MARKUS 15

Yesus neak adep Pilatus

(Mat. 27:1-2, 11-26; Luk. 23:1-5, 13-25; Yoh. 18:28–19:16)

1Kekabuk nien imem-imem kepalo besamo tetuai ngen gu'au-gu'au agamo serto paro anggota Mahkamah Agamo luyenne, made pertemuan. Sesudo'o tobo'o meket Yesus lajau mbin Si ngen semrak Si ngen Pilatus. 2Pilatus betanye ngen Yesus, “Ko Rajo tun Yahudi?” Jawab Yesus, “Ko suang madeak ne.” 3Lajau imem-imem kepalo melei dau tuduhan teadep Si. 4Pilatus betanye igai ngen Si, “Coa Ko jenawab samo sekilai? Keliak ba padeak daune tuduhan tobo'o teadep Ko!” 5Tapi Yesus samo sekilai coa jemawab igai, sehinggo Pilatus meraso sele.

6Pado tiep bilai rayo'o Pilatus biasone mlepas suang tun tahanan temurut minoi tun dau o. 7Pado waktau'o ade suang genne Barabas gidong masuk penjara besamo kekedau tun pembrutak luyen ne. Tobo'o bi munuak dau tun neak lem bruntak. 8Lajau tekoba tun dau ngen minoi supayo menea hal'o utuk tobo'o awei biasone. 9Pilatus temnai ngen tobo'o, “Janokah udi kemlok supayo uku mbebas Rajo tun Yahudi yo?” 10Si memang namen, bahwo imem-imem kepalo bi semrak Yesus kerno iri. 11Tapi imem-imem kepalo majung tun dau utuk minoi supayo Barabas ba de mbebasne bagiak tobo'o. 12Pilatus debat igai betanye ngen tobo'o, “Amen awei'o, jano de harus uku menea ngen tun de ko madeak Rajo tun Yahudi yo?”

13Tobo'o menggang igai, nadeakne, “Semalib Si!”

14Lajau Pilatus madeak ngen tobo'o, “Tapi kejahatan jano de nea ne?” Tapi tobo'o tambeak lek menggang, “Senalib Si!” 15Kerno Pilatus lok semnang atei tun dau'o, si mbebas Barabas utuk semreak ngen tobo'o. Dong Yesus cenambukne lajau semreak Si utuk senalib.

Yesus Genurek

(Mat. 27:27-31; Yoh. 19:2-3)

16Sesudo'o tentra-tentra mbin Yesus neak latet istana, de adeba penan tinggea Gubernur, ngen menok kute pasukan bekopoa. 17Tobo'o makei jubah ungu ngen Yesus, nganem debuak mahkota tebok ngen mpekne neak das ulau Yesus. 18Sesudo'o tobo'o muloi melei hormat ngen-Si, nadeakne, “Salam, hoi Rajo tun Yahudi!” 19Tobo'o mokoa ulau-Ne ngen buluak, ngen temkek-Ne ngen sujud nyembeak Si. 20aSesudo gemurek Si tobo'o temagea jubah ungu de makei-Ne ngen makei igai keracokne ngen Si.

Yesus senalib

(Mat. 27:32-44; Luk. 23:26, 33-43; Yoh. 19:17-24)

20bSesudo'o Yesus nembin moi luea utuk senalib. 21#Rm. 16:13 Pado waktau'o liwet suang tun genne Simon, tun Kirene, bak Aleksander ngen Rufus, de pei teko kunei luea kuta, ngen tun'o tobo'o pakso utuk mikua Salib Yesus.

22Tobo'o mbin Yesus moi penan genne Golgota, taine: “Penan Tengkorak”. 23Lajau tobo'o melei anggur capua mur ngen-Si, tapi Si temulokne. 24#Mzm. 22:19 Sesudo'o tobo'o senalib Si, lajau tobo'o magiak keracok-Ne ngen muang undi dasne utuk temenep pagiak saleak suang.

25Pado jam sembilan pueng tobo'o semalib Si. 26Alasan getai Si nukum senbut neak tulisan de nasang neak di, “Rajo Tun Yahudi.”

