Popera ga Chantiágu ümatüxü̃ 5
5
Ucu̱xẽ naxca̱x i ngẽma diẽruã̱xgüxü̃
1Pa diẽruã̱xgüxü̃, ¡Iperüxĩnüe i ñaa ore! ¡Pexauxe rü aita pexüe na̱xcha̱xwa i ngẽma guxchaxü̃gü i tá pexca̱x íngugüxü̃!
2Perü ngẽmaxü̃gü rü marü nangaue, rü ngẽma pexchiru i mexẽchixü̃ rü nawe nanangṍmü.
3Perü úiru rü perü diẽru rü ngẽxma naxãü̃tanü. Rü ngẽma norü ãü̃tanü rü wüxi i perü cua̱xruxü̃ tá nixĩ nax pema rü tá ta ipeyarütauxexü̃ ñoma ta̱xacü üxüwa ixaxü̃rüxü̃. Tupana ngĩxü̃ nadau i perü diẽru i ngĩmaxã penguxü̃marecü, rü ngẽmaca̱x tá pepoxcue i naanearü gu̱xgu.
4Rü pema rü tama nüxü̃́ ngĩxü̃ pexütanü ga yema diẽru ga ngĩxca̱x napuracüecü ga perü puracütanüxü̃. Rü ngẽmaca̱x i ngẽma perü puracütanüxü̃ rü ngĩxca̱x nidexagü ga yema diẽru ga tama nüxna ngĩxü̃ pexãcü. Rü nüma ya Cori ya Tupana ya Guxü̃étüwa Ngẽxmacü rü marü ngẽma duü̃xü̃güxü̃ naxĩnü nax ngĩxca̱x yadexagüxü̃ ga yema diẽru ga nüxü̃́ ngĩxü̃ pengetanücü.
5Rü ñoma i naanewa rü pegü penga̱xãẽgü rü pemepata rü pemuarü ngẽmaxü̃ã̱xgü rü petaãẽgü rü mea pechibüe. Natürü nawa tá nangu i ngẽma ngunexü̃ nax ñoma wocagü i ngüexü̃rüxü̃ tá pedaixü̃.
6Rü pema penapoxcue rü penadai i ngẽma duü̃xü̃gü i taxuxü̃ma i chixexü̃ pemaxã üchiréxü̃. Rü nümagü rü pexü̃ narüturamaegü, rü taxuacüma nügü ínapoxü̃gü.
Name i mea ítanangu̱xẽxẽ ya tórü Cori ya Cristu
7Rü ñu̱xma Pa Chauenexẽgüx, rü name nixĩ i mea ípenangu̱xẽxẽ ñu̱xmatata ínangu ya tórü Cori. Rü yíxema naanewa puracüxe rü mea ítanangu̱xẽxẽ ya pucü nax naxügüxü̃ca̱x i tümanetü. Rü ñu̱xũchi ítanangu̱xẽxẽ nax nayaxü̃ i tümanetüarü o, rü ngẽxguma rü tá tayabuxgü.
8Rü pema rü ngẽxgumarüxü̃ ta rü penaxwa̱xe nax mea ípenangu̱xẽẽxü̃ nax ínanguxü̃ ya tórü Cori. ¡Rü taxṹ i nüxü̃ perüchauexü̃ nax ípenangu̱xẽẽxü̃! Erü marü ningaica nax ínanguxü̃ ya tórü Cori.
9Pa Chauenexẽgüx, name nixĩ i nüxü̃ perüxoe nax pegü pixuechaü̃ nax tama ngẽmaca̱x pexna naca̱xaxü̃ca̱x ya Tupana. Erü marü ningaica nax ínanguxü̃ nax duü̃xü̃güxü̃ yacagüxü̃ca̱x i norü maxü̃chiga.
10Pa Chauenexẽgüx, name nixĩ i nüxna pecua̱xãchie ga yema nũxcümaü̃güxü̃ ga Tupanaarü orearü uruü̃gü ga yáxna namaxã naxĩnüexü̃ ga yexguma ngúxü̃ yangegügu. Rü name nixĩ i pema rü ta ngẽxgumarüxü̃ yáxna namaxã pexĩnüe ega ngúxü̃ pingegügu.
