Ngechuchuarü ngúexü̃gü ga yamugüxü̃arü puracüchiga 26
26
Pauru rü ãẽ̱xgacü ga Agrípape̱xewa nügüétüwa nidexa
1Rü yexguma ga Agrípa rü ñanagürü Pauruxü̃: —Marü name i ñu̱xma i cugüétüwa quidexa —ñanagürü. Rü yexguma naxunagüme̱xẽ ga Pauru, rü inanaxügü ga nügüétüwa nax yadexaxü̃, rü ñanagürü:
2—Chataãxẽ, Pa Ãẽ̱xgacü Pa Agrípax, nax cupe̱xewa chidexaxü̃ i ñu̱xma nax chaugüétüwa chachogüxü̃ca̱x naxca̱x i guxü̃ma i ngẽma choxü̃ ínaxuaxü̃güxü̃ i ngẽma chautanüxü̃ i Yudíugü.
3Rü yexeraãcü chataãxẽ erü cuma rü meama nüxü̃ cucua̱x i guxü̃ma i tocüma i toma i Yudíugü, rü guxü̃ma i ngẽma naxca̱x yadexagüxü̃ i chautanüxü̃. Rü ngẽmaca̱x cuxna chaca nax mea choxü̃́ icurüxĩnüxü̃ca̱x.
Pauruarü maxü̃ naxü̃pa nax Ngechuchuaxü̃́ yaxõõxü̃
4Rü guxü̃ma i ngẽma chautanüxü̃ i Yudíugü rü nüxü̃ nacua̱xgü nax ñuxãcü natanüwa chamaxü̃xü̃ ga chauchixü̃anewa rü Yerucharéü̃wa ga yexguma changextü̱xügu.
5Rü ngẽxguma ngẽma Yudíugü chauchiga idexagüchaü̃gu, rü nüma nüxü̃ nacua̱xgü nax choma rü woetama Parichéu chixĩxü̃. Rü toma i Parichéugü tixĩ i guxü̃ma i totanüxü̃ i Yudíugüarü yexera nax poraãcü nagu taxĩxü̃ i ngẽma ore i tixõgüxü̃.
6Rü ñu̱xma i ngẽma chautanüxü̃ i Yudíugü rü choxü̃ ínaxuaxü̃gü naxca̱x nax nüxü̃́ chayaxõxü̃ ga yema ore ga Tupana nũxcümaü̃güxü̃ ga torü o̱xigümaxã ixunetaxü̃ nax Cristu tá núma nguxü̃.
7Rü guxü̃ma i ngẽma 12 tücumügü ga Iraétanüxü̃ i Yudíugü rü ínanangu̱xẽẽgü nax yanguxü̃ i ngẽma uneta. Rü ngẽmaca̱x guxü̃guma i ngunecü rü chütacü rü Tupanaxü̃ nicua̱xüxü̃gü. Rü choma rü ta íchananguxẽxẽ nax yanguxü̃ i ngẽma uneta, rü ngẽmaca̱x nixĩ, Pa Ãẽ̱xgacüx, i ñu̱xma i choxü̃ ínaxuaxü̃güxü̃ i ngẽma chautanüxü̃ i Yudíugü.
8¿Rü tü̱xcüü̃ tama peyaxõgü nax Tupana wena namaxẽxẽxẽxü̃ i ngẽma yuexü̃?
Pauru rü nüxü̃ nixu nax yema yaxõgüxü̃we yangẽchigüxü̃
9Rü noxri ga choma rü ta rü nagu charüxĩnü nax chayanaxoxẽẽxü̃ ga yema Ngechuchu ya Nacharétucüã̱xaxü̃́ yaxõgüxü̃.
10Rü yemaca̱x nawe chingẽchigü ga yema yaxõgüxü̃ ga Yerucharéü̃wa yexmagüxü̃. Rü chacherdótegüarü ãẽ̱xgacügü choxna naxãgagü nax chanapoxcuexü̃ca̱x ga yema yaxõgüxü̃. Rü yexma chanapoxcue ga muxü̃ma. Rü yexguma chautanüxü̃ ga Yudíugü nadaixgu ga yema yaxõgüxü̃, rü choma rü chorü me nixĩ.
