Nüxíraxü̃xü̃ ga popera ga Timutéuca̱x naxümatüxü̃ ga Pauru 5

¡Nüxü̃ nangechaü̃ i ngẽma yaxõgüxü̃!

1Tama name i cunanga i wüxi i yatü i cuxü̃ rüyamaẽxü̃. Rü narümemae nixĩ i meama cunaxucu̱xẽ ñoma cunatürüxü̃. Rü ngẽma ngextü̱xücügü rü name nixĩ i meama namaxã quidexa ñoma cuenexẽgüxüchirüxü̃.

2Rü yíxema yáxe ya ngexegü rü name nixĩ i meama tümamaxã quidexa cuéxüchirüxü̃. Rü ngẽxgumarüxü̃ ta i paxü̃gü rü name nixĩ i meama namaxã quidexamare wüxi i cueya̱xüchirüxü̃, rü tama name i chixexü̃gu namaxã curüxĩnü.

3¡Tüxü̃ rüngü̃xẽxẽ ya yíxema yutegüxe ega aixcüma taxúema tüxü̃ rüngü̃xẽẽgu!

4Natürü ngẽxguma chi wüxi i yutecü ngĩxü̃́ nangẽxmagu i ngĩxacügü rü ẽ̱xna ngĩtaagü, rü name nixĩ i nümagü ngĩxü̃ narüngü̃xẽẽgü rü ngĩxna nanaxã i ta̱xacü i ngĩxü̃́ taxuxü̃. Erü Tupana nanaxwa̱xe nax ngĩtanüxü̃xíra ngĩxna daugüxü̃ nax ngẽmaãcü yangutanüxẽẽgüãxü̃ca̱x ga yema naé nax nayaexẽẽxü̃.

5Natürü name i ngẽma yaxõgüxü̃ tüxü̃ narüngü̃xẽẽgü ya yíxema yutexe ya tüxica irüxã́ũxe rü tüxü̃́ nataxúxe i tümatanüxü̃, rü Tupanaxü̃tawaxicatama ítanangu̱xẽxẽ i tümaarü ngü̃xẽxẽ, rü guxü̃guma chütacü rü ngunecü rü tayumüxẽ nax tüxü̃ nangü̃xẽẽxü̃ca̱x ya Tupana.

6Natürü yíxema yutexe ya tümaarü ngúchaü̃gu rüxĩnüxe, rü Tupanape̱xewa rü ñoma tayuxü̃rüxü̃ tixĩ.

7Rü ngẽma nixĩ i ore i tá cunangúexẽẽxü̃ i ngẽma yaxõgüxü̃ nax nügüna nadaugüxü̃ca̱x nax taxúema chixri nachiga idexagüxü̃ca̱x.

8Erü yíxema tama mea nüxna dauxe ya tümanatü rü tümaé rü tümatanüxü̃ rü tama aixcüma Tupanaaxü̃́ tayaxõ. Rü wüxi i tama yaxõxü̃arü yexera chixexü̃ tixĩ.

9Rü ngẽxguma chi wüxi i ngexü̃ i yutexü̃ naxca̱x ícaxgu nax ngẽma yaxõgüxü̃ ngĩxü̃ rüngü̃xẽẽgüxü̃ca̱x rü tanaxwa̱xe i 60 ya taunecüarü yexera ngĩxü̃́ nangẽxma rü wüxitama nixĩ ga ngĩte.

10Rü tanaxwa̱xe i duü̃xü̃gü ngĩxü̃ nacua̱xgü nax wüxi i mexü̃ üxcü nax yixĩxü̃, rü mea ngĩxãcüxü̃ yaexẽẽcü iyixĩ, rü mea ngĩpatawa duü̃xü̃güxü̃ yaxucü iyixĩ, rü yaxõgüxü̃arü ngü̃xẽẽruxü̃ iyixĩ, rü da̱xaweexü̃arü ngü̃xẽẽruxü̃ iyixĩ. Rü ngẽmaãcü tanaxwa̱xe i guxü̃raxü̃xü̃ i mexü̃arü üruxü̃ iyixĩ.

11Natürü tama name i ngẽma poperawa nango̱x i ngĩégagü i ngẽma yutegüxü̃ ega tama 60 wa nanguxgu ya ngĩrü taunecügü. Erü ngẽma yutegüxü̃ i tama 60 wa nanguxgu ya ngĩrü taunecü, rü ngürüãchi ngĩrü ngúchaü̃ tá Cristuna ngĩxü̃ ixĩgachixẽxẽ, rü tá inaxwa̱xegü nax wena naxãtexü̃.

12Rü duü̃xü̃gü tá chixri ngĩchiga nidexagü, erü tama aixcüma iyangu̱xẽxẽ ga yema Cristumaxã inaxunetaxü̃ ga noxrix.

13Rü ngĩmagü rü ĩpatawa iyaxĩxchigümare rü tama ipuracüechaü̃. Rü tama ngẽmaxicatama ixügü, natürü düxwa ixoregütaxáx, rü guxü̃raxü̃xü̃ i ore i tama mexü̃ i togüchiga iyaxugü.

14Rü ngẽmaca̱x chanaxwa̱xe i ngẽma yutegüxü̃ i paxü̃gü nax wenaxarü naxãtegüxü̃, rü naxãxãcügüxü̃, rü mexü̃ i napataarü dauruü̃gü nax yixĩgüxü̃. Rü ngẽmaãcü i ngẽma duü̃xü̃gü i tama yaxõgüxü̃ rü taxucürüwa chixri ngĩchiga nidexagü.