27Besamo ngen Si, senalib duai tun perapok, suang neak depeak kanen-Ne ngen suang neak depeak kideu-Ne.

[28Ngen awei yo tejijaiba ayat alkiteb de sa'eine, “Si bakea teitung neak antaro tun-tun kidek.”]

29 # Mzm. 22:8, 109:25; Mrk. 14:58; Yoh. 2:19 Tun-tun de liwet neak di mino Yesus, ngen samo giling ulau tobo'o madeak, “Hoi, Ko de lok mubuak Bait Sucai ngen lok temgok igai lem telau bilai. 30Tu'un ba kunei salib'o ngen semlamat ba dirai-Nu!” 31Awei'o kulo imem-imem kepalo besamo-samo gu'au-gu'au agamo kemurek Si neak antaro tobo'o suang ngen tobo'o madeak, “Tun luyen Si semlamet, tapi diraine suang coa dapet Si semlamat! 32Baikba Rajo Penyelamat, Rajo Israel o, tu'un kunei salib'o uyo supayo ite kemliak ngen masai.”

Keduai tun o kulo de senalib besamo-samo ngen-Si mino Si kulo.

Yesus matei

(Mat. 27:45-56; Luk. 23:44-49; Yoh. 19:28-30)

33Pado jam duai belas, kelem kute daerah'o ngen belangsung sapei jam telau pelbea. 34#Mzm. 22:2 Pado jam telau menggang ba Yesus ngen sa'ei nya'ing, “Eloi, Eloi, lema sabakhtani?” taine, “Allahku, Allahku, getai Ko teminggea Uku?” 35Temi'uk'o kekedau tun de je neak di madeak, “Keliak, Si menok Elia.” 36#Mzm. 69:22 Mako tekoba suang tun ngen sobot, cemlupne moi lem anggur pi'iak lajau cemcukne moi depun buluak ngen melei Yesus menem samo madeak, “Baik ba ite mbot ngen kemliak jano Elia teko utuk temu'un-Ne.” 37Lajau menggangba Yesus ngen suaro lek ngen semreak nyabai-Ne. 38#Kel. 26:31-33 Ketiko o tabir Bait Sucai pegit jijai duai kunei das sapei beak. 39Waktau pemipin pasukan de je sekadep ngen Si kemliak-Ne mok nyabai terakhir awei'o madeak ba si, “Sungguak, tun yo Anok Allah!”

40 # Luk. 8:2-3 Ade kulo kekedau selawei de kemliak kunei ku'uak, antarone Maria Magdalena, Maria indok Yakobus u'ai ngen Yoses, serto Salome. 41Tobo'o kutene bi temotoa Yesus ngen ngelayan-Ne waktau Si neak Galilea. Ade kulo neak di dau selawei luyen de sudo teko neak Yerusalem besamo-samo ngen Yesus.

Yesus kenubua

(Mat. 27:57-61; Luk. 23:50-56; Yoh. 19:38-42)

42Sementaro'o bilai muloi kelemen ngen bilai'o bilai persiapan, adeba bilai ayok Sabat. 43Kerno'o Yusuf, tun Arimatea, suang anggota majelis lai de kayo kulo mbot waktaune Allah meriteak sebagai Rajo, minoi dirai madep Pilatus ngen minoi mayit Yesus. 44Pilatus sele waktau temi'uk bahwo Yesus bi matei. Lajau si menok pemipin pasukan, ngen betanye ngen si jano Yesus bi matei. 45Sesudo temi'ukne keterangan pemipin pasukan, si mizin melei mayit'o ngen Yusuf. 46Yusuf kulo mukua kain lenan, sudo'o si temu'un mayit Yesus kunei salib ngen kempanne ngen kain lenan'o lajau si gemulingne lem kubua de ade neak lem tebo butau. Sudo'o genulingne debuak butau moi bang kubua'o. 47Maria Magdalena ngen Maria indok Yoses kemliak neak ipe Yesus genulek.

Currently Selected:

MARKUS 15: REJ

Highlight

Copy