Ngechuchuarü ngúexü̃gü ga yamugüxü̃arü puracüchiga 27
27
Pauruxü̃ Rómawa namugü
1Rü yema ãẽ̱xgacügü rü düxwa nagu narüxĩnüe nax Itáriaanewa toxü̃ namugüxü̃. Rü norü churaragüarü capitáü̃na nanamu ga Pauru namaxã ga ñuxre ga togü ga poxcuexü̃. Rü gumá capitáü̃ rü Yúriu nixĩ ga naéga, rü norü churaragütücumü rü “Ãẽ̱xgacü ya Chécharuarü Dauruü̃gü”, nixĩ ga naéga.
2Rü nagu tichoü̃ ga wüxi ga wapuru ga buanecümaxã ixũxü̃ne ga Adamítiuwa ne ũxü̃ne ga Áchiaarü ĩanegüwa ũxchaxü̃ne. Rü towe ta nixüe ga Aristárcu ga Machedóniaanecüã̱x ga ĩane ga Techarónicawa ne ũxü̃.
3Rü moxü̃ãcü rü Chidóü̃arü türewa tangugü. Rü Paurumaxã namecüma ga capitáü̃ ga Yúriu rü ínanaxüexẽxẽ ga Pauru nax yémacüã̱x ga namücügüxü̃tagu naxũãneaxü̃ca̱x rü nüxü̃ nangü̃xẽẽgüxü̃ca̱x.
4Rü yéma itaxĩãchi. Rü Chíperearü capaxũarü tocüwaguama taxĩ, na̱xcha̱xwa ga buanecü, yerü towaama nabu.
5Rü yéma Chíperewa tixãü̃ ga már rü Chiríchiaanecutüwa tarüyicu. Rü yemacutügu taxĩ, rü Panfíriaanewa tachopetü rü ñu̱xmata Líchiaanewa yexmane ga ĩane ga Mírawa tangugü.
6Rü yema capitáü̃ yexma nüxü̃ nayangau ga wüxi ga wapuru ga Areyandríawa ne ũxü̃ne ga Itáriaanewa ũxü̃ne. Rü gumágu toxü̃ nichoü̃xẽxẽ, rü tomaxã inaxũãchi.
7Natürü írarüwatama itiñaxwetaxü̃ ga muxü̃ma ga ngunexü̃gu, rü guxchaãcüma Chenídoarü to̱xma̱xtawa tangugü. Natürü towaama nabuema ga buanecü, rü yemaca̱x capaxũ ga Charmónaarü to̱xma̱xtawa tachopetü rü capaxũ ga Crétaxü̃ ítachoeguãchi.
8Rü guxchaãcüma nacutügu taxĩ ga yema capaxũ, rü wüxi ga nachica ga Mexü̃ ga Türegu ãégaxü̃wa tangugü. Rü ĩane ga Lachéaarü ngaicamana nayexma.
9Natürü marü poraãcü tanuxcü nax itaxĩxü̃, rü marü naxãũcüma nax itaxĩãmaxü̃ yerü marü nawa nangu ga gumá tauemacügü ga nagu nagáuanexü̃. Rü yemaca̱x ga Pauru rü nayaxucu̱xẽ ga duü̃xü̃gü, rü ñanagürü:
10—Pa Chomücügüx, nüxü̃ chacua̱x i ngẽxguma chi ixĩãmagu, rü tá naxãũcüma. Rü daa wapuru rü tá inayarütaxu namaxã i guxü̃ma i naãcu. Rü ngürüãchi i yixema rü tá ta tayue —ñanagürü.
11Natürü yema churaragüarü capitáü̃ rü yexeraãcü gumá wapuruarü yoragaama naxĩnü, rü marinerugüarü capitáü̃gaama naxĩnü, rü tama aixcüma Pauruga naxĩnü.
12Natürü yema türe rü tama name ga yéma nax tanangupetüxẽẽxü̃ ga gáuanexü̃. Rü yemaca̱x wixguxüchi guxü̃ma ga duü̃xü̃gü nagu narüxĩnüe rü narümemae nixĩ nax itaxĩãchixü̃ ga yéma. Rü nanaxwa̱xegü ga chi Feníchewa nax tangugüxü̃ nax yéma tanangupetüxẽẽxü̃ ga gáuanexü̃, yerü yema nixĩ ga wüxi ga Crétaarü türe ga mexü̃ ga tama poraãcü buanecü nawa nguxü̃.
Már arü ngãxü̃tügu nüxü̃ naxǘ ga buanecü ga tacü
13Rü inanaxügü nax meama tope̱xewaama nabuxü̃ ga buanecü ga súrwa ne ũcü, rü yemaca̱x ga nümagü ga marinérugü rü nüxü̃ nacua̱xgügu rü chi mea ítangugü ga yema ítaxĩxü̃wa. Rü yemaca̱x itaxĩãchi, rü nacutüarü ngaicamagu taxĩ ga yema Crétaarü capaxũ.
