Nüxíraxü̃xü̃ ga popera ga Timutéuca̱x naxümatüxü̃ ga Pauru 6

1Guxãma ya yíxema yaxõgüxe ya mugüruxü̃gü ixĩgüxe, rü tanaxwa̱xe i tümaarü corigüga taxĩnüe rü nüxü̃ tangechaxü̃ nax ngẽmaãcü taxúema Tupanachiga rü tórü ngu̱xẽẽtaechiga chixri idexagüxü̃ca̱x.

2Rü ngẽxguma chi ngẽma mugüruü̃gü rü naxrüxü̃ yaxõgüxü̃maxã nacoriã̱xgügu, rü tama tanaxwa̱xe i ngẽma nax nügüenexẽgü yaxĩgüxü̃ca̱x nüxü̃ narüxoe nax nüxü̃ nangechaü̃güxü̃ i norü corigü. Natürü narümemae nax yexeraãcü mea naga naxĩnüexü̃ rü nüxü̃́ napuracüexü̃ erü norü corigü rü naxrüxü̃ yaxõgüxü̃ nixĩgü rü naenexẽgü ya Tupana nüxü̃ ngechaü̃güxü̃ nixĩgü. Pa Timutéux, chanaxwa̱xe i meama cunangúexẽxẽ i ngẽma cumaxã nüxü̃ chixuxü̃, rü guxü̃ma i yaxõgüxü̃pe̱xewa nüxü̃ quixu.

Tupanaarü ore rü aixcüma tüxü̃́ name

3-4Rü ngẽxguma chi tangẽxmagu ya wüxíe ya namaxã tangu̱xẽẽtaegu i wüxi i ngu̱xẽẽtae i tama namaxã wüxiguxü̃ i tórü ngu̱xẽẽtae i aixcüma mexü̃, rü tama namaxã wüxiguxü̃ i tórü Cori ya Ngechuchu ya Cristuarü ngu̱xẽẽtae i mexü̃, rü tama namaxã wüxiguxü̃ i ngẽma ngu̱xẽẽtae i Tupanaarü orewa ngóxü̃, rü tügü ticua̱xüxü̃ rü taxuxü̃ma tacua̱x. Rü ngẽmaca̱x ngexü̃rüüxü̃mare i dexaca̱x rü tachoxü̃gawa̱xe, rü tama texéga taxĩnüchaü̃. Rü düxwa ñoma tida̱xawexü̃rüxü̃ tixĩ namaxã i ngẽma tümacüma. Rü ngẽmagagu rü taxãũxãchiwa̱xe, rü tanuxwa̱xe, rü taguxchigawa̱xe, rü taxúeãxü̃ma tayaxõ.

5Rü ngẽmaãcü i ngẽma duü̃xü̃gü i chixeãẽgüxü̃, rü nügümaxã nanueecha, rü tama nüxü̃ nacua̱xgü i ngẽma ore i aixcüma ixĩxü̃, rü nagu narüxĩnüe rü Tupanaarü orewa yixĩxü̃ i diẽru ngĩxü̃ nayauxgüxü̃.

6Rü aixcüma nixĩ i Tupanaarü orewa nüxü̃ iyarünga̱u̱xü̃ i taxü̃ i mexü̃, natürü ngẽma mexü̃ rü tümaca̱x nixĩ ya yíxema namaxã taãẽgüxe i ngẽma marü tüxü̃́ ngẽxmaxü̃.

7Rü yexguma noxri ixíraegu, rü taxuxü̃ma ñoma i naanewa tange. Rü ngẽxguma iyuegu rü taxuxü̃táma tinge.

8Rü ngẽmaca̱x ega tüxü̃́ nangẽxmagu i taxchiru rü tórü õna rü name nixĩ i ngẽmamaãtama tataãẽgü.

9Natürü ngẽma duü̃xü̃gü i diẽruã̱xgüchaü̃xü̃, rü tama yáxna namaxã naxĩnüe i ngẽxguma ngẽma diẽruarü ngúchaü̃ nüxü̃ poragu. Rü ngẽmaca̱x nagu nayi i muxü̃ma i ngúchaü̃gü i taxuwama nüxü̃́ mexü̃ i chixexü̃wa nagagüxü̃. Rü ngẽmaca̱x düxwa i ngẽma duü̃xü̃gü rü poraãcü nachixe rü norü guxü̃maãma inayarütauxe.

10Erü ngẽma nax diẽruguama rüxĩnüxü̃ rü ngẽma nixĩ i guxü̃ma i chixexü̃güarü ügü. Rü nangẽxma i ñuxre i yaxõgüxü̃ i diẽruguama rüxĩnüexü̃ rü ngẽmaca̱x Tupanana nixĩgachi. Rü ngẽmaãcü nügünatama guxchaxü̃ naxãgü rü nügüxü̃tama ngechaü̃ nangu̱xẽẽgü.

Tupanaaxü̃́ yaxõgüamaxü̃chiga

11Natürü cumax, Pa Timutéux, rü wüxi ya yatü ya Tupanaaxü̃́ yaxõcü quixĩ. ¡Rü ngẽmaca̱x nüxna ixũgachi i guxü̃ma i chixexü̃! ¡Rü mea Tupanape̱xewa namaxü̃, rü norü ngúchaü̃ naxü, rü mea nüxü̃́ yaxõ, rü nüxü̃ nangechaxü̃ i duü̃xü̃gü, rü cugü naporaxẽxẽ i ngẽxguma guxchaxü̃ cuxca̱x ínguxgu! Rü tama name i cugü quicua̱xüxü̃.