15Cumaxã nüxü̃ chixu i ñaa ore, erü ñuxre i yutegüxü̃ rü marü nüxna iyaxĩgachi i ore i mexü̃ nax Chatanáwe naxĩxü̃ca̱x.

16Rü ngẽxguma chi wüxi ya yatü i yaxõ̱xcü rüe̱xna wüxi ya ngecü i yaxõ̱xcü rü ngĩxü̃́ nangẽxmagu i wüxi i ngĩtanüxü̃ i yutecü, rü name nixĩ i nümagütama ngĩxü̃ narüngü̃xẽẽgü nax ngẽmaãcü taxũtáma ngẽma yaxõgüxü̃arü puracü yixĩxü̃ca̱x nax ngĩxna nadaugüxü̃. Rü ngẽxguma tá nüxü̃́ natauxcha i ngẽma yaxõgüxü̃ nax ngĩxü̃ nangü̃xẽẽgüxü̃ i ngẽma yutecü i aixcüma ngĩxü̃́ natau̱xcüma i ngĩtanüxü̃ i ngĩxü̃ rüngü̃xẽẽgüxü̃.

17Rü ngẽma yaxõgüxü̃arü ãẽ̱xgacügü i aixcüma meama ngẽma yaxõgüxü̃maxã icua̱xgüxü̃, rü name nixĩ i ngẽma yaxõgüxü̃ aixcüma nüxü̃ nangechaü̃gü rü namaxã nataãẽgü. Rü yexera name i nüxü̃ nangechaü̃gü rü namaxã nataãẽgü i ngẽma Tupanaarü orexü̃ ixugüxü̃ rü nangúexẽẽxü̃.

18Erü Tupanaarü orewa rü ñanagürü:

“Tama name i nüxna taxaü i ngẽma woca i tríguarü pu̱xwa puracüxü̃”,

ñanagürü. Rü ñanagürü ta:

“Wüxi i puracütanüxü̃ rü tanaxwa̱xe i nüxü̃́ nax naxütanüxü̃ i norü puracü”,

ñanagürü i ngẽma Tupanaarü orewa.

19Rü ngẽxguma chi texé nüxü̃ ixuxgu nax chixexü̃ naxüxü̃ i wüxi i yaxõgüxü̃arü ãẽ̱xgacü, rü taxũtáma tüxü̃́ icuxĩnü ega nataxuxguma i taxre rüe̱xna tomaepü̱x i togü i duü̃xü̃gü i nüxü̃ daugüxü̃ nax aixcüma chixexü̃ naxüxü̃.

20Natürü ngẽma yaxõgüxü̃arü ãẽ̱xgacügü i aixcüma pecadugu maxẽxü̃, rü name nixĩ i guxü̃ i yaxõgüxü̃pe̱xewa cunaxucu̱xẽ, nax guxü̃ma i ngẽma togü i yaxõgüxü̃arü ãẽ̱xgacügü rü ta namuü̃exü̃ca̱x nax naxügüãxü̃ i ta̱xacürü chixexü̃.

21Rü ñu̱xma Tupanape̱xewa rü tórü Cori ya Ngechuchu ya Cristupe̱xewa rü ngẽma daxũcüã̱x i orearü ngeruü̃gü ya üünegüxü̃pe̱xewa, rü cuxü̃ chamu nax naga cuxĩnüxü̃ i ñaa ore i cumaxã nüxü̃ chixuxü̃. Rü chanaxwa̱xe i ngẽma cumaxã nüxü̃ chixuxü̃rüxü̃ mea cunaxucu̱xẽ i guxü̃ma i ngẽma yaxõgüxü̃ rü nüetama ega woo texé tixĩxgu.

22Rü ngẽxguma texéxü̃ quingucuchixẽẽchaü̃gu nax ngẽma yaxõgüxü̃arü ãẽ̱xgacü tixĩxü̃ca̱x, ¡rü taxṹ i cuñuxãẽxü̃ nax namaxã cuyumüxẽxü̃ i wüxi i duü̃xü̃ i tama nüxü̃ cucuáxü̃ i norü maxü̃! Natürü name nixĩ i noxri mea nagu curüxĩnü i ngẽma, erü ngürüãchi tá wüxi i duü̃xü̃ i pecadu üechaxü̃ quingucuchixẽxẽ, rü cugagu tá nixĩ, erü tama ícuxuãxẽ. ¡Rü mea cugüna nadau nax tama pecadugu cunguxü̃ca̱x!

23Rü ngẽma nax cungu̱xnecaxü̃ i ñuxguacü, rü name nixĩ i írarüwa bínune cuyaxaxü, rü tama i dexáxicatama.

24Rü nangẽxma i duü̃xü̃güarü pecadugü i noxtacüma ngóxü̃ naxü̃pa nax nüxna ica̱xaxü̃. Natürü nangẽxma i to i pecadugü i nawena nax nüxna ica̱xaxü̃gu ngóxü̃.

25Rü ngẽxgumarüxü̃ ta i ngẽma mexü̃ i duü̃xü̃gü ügüxü̃ rü meama nango̱x rü nüxü̃ tadaugü. Rü ngẽma chixexü̃ i duü̃xü̃gü ügüxü̃ rü tá nango̱xoma rü taxucürüwama guxü̃gu nicúecha.

Currently Selected:

Nüxíraxü̃xü̃ ga popera ga Timutéuca̱x naxümatüxü̃ ga Pauru 5: tcaP

Highlight

Copy