Norü taxre ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 3
3
Tupanaarü uneta i ngexwacaxü̃chiga
1Rü ñu̱xma nax pemaxã nüxü̃ tixuxü̃ nax aixcüma Tupana yixĩxü̃ ga toxü̃ mucü, rü bexmana tá nagu perüxĩnüe nax wenaxarü togüétüwa tidexagüxü̃. ¿Ẽ̱xna penaxwa̱xe nax wüxi i popera i cua̱xruxü̃ pexü̃ tawéxü̃ nax nawa nüxü̃ pecuáxü̃ca̱x nax aixcüma Tupanaarü orearü uruü̃gü tixĩgüxü̃? ¿Rü ẽ̱xna penaxwa̱xe nax pexü̃tawa naxca̱x ítaca̱xaxü̃ i poperagü nax ngẽmawa duü̃xü̃gü toxü̃ cuáxü̃ca̱x, naxrüxü̃ i ngẽma togü?
2Rü pemaxã nüxü̃ tixu rü tama tanaxwa̱xe i wüxi i popera nax duü̃xü̃gü toxü̃ cuáxü̃ca̱x, erü pematama nixĩ i ngẽma popera i toõxẽgu ümatüxü̃. Rü pewa nixĩ i guxü̃ma i duü̃xü̃gü nüxü̃ daugüxü̃ nax aixcüma mexü̃ ga puracü taxüxü̃ ga petanüwa.
3Rü ñu̱xma rü meama nango̱x nax pema rü wüxi i popera i Cristutama ümatüxü̃ pixĩgüxü̃. Rü torü puracügagu nixĩ i ngẽma. Rü tama wüxi i popera i tíntamaxã ümatüxü̃ pixĩgü, natürü ümatüxü̃ ya Tupana ya Maxü̃cüãxẽ i Üünexü̃ ümatüxü̃ pixĩgü. Rü ngẽma ümatüxü̃ rü tama nutagu ümatüxü̃ nixĩ, natürü duü̃xü̃güarü maxü̃negu nixĩ i naxümatüxü̃.
4Rü toma rü aixcüma tayaxõgü nax Cristugagu Tupana yixĩxü̃ i toxü̃ muxü̃ nax tanaxüxü̃ca̱x i norü puracü.
5Rü tama tóxrütama cua̱xmaxã nixĩ i tanaxüxü̃ i ngẽma puracü. Natürü guxü̃ma i ngẽma taxüxü̃ rü Tupanaarü ngü̃xẽẽmaxã nixĩ i tanaxüxü̃.
6Rü nümatama ya Tupana nixĩ i toxü̃ nangúexẽẽxü̃ nax nüxü̃́ tapuracüexü̃ca̱x rü nüxü̃ tixuxü̃ca̱x i ngẽma ngexwaca̱xü̃xü̃ i norü uneta i tama Moichéarü mugüwa ne daxü̃ natürü Tupanaãxẽ i Üünexü̃wa ne ũxü̃. Rü yema mugü ga Moiché ümatüxü̃ rü yuwa tüxü̃ nagagü, natürü Tupanaãxẽ ya Üünecü rü tüxna nanaxã i maxü̃ i taguma gúxü̃.
7Rü yema Moichéarü mugü ga yuwa tüxü̃ gaxü̃, rü nutagu nixĩ ga naxümatüxü̃. Rü yexguma Moiché nayaxugu ga yema mugü, rü poraãcü niya̱xaurachiwecüxü. Rü yemaca̱x ga yema Iraétanüxü̃ rü taxucürüwama Moichéchiwegu narüdaunü yerü yema norü ya̱u̱xrachiwe rü naporaxüchi woo nixochigü.
8Natürü yema Moichéarü mugüarü yexera narümemaexü̃chi i ngẽma Tupanaarü uneta i ngexwaca̱xü̃xü̃ i Naãxẽ ya Üünexü̃ tamaxã nüxü̃ ixuxü̃.
9Rü woo namexẽchi ga yexguma ínanguxgu ga yema mugü ga yuwa tüxü̃ gagüxü̃, natürü yexeraãcü namexẽchi nax naxunagüxü̃ i ngẽma ore i Tupanape̱xewa tüxü̃ mexẽẽxü̃.
