Mt 14

Kufa ka Yohana Mubabatisi

(Mrk 6:14-29; Lk 9:7-9)

1Ankameni lowo Heroda, mutetrarka, (mufumi), ayingeli kutwala ka Yesu, 2kutani aku ku malandra yake: Lweyo hi Yohana Mubabatisi apfukiki kufeni. Hileswo-ke a mahlolana lawa mayentxiwa hi yene.

3Hikusa Heroda afa akhomi Yohana amunhingenisa abohelweni, hinkonta ya Herodiyasi, a nkata Filipi makwavu; 4hikusa Yohana afa abyeli Heroda aku: Awuna mfanelo ya kumuteka. 5Heroda afa adjula a kudlaya Yohana, kambe afa atxhava xitrhungu, hikusa hinkwavu afa vapfumela leswaku Yohana i muprofeta. 6Kambe hi siku dra nkhuvu wa malembe ya kubelekiwa ka Heroda, a n'wana wa xisati wa Herodiyasi akina amahlweni ka varambiwa, kutani atrhavisa ngopfu Heroda 7lakakuva yene amudumbisa hi kufunga leswaku atamunyika hinkwaswu leswi atakaswikombela. 8Kolahu yene hi kuhlohloteliwa hi mamana wakwe, aku ku Heroda: Ninyike kola angelweni a nhloko ya Yohana Mubabatisi. 9Kutani a mufumi Heroda avaviseka; kambe hinkonta ya kuva afungile ni hinkonta ya varambiwa, apfumeli leswi a n'wana Herodiyasi akombeliki swone, 10aleleta leswaku kutremiwa a nhloko ya Yohana abohelweni; 11vayibuyisa hi ngelo vayinyikela ku lweyi wa nhwanyana, yene ayinyika mamana wakwe. 12A vadondrisiwa va Yohana vatlhasa, vateka ntrumbu vayawulahla; ntrhaku vayativisa Yesu.

Mahlolana ya kusungula ya kuyandrisa makati

(Mrk 6:30-44; Lk 9:10-17; Yhn 6:1-14)

13Loko Yesu aswiyingelile (swakudlayiwa ka Yohana), asuki hi byatrhu aya ahuleni vuswake. Loko switrhungu swiswiyingelile, swimulandra hi minenge, swipfa mitini. 14Aku awahuma abyatrhwini, avona xitrhungu lexi xikulu; kutani axitwela a vurombe, ahanyisa timbabyi hinkwatu leti afaka vatitisa ku Yene.

15Akupeleni ka dambu, a vadondrisiwa vayi ku Yene vaku: Dripelile, na wone mbangu lowu i hula. Tlhelisa a switrhungu, akuva switiyela mitini swiyatixavela swakuda. 16Kambe Yesu aku ku vone: Aswifanekelanga leswaku vafamba, vanyikani n'wine vada! 17Vone vayangula vaku: Ahina ntxhumu halenu loko enge ntlhanu wa makati na tinhlampfi tibiri. 18Yene aku ku vone: Swibuyisani halenu. 19Kuti loko aleleti switrhungu leswaku switrhamisa abyanyini, ateka a ntlhanu wa makati ni tinhlampfi tibiri, alavisa Tilweni, atlangela; kutani akhemelela a makati, anyika vadondrisiwa, vone vayavela switrhungu. 20Hinkwavu vada vaxura. Varolela swibuvu leswi swisaliki, vatata khume dra swihundru na swibiri. 21Lava vangada afa vadjula kutlhasa ku ntlhanu wa makume ya madzana (5000), ya vavanuna, handle ka vavasati ni vatrongwana.

Yesu afamba ahenhla ka mati

(Mrk 6:45-52; Yhn 6:15-21)

22Ntrhaku ka leswo, Yesu asindrisi vadondrisiwa vakwe leswaku vanhingena abyatrhwini, vamurangela vaya halahaya nkingeni mun'wana, na ahali kari alelela a switrhungu. 23Loko a switrhungu swifambile, Yesu antlhantukela anhaveni vuswake akuya khongota. Amadambyeni, afa ahali kone, vuswake. 24A byatrhu, drone, afa drili kule swinene ni sava, na drikarateka hikola ka mavimbi, hikusa afa kuni mheho yidriyalela. 25Ampundrwini, Yesu ata ku vadondrisiwa, na afamba henhla ka mati. 26Loko vamuvona na afamba a henhla ka lwandle, vatxhuka. Vabandlukana hi kutxhava vaku: I xipoko! 27Kambe Yesu avabyela aku ku: Rulani! Hi mine. N'wingatxhaveni! 28Kolahu Petrosi amuyangula aku: HOSI, loko ali wene nileleti akuva nita ku wene hi le henhla ka mati. 29Kutani Yene ayangula aku: Tana! Hi loko-ke Petrosi ahuma abyatrhwini, asungula akufamba ahenhla ka mati akongoma ku Yesu. 30Kambe loko avona a ntamu wa mheho, atxhava; asungula kutika, kutani abandlukana aku: Nihuluxe, HOSI! 31Yesu ahatla analavuta voko amukhoma aku ku yene: Xipfumelinyana! Xana uganaganekisiwi ha yini? 32Kutani loko vanhingeni abyatrhwini, a mheho yirula. 33Lava afaka vali byatrhwini vakhisama amahlweni ka Yesu vaku: Kunene, wene u N'wana wa Xikwembu Nkulukumba!

Yesu ahanyisa timbabyi a Genezarete

(Mrk 6:53-56)

34Loko vaweleli nkingeni wun'wana, vatlhasi atikweni dra Genezarete. 35Loko vhanu va mbangu lowuya vamutivile, a mhaka yihangalaki ku hinkwadru tikwana. Vamutisela hinkwavu lava vavabyaka. 36Vamukombela leswaku avatrika vakhumba a makhaxa ya swiyambalo swake; hinkwavu lava afaka vamukhumba afa vahanyisiwa.

Currently Selected:

Mt 14: NTX2007

Highlight

Copy