Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 7

Wüxi i nge i yutecü rü marü tama ngĩteme̱xẽwa ingẽxma

1Pa Chauenexẽgüx, pema nax nagu pexĩxü̃ i ngẽma mugü, rü nüxü̃ pecua̱x rü ngẽxguma tamaxü̃guxicatama nixĩ i ngẽma mugütüü̃wa tangexmaxü̃ ya duü̃xẽ.

2Rü dücax, rü wüxi i nge i ãtecü rü ngĩteme̱xẽwa ingẽxma i ngẽxguma namaxyane ya ngĩte, erü ngẽma ñanagürü i ngẽma mugü. Natürü ngẽxguma nayu̱xgu ya ngĩte, rü marü tama ngĩteme̱xẽwa ingẽxma. Rü yema mugü ga ngĩteme̱xẽwa ngĩxü̃ yexmaxẽẽxü̃ ga noxri rü marü tama ngĩmaxã inacua̱x.

3Rü ngẽmaca̱x i ngẽxguma namaxyane ya ngĩte rü to i yatümaxã inapexgu, rü pecadu ixü. Natürü ngẽxguma marü nayu̱xgu ya ngĩte, rü marü nüxna íinguxuchi i ngẽma mugü ga ngĩteme̱xẽwa ngĩxü̃ yexmaxẽẽxü̃ ga noxrix. Rü ngẽxguma wenaxarü naxãtegu rü taxuxü̃ma i chixexü̃ ixü.

4Rü ngẽxgumarüxü̃ ta i pemax, Pa Chauenexẽgüx, rü ngẽxguma Cristuaxü̃́ peyaxõgügü̃ rü Cristu nayuxü̃rüxü̃ na̱xcha̱xwa peyue i ngẽma mugü. Rü ngẽmaca̱x i ñu̱xma rü marü tama ngẽma mugütüü̃wa pengẽxmagü erü Cristu ga yuwa írüdacüme̱xẽwa tangexmagü. Rü ngẽmaãcü Tupana tüxü̃ narüngü̃xẽxẽ nax naxca̱x imaxẽxü̃ca̱x, rü norü ngúchaü̃ ixügüxü̃ca̱x.

5Rü yexguma pecadugu imaxẽgu rü tanaxü ga taxü̃nearü ngúchaü̃gü woo yema mugü tüxna nax nachu̱xuxü̃ ga yema. Rü yexguma nüxü̃ icua̱xgu nax nachu̱xuxü̃ ga yema pecadu ga ixüxü̃, rü yexeraãcü tanaxüxchaü̃. Rü yemaacü ga yema tórü pecadugü rü yuwa tüxü̃ nagagü.

6Natürü i ñu̱xma rü marü tama ngẽma mugütüü̃wa tangexmagü, erü Tupana rü marü nüxna tüxü̃ ínanguxü̃xẽxẽ. Rü ngẽmaca̱x i ñu̱xma rü ñoma duü̃xü̃gü i iyuexü̃rüxü̃ tixĩgü nape̱xewa i ngẽma mugü, erü marü tama tamaxã inacua̱x. Rü ñu̱xma rü marü nüxna ítanguxü̃ i ngẽma mugü nax Tupanaarü ngúchaü̃ ixügüxü̃ca̱x rü naxca̱x nax imaxẽxü̃ca̱x namaxã i tórü maxü̃ i ngexwaca̱xü̃xü̃ i Naãxẽ ya Üünexü̃ tüxna ãxü̃.

Ngẽma pecadu i chowa ngẽxmaxü̃ rü chomaxã inacua̱x

7¿Rü ñuxũ ñagüxü̃ tá i ñu̱xmax? ¿Rü pexca̱x rü pecadu yixĩxü̃ i ngẽma mugü? Dücax, tama pecadu nixĩ. Natürü yexguma chi yema mugü taxũchima choxü̃ nüxü̃ cua̱xẽẽgu nax ta̱xacü yixĩxü̃ i pecadu, rü taxũchima nüxü̃ chacua̱x i pecadu. Rü yexguma chi yema mugü rü taxũchima choxü̃ nüxü̃ cua̱xẽẽgu nax wüxi i pecadu yixĩxü̃ nax toguã̱xarü ngẽmaxü̃ choxü̃́ ngúchaü̃xü̃, rü taxũchima nüxü̃ chacua̱x nax pecadu yixĩxü̃ i ngẽma.

8Natürü yexguma yema mugü choxü̃ nüxü̃ cua̱xẽẽgu nax nachixexü̃ nax toguã̱xarü ngẽmaxü̃ choxü̃́ ngúchaü̃xü̃, rü nüma ga pecadu rü nayoxnie nax yexeraãcü choxü̃́ nax nangúchaü̃xẽẽãxü̃. Rü ngẽxguma chi nataxuxgu i ngẽma mugü, rü tataxuchima i norü pora i ngẽma pecadu.

9-10Rü noxri tauta yema mugüxü̃ chacua̱xgu, rü choma nagu charüxĩnügu rü chame. Natürü yexguma yema mugüxü̃ chacua̱xgu, rü nüxü̃ chicua̱xãchi nax pecadu chaxüxü̃ rü ngẽma pecaduca̱x rü tá chayuxü̃. Rü yema mugü ga chanaxwa̱xexü̃ nax maxü̃wa choxü̃ nagaxü̃, rü yuwaama choxü̃ naga.