11Rü muẽ̱xpü̱xcüna chanapoxcue nax nüxü̃ naxoexü̃ca̱x ga yema nax yaxõgüãxü̃. Rü yemaacü chanaxü ga guxü̃nema ga ngutaque̱xepataü̃güwa. Rü poraãcü naxchi chaxai ga yema yaxõgüxü̃, rü yemaca̱x nawe chingẽchigü ñu̱xmata to ga nachixü̃anecüã̱x ga ĩanegüwa changu.
Pauru rü wenaxarü nüxü̃ nixu ga ñuxãcü nax yaxõõxü̃ ga noxrix
12Rü yemaca̱x Damácuwa chaxũ nax yema yaxõgüxü̃xü̃ íchayayauxü̃xü̃ca̱x. Yerü ga chacherdótegüarü ãẽ̱xgacügü rü choxna naxãga rü choxü̃ namu nax íchayayauxü̃xü̃ca̱x ga yema yaxõgüxü̃.
13Rü yexguma namagu taxĩyane, Pa Ãẽ̱xgacüx, rü yexguma meama tocuchiwa nanguxgu, rü nüxü̃ chadau ga wüxi ga omü ga daxũwa ibáxixü̃ ga üa̱xcüarü yexera nangóonexẽẽxü̃. Rü choxü̃ nabáxi rü yema chomücügüxü̃ rü ta nabáxi.
14Rü guxãma ga toma rü ñaxtüanegu tayayi. Rü choma rü nüxü̃ chaxĩnü ga wüxi ga naga ga Yudíugawa choxü̃ ñaxü̃: “Pa Chaurux, Pa Chaurux, ¿tü̱xcüü̃ i chowe quingẽchigüxü̃? Poraãcü cugütama cuchixexẽxẽ ñoma wüxi i ta̱xacü i ãmaguxü̃gu cucuxuxü̃rüxü̃”, ñanagürü choxü̃.
15Rü choma chanangãxü̃, rü ñacharügü: “¿Texé quixĩ, Pa Corix?” ñacharügü. Rü nüma ga Cori rü ñanagürü choxü̃: “Choma nixĩ ya Ngechuchu rü chorü duü̃xü̃gü nixĩ i ngẽma nawe quingẽchigüxü̃.
16¡Natürü írüda rü inachi! Rü marü cuxca̱x chango̱x i ñu̱xmax, erü cuxü̃ chayaxu nax choxü̃́ cupuracüxü̃ca̱x rü nüxü̃ quixuchigaxü̃ca̱x i ngẽma ñu̱xma nax choxü̃ cudauxü̃ rü ngẽma yixcüra tá chauxü̃tawa nüxü̃ cudauxü̃.
17Rü tá cuxna chadau naxcha̱xwa i cutanüxü̃ i Yudíugü rü ngẽma tama Yudíugü ixĩgüxü̃ i natanüwa cuxü̃ chamuxü̃.
18Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.
Pauru rü naga naxĩnü ga yema Ngechuchu namaxã nüxü̃ ixuxü̃
19Rü chomax, Pa Ãẽ̱xgacü Pa Agrípax, rü naga chaxĩnü ga yema naga ga daxũwa inaxũxü̃.
20Rü noxri Damácucüã̱xgümaxã nüxü̃ chixuchiga ga Tupanaarü ore. Rü yemawena Yerucharéü̃cüã̱xgümaxã nüxü̃ chixuchiga. Rü ñu̱xũchi guxü̃ ga Yudéaanewa nüxü̃ chixuchiga. Rü yexgumarüxü̃ yema tama Yudíugü ixĩgüxü̃maxã nüxü̃ chixu. Rü ñacharügü: “¡Nüxü̃ perüxoe i pecüma i chixexü̃gü, rü Tupanaca̱x pedaugü, rü mea pemaxẽ nax duü̃xü̃gü nüxü̃ daugüxü̃ca̱x nax aixcüma peyaxõgüxü̃!” ñacharügü.
21Rü yemaca̱x nixĩ ga Yudíugü Tupanapata ya taxü̃negu choxü̃ yayauxgüxü̃ rü choxü̃ yama̱xgüchaü̃xü̃.