14-15Natürü yexgumatama ngürüãchi wüxi ga buanecü ga taxüchicü ga capaxũarü tocüwawa ne ũcü ngãxü̃tüwaama nanacue ga gumá wapuru. Rü taxuacüma itixũtaü̃ nawaama ga buanecü. Rü yemaca̱x düxwa ítayachaxãchi nax tanatoxchinüxü̃, rü toxü̃ ínicuetaü̃.
16Rü wüxi ga capaxũxãcü ga Cáudagu ãégaxü̃arü tocüwawaama tachopetü ga ngextá tama poraãcü íyabuaxü̃wa. Rü yéma poraãcü tapuracüe nax gumá wapurugu tanatúnagüxü̃ ga norü ngue ga yatúchigüne.
17Rü yexguma marü natunagügüãgu ga gumá ngue, rü napana̱xãgü ga tanütaxü̃maxã nayana̱i̱xgütüwe ga gumá wapuru. Rü ñu̱xũchi nayawẽgü ga yema naxchirutachinügü ga namaxã yacuetaü̃xü̃ ga noxrix, yerü namuü̃e ga nax Chírutearü naxnecüwa yanangaixtaü̃güxü̃. Rü yema buanecü toxü̃ nicuetaü̃mare.
18Rü moxü̃ãcü ga buanecü rü tama nangupetüéga, rü yemaca̱x inanaxügü nax ínawoü̃ãcuãxü̃ ga gumá wapuru.
19Rü norü tomaepü̱x ga ngunexü̃gu, rü naxme̱xmaxãtama ínanawoü̃ ga yema natü̱xügü ga gumá wapuru, rü guxü̃ma ga to ga norü yemaxü̃gü.
20Rü muxü̃ma ga ngunexü̃gu, rü tama nango̱x ga üa̱xcü rü ẽxtagü, rü tama nangupetüéga ga gumá buanecü ga taxüchicü. Rü düxwa nagu tarüxĩnüe nax marü taxũtáma tamaxẽxü̃.
21Rü yexguma marü muxü̃ma ga ngunexü̃ tingegügu ga tama nax tachibüexü̃, rü yexguma guxü̃ma ga yema duü̃xü̃gütanüwa inachi ga Pauru, rü ñanagürü: —Narümemae chi nixĩ, Pa Chomücügüx, nax chauga pexĩnüexü̃, rü taxũchima nax ixĩãchixü̃ ga Crétawa, rü taxũchima ñu̱xmarüxü̃ tüxü̃ naxüpetü i ñaa ãũcümaxü̃ rü taxuxü̃chima i chixexü̃ tüxü̃ nangupetü.
22Natürü ¡petaãẽgü! erü wapuruxica tá inayarütaxu, natürü i yixema rü taxúetama tayue.
23Erü ngewa̱xarü chütaxü̃gu ya Tupana ya nüxü̃́ chapuracücü ya chorü Cori ixĩcü rü núma nanamu i wüxi i norü orearü uruxü̃ i daxũcüã̱x i cha̱u̱xca̱x ngóxü̃.
24Rü ñanagürü choxü̃: “¡Taxṹ i cumuü̃xü̃, Pa Paurux! Erü Rómaarü ãẽ̱xgacü ya Chécharupe̱xewa tá cungu, rü cugagu tá Tupana nanamaxẽxẽxẽ i guxü̃ma i ngẽma cumücügü i cumaxã ngẽxma wapurugu ĩxü̃”, ñanagürü choxü̃.
25Rü ngẽmaca̱x, Pa Chomücügüx, ¡rü petaãẽgü! erü choma rü aixcüma Tupanaaxü̃́ chayaxõ, rü aixcüma tá nixĩ i ngẽmaãcü tá nangupetüxü̃ ngẽxgumarüxü̃ i ngẽma daxũcüã̱x chomaxã nüxü̃ ixuxü̃.
26Natürü wüxi i capaxũwa tá tayarücüxcuchitaü̃gü —ñanagürü ga Pauru.
27Rü yexguma taxre ga yüxü tingexgu nax itaxĩxü̃, rü Már ga Ariáticuwa tayexmagü, yerü ga buanecü rü nuxica toxü̃ nacuetaü̃. Rü ngãxü̃cüügu nüxü̃ nicua̱xãchitanü ga yema marinérugü nax naxãnacüwa tangugüchaü̃xü̃.
28Rü ínanataegü ga norü ngugütamaruxü̃ rü 36 ga metru nixĩ ga norü mátama. Rü yexguma marü írarüwa yáxü̃guxüra itaxĩxgu rü wenaxarü nanangugütamagü, rü 27 ga metru nixĩ ga norü mátama ga yexguma.
