MARKUS 5

Yesus musir roh kidek kunei tun Gerasa

(Mat. 8:28-34; Luk. 8:26-39)

1Lajau sapei ba tobo'o moi dipoa Daneu Galilea, neak daerah tun Gerasa. 2Tembei bae Yesus tu'un kunei biduk tekoba tun de pasuk roh kidek kunei kubua magea Si. 3Tun'o tinggea neak rogok kubua o ngen coa ade dikup tun igai de sanggup meketne, walaupun ngen ratoi, 4kerno bi awit Si neket ngen ratoi, tapi ratoi'o nutusne peketne o de natiakne, sehinggo coa ade tun de cukup kuet utuk jeminokne. 5Lueng kelmen Si rundo neak kubua ngen neak tebo-tebo samo menggang ngen mokoa diraine ngen butau.

6Waktau si kemliak Yesus kunei uak, melilai ba si teko mageane lajau nyembeak-Ne. 7Ngen lek si menggang, “Jano urusannu ngen uku, hoi Yesus, Anok Allah gi maho lekat? Demi Allah, jibeak sikso uku!” 8Kerno ayokne Yesus madeak ngen si, “Hoi ko roh kidek, kulea kunei awok tun'o!”

9Sudo'o Yesus temnai ngen tun o, madeak ngen tun'o, “Api ngen nu?”

Jawabne, “Legion, kerno keme dau.” 10Si minoi ngen Yesus supayo jibeak musir tobo'o keluea kunei daerah'o.

11Neak li'ing tebo'o dau nien jauak gidong mesoa upan. 12Lajau Roh-roh'o minoi ngen Si, nadeak tobo'o, “Meluakba keme baliak moi lem jauak-jauak'o, kunyauba keme masukne.” 13Yesus kemabul kinoi tobo'o. Lajau, kelueaba roh-roh kidek'o ngen masuk moi lem awok jauak-jauak'o. Kaben jauak de kiro-kiro dua ribau jumlahne'o, tejun kunei tebing moi lem daneu ngen matei.

14Mako ngacapba Penjago-penjago jauak'o ngen cemrito hal'o neak kota ngen neak sadei-sadei sekelilingne lajau kelueaba tun utuk kemliak jano de jijai. 15Tobo'o teko ngen Yesus ngen kemliak tun de pasuk roh kidek o temot. Si bi makei keracok ngen waras, tobo'o kutene saben. 16Tun-tun de kemliak suang hal'o cemrito ngen tobo'o tetang jano de tejijai ngen tun de pasuk roh kidek o ngen tetang jauak-jauak'o. 17Lajau tun-tun o muloi demsok Yesus supayo Si teminggea daerah tobo'o.

18Waktau Yesus Kemnek igai neak lem biduk, tun de nanone pasuk roh kidek o minoi, supayo Si nlueak temotoa-Ne.

19Yesus coa mizinne, tapi Si madeak magea tun'o, “Belekba moi dasei nu, ngen tun-tun do sadei nu, ngen melei namenba ngen tobo'o kute de nea Tuhan ngen ko ngen awei ipe Si bi mengasihi ko!”

20Tun'o kulo lalau ngen muloi melei namen neak daerah puluak kota kute de nea Yesus das diraine ngen tobo'o kutene jijai kanjet.

Yesus midup igai anok Yairus ngen kema'en suang selawei de bolon

(Mat. 9:18-26; Luk. 8:40-56)

21Sesudo Yesus nyebe'ang igai ngen biduk, tun dedau teko lajau ngelumbung Si. Sementaro Si neak biding daneu. 22Tekoba su'ang pemipin umeak semyang genne Yairus. Ketiko si kemliak Yesus, sujud ba si neak adep kekea-Ne. 23Ngen minoi ngen Si, “Anok selaweiku dong bolon, gesea ninggea, tekoba kirone ngen mpekba tangen-Nu dasne, supayo si selamat ngen tetep idup.”

24Lajau lalauba Yesus ngen tun'o. Tun dau beroron temotoa Si ngen dedesok neak pa'ok-Ne.

25Adeba neak di suang selawei bi duai belas taun bolon. Olon pendarahan. 26Si bi awit nubet ngen dau dokter de luyen, sehinggo bi abis kute de ade ngen si, tapi samo sekilai coa ka'en, tapi sebelekne keadaanne tambeak bea. 27Si bi temi'uk bito tetang Yesus, mako neak tengeak-tengeak tun dau'o si ma'ok Yesus kunei belakang ngen megong jubah-Ne. 28Sebab nadeakne, “Asal kumegong bae jubah-Ne, uku bakea ka'en.”

29Seketiko o kulo ka'enba olonne o ngen Si meding bahwo awokne bi ka'en kunei olonne. 30Waktau'o kulo Yesus namen bahwo awei ade tenago de keluea kunei dirain-Ne, lajau Si belek igai neak tengeak tun dau ngen temnai, “Api de gemindoa jubah-Ku?”

31Murid-murid-Ne jmawab, “Ko kemliak awei ipe tun-tun yo dedesok pa'ok-Nu, ngen Ko temnai: Api de gembindoa Uku?” 32Lajau Si demnong rogok-Ne utuk kemliak api de menea hal'o. 33Selawei o, de jijai saben ngen gemtea waktau namen jano de tejijai ngen diraine, teko ngen sujud neak adep Yesus, melei namen ngen Si kute de tejijai. 34Lajau Yesus madeak ngen selawei'o, “Hoi anok-Ku, imennu bi semlamatko. Lalauba ngen damoi ngen ka'en kunei olonne!”

35Ketiko Yesus masiak miling tekoba tun kunei keluargo pemimpin umeak semyang'o ngen madeak, “Anoknu bi ninggea, utuk janoko masiak semaro gu'au?” 36Tapi Yesus coa dulai kecek tobo'o madeak ngen pemipin umeak semyang, “Jibeak saben cayo bae!” 37Lajau Yesus coa meluak dikup tun milau, kecuali Petrus, Yakobus ngen Yohanes, pasuak Yakobus. 38Tobo'o sapei neak umeak pemimpin umeak semyang, neak di kenliakne tun-tun gu'ok, ngindoi ngen sedingen ngen saei nyaing. 39Sesudo'o masuk Si madeak ngen tun-tun'o, “Genne udi gu'ok ngen ngindoi? Anok yo coa matei, tapi tidua!”

40Tapi tobo'o temawai Si. Mako kute tun'o neluakne keluea lajau mbin-Ne bapok ngen indok anok'o serto tobo'o de samo ngen Si masuk moi bilik anok'o. 41Lajau negong-Ne tangen anok'o. Nadeak-Ne, “Talita Kum,” taine, “Hoi anok selawei, Uku madeak ngen ko, kelongonba!” 42Seketiko o kulo anok'o kelongon ngen paneu kerno omorne bi duai belas taun. Kute tun de ade neak di kembiak kanjet. 43Ngen Yesus pesen ngen tobo'o supayo jibeak dikup tun namen hal'o. Lajau Si meluak tobo'o melei anok'o mukmei.

Currently Selected:

MARKUS 5: REJ

Highlight

Copy