22-23Natürü Tupana choxü̃ narüngü̃xẽxẽ rü ngẽmaca̱x taguma íchayachaxãchi nax guxü̃ma i duü̃xü̃gümaxã nüxü̃ chixuxü̃ i Tupanaarü ore rü woo buxü̃ rü yáxü̃. Rü namaxã nüxü̃ chixu ga yema ore ga nũxcümaü̃güxü̃ ga Tupanaarü orearü uruü̃gü rü Moiché nüxü̃ ixugüxü̃ nax ngúxü̃ tá yangexü̃ ya Cristu rü tá nax nayuxü̃, natürü yemawena rü nüma tá yixĩxü̃ ga nüxíra yuwa ínadaxü̃ nax tatanüxü̃ i Yudíugümaxã rü ngẽma to i duü̃xü̃gü i tama Yudíugü ixĩgüxü̃maxã nüxü̃ yaxuxü̃ca̱x i ore i tüxü̃ maxẽxẽẽxü̃. Rü taguma tomare ga ore duü̃xü̃gümaxã chixu —ñanagürü ga Pauru.
Pauru rü Agrípaaxü̃́ nanangúchaü̃xẽxẽ nax yaxõõxü̃
24Rü yexguma yemaacü nügüétüwa yadexaxgu ga Pauru, rü ñanagürü ga Féstu tagaãcüma: —Cungẽãxẽmare Pa Paurux. Rü ngẽma nax yeü̃cürü cungúechaü̃, rü düxwa nawa cungeãxẽ —ñanagürü.
25Natürü ga Pauru rü nanangãxü̃, rü ñanagürü: —Tama changẽãxẽ Pa Ãẽ̱xgacüx, Pa Féstux. Erü ñaa ore i nüxü̃ chixuxü̃, rü aixcümaxü̃chi nixĩ.
26Rü daa ãẽ̱xgacü ya Agrípa rü meama nüxü̃ nacua̱x i guxü̃ma i ngẽma pemaxã nüxü̃ chixuxü̃. Rü ngẽmaca̱x tama chamuü̃ãcüma chorü taãẽmaxã nape̱xewa nüxü̃ chixu, erü nüxü̃ chacua̱x nax nüma rü ta nüxü̃ nacuáxü̃ i ta̱xacüchiga nax yixĩxü̃ i guxü̃ma i ñaa ore. Rü tama ngextámare cúãcü naxüpetü i ngẽma.
27¿Cuyaxõxü̃, Pa Agrípax, i ngẽma Tupanaarü orearü uruü̃gü nüxü̃ ixuxü̃? Choma nüxü̃ chacua̱x rü cuyaxõ —ñanagürü ga Pauru.
28Rü Pauruxü̃ nangãxü̃ ga Agrípa, rü ñanagürü: —¿Ẽ̱xna cuma nagu curüxĩnügu rü ngẽmaãcü noxre i curü oremaxã Cristuaxü̃́ choxü̃ cuyaxõxẽẽxü̃? —ñanagürü.
29Rü ñanagürü ga Pauru: —Woo noxre i oremaxã rü woo muxü̃ i oremaxã rü Tupana nanaxwa̱xe nax cuyaxõxü̃. Rü tama i cuxicatama, natürü guxü̃ma i ñaa nua choxü̃ ĩnüexü̃ rü ta, rü Tupana nanaxwa̱xe nax chauxrüxü̃ yixĩgüxü̃, natürü tama chauxrüxü̃ daa cadénagümaxã nax yana̱i̱xgüxü̃ —ñanagürü ga Pauru.
30Rü yexguma inachigü ga Agrípa, rü Féstu, rü Bereníche, rü guxü̃ma ga yema namaxã yéma rütogüxü̃.
31Rü yexguma ga nümagü rü noxrüwama naxĩ nax yéma nügümaxã Pauruchiga yadexagüxü̃ca̱x. Rü ñanagürügü: —Ngẽma yatü, rü taxuxü̃ma i chixexü̃ naxü nax naxca̱x yamáxü̃ rü taxuca̱xma tü̱xcüü̃ napoxcu —ñanagürügü.
32Rü Féstuxü̃ ñanagürü ga Agrípa: —Ngẽxguma chi tama nümatama naxca̱x ínaca̱xgu nax Rómaarü ãẽ̱xgacü ya Chécharu nüxna caxü̃ca̱x, rü chi ínanguxuchi —ñanagürü.
Currently Selected:
Ngechuchuarü ngúexü̃gü ga yamugüxü̃arü puracüchiga 26: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.