10Rü yema mugü ga mexẽchixü̃ ga yexguma ínanguxgu, rü ñu̱xma rü taxuwama name ega nügü nangugügu namaxã i ngẽma Tupanaarü uneta i ngexwaca̱xü̃xü̃ i yexeraãcü mexẽchixü̃.
11Rü woo namexẽchi ga yema mugü ga yarüxochigüxü̃, natürü yexeraãcü namexẽchi i ngẽma uneta i ngexwaca̱xü̃xü̃ i guxü̃gutáma ixĩxü̃.
12Rü ñu̱xma nax toxü̃́ nangẽxmaxü̃ i ngẽma Tupanaarü uneta i ngexwaca̱xü̃xü̃ i guxü̃gutáma yixĩxü̃, rü ngẽmaca̱x tama muü̃ãcüma duü̃xü̃gümaxã nüxü̃ tixuchiga.
13Rü yexguma Moiché nayaxugu ga Tupanaarü mugü, rü nügü nidüxchiwe nax Iraétanüxü̃ tama nüxü̃ daugüxü̃ca̱x nax yaxochigüxü̃ ga norü ya̱u̱xrachiwecüü. Natürü i toma rü tama Moichérüxü̃ tanaxü, erü tama duü̃xü̃gücha̱xwa itayacu̱x i ngẽma uneta i ngexwaca̱xü̃xü̃.
14Natürü yema Iraétanüxü̃ ga Moichéxü̃ íixümücügüxü̃ rü tama nüxü̃ nacua̱xgüéga ga ta̱xacüchiga nax yixĩxü̃ ga yema mugü. Rü ñu̱xma rü ta i ngẽma Yudíugü rü ngẽxguma nawa nangúegu i ngẽma mugü rü tama nüxü̃ nacua̱xgüéga. Erü naãxẽgüwa rü ñoma yadüxgüchiwexü̃rüxü̃ nixĩgü, rü ngẽma nixĩ i nüxü̃́ naguxchaxẽẽxü̃ nax nüxü̃ nacua̱xgüxü̃ca̱x i ngẽxguma nüxü̃ nadaumatügügu i ngẽma mugü. Rü ñu̱xma rü ta tama nüxna ínanguéga i ngẽma nacüma i ñoma yadüxgüchiwexü̃rüxü̃ ixĩxü̃, erü Cristuxicatama nixĩ ya yimá nüxna ínanguxẽẽcü.
15Rü ñu̱xma rü ta i ngẽma Yudíugü, rü ngẽxguma nawa nangúegu i ngẽma mugü ga Moiché tüxna ãxü̃, rü nangẽxma i ta̱xacü i ñoma yadüxgüchiwexü̃rüxü̃ nüxü̃́ naguxchaxẽẽxü̃ nax tama nüxü̃ nacua̱xgüxü̃ca̱x nax ta̱xacüchiga yixĩxü̃ i ngẽma mugü.
16Natürü ngẽxguma wüxi i duü̃xü̃ nüxü̃ rüxoxgu i nacüma i chixexü̃, rü tórü Coriaxü̃́ yaxõõgu, rü ngẽxguma nixĩ i nüxna ínanguxü̃ i ngẽma nüxü̃́ naguxchaxẽẽxü̃.
17Erü nüma ya tórü Cori ya Tupana rü Naãxẽ ya Üünexü̃ rü wüxitama nixĩgü, rü ngextá ínangexmaxü̃wa i Naãxẽ ya Üünexü̃, rü nangẽxma i tauxcha nax Tupanana ingaicamagüxü̃.
18Rü ngẽmaca̱x guxãma i yixema nax Cristuaxü̃́ yaxõgüxü̃ rü ñoma woruarüxü̃ tixĩgü, rü tawa nango̱x nax ñuxãcü namexẽchixü̃ ya tórü Cori, rü ñu̱xma rü nataxuma i ta̱xacü i tüxü̃ idüxüxü̃ naxcha̱xwa. Rü nüma ya tórü Cori i Naãxẽ ya Üünexü̃ ixĩcü, rü guxü̃guma yexeraãcü tüxü̃ nimexẽẽchigü nax naxrüxü̃ imexü̃ca̱x.
© 2022, Wycliffe Bible Translators, Inc. All rights reserved.