11Rü yexguma yema mugü choxü̃ nüxü̃ cua̱xẽẽgu nax nachixexü̃ ga yema pecadu, rü yexeraãcü choxü̃́ nangúchaü̃ ga yema pecadu. Rü yemaacü ga yema pecadu rü choxü̃ nawomüxẽxẽ rü nayoxnie namaxã ga yema mugü nax yuwa choxü̃ nagaxü̃ca̱x.

12Natürü yema mugü rü aixcüma naxüüne i Tupanape̱xewa. Rü guxü̃ma i ngẽma Tupana tamaxã nüxü̃ ixuxü̃ rü naxüüne rü nixaixcüma rü name.

13¿Natürü ñuxãcü nixĩ i ngẽma i ñu̱xmax? ¿Ẽ̱xna yema mugü yixĩxü̃ ga yuwa choxü̃ gaxü̃? Dücax, tama ngẽmaãcü nixĩ. Rü ngẽma pecadu nixĩ i Tupanaarü mugü i mexü̃maxã yoxniẽxü̃ nax yuwa choxü̃ nagaxü̃ca̱x. Rü yemaacü ga yema mugü i mexü̃ choxü̃ nüxü̃ nacua̱xẽxẽ nax poraãcü nachixexü̃ ga yema pecadu.

14Nüxü̃ tacua̱x i ngẽma mugü rü Tupanaãxẽ i Üünexü̃wa ne naxũ. Natürü choma rü duü̃xü̃mare chixĩ, rü ngẽmaca̱x nixĩ i chomaxã inacuáxü̃ i ngẽma pecadu.

15Rü tama nüxü̃ chacua̱x nax ta̱xacü choxü̃ üpetüxü̃. Erü tama chanaxü i ngẽma mexü̃ i chanaxwa̱xexü̃ nax chaxüxü̃, natürü ngẽma chixexü̃ i tama chanaxwa̱xexü̃ nax chaxüxü̃ rü ngẽmaama chaxü.

16Natürü i ñu̱xma nax chanaxüxü̃ i ngẽma tama chanaxwa̱xechiréxü̃ nax chaxüxü̃, rü ngẽmawa nüxü̃ chicua̱xãchi nax namexü̃ i ngẽma mugü.

17Rü ngẽmaca̱x tama chauechama nixĩ i chanaxüxü̃ i ngẽma chixexü̃. Natürü ngẽma pecadu i chowa ngẽxmaxü̃ nixĩ i chomaxã icuáxü̃, rü ngẽma nixĩ i chixexü̃ choxü̃ üxẽẽxü̃.

18Rü choma nüxü̃ chacua̱x rü wüxi i pecaduã́xü̃ i duü̃xü̃mare chixĩ, rü ngẽmaca̱x chowa rü nataxuma i ta̱xacü i mexü̃. Rü woo chanaxwa̱xe nax mexü̃ chaxüxü̃, natürü tama chomaxã nanguxü̃ nax chanaxüxü̃.

19Erü ngẽma mexü̃ i chanaxwa̱xexü̃ nax chaxüxü̃, rü tama chanaxü. Natürü chanaxüama i ngẽma chixexü̃ i tama chanaxwa̱xexü̃ nax chanaxüxü̃.

20Rü dücax, ñu̱xma nax chanaxüxü̃ i ngẽma chixexü̃ i tama chanaxwa̱xexü̃ nax chaxüxü̃, rü meama nango̱x nax tama chauechama chanaxüxü̃. Natürü ngẽma pecadu i chowa ngẽxmaxü̃ nixĩ i chomaxã icuáxü̃ rü chixexü̃ choxü̃ üxẽẽxü̃.

21Rü ñu̱xma rü nüxü̃ chicua̱xãchi rü ngẽxguma mexü̃ chaxüxchaü̃gu rü chixexü̃xicatama nixĩ i chaxüxü̃.

22Choma rü chauãẽwa rü chorü me nixĩ i Tupanaarü mugü, rü naga chaxĩnüchaü̃.

23Natürü ñaa chaxunewa rü nangẽxma i ta̱xacü i tama naxüxchaü̃xü̃ i ngẽma chauãxẽ naxwa̱xexü̃. Rü ngẽma pecadu i chowa ngẽxmaxü̃ nixĩ i chomaxã icuáxü̃ rü chixexü̃ choxü̃ üxẽẽxü̃.

24-25Rü taxü̃ i ngechaü̃wa changexma. ¿Rü texé tá nüxna choxü̃ ítanguxuchixẽxẽ i ngẽma pecaduarü pora i chowa ngẽxmaxü̃ rü yuwa choxü̃ gaxchaü̃xü̃? Rü Tupanana moxẽ chaxã erü tórü Cori ya Ngechuchu ya Cristu tá nixĩ i choxü̃ ínguxuchixẽẽcü. Rü ngẽmaãcü i choma rü chauãẽwa chayanguxẽẽchaü̃ i Tupanaarü mugü, natürü ñoma i naanecüã̱x i chaxune rü nanaxüama i ngẽma pecadu naxwa̱xexü̃.

Currently Selected:

Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 7: tcaP

Highlight

Copy