Madrakma mabiri i tinemba leti mun'wana-ni-mun'wana afaka afanela kuhumexela Tempele. vata ku Petrosi, vamuvutisa vaku: Xana a mudondrisi wenu angahakeli a madrakma mabiri? 25Petrosi aku: Im'na. Kambe aku anhingena ndlwini, Yesu ahatla aku ku yene: A mavonela yaku hi wani Simoni? Xana a vafumi va misava leyi vayamukela ku vamani a tinemba kumbe minhlengo; ku va vana va tiko kumbe ku van'wana? 26Petrosi ayangula aku: Ku van'wana. Kutani Yesu aku: Hileswo-ke a vana va tiko vatrhunxekile. 27Kambe, akuva hingavakhunguvanyisi, yana alwandle uyatxukumetela a ndrovo, utaphasa nhlampfi leyi yitakaranga kuhuma; loko utava upfuli nomu wa yone, utakuma kone statera#17:27 Statera i mali ya nsimbi ya ntlhohe.; xiteke, uvanyika, uhumexela mine na wene.

Currently Selected:

Mt 17: NTX2007

Highlight

Copy