MARKUS 3

Yesus kema'en tun neak bilai sabat

(Mat. 12:9-14; Luk. 6:6-11)

1Lajau Yesus masuk igai neak lem umeak semyang. Neak di ade tun de tangenne matei depeak. 2Tobo'o bogoa kemliak Yesus, amen Si kema'en tun'o pado bilai Sabat, supayo tobo'o dapet semaleak-Si. 3Nadeak Yesus ngen tun de tangenne matei depeak'o, “Maro, je ba neak donok!” 4Sesudo'o nadeak-Ne ngen tobo'o, “Ipe debuliak pado bilai Sabat? Menea baik jano menea kidek? Semlamat nyabai tun jano de munuak tun?”

Tapi tobo'o diem bae. 5Si kembiak duko kerno telo atei tobo'o ngen Si lebiak mengiak kemliak tun-tun neak le'etne lajau Si madeak ngen tobo'o, “Nuluaba tangennu!” Lajau tun mulua tangenne, mako ka'enba tangenne o. 6Lajau kelueaba tun-tun Farisi ngen segro menea rencano besamo tun-tun Herodian utuk munuak Si.

Yesus kema'en dau tun

7Sesudo'o Yesus ngen murid-murid-Ne nyikir moi Daneu Galilea, ngen dau tun kunei Galilea temotoa Si. Kulo kunei Yudea, 8kunei Yerusalem, kunei Idumea, kunei dipoa Bioa Yordan, ngen kunei daerah Tirus ngen Sidon teko kute ngen-Si, sesudo tobo'o temi'uk kute hal de nea-Ne. 9#Mrk. 4:1; Luk. 5:1-3 Si meluak murid-murid-Ne semiap debuak biduk utuk-Ne kerno tun dau'o, supayo tobo'o jibeak sapei menyet-Ne. 10Sebab Si kema'en dau tun, sehinggo kute tun bolon dedesok ngen-Si lok megong Yesus. 11Tiep kilai roh-roh kidek kemliak Si, tobo'o sujud neak adepne ngen menggang, “Ko ba Anok Allah.” 12Tapi Yesus temgeak tobo'o melei namen api Si

Yesus manggea duai belas rasul

(Mat. 10:1-4; Luk. 6:12-16)

13Sesudo'o kenekba Yesus neak das tebo. Si manggea tun-tun de kenlok-Ne, tobo'o teko ngen-Si. 14Si temtep duai belas tun utuk semerto Si ngen utuk semayo melei namen Bito Baik. 15Ngen nelei-Ne kuaso utuk musir semat.

16Keduai belas tun de tentep-Ne adeba: Simon, de nelei genne Petrus, 17Yakobus anok Zebedeus, ngen Yohanes pasuak Yakobus, de keduaine nelei-Ne gen Boanerges, taine anok-anok gutua. 18Selanjutne Adreas, Filipus, Bartolomeus, Matius, Tomas, Yakobus anok Alfeus, Tadeus, Simon tun Zelot, 19ngen Yudas Iskariot, de muker Si.

Yesus ngen Beelzebul

(Mat. 12:22-32; Luk. 11:14-23)

20Sesudo Yesus belek moi umeak. Tapi tun dau teko igai bekopoa, sapei Yesus ngen murid-murid-Ne coa sepet mukmei. 21Waktau keluargo-Ne temi'uk hal'o, tobo'o teko lok mok Si, sebab nadeak tobo'o Si gilo. 22#Mat. 9:34, 10:25, 12:24; Luk. 11:15 Ngen gu'au-gu'au agamo de teko kunei Yarusalem madeak, “Si pasuk roh Beelzebul! Pemipin roh-roh kidek o ba de melei kuaso ngen Yesus utuk musir roh kidek.”

23Yesus menok tobo'o, lajau madeak ngen tobo'o lem perumpamo, “Awei ipe Iblis dapet musir Iblis? 24Amen debuak kerajaan tepecuak-pecuak, kerajaan'o coa dapet beta'en, 25ngen amen debuak umeak tanggo'o tepecuak-pecuak, umak tanggo'o coa dapet beta'en. 26Awei'o kulo amen Iblis brutak melawen diraine suang ngen amen si tepecuak-pecuak, si coa dapet betaen, seluyen sudoba sapei kesudone.

27Tapi coa suang kulo dapet masuk umeak suang do kuet utuk merapok hokne amen coa neket kileak tun kuet'o. Sesudo'o baruba dapet si merapok umeak'o.

28Uku madeak ngen udi: sebenea menea duso ngen mino te'adep tun bakea napun. 29#Mat. 12:32; Luk. 12:10 Tapi amen suang mengiak ngen Roh Sucai, si coa dapet napun sekeanne, seluyen besaleak kerno menea duso de kekal.” 30Si madeak awei yo karno tobo'o madeak bahwo si pasuk roh kidek.

Yesus ngen pasuak-Ne

(Mat. 12:46-50; Luk. 18:19-21)

31Lajau tekoba indok ngen pasuak-pasuak Yesus. Sementaro tobo'o je neak luea, tobo'o meluak manggea Yesus. 32Ade tun dau temot gemlung Si, tobo'o madeak ngen-Si, “Keliak, indok ngen pasuak-pasuak-Ne ade neak luea, ngen berusaho temau Kumu.”

33Yesus jemawab ngen tobo'o, “Api indok-Ku ngen api pasuak-pasuak-Ku?” 34Si kemliak ngen tun-tun de temot neak sekeliling-Ne'o ngen madeak, “Dio indok-Ku ngen pasuak-pasuak-Ku! 35Api bae de menea kelok Allah, Siba pasuak-Ku semanei, Siba pasuak-Ku selawei, Siba Indok-Ku.”

Currently Selected:

MARKUS 3: REJ

Highlight

Copy