Ngechuchuarü ngúexü̃gü ga yamugüxü̃arü puracüchiga 1

Tupana inaxuneta rü tá ínangu i Naãxẽ ya Üünexü̃

1-2Pa Mecü Pa Teóquirux, nüxíra chaxümatüxü̃ ga poperawa chanaxümatü nachiga ga guxü̃ma ga Ngechuchu üxü̃ rü duü̃xü̃güxü̃ namaxã nangúexẽẽxü̃ ga noxritama inaxügüãgu ga norü puracü ñu̱xmata yema ngunexü̃ ga Tupana daxũguxü̃ ga naanewa nagaxgu. Rü naxü̃pa nax daxũguxü̃ ga naanewa naxũxü̃ ga Ngechuchu rü Tupanaãxẽ i Üünexü̃arü ngü̃xẽẽmaxã nayaxugücu̱xẽ ga yema norü ngúexü̃gü ga yadexechixü̃ rü yamugüchaü̃xü̃. Rü namaxã nüxü̃ nixu ga ta̱xacü tá nax naxüexü̃.

3Rü yexguma marü yuwa ínadaxguwena ga nüma ga Ngechuchu rü 40 ga ngunexü̃gu nügü nango̱xẽẽxü̃ naxca̱x ga norü ngúexü̃gü rü muxü̃ma ga togü ga nüxü̃́ yaxõgüxü̃ nax yemaacü nüxü̃ nacua̱xgüxü̃ca̱x nax aixcüma wena namaxü̃xü̃. Rü namaxã nüxü̃ nixu nachiga ya Tupana ãẽ̱xgacü íyixĩxü̃wa.

4Rü yexguma yema ngúexü̃gü ga yamugüxü̃tanüwa nayexmagu ga Ngechuchu, rü namaxã nüxü̃ nixu nax tama nüxna naxĩxü̃ca̱x ga Yerucharéü̃. Rü ñanagürü nüxü̃: —¡Ípenangu̱xẽẽx nax yanguxü̃ca̱x i ngẽma Tupanaarü uneta nachiga i Naãxẽ ya Üünexü̃ ga pemaxã nüxü̃ chixuchigaxü̃!

5Aixcüma nixĩ ga Cuáü̃ rü dexáwa duü̃xü̃güxü̃ ínabaiü̃xẽẽxü̃, natürü taxũtáma muxü̃ i ngunexü̃ nangupetü nax Tupanaãxẽ ya Üünecü tá pexna nguxü̃ —ñanagürü.

Dauxü̃guxü̃ ga naanewa naxũ ga Ngechuchu

6Rü yema duü̃xü̃gü ga Ngechuchuxü̃tagu ngutaque̱xegüxü̃ rü nüxna naca rü ñanagürügü nüxü̃: —Pa Corix, ¿ẽ̱xna ñu̱xma tá nixĩ i marü ícunawoxü̃xü̃ i nua tochixü̃anewa i torü uanügüarü churaragü nax wenaxarü tomatama namaxã itacuáxü̃ca̱x i ñaa Iraéane? —ñanagürügü.

7Rü Ngechuchu nanangãxü̃, rü ñanagürü: —Pema rü taxuca̱xma nüxü̃ pecuáxchaü̃ i ñuxgu tá nixĩ i ngẽma ngunexü̃ i choxna naxca̱x pecaxü̃, erü Chaunatüxicatama nüxü̃́ nangẽxma i pora nax nüxü̃ naxunetaxü̃ i ngẽma ngunexü̃.

8Natürü ngẽxguma pexna nanguxgu i Tupanaãxẽ ya Üünecü, rü tá pexü̃ naporaexẽxẽ. Rü tá ípechoxü̃ nax nüxü̃ peyarüxugüexü̃ca̱x i chauchiga i Yerucharéü̃wa, rü guxü̃ma i Yudéaanewa, rü Chamáriaanewa, rü ñu̱xmatáta guxü̃ i naanewa nangu —ñanagürü.

9Rü yexguma yema ñaxguwena rü nüxü̃ ínadaunüyane ga norü ngúexü̃gü, rü Tupana rü daxũguxü̃ ga naanewa Ngechuchuxü̃ naga. Rü wüxi ga caixanexü̃gu nayaxücu, rü yemaacü tama wenaxarü nüxü̃ nadaugü.

10Rü yexguma Ngechuchuxü̃ ínadaunüyane ga daxũwa nax naxũxü̃, rü ngürüãchi natanüwa nango̱x ga taxre ga yatü ga icómüchiruxü̃.

11Rü ñanagürügü nüxü̃: —Pa Yatügü i Gariréaanecüã̱x, ¿tü̱xcüü̃ daxũgu íperüdaunü? Erü daatama Ngechuchu ga petanüwa yexmacü rü ñu̱xma Tupana daxũwa nagacü, rü ngẽma ñu̱xma nüxü̃ nax pedauxü̃ nax daxũwa naxũxü̃, rü ngẽmaãcü tátama nixĩ i wena núma naxũxü̃ —ñanagürügü.

Yúdachicüü nanayauxgü ga Matía

12Rü yema ngúexü̃gü ga Ngechuchu imugüxü̃ nax Tupanaarü puracü naxügüxü̃ca̱x, rü nüxna ínixĩ ga guma ma̱xpǘne ga Oribunecügu ãégane. Rü Yerucharéü̃ca̱x nawoegu. Rü guma ĩanearü yáxü̃ nüxna ga guma ma̱xpǘne rü wüxi ga quirumétru nixĩ.