12¡Cugü naporaxẽxẽ nax mea cuyaxõõmaxü̃ca̱x rü cunaxüamaxü̃ca̱x i Tupanaarü puracü ega woo ta̱xacürü guxchaxü̃ cuxü̃ üpetügu! ¡Rü cugüna nadau nax taguma cuxna iyanaxoxü̃ca̱x i ngẽma maxü̃ i taguma gúxü̃, yerü yema maxü̃ca̱x nixĩ ga noxri Tupana cuxü̃ yaxuxü̃ ga yexguma muxü̃ma ga duü̃xü̃güpe̱xewa nüxü̃ quixuxgu nax Ngechuchu ya Cristuaxü̃́ cuyaxõxü̃!

13-14Rü ñu̱xma Pa Timutéux, rü nape̱xewa ya Tupana ya guxü̃xü̃ma maxẽxẽẽcü, rü nape̱xewa ya Ngechuchu ya Cristu ga Pónchiu ga Pirátupe̱xewa nüxü̃ ixucü nax aixcüma Nanatü ya Tupanaga naxĩnüxü̃, rü cuxü̃ chamu nax naga cuxĩnüxü̃ca̱x i ngẽma ore i cumaxã nüxü̃ chixuxü̃ nax taxúema ta̱xacüca̱x cuxü̃ oregüxü̃ca̱x rü chixri cuchiga idexaxü̃ca̱x. Rü chanaxwa̱xe i ngẽmaãcü cunaxü ñu̱xmatáta ínangu ya tórü Cori ya Ngechuchu ya Cristu.

15Erü ngẽma ngunexü̃ ya Tupana nagu naxwa̱xexü̃gu rü tá Cristuxü̃ nango̱xẽxẽ. Erü nüma ya Tupana rü nüxicatama Tupana nixĩ, rü nüma nixĩ i aixcüma mecü yixĩxü̃ rü guxü̃étüwama nangẽxmaxü̃, rü guxü̃ i ãẽ̱xgacügüarü Ãẽ̱xgacü yixĩxü̃, rü guxü̃ i corigüarü Cori yixĩxü̃.

16Rü nüxicatama nixĩ i guxü̃guma namaxechaxü̃. Rü nüma rü poraãcü ínangóonexü̃wa namaxü̃, rü taxucürüwa texé ngẽma ngóonexü̃na tangaicama. Taguma wüxi i duü̃xü̃ nüxü̃ nadau, rü taxuacüma texé nüxü̃ tadau. Rü name nax guxü̃ma nüxü̃ icua̱xüü̃güxü̃, erü nüma rü guxü̃guma Ãẽ̱xgacü nixĩ. Rü ngẽmaãcü yixĩ.

17Rü yíxema muarü diẽruã́xẽ i ñoma i naanewa, ¡rü tümamaxã nüxü̃ ixu nax tama ngẽmamaxã tügü ticua̱xüü̃güxü̃ca̱x rü tama nagu tarüxĩnüexü̃ca̱x nax ngẽma tümaarü diẽruwa nüxü̃ itayangaugüxü̃ i tümaarü maxü̃! Erü ngẽma diẽru rü paxa tá nagu̱x. Natürü narümemae nixĩ i Tupanaga taxĩnü, erü yimá nixĩ i tüxna naxãcü i maxü̃ rü guxü̃ma i ngẽmaxü̃gü i inaxwa̱xexü̃ nax itaãẽgüxü̃ca̱x.

18¡Rü namaxã nüxü̃ ixu i ngẽma muarü diẽruã̱xgüxü̃ nax mexü̃ naxügüxü̃ca̱x! Rü ngẽmaãcü tá namu i ngẽma mexü̃gü i naxügüxü̃. Rü tanaxwa̱xe nax ínamemaregüxü̃ nax togüna naxããxü̃ rü namaxã nangauxü̃ i norü ngẽmaxü̃gü.

19Rü ngẽmaãcü tá nüxü̃́ nangẽxma i norü mexü̃gü i daxũguxü̃ i naanewa, rü tá nanayauxgü i maxü̃ i aixcüma ixĩxü̃ i taguma gúxü̃.

Pauru rü inayacua̱xẽxẽ ga norü popera ga Timutéuca̱x naxümatüxü̃

20Pa Timutéux, ¡mea naga naxĩnü i ngẽma ore i cumaxã nüxü̃ chixuxü̃! Rü tama name nax icurüxĩnüxü̃ i ñoma i naanecüã̱xarü dexagümare i taxuwama mexü̃. Rü tama name nax icurüxĩnüxü̃ i ngẽma ore i doramare ixĩxü̃ i duü̃xü̃gü nüxü̃ ixugügünetaxü̃ nax ore i nawa nüxü̃ icuáxü̃ yixĩxü̃.

21Erü ñuxre i ngẽma nagu ĩxü̃ i ngẽma cua̱x i doramare ixĩxü̃ rü düxwa marü nüxü̃ narüxoe nax Tupanaaxü̃́ yaxõgüãxü̃. Rü chanaxwa̱xe ya Tupana pexü̃ narüngü̃xẽxẽ.

Currently Selected:

Nüxíraxü̃xü̃ ga popera ga Timutéuca̱x naxümatüxü̃ ga Pauru 6: tcaP

Highlight

Copy