29Rü namuü̃e ga nax nutamaxã yanañaxtaxü̃güxü̃ ga naxãnacüwa, rü yemaca̱x gumá wapuruchinüwa ínanawoü̃ ga ãgümücü ga anclagü ga napanaxãmaxã ixãtü̱xüxü̃ nax yemaacü íyachaxãchigüxẽẽãxü̃ca̱x ga gumá wapuru. Rü nayumüxẽgü nax paxa yangunexü̃ca̱x.
30Natürü ga yema marinérugü rü nibuxmüchaü̃ ga gumá wapuruwa, rü yemaca̱x nanawãĩxẽgü ga gumá wapuruarü ngue, rü ñanagürügü: —Ngẽma wapurupe̱xearü anclagü tá ítawoü̃ nax nataixü̃ca̱x ya wapuru —ñanagürügüneta.
31Natürü ga Pauru rü churaragüarü capitáü̃maxã rü norü churaragümaxã nüxü̃ nixu rü ñanagürü: —Ngẽxguma ñaa marinérugü rü taxũtáma nuxã wapurugu nachoxgu, rü guxãma i pema rü tá peyue —ñanagürü.
32Rü yexguma ga yema churaragü rü nayadaecunügü ga gumá ngue, rü nananguxẽẽgü.
33Rü yexguma marü yangunechaü̃gu, rü Pauru nayaxucu̱xẽgü ga guxü̃ma nax nachibüexü̃ca̱x, rü ñanagürü: —Taxre i yüxü nixĩ i ñu̱xma nax taguma aixrügumarüxü̃ pechibüexü̃, rü bai i ta̱xacü nax pengṍxü̃ yerü poraãcü pexoegaãẽgü.
34Rü ñu̱xma rü pemaxã nüxü̃ chixu nax pechibüexü̃ nax peporaexü̃ca̱x, rü taxuxü̃ma pexü̃ üpetüxü̃ca̱x. Erü taxúetama itayarütaxu rü bai i wüxi i peyaexüra inayarütaxu —ñanagürü.
35Rü yexguma marü yema ñaxgu, rü nanayaxu ga wüxi ga paũ, rü Tupanana moxẽ naxã nape̱xewa ga guxü̃ma. Rü inanabücu ga yema paũ, rü inanaxügü nax nangṍoxü̃.
36Rü yexguma nataãẽgü ga guxü̃ma, rü nümagü rü ta nachibüe.
37Rü 276 tixĩgü ga guxãma ga toma ga gumá wapurugu ĩxẽ.
38Rü yexguma marü nangãxegu, rü ínanawoü̃ ga yema trigu ga wapuru namaxã ããcuxü̃ nax nangünagüxü̃ca̱x ga gumá wapuru.
Inangu ga gumá wapuru
39Rü yexguma yangunegu, rü yema marinérugü tama nüxü̃ nacuáane ga yéma. Natürü nüxü̃ nadaugü ga wüxi ga axcuchixü̃ ga naxnücüpechinüã́xü̃, rü nagu narüxĩnüe ga yéma nax yanangaixẽẽgüãxü̃ ga guma wapuru.
40Rü yexguma nanadaü̃ ga norü ngãxü̃xü̃ ga anclagü, rü márwa nanawogü. Rü nayawẽgü ga norü toxchinüxü̃arü na̱i̱xruü̃gü, rü inananga ga yema nape̱xewa üxü̃ ga naxchirutachinü ga namaxã iticuetaü̃xü̃. Rü itanaxügü ga nüxü̃ nax tingaicaxü̃ ga yema naxnücüpechinü.
41Natürü wüxi ga naxnücüarü nuxtamaxü̃wa tayarüngaixtaü̃. Rü yéma naxnecüwa nayarüwápe̱xe ga guma wapuru rü marü tama yéma itaxĩãchi. Rü yoxni ga nachinüwa, rü yuape nayapuxẽxẽ.
42Rü yema churaragü rü nagu narüxĩnüe nax nadaiaxü̃ ga yema poxcuexü̃ nax taxuxü̃ma iñaxü̃ca̱x ga yexguma naxãnacüwa nangugügu.
43-44Natürü yema norü capitáü̃ ga churaragü, rü Pauruxü̃ namaxẽẽchaü̃, rü yemaca̱x tama nanaxwa̱xe nax nadaiaxü̃ ga yema poxcuexü̃. Natürü nanamu nax yema ixãnüxü̃ rü nüxíra ínayuxgüxü̃ nax naxãnacüwa nawẽxgüxü̃ca̱x, rü yema togü rü mürapewagügu rüe̱xna yema wapurutüchigügu mea nax ínachoü̃xü̃ca̱x. Rü yemaacü guxãma meama naxãnacüwa tangugü.
Currently Selected:
Ngechuchuarü ngúexü̃gü ga yamugüxü̃arü puracüchiga 27: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.