11Yixema rü nüxü̃ tacua̱x nax nataãẽgüxü̃ ga yema duü̃xü̃gü ga mea Tupanaca̱x maxẽãmaxü̃ ga yexguma ngúxü̃ yangegügu. Rü pema nüxü̃ pecua̱x ga ñuxãcü yáxna namaxã naxĩnüxü̃ ga gumá Yox ga yexguma ngúxü̃ yangegügu. Rü nüxü̃ pecua̱x ga ñuxãcü yixcama tórü Cori ya Tupana nüxü̃ rüngü̃xẽẽxü̃. Erü nüma ya tórü Cori ya Tupana rü namecümaxüchi rü poraãcü nüxü̃́ tangechaü̃tümüü̃gü.
12Rü guxü̃arü yexera, Pa Chauenexẽgüx, rü ngẽxguma ta̱xacüca̱x ipexunetagu, rü tama name i Tupanaégagu ipexuneta, rü ẽ̱xna ñoma i naaneégagu ipexuneta, rü ẽ̱xna ta̱xacü i to i naégagu ipexuneta. Rü ngẽxguma “Ngü̃”, ñapegügu rü name nax peyanguxẽẽxü̃. Rü ngẽxguma “Tama”, ñapegügu rü name nax peyanguxẽẽxü̃. Rü ngẽxguma ya Tupana rü taxũtáma pexü̃ napoxcue naxca̱x i ngẽma perü uneta.
13Rü ngẽxguma wüxíe i petanüwa naxĩ̱xãchiãẽgu, rü name nixĩ nax tayumüxẽxü̃. Rü ngẽxguma wüxíe taãxẽgu, rü name nixĩ nax tümaarü wiyaemaxã Tupanaxü̃ ticua̱xüxü̃xü̃.
14Rü ngẽxguma wüxíe i petanüwa ida̱xaweegu, rü name nixĩ i naxca̱x peyaca i yaxõgüxü̃arü ãẽ̱xgacügü nax tümaca̱x nayumüxẽgüxü̃ca̱x rü Cori ya Tupanaégagu chíxü̃maxã tüxü̃ yaxĩ̱xãgüxü̃ca̱x.
15Rü ngẽxguma mea Tupanaaxü̃́ yaxõgüãcüma nayumüxẽgügu, rü tá tümaca̱x nitaane, rü nüma ya Cori ya Tupana tá tüxü̃ ínarüdaxẽxẽ nawa i tümaarü da̱xawe. Rü ngẽxguma chi ta̱xacürü pecadu taxü̱xgu, rü Tupana tá tüxü̃́ nüxü̃ inarüngüma.
16Rü ngẽmaca̱x name nixĩ i pegümaxã nüxü̃ pixu i perü pecadugü rü pegüca̱x peyumüxẽgü nax pexca̱x yataanegüxü̃ca̱x. Rü yimá mecü ya yatüarü yumüxẽ rü aixcüma napora rü taxü̃ i mexü̃ nawa ínanguxuchi.
17Tupanaarü orearü uruxü̃ ga Ería nixĩ ga wüxi ga yatü ga taxrüxü̃ ixĩcü. Natürü yexguma nüma aixcüma yaxõõcüma nayumüxẽgu nax tama napuxü̃ca̱x, rü tomaepü̱x ga taunecüarü ngãxü̃gu rü tama napu ga yema naanewa.
18Natürü yexguma wena nayumüxẽgu ga Ería rü wenaxarü napu. Rü narüxü̃ ga nanetügü rü nixo.
19Pa Chauenexẽgüx, ngẽxguma chi texé petanüwa Tupanana ixũgachigu, rü tangexmagu ya wüxíe ya tüxü̃ taeguxexẽ́xẽ nax wenaxarü Tupanawe tarüxũxü̃ca̱x, rü mexü̃ taxü.
20Erü ngẽxguma texé Tupanaca̱x nataeguẽẽgu i wüxi i duü̃xü̃ nüxna i norü chixexü̃, rü tümagagu Tupana tá nanamaxẽxẽ i ngẽma duü̃xü̃, rü tá nüxü̃́ nüxü̃ narüngüma i ngẽma muxü̃ i norü pecadugü.
Currently Selected:
Popera ga Chantiágu ümatüxü̃ 5: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