13Rü yexguma Yerucharéü̃arü ĩanewa nangugügu, rü nagu nachocu ga gumá ĩ ga nagu napegüne. Rü dauxna naxĩgü naxca̱x ga yema ucapu ga taxü̃ ga nagu napegüxü̃. Rü nümagü nixĩ ga Pedru, rü Cuáü̃, rü Chantiágu, rü André, rü Ferípe, rü Tumáchi, rü Barturumé, rü Matéu, rü Chantiágu ga Arupéu nane, rü Chimóü̃ ga Iporaãẽcüücü, rü Yúda ga Chantiágu naenexẽ.

14Rü guxü̃ma ga nümagü rü guxü̃guma nangutaque̱xegüxü̃ nax wüxigu nayumüxẽgüxü̃ca̱x namaxã ga Ngechuchuenexẽgü, rü ngĩmaxã ga María ga Ngechuchu naé, rü ñuxre ga togü ga ngexü̃gü.

15Rü yema ngunexü̃gügu ga yexguma nangutaque̱xegügu ga yema yaxõgüxü̃ ga maneca 120 ixĩgüxü̃ rü Pedru rü inachi ga norü ngãxü̃tanüwa, rü ñanagürü:

16—Pa Chomücügüx, marü ningu ga yema Tupanaãxẽ ya Üünecü nũxcüma Dabíxü̃ muxü̃ nax naxümatüaxü̃ca̱x nachiga ga Yúda ga namaarü cua̱xruxü̃ ixĩxü̃ naxca̱x ga yema duü̃xü̃gü ga Ngechuchuxü̃ iyauxgüxü̃.

17Rü tatanüxü̃chire̱x nixĩ ga Yúda, rü nüma rü ta taxrüxü̃ ñaa Tupanaarü puracüwa napuracü ga noxrix.

18(Rü yema diẽru ga norü chixexü̃ca̱x nüxna ãxü̃maxã naxca̱x nataxe ga wüxi ga naane. Rü yemawena rü naerumaxã inanago rü niwã́ĩpütüwe rü ínayixü̃ ga guxü̃ma ga naü̃nüta.

19Rü nüxü̃ nacuáchigagü ga guxü̃ma ga Yerucharéü̃cüã̱x, rü yemaca̱x Achédamagu nanaxüéga ga yema naane. Rü ngẽma rü “Nagüchitaxü̃”, ñaxü̃chiga nixĩ.)

20Rü Wiyaegüarü poperawa yemachiga nanaxümatü ga Dabí, rü ñanagürü:

“Yixrüma rü ngéma natá ya napata, rü taxúema nagu pex”,

ñanagürü. Rü tóxnamana i ngẽma poperawa rü ñanagürü ta:

“Rü name nixĩ nax toguxe nayaxuxü̃ i nachica”,

ñanagürü i Wiyaegüpanewa.

21-22Rü nua tatanüwa nangẽxmagü i ñuxre i yatügü ga guxü̃guma tüxü̃ ümücügüxü̃ ga yexguma tatanüwa nanuxmagu ga Cori ga Ngechuchu. Rü nümagü rü tüxü̃ naxümücügü ga noxritama Cuáü̃ Ngechuchuxü̃ íbaiexẽẽgu rü ñu̱xmata yema ngunexü̃ ga daxũwa naxũxgu. Rü name nixĩ i ngẽma yatügütanüwa nax nayaxuxü̃ i wüxi nax tamücü yixĩxü̃ca̱x rü tarüxü̃ nüxü̃ yaxuxü̃ca̱x nax wena namaxü̃xü̃ ya Ngechuchu —ñanagürü.

23Rü yemawena rü nüxü̃ naxunetagü ga taxre ga yatügü. Rü wüxi nixĩ ga Yúche ga Bachabámaxã naxugüxü̃. Rü nüma rü to ga namaxã naxugüãxü̃ nixĩ ga Ixaixcümacü. Rü Matía nixĩ ga to.

24-25Rü ñaãcü nayumüxẽgü: —Pa Corix, cuma nüxü̃ cucua̱x i guxü̃ma i duü̃xü̃güarü maxü̃. ¡Rü ñu̱xma rü toxü̃ nawe̱x i ngexü̃rüüxü̃ i ñaa taxrewa nixĩ i cunaxwa̱xexü̃ nax cunamuxü̃ca̱x nax naxüaxü̃ca̱x i ñaa puracü ga Yúda ítáxü̃ ga yexguma norü poxcuwa naxũxgu! —ñanagürügü.

26Rü wüxi ga diẽru ngĩxü̃ nañanagügü nax yemawa nüxü̃ nacua̱xgüxü̃ca̱x ga ngexü̃rüüxü̃ ga yema taxre tá nax ixücuxü̃. Rü Matíagu nangu nax yaxücuxü̃. Rü yexgumatama rü yema 11 ga ngúexü̃gü ga Ngechuchu imugüxü̃tanügu naxã ga Matía.

Currently Selected:

Ngechuchuarü ngúexü̃gü ga yamugüxü̃arü puracüchiga 1: tcaP

Highlight

Copy