Yhn 14

Yesu i Ndlela

1A timbilu tenu tingaganaganeki; pfumelani ku Xikwembu Nkulukumba; n'wipfumela ni le ku mine. 2A vutrhamu i byinyingi andlwini ya Tatana wanga; loko afa swinge tanu, ana nin'wibyelile; kutani niya n'wibekisela mbangu. 3Ni loko nitava ni fambile, nin'wibekiselile mbangu, nitabuya; nitan'witekela ku mine, akuva lomu ninga kone, na n'wine n'witava kone. 4Kutani a ndlela ya kuya lomu niyaka kone n'wayitiva. 5Tomasi aku ku yene: Hosi, lomu uyaka kone ahikutivi; xana a ndlela hingayitivisa kuyini? 6Yesu aku ku yene: Hi mine ndlela, ni xihlayelamfuri, ni vutomi; akuna mhunu lweyi angataka ku Tatana, loko kunge ha mine. 7Loko afa n'winitivile, an'witativa ni Tatana wanga; kusukela swoswi, n'wamutiva, na swone n'wimuvonile.

8Filipi aku ku yene: Hosi, hi kombe Tatana, kutani switahidringana. 9Yesu aku ku yene: Nitrhami na n'wine nkama wunyingi, kutani awusinitiva, Filipi? Lweyi anivoniki, avoni Tatana. Kutani uhlaya ha yini uku: Hikombe Tatana? 10Xana awupfumeli leswaku ni le ku Tatana, ni leswaku Tatana ale ku mine xana? Leswi nin'wibyelaka swone, aniswihlayi ha vuswanga. Tatana lweyi anga ku mine hi yene atiraka mintiro. 11Nipfumelani leswaku ni le ku Tatana, na yene Tatana a le ku mine; loko n'winganipfumeli, pfumelani hikola ka mintiro. 12Nihlayelamfuri nili ku n'wine: Lweyi apfumelaka ku mine, na yene atatira mintiro leyi nimitiraka; atatira ni leyi mitlulaka yone, hikusa niya ku Tatana. 13Kutani nambi n'wingakombela yini na yini hi vito dranga, nitaswiyentxa, akuva Tatana atwalisiwa ku N'wana. 14Loko n'wikombela xa ntxhumu, hi vito dranga, nitaxiyentxa.

Yesu adumbisa Moya wa Kuxwenga

15Loko n'winirandra, n'witabekisa milawu yanga. 16Kutani mine nitakombela Tatana, yene atan'winyika Mupfuni mun'wana, lweyi atakava na n'wine hi la kungahelikiki, 17wunga Moya wa xihlayelamfuri, lowu a misava mihlulekaka kuwuyamukela, hikusa amiwuvoni, amiwutivi; kambe n'wine n'wawutiva, hikuva wutrhama na n'wine, kutani wutava ndreni kwenu.

18Ningan'witriki n'wiva swirombe; nitata ku n'wine. 19Antrhaku ka nkamanyana, a misava mingahanivoni, kambe n'wine n'witanivona. Leswi ni hanyaka, na n'wine n'witahanya. 20Hi siku ledro, n'witativa leswaku ni le ku Tatana, na n'wine n'wile ku mine, na mine ni le ku n'wine. 21Lweyi ayamukelaka milawu yanga, ava amibekisa, hi yene lweyi anirandraka; kutani lweyi anirandraka, atarandriwa hi Tatana wanga; na mine nita murandra, niva nitivonekisa ku yene. 22Yudasi (kungeke Iskariyota) aku: Hosi, ha yini uhlaya leswaku: utativonekisa ku hine, kunge ku misava xana? Yesu amuyangula, aku: 23Loko mhunu anirandra, atabekisa ritu dranga, kutani Tatana wanga atamurandra, hitata ku yene, hitrhama na yene. 24Lweyi anganirandrikiki, angabekisi maritu yanga; kutani a ritu ledri n'widriyingelaka, ahidranga, kambe i dra Tatana lweyi anirumiki.

25Nin'witivisi leswi na nahali na n'wine. 26Kambe Mutxhaveleli, wunga Moya wa Kuxwenga, lowu Tatana atakawurumela hi vito dranga, wutan'widondrisa hinkwaswu, ni kun'widrimuxa hinkwaswu leswi ni n'wibyeliki swone.

27Nin'wisiyela kurula, nin'winyika kurula kwanga. Anin'winyikisi xileswi misava minyikisaka xiswone. A timbilu tenu tingatxhuki tiganaganeka, tingatxhuki titxhava. 28N'wiswiyingelile leswi nin'wibyeliki niku: Nafamba, kutani nitatlhela nibuya ku n'wine. Loko afa n'winirandra, ana n'witrhavile leswi niyaka ku Tatana, hikusa Tatana i nkulu kutlula mine. 29Kutani, nin'wibyeli leswi na swingasina humelela, akuva loko swihumelela n'witakota kupfumela. 30Ni ngaha khaneli swakutala na n'wine, hikusa mufumi wa misava leyi awata. Kambe angana ntamu ahenhla kwanga. 31Kambe hileswaku misava mitiva leswaku nirandra Tatana, ni leswaku nitira swanga hi leswi Tatana anileletisiki xiswone. Sekelekani, ahifambeni hisuka la!

Currently Selected:

Yhn 14: NTX2007

Highlight

Copy